Uzou Avọ 64

Uwuhrẹ Evaọ Erọvrẹ

O WỌHỌ nọ Jesu ọ gbẹ rọ evaọ uwou na evaọ Kapaniọm kugbe ilele riẹ. O bi lele ai t’ẹme kpahe epanọ inievo a re ro ku ẹwhọ họ, fikiere Pita ọ tẹ nọ nọ: “Olori, bro ẹse omoni mẹ o re ru omẹ thọ no mẹ jẹ rọ vrẹ e?” Nọ otu iwuhrẹ ahwo Ju a wuhrẹ inọ a rẹ rọ vrẹ ohwo te isiasa na, Pita o te roro nọ ọ be lọhọ obọ gaga nọ ọ ta nọ “u re te asiahrẹ?”

Rekọ iroro ekele unuẹse nọ a ru ohwo thọ o thọ k’omobọ riẹ. Jesu ọ tẹ kpọ Pita vi: ‘Mẹ ta kẹ owhẹ nọ, asiahrẹ hẹ, rekọ ri te udhẹse-osa gbe ikpegbihrẹ.’ O bi dhesẹ inọ u wo unuẹse nọ Pita ọ rẹ rọ vrẹ oniọvo riẹ hẹ.

Re o dhesẹ kẹ ilele riẹ owha-iruo rai nọ a rẹ rọ vrẹ, Jesu ọ tẹ kẹ ọtadhesẹ jọ. O rọ kpahe ovie jọ nọ ọ gwọlọ ye irigbo riẹ osa. A tẹ rehọ ọrigbo jọ bru ei ze ọnọ ọ re osa riẹ buobu gaga tube te dinari 60,000,000. Edhere ọvuọvo ọ riẹ nọ ọ sae rọ hwa ugho na ha. Fikiere, wọhọ epanọ Jesu ọ ta, ovie na ọ tẹ ta nọ a zẹ ọzae na te aye riẹ te emọ riẹ re a hwa ugho na.

Ọrigbo na o te kie fihọ aro olori riẹ ọ tẹ lẹ nọ: ‘Kiakọ kẹ omẹ, mẹ rẹ te hwa ae kpobi kẹ owhẹ.’

Nọ o rri rie aro, olori na avọ ohrọ ọ tẹ rọ osa ulogbo na kpobi rọ vrẹ riẹ. Jesu ọ tẹ ta haro inọ, u ri kri hi na, ọrigbo ọnana ọ tẹ ruẹ ibe ọrigbo riẹ jọ nọ o kru rie dinari 100. Ọzae na ọ tẹ duọ ibe ọrigbo riẹ na uvo bi nuhu iei, anọ: “Hwa o nọ whọ re.”

Rekọ ibe ọrigbo riẹ na o wo ugho na ha. Fikiere o te kie fihọ aro ọrigbo na ọnọ ọ re osa na, be lẹ nọ: ‘Kiakọ kẹ omẹ, mẹ rẹ te hwa kẹ owhẹ.’ Wo ohẹriẹ no olori riẹ, ọrigbo na o wo ohrọ họ, o te gbolo ibe ọrigbo riẹ fihọ uwou-odi.

Jesu ọ tẹ ta haro inọ, nọ irigbo edekọ a ruẹ oware nọ o via a tẹ nya i gu kẹ olori na. Avọ evedha o te se ọrigbo na. Ọ tẹ ta nọ: “Whẹ odibo omuomu! Mẹ rehọ osa oyena kpobi vrẹ owhẹ fiki epanọ whọ lẹ omẹ; kọ whọ gbẹ hae re ohrọ ibẹ odibo ra, epanọ mẹ re ohrọ ra?” Avọ evedha, olori na ọ tẹ rehọ ọrigbo nọ o wo ohrọ họ na rọ kẹ iriekarọ bẹsenọ ọ rẹ hwa osa nọ ọ re na kpobi no.

Kẹsena Jesu o te ku ei họ nọ: “Ere Ọsẹ mẹ nọ ọ rọ obọ odhiwu o re ru owhai omomọvo u re, wha gbẹ rọ vrẹ ọvuọ omoni riẹ no eva ha.”

Ẹvẹ onana o rọ uwuhrẹ uwoma te evaọ erọvrẹ! Ma tẹ rehọ osa ulogbo izieraha nọ Ọghẹnẹ ọ be rọ vrẹ omai wawo, oware kpobi nọ oniọvo Oleleikristi jọ o ro ru omai thọ o ghinẹ rọ kakao gaga. Ofariẹ, Jihova Ọghẹnẹ ọ rọ vrẹ omai isia idu buobu no. Ẹsibuobu, ma rẹ tubẹ riẹ nọ ma ru rie thọ dede he. Fikiere, kọ ma gbẹ rọ vrẹ oniọvo mai unuẹse kakao, o tẹ make rọnọ oware nọ o ru omai na u ghine yoma? Kareghẹhọ, wọhọ epanọ Jesu o wuhrẹ evaọ Ovuẹ obọ Ugbehru na, Ọghẹnẹ ọ rẹ “rehọ osoriọ mai vrẹ omai, wọhọ epanọ ma rọ vrẹ eriosa mai.” Matiu 18:21-35; 6:12; Ahwo Kọlọsi 3:13.

▪ Eme o lẹliẹ Pita n’onọ kpahe ẹrọvrẹ oniọvo riẹ, kọ fikieme o je rri nọ ọ be lọhọ obọ hrọ otẹrọnọ ọ rọ vrẹ oniọvo riẹ asiahrẹ wọhọ epanọ ọ ta?

▪ Ẹvẹ uyo nọ ovie na ọ kpahe kẹ olẹ ohrọ ọrigbo riẹ u ro wo ohẹriẹ no uyo nọ ọrigbo na ọ kpahe kẹ olẹ ibe ọrigbo riẹ?

▪ Eme ma wuhrẹ no ọtadhesẹ Jesu ze?