Uwuhrẹ 3

Ono Họ Jesu Kristi?

Fikieme a je se Jesu Ọmọ “ọtuyẹ” Ọghẹnẹ? (1)

Fikieme a je sei “Ẹme na”? (1)

Fikieme Jesu ọ jẹ ze otọakpọ wọhọ ohwo? (2-4)

Fikieme o je ro ru eware igbunu? (5)

Eme Jesu o ti ru evaọ obaro kẹle na? (6)

1. Jesu ọ rria ob’odhiwu wọhọ ohwo ẹzi taure ọ tẹ te ze otọakpọ. Ọye họ omama ọsosuọ Ọghẹnẹ, fikioye a je sei Ọmọ “ọtuyẹ” Ọghẹnẹ. (Ahwo Kọlọsi 1:15; Eviavia 3:14) Jesu ọvo họ Ọmọ nọ Ọghẹnẹ ọ rehọ obọ riẹ ma. Jihova ọ rehọ Jesu ruiruo wọhọ “osu iruo” eva ẹma eware efa kpobi nọ erọ odhiwu gbe akpọ taure ọ tẹ te jọ ohwo-akpọ. (Itẹ 8:22-31; Ahwo Kọlọsi 1:16, 17) Ọghẹnẹ ọ rehe riẹ ruiruo re wọhọ ọtota ologbo Riẹ. Oyejabọ a je se Jesu “Ẹme na.”—Jọn 1:1-3; Eviavia 19:13.

2. Ọghẹnẹ o vi Ọmọ Riẹ ze otọakpọ na ẹkwoma uzuazọ riẹ nọ o kpeze fihọ edhede Meri. Fikiere Jesu o wo ọsẹ ohwo-akpọ họ. Oyejabọ nọ ọ gbẹ reuku uzioraha ọvo hayo sebaẹgba ha. Ẹjiroro esa Ọghẹnẹ o ro vi Jesu ze otọakpọ: (1) Re o wuhrẹ omai uzẹme na kpahe Ọghẹnẹ (Jọn 18:37), (2) re ọ yọrọ edikihẹ ọgbagba, fi oriruo họ otọ k’omai re ma lele (1 Pita 2:21), gbe (3) re ọ rehọ uzuazọ riẹ dhidhe ro ru omai họ emuyẹ no uzioraha gbe uwhu. Eme a jẹ gwọlọ onana?—Matiu 20:28.

3. Ẹkwoma aghọẹmeeyo kẹ ujaje Ọghẹnẹ, ohwo ọsosuọ, Adamu, ọ tẹ thọ uzi oware nọ Ebaibol o se “uzioraha.” Fikiere Ọghẹnẹ o te broziẹ uwhu kpei. (Emuhọ 3:17-19) Ọ gbẹ sae nya te ute Ọghẹnẹ hẹ, fikiere ọ gbẹ sae jọ gbagba ha. Ẹmẹrera o te muhọ ẹwho je whu. Adamu ọ tẹ wha uzioraha se emọ riẹ kpobi. Oyejabọ ma jẹ be who, mọ eyao, ma ve je whu re na. Ẹvẹ a sai ro siwi ohwo-akpọ?—Ahwo Rom 3:23; 5:12.

4. Jesu yọ ohwo ọgbagba wọhọ Adamu. Dede, wo ohẹriẹ no Adamu, Jesu o yoẹme kẹ Ọghẹnẹ gbagba makọ evaọ otọ ẹdawọ nọ omai ga kpobi. Fikiere ọ sae rehọ ugboma uzuazọ ogbagba riẹ dhidhe rọ hwosa ọ uzioraha Adamu. Onana họ oware nọ Ebaibol o t’ẹme te wọhọ “ẹtanigbo” na. Koyehọ a sae rehọ erei si emọ Adamu no otọ obrukpe uwhu. Ahwo kpobi nọ a fi ẹrọwọ rai họ Jesu a sai wo erọvrẹ izieraha rai, a ve ti no ere wo uzuazọ ebẹdẹ bẹdẹ.—1 Timoti 2:5, 6; Jọn 3:16; Ahwo Rom 5:18, 19.

5. Okenọ ọ jọ otọakpọ Jesu o siwi enọ e jẹ mọ, ọ kuọ enọ ohọo u je kpe, jẹ za ofou dhe. Ọ tubẹ kpare iwhuowhu. Fikieme o je ru eware igbunu? (1) Ọ jẹ re ohrọ ahwo nọ e jẹ ruẹ uye, yọ ọ gwọlọ nọ o re fiobọhọ kẹ ai. (2) Eware igbunu riẹ idhesẹ nọ ọye họ Ọmọ Ọghẹnẹ. (3) I dhesẹ eware nọ o ti ru kẹ ahwo-akpọ nọ iyo ẹme okenọ o ti su akpọ na wọhọ Ovie.—Matiu 14:14; Mak 2:10-12; Jọn 5:28, 29.

6. Nọ Jesu o whu, Ọghẹnẹ ọ tẹ kpariẹe no iwhuowhu ze wọhọ omama ẹzi, o te zihe kpohọ odhiwu. (1 Pita 3:18) Anwọ okioye, Ọghẹnẹ o ro ru ei họ Ovie. Kẹle na Jesu o ti si emuemu gbe uye-oruẹ kpobi no akpọ nana.—Olezi 37:9-11; Itẹ 2:21, 22.

[Pictures on page 7]

Odibọgba Jesu u kugbe ewuhrẹ, eruo eware igbunu, avọ uzuazọ riẹ nọ o tube ro dhidhe k’omai