Emamọ Usi na Ro te Ahwo Buobu Efa

NỌ ME bi roro kpahe ahwo orẹwho mẹ na, me te vuhumu nnọ ibuobu i bi se je yo kpahe Isẹri Jihova ọvo. Me te roro nọ, u fo re a nyate ahwo nana oma, re a riẹ ahwo nọ Isẹri Jihova a rọ gbe eware nọ a ghinẹ rọwo. Rekọ ẹvẹ mẹ sai ro fiobọhọ? Ọzae mẹ yọ ọkpako Oleleikristi, ọ tẹ k’omẹ ọkpọvio gbe ẹjiroro areghẹ jọ.

Ma tẹ ruẹ uvi iroro jọ evaọ uzoẹme na “Emagazini nọ E rẹ Kẹ Uvi Omosasọ,” nọ a kporo evaọ ukere emagazini ọ Awake! ọrọ January 8, 1995. Kpahe iruẹru Osẹri jọ, uzoẹme na o ta nọ: “O ru rie họ uruemu re ọ tọlọ emagazini ọ Awake! jọ nọ e vrẹ no nọ Isẹri efa a kokohọ eva uwou. O ve weze bru ẹko ahwo nọ o roro nọ a ti wo obọdẹ isiuru kpahe izoẹme na.”

Avọ obufihọ ọzae mẹ, mẹ tẹ kua emagazini udhusoi buobu koko. Mẹ tẹ jọ enana salọ izoẹme buobu nọ i fo ahwo nọ mẹ gwọlọ nyabru.

Avọ obe ifonu gbe okerefihotọ iyẹrẹ ẹgbede, me te kere edẹ ẹsipito buobu, iwou nọ izoge e be rria, gbe iwou nọ a be jọ yọrọ emọ. Me te je kere edẹ ahwo nọ e rẹ rẹro te uwhori, esẹro gbe ekohrẹ isukulu, ebo-imu, gbe esẹro iwou-odi gbe ekọto. Obe mẹ u te je wo edẹ enọ e be rẹro te eria nọ a re jo fiobọhọ kẹ egbidi gbe enọ e rẹ lọ imu egaga, enọ e be rẹro te okegbe, enọ e be rẹro te enọ e ko gbe enọ ẹmo o le no iwou, gbe ahwo otokiẹ emamọ emu. Enọ i wuzou eria omofọwẹ i vo omẹ ẹro ho, te enọ i bi ruiruo obufihọ, gbe iruẹru uviuwou.

Eme Mẹ te Ta?

Oware ọsosuọ nọ me ru okenọ me te bi ru iweze họ oma mẹ nọ me re dhesẹ vevẹ. Mẹ vẹ jẹ ta nọ iweze mẹ o te rehọ iminiti kakao ọvo.

Nọ mẹ tẹ rẹriẹ aro ku ohwo nọ o wuzou na no, mẹ vẹ ta nọ: “Mẹ yọ omọvo Isẹri Jihova. Rekọ, orọnikọ mẹ nyaze te ta usiuwoma ha, keme ẹsejọhọ onana u ti fo evaọ oke iruo ho.” Ẹsebuobu ẹbẹbẹ ọ rẹ gbẹ jariẹ hẹ. Kẹsena, avọ ẹme nọ mẹ rẹ ta kiehọ uyero ohwo na, mẹ vẹ ta haro nọ: “Eware ivẹ e wọ omẹ ze. Orọ ọsosuọ, mẹ gwọlọ yere owhai kẹ iruo nọ ọfisi ra o bi ru. Whaọ, a re rri rie vo ho inọ ohwo jọ ọ be raha oke gbe ogaga riẹ re o fiobọhọ kẹ ẹgbede. Me jiri owhai kẹ onana.” Evaọ eria buobu, onana u re gbe ahwo buobu nọ mẹ nyabru na unu.

Ẹsejọhọ enẹna ohwo na o muhọ eroro no kpahe oware nọ ẹjiroro avivẹ na o rọ. Mẹ vẹ taharo nọ: “Ẹjiroro avivẹ iweze mẹ ona: Ro no emagazini Awake! mai ze, onọ a be jọ akpọ na kpobi whowho na, mẹ salọ izoeme jọ nọ e nwane t’ẹme kpahe oghẹrẹ iruo ra gbe ebẹbẹ nọ e rọ eva riẹ. U mu omẹ ẹro nọ whọ gwọlọ riẹ epanọ emagazini akpọ soso o rri ebẹbẹ enana fihọ. O te were omẹ re mẹ nya siọ enana ba k’owhẹ.” Ẹsebuobu a rẹ ta nọ a wo ovuhumuo kẹ omodawọ mẹ.

Iyẹrẹ Igbunu avọ Erere

Mẹ tẹ rọ edhere ọnana t’ẹme kẹ ohwo, ibuobu a re dede omẹ rehọ ziezi; evaọ usu ahwo nọ mẹ ta ẹme kẹ, ọvo evaọ 17 họ ọnọ ọ rọ gaviezọ họ. Mẹ nyaku eware igbunu avọ erere buobu.

Wọhọ oriruo, nọ mẹ dawo isiane no jẹ rehọ odiri hẹrẹ, mẹ tẹ ruẹ ọsẹro ubrotọ isukulu jọ. O re w’uvẹ hẹ. Ghele na, ọ jọ whẹtiẹwhẹtiẹ gaga o te je lele omẹ t’ẹme dina kri. Okenọ me je kpo, ọ tẹ ta nọ: “Me ghine wo ovuhumuo kẹ omodawọ ra, yọ ababọ avro mẹ te roma totọ se ebe ra na.”

Evaọ oria ofa, me weze kpohọ okọto ubrotọ jọ, me te zere oguẹdhọ na, ọzae ọ ikpe udhuvẹ-gbọ jọ. Okenọ mẹ rueva ọfisi riẹ, ọ tẹ kpare ova no ebe nọ o bi se ze, avọ ofu.

Ọ tẹ ta avọ evedha nọ: “Ohiohiẹ Edivẹ-Oka ọvo ọfisi o re rovie, yọ okioye ọvo whọ rẹ sae wha ẹme nọ who wo kpobi ze.”

“Eva e dh’owhẹ hẹ inọ mẹ nyazẹ evaọ oke utionana,” ere mẹ kuyo vẹrẹ vẹrẹ je fibae nọ, “Ghele na, o te were omẹ re me zihe ze okiofa. Rekọ ẹnyaze mẹ na orọnikọ fiki iruo ho.”

Udu u te mu oguẹdhọ na họ ẹkpakpa. Ọ tẹ dina rọ urru kpotọ omojọ nọ kpahe oware nọ mẹ gwọlọ. Mẹ tẹ wariẹ ta kẹe nnọ me ti zihe ze Edivẹ-Oka.

U te gbe omẹ unu nọ o si ikẹ nọ: “Iviena, keria. Eme whọ gwọlọ?”

Ma te mu ẹme họ ẹta ziezi, o te wounu fiki ẹme ọgaga nọ ọ kpahe evaọ emuhọ na fikinọ obọ riẹ o ghinẹ jọ iruo gaga.

Nọ o dina kri no, oguẹdhọ na ọ tẹ nọ inọ: “Kọ whọ riẹ oware nọ o be jọ oma Isẹri Jihova were omẹ? A wo obọdẹ izi nọ a re reghe no ho. Hitler ọ dao utho oware nọ ẹgba riẹ o te kpobi, rekọ Isẹri na a rọwo fiẹmo ghele he.”

Okenọ mai imava ma rueva ọfisi na, ikere-obe na a te vuhu omai. Okere-obe okpehru na ọ tẹ t’ẹme dhedhẹ nnọ, “Ọnọ o wuzou na o re dede ahwo nọ a wha ẹme ze rehọ vievie he.”

Mẹ tẹ r’unu totọ kuyo nọ: “Rekọ o ti dede omai rehọ, keme mai yọ Isẹri Jihova. Ma nyaze te yare oware ovo ho, yọ ẹkeria mai o ti kri vrẹ iminiti esa ha.” Evaọ udu mẹ, mẹ tẹ lẹ gaga: “O Jihova, jọ onana o nya ziezi!”

Okere-obe na ọ tẹ kuyo avọ avro, “Uwoma, mẹ te daoma.” Ọ tẹ nyavrẹ. Oware wọhọ iminiti ivẹ e vrẹ no, nọ o jọ obọ mẹ lehie te ibẹdẹ bẹdẹ, o te zihe ze avọ ọnọ o wuzou na. Ababọ ẹme, ọ tẹ karo bi kpohọ ọfisi riẹ, fa ibrikpẹ ivẹ efa vrẹ.

Nọ ma muọ ẹme na họ ẹta no, ọ tẹ whẹtiẹ omai h’oma viere. Ọ rọ unevaze rehọ ukere emagazini Awake! na okenọ ma rehọ ai kẹe. Ma yere Jihova kẹ uvẹ onana nọ ma ro se emamọ isẹri kpahe ẹjiroro iruo mai.

Me te rri kpemu kpohọ eware igbunu nọ e via no, kẹsiẹe me wo ovuhumuo viere kpahe oware nọ Pita ukọ na ọ ta: “Uzẹme, mẹ riẹ nọ Ọghẹnẹ ọ rọ ọriẹwẹ hẹ, rekọ evaọ korẹwho korẹwho ọzae nọ ọ dhẹ riẹ je ru iruo ẹrẹreokie ọ rẹ jẹe rehọ.” (Iruẹru 10:34, 35, NW ) Oreva Ọghẹnẹ họ a rẹ kẹ ahwo uyerakpọ kpobi, evẹrẹ kpobi, ọkwa uzuazọ kpobi uvẹ nọ a rẹ rọ riẹ kpahe ẹjiroro riẹ kẹ ohwo-akpọ jẹ rọ kẹ otọakpọ na.—Onọ a zọhọ.