Fikieme Ma Je Wuhrẹ Ebaibol Na?

BILL ọ jọ ọmoha, nọ ọ rọ jajaja, jẹ riẹ obe, yọ o wo ugho. Ghele na, o wo edẹro ho. Uzuazọ riẹ u wo ẹjiroro ho, yọ oyena o jẹ kẹe idhọvẹ gaga. Evaọ omodawọ re o duku ẹjiroro uzuazọ na, ọ kiẹ egagọ sa-sa riwi, rekọ ọ ruẹ oware nọ ọ jẹ gwọlọ họ. Evaọ 1991 ọ tẹ nyaku omọvo Isẹri Jihova jọ, ọnọ ọ nyasiọ obe jọ nọ o t’ẹme kpahe oware nọ Ebaibol na o ta kpahe ẹjiroro uzuazọ ba kẹe. A te ru ọruẹrẹfihotọ uwuhrẹ Ebaibol re Bill ọ sae t’ẹme kpahe uzoẹme onana gbe efa.

Bill ọ kareghẹhọ inọ: “Ma ru uwuhrẹ ọsosuọ mai, yọ fikinọ ma je rovie kpohọ Ebaibol na ẹsibuobu, mẹ tẹ riẹ nọ onana họ oware nọ mẹ be gwọlọ. Iyo nọ e rọ Ebaibol na e sasa omẹ oma gaga. Nọ uwuhrẹ oyena o vrẹ no, mẹ tẹ dhẹ kpohọ ugbehru jọ, ruotọ no omoto mẹ, mẹ tẹ viẹ do via fiki oghọghọ. Mẹ ghọghọ inọ me muọ iyo enọ mẹ họ ẹruẹ no.”

Uzẹme, orọnikọ ohwo kpobi nọ o duku uzẹme Ebaibol na ọ rẹ ghinẹ viẹ via avọ omawere he. Ghele na, re a wuhrẹ iyo kẹ enọ uzuazọ nọ i wuzou yọ oware oghọghọ kẹ ahwo buobu. A wọhọ ọzae ohare Jesu jọ ọnọ o duku efe nọ a sino evaọ udhu. Jesu ọ ta nọ: “Fiki oghọghọ riẹ o re kpo e zẹ eware nọ o woi kpobi ọ vẹ dẹ udhu na.”—Matiu 13:44.

Usiavẹ kẹ Uzuazọ Otofa

Bill o je roro kpahe ugogo onọ jọ, Eme họ ẹjiroro uzuazọ? Egbaeriariẹ, iwuhrẹ-egagọ, gbe ekiotọ-eriariẹ a daoma gaga no evaọ idu-ikpe buobu re a kuyo onọ oyena. Ahwo nọ a be daoma re a kuyo riẹ a kere ebe buobu no. Omodawọ rai u zihe ro ufofe no, yọ ibuobu a ku rie họ inọ a rẹ sae kuyo onọ na ha. Ghele na, uyo na o riẹ. Dede nọ uyo na u gbunu, o rọ lọlọhọ. A ru rie vẹ evaọ Ebaibol na. Usiavẹ kẹ uzuazọ evawere, onọ u wo otofa ona: Ma re wo emamọ usu kugbe Jihova, Ọnọma gbe Ọsẹ obọ odhiwu mai. Ẹvẹ ma re ro wo usu oyena?

Eware ivẹ jọ nọ e wọhọ nọ e wọso ohwohwo i w’obọ kpahe esikẹle Ọghẹnẹ. Ahwo nọ a re si kẹle Ọghẹnẹ a rẹ dhozọ riẹ je you rie. Joma roro kpahe ikereakere ivẹ jọ nọ e tha ẹme ọyena uke. Oke krẹkri nọ u kpemu no, Solomọn Ovie owareghẹ na ọ romatotọ wuhrẹ kpahe ohwo-akpọ je kere eware nọ o duku fihọ obe Ebaibol Ọtausiuwoma Na. Nọ ọ gba eware nọ o muẹrohọ kugbe, o te kere nọ: “Ukuhọ eme na ona; a yo rai kpobi no. Dhẹozọ Ọghẹnẹ, who koko izi riẹ; keme onana họ iruo kpobi nọ i te ohwo e ruo.” (Ọtausiwoma Na 12:13, ẹjẹle ibiẹme na ọmai.) Ikpe-udhusoi buobu evaọ uwhremu na, okenọ a nọ e kpahe ujaje nọ o mae rro kpobi evaọ Uzi nọ a kẹ Mosis na, Jesu ọ kuyo inọ: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, you Ọnowo na Ọghẹnẹ ra.” (Matiu 22:37, ẹjẹle ibiẹme na ọmai.) Kọ o rọ oware ẹkpẹlobọ k’owhẹ inọ ma rẹ dhozọ Ọghẹnẹ je you rie? Joma kiẹ epanọ ozodhẹ gbe uyoyou i wuzou te gbe epanọ i re ruiruo kugbe ro fiobọhọ k’ohwo wo usu evevọwẹ kugbe Ọghẹnẹ.

Oware nọ Ozodhẹ Ọghẹnẹ U Dhesẹ

Ozodhẹ adhẹẹ o r’oja otẹrọnọ ma rẹ gọ Ọghẹnẹ evaọ edhere nọ ọ jẹrehọ. Ebaibol na e ta nọ: “Ozọodhe kẹ ỌNOWO họ emuhọ areghẹ.” (Olezi 111:10) Pọl ukọ na o kere nọ: “Whaọ jọ ma gọ uvi egagọ nọ i re je Ọghẹnẹ miẹ, avọ enuho gbe ọwhewhe.” (Ahwo Hibru 12:28) Epọvo na re, ẹnjẹle jọ evaọ idadeghe na nọ Jọn ukọ na ọ ruẹ evaọ aruọruẹ o muọ ewhowho riẹ ọrọ emamọ usi na họ avọ eme na: “Dhozọ Ọghẹnẹ jẹ rehọ oruaro kẹ e.”—Eviavia 14:6, 7.

Ozodhẹ Ọghẹnẹ onana, onọ o r’oja gaga kẹ uzuazọ nọ u wo otofa na, o wọhọ ozodhẹ eguegue he. Ozọ o rẹ sai mu omai otẹrọnọ ogbulegbu ọgeva, nọ ọ vọ avọ imuozọ o guegue omai. Rekọ ozodhẹ Ọghẹnẹ yọ ozodhẹ urirẹ gbe egagọ ididi kẹ Ọnọma na. U te je kugbe emamọ ozodhẹ orọ eva nọ a re ru dha Ọghẹnẹ keme ọye họ Oguẹdhọ Ologbo gbe Erumeru na, ọnọ o wo ogaga gbe udu nọ ọ rẹ rọ kẹ enọ e ghẹmeeyo uye.

Ozodhẹ gbe Uyoyou E rẹ Nya Kugbe

Ghele na, orọnikọ Jihova ọ gwọlọ nọ ahwo a gọe fiki ozodhẹ nọ a wo kẹe ọvo ho. Jihova ghinọ Ọghẹnẹ uyoyou. Oma o wọ Jọn ukọ na kere inọ: “Ọghẹnẹ họ uyoyou.” (1 Jọn 4:8) Jihova Ọghẹnẹ ọ rehọ edhere uyoyou yerikugbe ahwo-akpọ no, yọ ọ gwọlọ nọ ahwo a rẹ j’owọ ẹkwoma eyou nọ a re you rie zihe. Ghele na, ẹvẹ uyoyou utioye na o rẹ rọ nya kugbe ozodhẹ Ọghẹnẹ? Ivẹ na e ghinẹ jẹhọ ohwohwo. Ọso-ilezi na o kere inọ: “Okugbe ỌNOWO ọ rẹ jọ kẹ enọ e rẹ dhẹozọ riẹ.”—Olezi 25:14.

Dai roro kpahe oghẹrẹ iroro adhẹẹ gbe ozodhẹ urirẹ nọ ọmọ o re wo kẹ ọsẹ nọ o wo ogaga gbe areghẹ. Eva okiovo na, ọmọ otiọye na ọ rẹ j’owọ kẹ uyoyou ọsẹ na. Ọmọ na o re fievahọ ọsẹ na jẹ rẹroso ẹe kẹ ọkpọvio, avọ imuẹro inọ ọkpọvio riẹ ọ te wha irere ze. Epọvo na re, ma te you jẹ be dhozọ Jihova, ma re yoẹme kẹ ọkpọvio riẹ, yọ onana o rẹ k’omai erere. Muẹrohọ ẹme nọ Jihova ọ ta kpahe emọ Izrẹl na: “O dodokiyọ a he wo eva nana ẹsikpobi rọ dhozọ mẹ je koko izi mẹ, re u woma kẹ ae gbe emọ rai bẹdẹ!”—Iziewariẹ 5:29.

Ẹhẹ, ozodhẹ Ọghẹnẹ u re su kpohọ igbo ho rekọ ufuoma, orọnikọ uweri hi rekọ oghọghọ. Aizaya ọ ruẹaro kpahe Jesu inọ: ‘Akpọriọ ọ te jariẹ kẹ e evaọ ozodhẹ ỌNOWO na.’ (Aizaya 11:3) Yọ ọso-ilezi na o kere inọ: “Oghale u te ọnọ ọ be dhẹozọ ỌNOWO, ọnọ ọ rẹ jọ evaọ izi riẹ ghọghọ!”—Olezi 112:1.

U re vevẹ, ma rẹ sae dhozọ Ọghẹnẹ hayo you rie he otẹrọnọ ma riẹ riẹe he. Oyena o soriẹ ze nọ uwuhrẹ Ebaibol u je wuzou tere na. Uwuhrẹ utioye na u re fiobọhọ k’omai wo otoriẹ ekwakwa-oma Ọghẹnẹ je wo ovuhumuo kpahe areghẹ ẹnyalele ọkpọvio riẹ. Nọ ma bi si kẹle Ọghẹnẹ viere na, ma gwọlọ ru oreva riẹ yọ oma o be w’omai koko ijaje riẹ, nọ ma riẹ nọ e te k’omai erere na.—1 Jọn 5:3.

O rọ oware oghọghọ re ohwo ọ riẹ nọ ọ rrọ emamọ edhere uzuazọ. Onana o rọ ere kẹ Bill, ọnọ ma jọ emuhọ fodẹ na. Ọ ta kẹle inọ: “Evaọ ikpe izii nọ e vrẹ no anwọ uwuhrẹ Ebaibol ọsosuọ mẹ ze, usu mẹ kugbe Jihova o rro no. Oghọghọ ọsosuọ nọ me wo na o ghinẹ rro zihe ro edhere uzuazọ oghọghọ no. Me wo eriwo ọliọliọ kpahe uzuazọ. Edẹ mẹ e vọ avọ iruẹru nọ i wo otofa, orọnikọ egwọlagwọlọ ababọ ẹjiroro kẹ omawere he. Jihova o zihe ro uvi ohwo k’omẹ no, yọ mẹ riẹ nọ o wo emamọ isiuru mẹ evaọ udu.”

Evaọ uzoẹme uwuhrẹ avesa ọ ukere nana, ma te gbẹ kiẹriwi kpahe epanọ eriariẹ Jihova e rẹ rọ wha oghọghọ gbe irere se enọ i fi rai h’iruo evaọ izuazọ rai.

[Ẹme nọ a fi ẹgba họ nọ ọ rrọ ẹwẹ-obe avọ 5]

Esikẹle Ọghẹnẹ u dhesẹ nọ ma re you rie jẹ dhozọ riẹ

[Uwoho nọ o rrọ ẹwẹ-obe avọ 6]

Jesu ọ ghọghọ evaọ ozodhẹ Jihova