Uzou Avọ 109

Jesu Ọ Whọku Otu Ewọsuọ Riẹ

JESU o reghe ewọsuọ egagọ riẹ no te epanọ ozọ o gbẹ be jae nọe enọ họ. Fikiere ọ tẹ rehọ uvẹ na rovie ogbori rai via. Ọ nọ inọ: “Ẹvẹ wha roro kpahe Kristi na? Ọmọ ono ọ rọ?”

Otu Farisi na a te yo nọ: “Ọmọ Devidi.”

Dede nọ Jesu ọ vro nnọ oma Devidi Kristi, hayo Mesaya na, o nọ ze he, ọ tẹ nọ nọ: “Kẹvẹ Devidi ọ jẹ jọ eva Ẹzi [eva Olezi 110] se i Olori, a nọ, ‘Ọnowo na ọ ta kẹ Olori mẹ nọ, Keria obọze mẹ, bẹsenọ me re ru ewegrẹ ra họ otọ-awọ ra’? Re Devidi o te se i Olori, kẹvẹ ọ rẹ rọ jọ ọmọ riẹ?”

Otu Farisi na a j’ẹme he, keme a wo otoriẹ ogbagba kpahe Kristi, hayo ọnọ a wholo na ha. Orọnikọ Mesaya na yọ ohwo-akpọ nọ o no oma Devidi ze ọvo ho, wọhọ epanọ otu Farisi na a rọwo, rekọ ọ rria obọ odhiwu no o te je kpehru vi Devidi, hayo Olori riẹ.

Nọ ọ rẹriẹ ovao ku ogbotu na gbe ilele riẹ, Jesu ọ tẹ vẹvẹ unu kpahe ikere-ebe gbe otu Farisi na. Nọ enana a bi wuhrẹ Uzi Ọghẹnẹ na, nọ a rọ oma rai “keria akaba Mosis” no na, Jesu ọ tẹ k’ohrẹ anọ: “Wha ru oware nọ a ta kẹ owhai.” Rekọ o te fibae nọ: “Wha ru eruo rai hi, keme a re ru epanọ a ta ha.”

A rọ eviẹwẹ, yọ Jesu ọ tẹ rehọ oghẹrẹ eme ọwhọkuo nọ ọ ta okenọ ọ jẹ re emu evaọ uwou ohwo Farisi jọ emerae jọ nọ i kpemu na rọ whọku ai. Ọ ta nọ: “A re ru eware kpobi re ahwo a rue rae.” Ọ tẹ kẹ iriruo, ta nọ:

“A re ru igbelẹ rai kẹkẹe.” Igbelẹ esese enana, onọ a re thuru fihọ aruezo hayo obọ na, u wo abane Uzi na: Ọnyano 13:1-10, 11-16; gbe Iziewariẹ 6:4-9; 11:13-21. Rekọ otu Farisi na a ru igbelẹ enana rro re a dhesẹ oma via nnọ a wo ọwhọ kẹ Uzi na.

Jesu ọ tẹ jẹ ta haro nnọ a “ru efẹhọ iwu rai thetheri.” Eva Ikelakele 15:38-40 a kẹ emọ Izrẹl ujaje nnọ a ko iluelue fihọ akọ iwu rai, rekọ otu Farisi na a ko rai theri vi erọ amọfa kpobi. A re ru eware kpobi ro dhesẹ oma via! Jesu o whowho nọ: “A rẹ guọlọ eria nọ ikpehru keria.”

U yoma kẹhẹ, isiuru ọkwa-ologbo o kpomahọ ilele riẹ no re. Fikiere ọ tẹ hrẹ nọ: “Rekọ wha rọwo nọ a se o whai iwuhrẹ hẹ, keme ọvo họ [owuhrẹ] rai, whai kpobi inievo. Wha jọ eva akpọ na se ohwo ọvo ọsẹ rai hi, keme wha wo Ọsẹ ọvo nọ ọ rọ obọ odhiwu. Wha rọwo nọ a se owhai ilori gbe he, keme ọvo họ Olori rai, Kristi na.” Ilele na a rẹ whaha isiuru ẹjọ ohwo ọsosuọ! Jesu ọ hrẹ nọ: “Ohwo nọ ọ mai wuzou evaọ udevie rai, jọ o ru oma riẹ wọhọ odibo.”

O te whowho uye buobu fihọ uzou ikere-ebe gbe otu Farisi na, bi dhe ai esese nọ eviẹwẹ. Ọ ta inọ a “wuhu ẹthẹ uvie odhiwu dhe ahwo,” gbe “enọ e rẹ re uvuhu họ iwou eyae-uku, a vẹ rọ ẹghẹ lẹ thetheri.”

Jesu ọ ta nọ: “Uye u te owhai, isu ituaro.” (NW ) O brukpe aghare eware abọ-ẹzi nọ e kare otu Farisi na, nọ u dhesẹ oma via evaọ eware ẹkpẹlobọ nọ a bi ru. Wọhọ oriruo, a ta nọ, ‘O thọ họ otẹrọnọ ohwo ọ rehọ etẹmpol na bọwo ehao, rekọ ohwo o ruthọ otẹrọnọ ọ rehọ igoru etẹmpol na bọwo ehao.’ Fikinọ a rri igoru etẹmpol na ghare vi aghare abọ-ẹzi kẹ oria egagọ ọyena, a te bi dhesẹ aro otuẹtu iroro rai via.

Kẹsena, wọhọ epanọ o ru no vẹre na, Jesu o te brukpe otu Farisi na fikinọ a bi gbabọ kẹ ‘eware ilogbo Uzi na, koyehọ, oziẹ-okiẹrẹe gbe ohrọ gbe orọwọ’ a tẹ be mai fiẹgbahọ ẹhwa osa abọvo-abakpe, ọrọ ẹbe nọ i wo aghare he.

Jesu o se otu Farisi na ‘isu ituaro, enọ i re nwo etọle kufiẹ a ve si ekamẹle lọ!’ A re voro etọle no udi rai orọnikọ fikinọ ọ rọ amarao ọvo ho rekọ fikinọ ọ rọ gbegbe. Ghele na, eware egbẹgbẹdẹ Uzi na nọ a bi gbabọ kẹ o wọhọ nọ a bi si ekamẹle lọ, arao nọ ọ rọ gbegbe re. Matiu 22:41–23:24; Mak 12:35-40; Luk 20:41-47; Iruo-Izerẹ 11:4, 21-24.

▪ Fikieme otu Farisi na a je fibo okenọ Jesu ọ nọ ai onọ kpahe ẹme nọ Devidi ọ ta evaọ Olezi 110?

▪ Fikieme otu Farisi na a je ru igbelẹ Ikereakere rai gbe iluelue iwu rai rro?

▪ Didi ohrẹ Jesu ọ rọ kẹ ilele riẹ?

▪ Didi uruemu ẹkpẹlobọ otu Farisi na a wo, kọ ẹvẹ Jesu o ro brukpe ai fikinọ a gbabọ kẹ eware nọ e mai wuzou?