Uzou Avọ 108

A Sai Keke Ba Jesu Hu

FIKINỌ Jesu ọ be jọ etẹmpol na wuhrẹ yọ ọ nwane ta etadhesẹ esa kẹ ewegrẹ riẹ no enọ i dhesẹ emuemu rai via, eva e tẹ dha otu Farisi na a tẹ be gwọlọ edhere nọ a re ro ru ei ta ẹme nọ a re ro mu ei. A tẹ gbẹguae emuemu a te vi ilele rai, kugbe ilele Herọd, re a viẹe họ.

Ezae enana a tẹ ta nọ: “Owuhrẹ, ma riẹ nọ whẹ ohwo uzẹme, jegbe who bi wuhrẹ edhere Ọghẹnẹ eva uzẹme, whọ rẹ dawọ ozọ ohwo ọvo ho; keme who [re] roro ọkua ohwo ho. Fikiere, whọ ta kẹ omai epanọ who roro. Kọ u fo re a jẹ osa-uzou kẹ Siza, hayo u fo ho?”

Ugbejiro onana o viẹ Jesu họ họ. Ọ riẹ nọ ọ tẹ ta nnọ, ‘Ijo, u fo nọ a jẹ osa-uzou na ha,’ ọ te reabe ọkparesuọ Rom. Ghele na, ọ tẹ ta nnọ, ‘E, wha hwa osa-uzou nana,’ ahwo Ju na, enọ e be dheva fikinọ a rọ otọ esuo Rom, a ti mukpahe iẹe. Fikiere ọ tẹ kuyo nọ: “Fiki eme wha jẹ be dawo omẹ, whai eviẹwẹ na? Wha dhesẹ ugho nọ a be rọ jẹ osa-uzou na kẹ omẹ.”

Nọ a rọ ọvo jọ sei, ọ tẹ nọ nọ: “No uwoho gbe ekere ono?”

A te yo nọ: “Erọ Siza.”

“Wha rehọ eware Siza kẹ Siza, re wha rehọ eware Ọghẹnẹ kẹ Ọghẹnẹ.” Whaọ, nọ a yo uyo areghẹ Jesu, u te gbe ai unu. A te vu ei wa nyavrẹ.

Nọ a ruẹ nọ otu Farisi na a sai lele oware ovo ba Jesu hu, otu Sadusi, enọ e ta nnọ ẹkparomatha ọ rọ họ, a tẹ nyabru ei ze, nọ nọ: “Owuhrẹ, Mosis ọ ta nọ, ‘Ohwo o te whu, o gbe wo emọ họ, oniọvo riẹ ọ rẹ rọwọ aye-uku riẹ, re o yẹ emọ kẹ oniọvo riẹ.’ Whaọ iniọvo ihrẹ jọ e jọ udevie mai, ọrọ ọsosuọ o wo aye no, o te whu, fiki epanọ o wo ọmọ họ, ọ tẹ se aye riẹ ba kẹ oniọvo riẹ. Ọ rọ avivẹ epa ọvo na, gbe ọ rọ avọ esa ereire ri te ọ rọ avihrẹ. Uwhremu na, aye na o te whu re. Fikiere, eva ẹkparomatha, aye ono ọ rẹ te jọ eva imahrẹ na? Keme ai kpobi a rọwo riẹ.”

Evaọ uyo Jesu ọ tẹ ta nọ: “O gbẹ rọ nọ fiki onana ojẹ thọ owhai obọ [na], epanọ wha riẹ ekere na ha gbe ogaga Ọghẹnẹ? Keme nọ a te kparoma no iwhowhu tha, a rẹ [rọo ho] a rẹ rọ kẹ [rọo] gbe he; rekọ a rẹ te jọ wọhọ ikọ nọ e rọ obọ odhiwu. Rekọ ẹme iwhuowhu nọ e rẹ kparoma, wha ti se evaọ obe Mosis hi, evaọ ẹme obọ etuetue na, epanọ Ọghẹnẹ ọ rọ ta ẹme kẹ e nọ, ‘Mẹ họ Ọghẹnẹ Abraham, gbe Ọghẹnẹ Aiziki, gbe Ọghẹnẹ Jekọp’? Ọ rọ Ọghẹnẹ iwhuowhu hu rekọ ọ rọ e rọ uzuazọ; o rẹ thọ owhai obọ kẹhẹ.”

Uyo Jesu u te je gbe ogbotu na unu. Makọ otu ikere-ebe na jọ dede a ta via nọ: “Owuhrẹ, whọ riẹ ta.”

Nọ otu Farisi na a ruẹ nọ Jesu o kpomovuọ họ otu Sadusi na oma no, aikpobi a te su bru ei ze. Re a gbẹ dawo iẹe, okere-obe jọ evaọ udevie rai ọ tẹ nọ nọ: “Owuhrẹ, ujaje ovẹ o mae ro eva izi na?”

Jesu ọ tẹ kuyo nọ: “Onọ o maero ona, ‘Gaviezọ O Izrẹl, Ọnowo na Ọghẹnẹ mare, Ọnowo na ọ ye ọvo; Whọ rẹ rehọ eva ra kpobi, gbe ẹzi ra kpobi, gbe iroro ra kpobi, gbe ogaga ra kpobi, you Ọnowo na Ọghẹnẹ ra.’ O rọ avivẹ ona, ‘Who re you omọfa epanọ who you oma ra.’ [Ujaje] ovuovo nọ o ro vi enana, o rọ họ.” Evaọ uzẹme, Jesu o fibae nọ: “Eva ijaje ivẹ enana uzi na soso gbe eruẹaro na ehwa e.”

Okere-obe na ọ tẹ rọwo nọ: “Owuhrẹ, whọ riẹ ta, [oye] ovo; ofa o rọ họ rekọ oye ovo; whọ rẹ rọ eva ra kpobi you yei, gbe areghẹ kpobi, gbe ogaga kpobi, gbe who you omọfa epanọ who you oma ra, u vi iwegọ emahọ ọsoso kpobi gbe iwegọ edekọ.”

Nọ ọ ruẹ nọ okere-obe na ọ riẹ yo, Jesu ọ tẹ ta kẹe nọ: “Uvie Ọghẹnẹ u thei owhẹ abọ họ.”

Anwọ edẹ esa na—Ẹdoka, Ẹdọvo-Oka, gbe Edivẹ-Oka—Jesu o bi ro wuhrẹ evaọ etẹmpol na. Ahwo na a be gaviezọ kẹe avọ omawere, ghele na isu egagọ na a be gwọlọ iẹe kpe, rekọ omodawọ rai kpobi i ti w’iruo ho. Matiu 22:15-40; Mak 12:13-34; Luk 20:20-40.

▪ Didi ẹgwa oyoma otu Farisi na a gba re a mu Jesu, kọ eme ọ rẹ via otẹrọnọ ọ kẹ uyo E hayo ijo?

▪ Ẹvẹ Jesu ọ rọ raha omodawọ otu Sadusi na re a mu ei?

▪ Omodawọ ọfa vẹ otu Farisi na a ru re a dawo Jesu, kọ ẹvẹ u ro kuhọ?

▪ Evaọ etoke odibọgba urere riẹ evaọ Jerusalẹm, bro edẹ Jesu o wuhrẹ evaọ etẹmpol na, kọ eme o no riei ze?