Uzou Avọ 50

Omaruẹrẹhọ kẹ Ovaurodhe Ukpokpoma

NỌ Ọ kẹ ikọ riẹ uthubro kpahe oghẹrẹ nọ a rẹ rọ wha iruo usiuwoma ota rai haro no, Jesu ọ tẹ vẹvẹ ai unu kpahe otu-ọwọsuọ. Ọ ta nọ: “Ri, me vi owhai wọhọ igodẹ udevie erao-imuomu . . . wha yọrọ oma obọ ahwo; keme a rẹ te rehọ owhai kẹ egbẹguae, a rẹ te jọ evaọ iwou-egagọ rai fa owhai, ere a rẹ te rehọ owhai tha aro eba gbe ivie fiki mẹ.”

Makọ ukpokpoma ọgaga nọ ilele riẹ a te rẹriẹ ova ku, Jesu ọ tẹ yeyaa avọ imuẹro nọ: “Rekọ nọ a te rehọ owhai kẹ ae na, wha ruọ awa ha ẹvẹ hayo epa onọ wha rẹ ta; keme oke oyena a rẹ te kẹ owhai o nọ wha rẹ ta. Keme orọnọ whai a rẹ ta ha, rekọ Ẹzi Ọsẹ rai ọ ye ọ rọ ẹme ẹta eva rai.”

Jesu ọ tẹ gbẹ ta haro nọ: “Oniọvo o re ti vivie oniọvo re o whu, ọsẹ ọmọ riẹ; emọ e rẹ kpare bru enọ i yẹ rai, a re ru re a kpe ai.” O te fibae nọ: “Ahwo kpobi a re ti mukpahe owhai fiki odẹ mẹ rekọ ọnọ o kiakọ ba umuo, a re ti siyei.”

Usiuwoma na họ oware nọ o mai wuzou. Fikiere Jesu ọ tẹ fodẹ ẹgwọlọ nọ a re ro dhesẹ areghẹ re ohwo ọ ruẹse rọ ufuoma wha iruo na haro. Ọ ta nọ: “Nọ a tẹ kẹ owhai uye evaọ ẹwho ọnana, dhẹ kpo ọdekọ; keme uzẹme mẹ ta kẹ owhai, whọ sae nya ewho ahwo Izrẹl re, re Ọmọ ohwo ọ tẹ ze he.”

Uzẹme o rọ inọ Jesu ọ rehọ ohrẹ, unuovẹvẹ, gbe uduotahawọ enana kẹ ikọ 12 riẹ, rekọ i w’iruo re kẹ ahwo nọ i ti w’abọ evaọ iruo usiuwoma ota akpọ-soso na nọ o te whu jẹ kparoma no. Onana u dhesẹ oma via eva eme riẹ nọ ọ ta nọ ‘ahwo kpobi a ti mukpahe’ ilele riẹ, orọnikọ emọ Izrẹl ọvo ho enọ a vi ikọ na bru kẹ usiuwoma ota. Ofariẹ, o wọhọ nọ a mu ikọ na ziọ aro eba gbe ivie evaọ oke nọ Jesu o vi ai evaọ ewhowho usiuwoma okpẹkpẹe rai hi. Ofariẹ, ahwo uviuwou a jọ oke oyena kpe enọ e rọwo ho.

Fikiere nọ ọ ta inọ ilele riẹ a te nya ẹkwotọ usiuwoma ota rai re he bẹsenọ ‘Ọmọ ohwo ọ te ze,’ Jesu ọ be jọ eruẹaruẹ ta inọ ilele riẹ a te rehọ usiuwoma Uvie Ọghẹnẹ nya otọakpọ na soso duwu hu taure Ovie oruaro na Jesu Kristi ọ tẹ ze wọhọ okpikpakpe ologbo Jihova eva Amagẹdọn.

Be nyaharo evaọ uthubro usiuwoma ota riẹ, Jesu ọ tẹ ta nọ: “Olele ọ rẹ ro vi owuhrẹ riẹ hẹ, gbe ọrigbo ọ rẹ ro vi olori riẹ hẹ.” Fikiere ilele Jesu a re rẹro olahiẹ gbe ukpokpoma enọ i te rie oma nọ ọ jẹ ta usiuwoma Uvie Ọghẹnẹ na. Ghele na, ọ tẹ hrẹ nọ: “Wha dhozọ enọ i re kpe oma na ha, rekọ a rẹ sai kpe [ẹwẹ hẹ, NW ]; rekọ ikpoye, wha dhẹ ọnọ ọ rẹ raha [ẹwẹ, NW ] gbe oma evaọ [Gehena].”

Jesu o re fi oriruo hotọ evaọ ẹme ọnana. Ọ rẹ rọ ababọ ozodhẹ thihakọ uwhu ukpenọ o re fi omurokpotọ riẹ kẹ Ọnọ o wo ogaga kpobi, Jihova Ọghẹnẹ, họ otọ. Ẹhẹ, Jihova họ ọnọ ọ rẹ sae raha ‘ẹwẹ’ (koyehọ evaọ etenẹ ẹruore obaro ohwo wọhọ ẹwẹ uzuazọ) hayo ọ vẹ kpare ohwo ze re ọ reawere uzuazọ ebẹdẹ bẹdẹ. Ẹvẹ Ọsẹ obọ odhiwu mai, Jihova, o wo ohrọ gbe uyoyou te!

Jesu ọ tẹ rehọ ọtadhesẹ jọ tudu họ ilele riẹ awọ onọ u dhesẹ ẹruọsa oyoyou Jihova kẹ ai. Ọ nọ inọ: “A [gbẹ] be zẹ emevra ivẹ ẹnini . . . ? Rekọ ọvuọvo rai o re kie otọ emu Ọsẹ rai hi. Makọ egẹ-eto uzou rai kpobi a kele i rai. Fikiere wha dhẹ ozọ họ; wha wo aghae vi emevra buobu.”

Ovuẹ Uvie nọ Jesu o vi ilele riẹ nọ a whowho o te hẹriẹ iviuwou, keme ahwo uviuwou na jọ a te jẹe rehọ efa e vẹ siẹe. Ọ ta nọ: “Wha roro nọ me ti fi udhedhẹ họ akpọ họ; [mẹ ze] ti fi udhedhẹ họ họ, rekọ ọpia.” Fikiere, re ohwo uviuwou o dede uzẹme Ebaibol rehọ o gwọlọ aruọwha. Jesu o muẹrohọ nọ: “Ọnọ o you ọsẹ hayo oni riẹ vi omẹ, o ri te ọmẹ hẹ; ọnọ o you [ọmọzae] hayo ọmọtẹ riẹ vi omẹ, o ri te ọmẹ hẹ.”

Je ku ithubro riẹ họ, Jesu ọ tẹ ta nọ ahwo nọ i dede ilele riẹ rehọ a dede i rie rehọ re. “Ohwo nọ ọ rehọ fiki odẹ olele ọvo rehọ egho ame odhedhẹ dede kẹ emaha enana ọ jọ da, uzẹme mẹ ta kẹ owhai, osa riẹ u re vrẹ vievie he.” Matiu 10:16-42.

▪ Didi inuevẹvẹ Jesu ọ kẹ ilele riẹ?

▪ Didi uduotahawọ gbe omosasọ ọ kẹ rai?

▪ Fikieme ithubro Jesu i je w’iruo re kẹ Ileleikristi ọgbọna?

▪ Edhere vẹ olele Jesu ọ gbẹ rọ rro vi owuhrẹ riẹ hẹ?