Ọsẹ Gbe Ọkpako—Erugba Iruo Ivẹ Na

“Otẹrọnọ ohwo ọ gbẹ riẹ epanọ ọ sae ro su ahwo uwou riẹ hẹ, kẹvẹ ọ sai ro muẹrohọ ichọche Ọghẹnẹ?”—1 TIMOTI 3:5.

 1, 2. (a) Evaọ ikpe-udhusoi ọsosuọ, ẹvẹ esẹro nọ e rọo ho gbe enọ e rọo ababọ emọ a jẹ rọ gbodibo kẹ inievo rai? (b) Ẹvẹ Akwila avọ Prisila a jẹ rọ iriruo kẹ ahwo nọ e rọo no buobu nẹnẹ?

ESẸRO evaọ ukoko Ileleikristi ọsosuọ e rẹ sae jọ ezae nọ e rọo ho hayo enọ e rọo ababọ emọ hayo enọ e rọo avọ emọ. Ababọ avro, Ileleikristi eyena jọ a sai lele ohrẹ Pọl ukọ na nọ o jọ ileta ọsosuọ riẹ ro se ahwo Kọrint, evaọ uzou avọ 7, a tẹ seba ẹrọo. Jesu ọ ta nọ: “E jọ e rọ nọ e whare oma rai fiki uvie odhiwu.” (Matiu 19:12) Ezae itieye nọ e rọo ho na, wọhọ Pọl gbe ẹsejọhọ ibe esẹro enyawariẹ riẹ jọ, oma u re vẹ ai re a nya i fiobọhọ kẹ inievo rai.

² Ebaibol na ọ ta ha sọ Banabas, Mak, Sailas, Luk, Timoti, gbe Taitọs a rọo. Otẹrọnọ a rọo, o sae jọ nọ oma u dina vẹ ai no ewha-iruo uviuwou nọ a jẹ sai je ro kpohọ erẹ thethabọ evaọ iruo sa-sa. (Iruẹru 13:2; 15:39-41; 2 Ahwo Kọrint 8:16, 17; 2 Timoti 4:9-11; Taitọs 1:5) O sae jọ nọ eyae rai i je lele ai, wọhọ Pita avọ ‘ikọ edekọ na,’ enọ o jọ vevẹ nọ a wha eyae rai lele oma nọ a je no oria ruọ oria. (1 Ahwo Kọrint 9:5) Akwila avọ Prisila yọ oriruo ọzae avọ aye enọ u no eva ze re a no oria ruọ oria, je lele Pọl no Kọrint kpohọ Ẹfẹsọs, a te no obei kpohọ Rom jẹ wariẹ zihe kpohọ Ẹfẹsọs. Ebaibol na ọ ta ha sọ a wo emọ jọ. Iruo unevaze rai kẹ inievo rai o wha riẹ ze nọ a ro wo uyere no ‘ikoko erẹwho egedhọ kpobi’ ze. (Ahwo Rom 16:3-5; Iruẹru 18:2, 18; 2 Timoti 4:19) Nẹnẹ, ahwo nọ a rọo buobu a riẹ enọ, wọhọ Akwila avọ Prisila, a rẹ sae ruiruo kẹ ikoko efa, ẹsejọ ẹkwoma ekpohọ oria nọ ẹgwọlọ ọ mae rọ.

Ọsẹ gbe Ọkpako

 3. Eme u dhesẹ nọ ekpako ikpe-udhusoi ọsosuọ buobu a jọ ezae nọ e rọo no avọ iviuwou?

³ O wọhọ nọ evaọ ikpe-udhusoi ọsosuọ C.E., ekpako Ileleikristi na buobu a jọ ezae nọ e rọo avọ emọ. Nọ Pọl ọ fodẹ ute kẹ ọzae nọ “ọ guọlọ ọkwa [ọsẹro],” ọ ta nọ Oleleikristi otiọye ọ rẹ jọ “ohwo nọ o re suẹ uwou riẹ ziezi, nọ ọ rẹ yọrọ emọ riẹ fihọ omaurokpotọ avọ adhẹ eva edhere kpobi.”—1 Timoti 3:1, 4.

 4. Eme a gwọlọ mi ekpako nọ e rọo no je wo emọ?

⁴ Wọhọ epanọ ma ruẹ no na, o rọ ọgbahọ nọ ọsẹro o re wo emọ họ, hayo kọ ọ rẹ rọo dede he. Rekọ otẹrọnọ ọ rọo, re ọ sai te wọhọ ọkpako hayo odibo oriruo, Oleleikristi ọ rẹ rẹro te aye riẹ ziezi je dhesẹ nọ o te epanọ o re ro koko emọ riẹ uzou họ. (1 Ahwo Kọrint 11:3; 1 Timoti 3:12, 13) Oyẹlẹ jọ evaọ ẹruorote uviuwou riẹ o rẹ lẹliẹ oniọvo nọ o gbe ro te kẹ ọkwa obọdẹ hẹ evaọ ukoko na. Fikieme? Pọl o ru rie vevẹ nọ: “Otẹrọnọ ohwo ọ gbẹ riẹ epanọ ọ sae ro su ahwo uwou riẹ hẹ, kẹvẹ ọ sai ro muẹrohọ [ukoko] Ọghẹnẹ?” (1 Timoti 3:5) Otẹrọnọ emọ obọ riẹ a be roma kpotọ kẹe he, ẹvẹ o rẹ jọ amọfa oma?

“Ewo Emọ nọ E Rọwo”

 5, 6. (a) Didi ẹgwọlọ kpahe emọ Pọl ọ fodẹ kẹ Taitọs? (b) Eme a gwọlọ mi ekpako nọ i wo emọ?

⁵ Nọ ọ jẹ hrẹ Taitọs re ọ rehọ esẹro mu evaọ ikoko obọ Kriti, Pọl ọ tẹ fodẹ nọ: “Ezae nọ e kare afuẹwẹ, enọ e rehọ aye ọvo, enọ emọ rai e rọwo, nọ a bọomasa ọfariẹogbe hayo ọjẹfiẹ hẹ. Keme wọhọ oruiruo Ọghẹnẹ, [ọsẹro] ọ rẹ jọ kare epe.” Kọ eme ute na u dhesẹ re a jọ ‘enọ emọ rai e rọwo’?—Taitọs 1:6, 7.

⁶ Ẹme na “emọ nọ e rọwo” u dhesẹ emaha nọ e rehọ izuazọ rai mudhe kẹ Jihova jẹ họ-ame no, hayo emaha nọ e be nya kẹle omarọkẹ gbe ame-ọhọ. Ahwo ukoko na a re rẹro nọ emọ ekpako a rẹ jọ kpatiẹ avọ ẹmeoyo. O rẹ jọ vevẹ inọ ọkpako na ọ be dao utho ẹgba riẹ kpobi re ọ bọ ẹrọwọ họ emọ riẹ. Solomọn ovie na o kere nọ: “Wuhrẹ ọmọ edhere nọ ọ rẹ nya, nọ ọ jẹ kpako no ọ gbẹ thọriẹ ẹro ho.” (Itẹ 22:6) Rekọ ẹvẹ otẹrọnọ uzoge nọ a kẹ uwuhrẹ oyena no ọ se nọ ọ rẹ gọ Jihova ha hayo tubẹ thọ uzi ulogbo jọ dede?

 7. (a) Eme u dhesẹ nọ Itẹ 22:6 o rọ uzi nọ a tehe utu mu hu? (b) Otẹrọnọ ọmọ ọkpako ọ sa nọ ọ rẹ gọ Jihova ha, fikieme ọkpako na ọ gbẹ nwani ku ọkwa riẹ fiẹ hẹ?

⁷ O rọ vevẹ inọ itẹ nọ a jọ obọ ehru fodẹ na yọ uzi nọ a tehe utu mu hu. U si ọ uzi iroro obọ ohwo no ho. (Iziewariẹ 30:15, 16, 19) Nọ ọmọzae hayo ọmọtẹ o te te ikpe owha-iruo no, ọ rẹ jiroro kẹ omobọ riẹ kpahe omarọkẹ gbe ame-ọhọ. Otẹrọnọ ọkpako ọ ghinẹ kẹ obufihọ ọkpọvio, gbe ọwhọkuo ẹzi nọ a gwọlọ no, ghele uzoge na ọ salọ nọ ọ rẹ gọ Jihova ha, onana o rẹ nwane whaha ọsẹ na ete kẹ iruo ọsẹro ho. Evaọ abọdekọ riẹ, otẹrọnọ ọkpako ọ jọ uwou wo emọ yoyo nọ, unọjọ utọjọ, a vẹ mọ ẹyao ẹzi je kie ro ẹbẹbẹ, a gbẹ sai rri ohwo ọyena wọhọ ọnọ o bi “suẹ uwou riẹ ziezi” hi. (1 Timoti 3:4) Ẹme na họ, imuẹro e rẹ jariẹ inọ ọsẹro ọ be dao utho ẹgba riẹ re ọ ruẹse wo ‘emọ nọ e rọwo nọ e kare afuẹwẹ hayo uzou-uveghe.’a

Ọ tẹ Rọo “Aye nọ Ọ rọ Ọgẹdhọ”

 8. Didi uruemu ọkpako o re dhesẹ kpahe aye riẹ nọ ọ rọwo ho?

⁸ Rọ kpahe ezae Ileleikristi nọ e rọo egedhọ, Pọl o kere nọ: “Ohwo jọ ọ tẹ rọ nọ o wo aye nọ ọ rọ ọgẹdhọ, ọ tẹ rọwo nọ aviẹ agbẹ jọ, ọ siẹe he . . . Keme a . . . ru aye ọgẹdhọ na fo fiki ọzae riẹ. Ogbẹrọ ere he, emọ rai e rẹ te jọ ababọ ẹfuọ, rekọ epanọ a rọ na, a foro. Keme . . . ọzae, ẹvẹ whọ rọ riẹ nọ who reti siwi aye ra?” (1 Ahwo Kọrint 7:12-14, 16) Ubiẹme na “ọgẹdhọ” evaọ etenẹ orọnikọ u bi dhesẹ aye nọ ọ rọwo egagọ họ họ rekọ ohwo nọ ọ roma mudhe kẹ Jihova ha. Ẹsejọhọ ohwo Ju, hayo ọnọ ọ rọwo emedhọ. Nẹnẹ, o sae jọ nọ aye nọ ọkpako o wo ọ rọ egagọ ọfa, ohwo nọ o rri Ọghẹnẹ thethabọ, hayo ọnọ ọ rọwo inọ Ọghẹnẹ ọ rọ họ. U te noi eva ze nọ ọ rẹ jọ kugbe ọzae na, ọ rẹ siẹe he fikinọ o wo ẹrọwọ ọfa ọvo. Ọ rẹ gbẹ ‘rọ iroro lele iei yeri, tete iei wọhọ oware ohẹhẹ,’ avọ irẹro nọ o ti siwi iei.—1 Pita 3:7; Ahwo Kọlọsi 3:19.

 9. Evaọ ekuotọ nọ uzi na o jẹ kẹ ọzae gbe aye udu nọ a rẹ rọ rehọ ẹrọwọ egagọ rai wuhrẹ emọ rai, didi uruemu ọkpako o re dhesẹ, kọ ẹvẹ onana u re ro kpomahọ ọkwa riẹ?

⁹ Otẹrọnọ ọsẹro o wo emọ, o re dhesẹ uzou-uwo ọzae uwou-orọo gbe ọsẹ evaọ ẹyọrọ emọ na ‘evaọ ọwhọkuo gbe ọkpọvio Jihova.’ (Ahwo Ẹfẹsọs 6:4) Evaọ ekuotọ buobu uzi na o kẹ imava orọo na uvẹ re a rehọ iwuhrẹ egagọ rọ kẹ emọ rai. Evaọ etenẹ aye na ọ sae gwọlọ nọ ọ rẹ rehọ ẹrọwọ gbe iruemu egagọ riẹ wuhrẹ emọ na, nọ u re kugbe ẹrehọ emọ na kpohọ ichọche.b Dede, emọ na a re lele iroro obọ rai nọ a rọ Ebaibol wuhrẹ no kpahe ehaa egagọ erue nọ a gwọlọ lele. Wọhọ ọnọ o wuzou uviuwou na, ọsẹ na o re dhesẹ udu riẹ ẹkwoma ewuhrẹ emọ riẹ jẹ rehọ ai kpohọ iwuhrẹ eva Ọgwa Uvie na kẹse kẹse te epanọ o lọhọ te. Nọ a tẹ kpako te ahwo no, a rẹ jiroro na kẹ omobọ rai kpahe edhere nọ a rẹ nya. (Joshua 24:15) Otẹrọnọ ibe ekpako riẹ gbe amọfa evaọ ukoko na a be ruẹ nọ ọ dao utho ẹgba riẹ wọhọ epanọ uzi na o kẹ uvẹ re o wuhrẹ emọ riẹ ziezi evaọ edhere uzẹme na, a rẹ whaha iẹe re ọ siọ ọsẹro ba ẹjọ họ.

“O re Suẹ Uwou Riẹ Ziezi”

10. Otẹrọnọ ọzae nọ o w’aye gbe emọ ọ rọ ọkpako, eme họ owha-iruo ọsosuọ riẹ?

¹⁰ Makọ rọ kẹ ọkpako nọ ọ rọ ọsẹ gbe ọnọ aye riẹ ọ rọ ibe Oleleikristi, o lọhọ ghele he re ọ ghale oke riẹ ziezi fihọ ẹruorote aye riẹ, emọ, gbe ewha-iruo ukoko na. Ikereakere na i ru rie vevẹ inọ ọsẹ Oleleikristi o wo owha-iruo nọ ọ rẹ rọ sẹro aye gbe emọ riẹ. Pọl o kere nọ: “Otẹrọnọ ohwo jọ ọ sae guọlọ kẹ imoni riẹ hẹ, yọ ọ sae guọlọ kẹ uwou riẹ gbe he, ohwo ọyena ọ vro orọwọ na no, o te je yoma vi ohwo nọ ọ rọwo ho.” (1 Timoti 5:8) Evaọ ileta ọvo ọyena, Pọl ọ ta nọ ajokpanọ ezae nọ e rọo no ọvo enọ i dhesẹ oma rai no wọhọ emamọ ezae uwou-orọo gbe esẹ a re ro mu wọhọ esẹro.—1 Timoti 3:1-5.

11. (a) Evaọ idhere vẹ ọkpako ọ rẹ rọ “guọlọ kẹ uwou riẹ”? (b) Ẹvẹ onana u re ro fiobọhọ kẹ ọkpako nyate ewha-iruo ukoko riẹ?

¹¹ Ọkpako ọ rẹ “guọlọ” kẹ ahwo riẹ orọnikọ evaọ edhere iwo ọvo ho rekọ te ẹzi gbe ọkpọvio. Solomọn Ovie areghẹ na o kere nọ: “Jọ eva otafe ruẹrẹ iruo rahọ, jọ obọ ẹwọ ruẹrẹ eware kpobi họ; taore whọ tẹ bọ uwou ra.” (Itẹ 24:27) Fikiere nọ ọ be gwọlọ kẹ isiuru iwo, ọkpọvio, gbe arozaha aye gbe emọ riẹ na, ọsẹro ọ rẹ jẹ bọ ai ga evaọ ẹzi re. Enana e rẹ rehọ oke—oke nọ ọ rẹ sae raha kẹ eware ukoko na ha. Rekọ o rọ oke nọ o rẹ wha irere buobu ze evaọ evawere gbe ute ẹzi uviuwou na. Eva ukuhọ riẹ, otẹrọnọ uviuwou riẹ o rọ gaga evaọ ẹzi, ọkpako na ọ vẹ te raha oke kakao nọ o re ro ku ebẹbẹ uviuwou na họ. Onana o rẹ lẹliẹe wo iroro dhedhẹ nọ ọ rẹ rọ rẹro te eware ukoko na. Oriruo riẹ wọhọ emamọ ọzae uwou-orọo gbe emamọ ọsẹ o rẹ jọ erere ẹzi kẹ ukoko na.—1 Pita 5:1-3.

12. Evaọ ẹme uviuwou vẹ esẹ nọ e rọ ekpako a rẹ jọ kẹ emamọ oriruo?

¹² Re a rẹro te uviuwou ziezi u kugbe oke nọ a rẹ ruẹrẹ họ re a rẹro te uwuhrẹ uviuwou. O mae wuzou re ekpako a fi emamọ oriruo họ otọ evaọ onana, keme iviuwou nọ e rọ gaga i re ru ikoko nọ e ga via. Oke ọsẹro u re keke fiki iruo ukoko na te epanọ o gbe ro wo uvẹ nọ o re ro wuhrẹ kugbe aye gbe emọ riẹ hẹ hẹ. Otẹrọnọ enẹ o rọ anwẹdẹ, ọ rẹ wariẹ kiẹ oma riẹ riwi. O re bru oke nọ ọ be raha kẹ eware efa jọ kpẹre, wariẹ ruẹrẹ oma riẹ họ hayo evaọ ẹsejọ tube siobọno iruo ukoko na jọ dede.

Ẹruorote nọ Ọ rọ Owowa

13, 14. Didi ohrẹ ‘ọrigbo nọ o wo ẹrọwọ avọ areghẹ’ na a kẹ ekpako na no enọ i w’eyae gbe emọ?

¹³ Onana họ oke ọsosuọ nọ a be kẹ ohrẹ re a rọ owowa sẹro ewha-iruo uviuwou gbe ukoko ho. Anwọ ikpe buobu ze, ‘ọrigbo nọ o wo ẹrọwọ avọ areghẹ’ na a be hẹ kẹ ekpako na ohrẹ kpahe eme enana. (Matiu 24:45) Bu vi ikpe 37 nọ i kpemu no, Uwou-Eroro Na ọrọ September 15, 1959 (ọrọ Oyibo), ewẹ-obe avọ 553 gbe 554, ọ hrẹ nọ: “Uzẹme, kọ o gbẹ gwọlọ owowa nọ a re ro ru eware nọ e gwọlọ oke mai kpobi? Evaọ onana whọ rẹ mae rẹriẹ ova ku isiuru uviuwou obọ ra. Evaọ uzẹme, Jihova Ọghẹnẹ ọ rẹ gwọlọ nọ ọzae ọ rehọ oke riẹ kpobi kẹ iruo ukoko ho, re o fiobọhọ kẹ inievo gbe erivẹ riẹ wo esiwo, kpakiyọ ọ be gwọlọ esiwo uviuwou obọ riẹ hẹ. Aye gbe emọ ohwo họ owha-iruo ọsosuọ riẹ.”

¹⁴ Uwou-Eroro Na ọrọ November 1, 1986 (ọrọ Oyibo), ẹwẹ-obe avọ 22, ọ hrẹ nọ: “Abọ o wo evaọ usiuwoma ota wọhọ uviuwou u re si owhai kẹloma, rekọ ẹgwọlọ nọ emọ a mae wo họ oke nọ whọ rẹ raha kugbe ai jẹ kẹ ai ọkpọvio. Fikiere, o gwọlọ owowa re whọ riẹ unuoke nọ whọ rẹ raha evaọ . . . ewha-iruo ukoko na whọ vẹ jẹ rẹro te ẹgwọlọ ẹzi, ọkpọvio, gbe ọrọ iwo ‘ahwo uwou ra.’ [Oleleikristi] ọ rẹ kaki ‘wuhrẹ omarọkẹ Ọghẹnẹ evaọ uviuwou riẹ.’ (1 Timoti 5:4, 8)”

15. Fikieme ọkpako nọ o w’aye gbe emọ ọ jẹ gwọlọ areghẹ gbe orimuo?

¹⁵ Itẹ Ikereakere jọ o ta nọ: “Areghẹ a rẹ rehọ bọ uwou, eriariẹ arẹ rehọ tọ e họ.” (Itẹ 24:3) Ẹhẹ, re ọsẹro o ru iruo Ọghẹnẹ riẹ gba re ọ jẹ bọ uviuwou riẹ ga, ọ ghinẹ gwọlọ areghẹ gbe orimuo. No Ikereakere na ze, o wo bu vi iruo ọvuọvo nọ ọ rẹ rẹro te. Uviuwou riẹ gbe ewha-iruo ukoko na e riẹ. Ọ gwọlọ orimuo re ọ rehọ owowa ru eko iruo na. (Ahwo Filipai 1:9, 10) Ọ gwọlọ areghẹ nọ ọ rẹ rọ riẹ onọ o mai wuzou. (Itẹ 2:10, 11) Epanọ ọ make wọ iruo ukoko na họ uzou te, o re vuhumu nọ wọhọ ọzae uwou-orọo gbe ọsẹ, owha-iruo ọsosuọ riẹ nọ Ọghẹnẹ ọ kẹ riẹ họ ẹruọsa gbe esiwo uviuwou riẹ.

Emamọ Esẹ gbe Emamọ Ekpako

16. Didi erere ọkpako o wo otẹrọnọ ọ rọ ọsẹ re?

¹⁶ Ọkpako nọ o wo emọ nọ i bi yoẹme yọ obufihọ ologbo. Otẹrọnọ o wuhrẹ no re ọ rẹro te uviuwou riẹ ziezi, o re je te re o fiobọhọ kẹ iviuwou efa evaọ ukoko na. Ọ rẹ riẹ kpahe ebẹbẹ rai ziezi jẹ rehọ ohrẹ rọ kẹ ai no eware nọ ọ rẹro ruẹ no ze. Avọ evawere, idu ekpako buobu evaọ akpọ na soso a be riẹ ru ziezi wọhọ ezae uwou-orọo, esẹ gbe esẹro.

17. (a) Eme o rẹ thọrọ ọzae nọ ọ rọ ọsẹ gbe ọkpako ẹro ho? (b) Ẹvẹ amọfa evaọ ukoko na a re ro dhesẹ ọdawẹ?

¹⁷ Re ọzae uviuwou ọ jọ ọkpako, ọ rẹ jọ Oleleikristi nọ ọ kpako te, nọ ọ be sẹro aye gbe emọ riẹ, ọ rẹ sai koko oma riẹ họ re ọ sae raha oke jẹ rẹro te amọfa evaọ ukoko na. O rẹ thọrọ iẹe ẹro vievie he inọ iruo ẹruorote riẹ u re muhọ evaọ uwou. Nọ a riẹ nọ ekpako nọ i wo eyae gbe emọ a wo owha-iruo uviuwou rai gbe erọ ukoko na, ahwo ukoko na a rẹ daoma re a whaha ẹlaruọ oke rai odode. Wọhọ oriruo, ọkpako nọ o wo emọ nọ i re ti kpohọ isukulu okiokiọ riẹ ọ sai ti bruenẹ hemu tere he nọ ewuhrẹ o te kuhọ no evaọ owọwọ. Amọfa evaọ ukoko na a rẹ riẹ onana je dhesẹ oma ororokẹ.—Ahwo Filipai 4:5.

Ekpako Mai A rẹ Jọ Ghaghae k’Omai

18, 19. (a) Eme ọkiẹriwo mai ọrọ 1 Ahwo Kọrint uzou avọ 7 u fiobọhọ k’omai vuhumu no? (b) Didi ubiẹro ma re ro rri ezae Ileleikristi itieye na?

¹⁸ Ọkiẹriwo uzou avọ 7 ọrọ ileta ọsosuọ Pọl ro se ahwo Kọrint na u fiobọhọ k’omai no ruẹ nọ, evaọ elele ohrẹ Pọl, ezae buobu nọ e rọo ho e riẹ nọ e be rehọ ufuoma rai ru iruo Uvie na. Idu inievo efa nọ e rọo no nọ i wo emọ họ e riẹ enọ, dede nọ a be rẹro te eyae rai ziezi, a be gọ wọhọ emamọ esẹro ibrotọ, ikogho, ikoko, gbe iruiruo evaọ iwou-ogha Watch Tower, avọ eyae rai nọ e be roma kpotọ ziezi. Ukuhọ riẹ, evaọ ikoko ahwo Jihova nọ i bu vi 80,000 na, esẹ buobu e riẹ orọnikọ nọ a be rẹro te eyae gbe emọ rai ziezi ọvo ho rekọ enọ e be raha oke gbodibo kẹ inievo rai wọhọ esẹro.—Iruẹru 20:28.

¹⁹ Pọl ukọ na o kere nọ: “U fo re ekpako nọ i bi suẹ ziezi na a kẹ ae adhẹ akuava, o nọ-omaero kọ otu nọ ọ be ruẹ uye ta usiuwoma a ve je wuhrẹ ahwo.” (1 Timoti 5:17) Ẹhẹ, ekpako nọ e be rẹro te iwou rai ziezi jẹ rẹro te ukoko na a fo kẹ uyoyou gbe adhẹẹ mai. U ghine fo re ma “kẹ eghẹrẹ ahwo otiọye adhẹ.”—Ahwo Filipai 2:29.

[Footnotes]

Evaọ Edhere ọ Ọkiẹkpemu

◻ Ẹvẹ ma rọ riẹ nọ ekpako buobu evaọ ikpe-udhusoi ọsosuọ C.E. a jọ ezae nọ i w’eyae gbe emọ?

◻ Eme a gwọlọ mi ekpako nọ e rọo no avọ emọ, kọ fikieme?

◻ Eme u dhesẹ re a wo ‘emọ nọ e rọwo,’ rekọ eme ọ rẹ via otẹrọnọ ọmọ nọ ọkpako no ọ sa nọ ọ rẹ gọ Jihova ha?

◻ Evaọ idhere vẹ ọkpako ọ rẹ rọ “guọlọ kẹ uwou riẹ”?

[Picture on page 16]

Iviuwou nọ e rọ gaga i re ru ikoko nọ e ga via