Uzou Avọ 49

Erẹ Usiuwoma Ota Ofa Evaọ Galili

NỌ Ọ ta usiuwoma gaga ikpe ivẹ no, kọ Jesu o ti s’omahọ re o riorio obọ? Wo ohẹriẹ, o te ru iruo usiuwoma ota riẹ kẹre ẹkwoma erẹ usiuwoma ota ofa, ọrọ avọ esa Galili. O te weze kpohọ ikpewho gbe iwhre nọ e rọ ẹkwotọ na kpobi, bi wuhrẹ evaọ uwou-egagọ be jẹ ta emamọ usi Uvie na. Oware nọ ọ jọ erẹ ọnana ruẹ o tẹ kẹe imuẹro viere kpahe ẹgwọlọ nọ o re ro fiẹgba họ iruo usiuwoma ota riẹ viere.

Oria nọ Jesu o te kpobi, ọ jẹ ruẹ ogbotu ahwo nọ e gwọlọ usiwo gbe omosasọ abọ-ẹzi. A wọhọ igodẹ nọ i wo othuru hu, enọ e rọ oyoya, ohrọ rai o tẹ riẹe. Ọ tẹ ta kẹ ilele na nọ: “Ivuẹvu na i ghine bu, rekọ iruiruo e rẹ [kakao]. Fikiere wha lẹ Olori ivuẹvu na re o vi iruiruo kpobọ ivuẹvu riẹ.”

Jesu o wo ẹjiroro jọ h’eva. O te se ikọ 12 na, enọ ọ salọ kẹle ukpe ọvo no na. Ọ tẹ ghale ai ivivẹ, a tẹ rọ eko etausiuwoma ezeza, ọ tẹ kẹ ai uthubro. Ọ tẹ ta nọ: “Wha nya ruọ edhere ahwo Egedhọ họ, wha ruọ ẹwho ahwo Sameria ha, rekọ wha nya kpo obọ igodẹ uwou Izrẹl nọ i vru. Nọ wha [be] nya, wha hẹ vuẹ nọ, ‘Uvie odhiwu o kẹle ino.’ ”

Uvie onana nọ a te ta usiuwoma kpahe na họ onọ Jesu o wuhrẹ ilele riẹ nọ a lẹ kpahe evaọ olẹ oriruo na. Uvie na o kẹle ino keme Ovie nọ Ọghẹnẹ o ro mu no, Jesu Kristi, ọ rọ etẹe. Re o dhesẹ udu nọ ilele riẹ a wo wọhọ ahwo ẹro egọmeti ogbunu ọyena, Jesu ọ tẹ kẹ ai ogaga nọ a re ro siwi ahwo nọ e be mọ jẹ tubẹ kpare iwhuowhu dede. Ọ ta kẹ ai nọ a ru eware enana ọvọvẹ.

Ọ tẹ jẹ ta kẹ ilele riẹ nọ a ruẹrẹ eware iwo họ kẹ erẹ usiuwoma ota rai na ha. “Wha wha igoru hayo idọlọ-efuafo, hayo eroo evaọ igbẹ rai hi, wha wha ekpa kpo erẹ rai hi, hayo iwu ivẹ hẹ, hayo eviẹ hẹ, wha wha ọkpọ họ; keme [oruiruo o fo kẹ emuore riẹ].” Ahwo nọ i wo ovuhumuo ovuẹ na a ti dede iei rehọ a vẹ zọhọ emuore gbe uwou. Wọhọ epanọ Jesu ọ ta: “Kẹwho kẹwho hayo kiwhre kiwhre nọ wha rẹ te rua, wha guọlọ ohwo eva riẹ nọ o te i, wha jọ etẹe bẹsenọ wha re no i.”

Jesu ọ tẹ kẹ ohrẹ kpahe oghẹrẹ nọ a rẹ rọ wha ovuẹ Uvie na se enọ i wo uwou. Ọ ta nọ: “Nọ wha te ruọ evaọ uwou, wha yere iei. Uwou na u te te, wha ru re udhedhẹ rai o ziẹ e; rekọ u gbe te he, wha ru re udhedhẹ rai u zihe bru owhai. Kohwo kohwo nọ ọ rẹ te rehọ owhai hi hayo ọnọ o yo ẹme rai hi, nọ wha ti no uwou na [hayo] ẹwho na, wha nuhu ẹkpẹ evawọ rai no.”

Rọ kẹ okpẹwho nọ ọ se ovuẹ na, Jesu o te dhesẹ nọ ẹdhoguo nọ o ti tei o te jọ gaga. Ọ ta nọ: ‘Uzẹme mẹ ta kẹ owhai, o rẹ te lọhọ kẹ Sodọm gbe Gomora evaọ Ẹdẹ Ẹdhoguo na vi ẹwho ọyena.’ Matiu 9:35–10:15; Mak 6:6-12; Luk 9:1-5.

▪ Okevẹ Jesu o ro muọ erẹ usiuwoma avọ esa Galili riẹ họ, kọ didi imuẹro o kẹ riẹ?

▪ Okenọ o je vi ikọ 12 riẹ kpohọ usiuwoma ota, didi ithubro ọ kẹ rai?

▪ Fikieme o jẹ rọ gbagba re ikọ na a wuhrẹ nọ Uvie na o kẹle ino?