Dadamu Gbodibo Kẹ Kristi Ovie na

‘Ọye a rehọ isuẹsu gbe oruaro gbe uvie kẹ, re ahwo kpobi, erẹwho gbe evẹrẹ kpobi, a ruẹse gbodibo kẹe.’—DANIẸL 7:14.

 1, 2. Ẹvẹ ma rọ riẹ nọ Kristi o wo ogaga-esuo vọvọ họ wọhọ Ovie evaọ 33 C.E.?

OSU vẹ ọ rẹ sai whu kẹ enọ o re suo, ọ jẹ kparoma ze ọ vẹ jọ ovie? Ovie vẹ ọ rẹ sae rria akpọ na, nọ o re ru nọ enọ o bi su a je fi eva họ iẹe, roma kpotọ kẹe, o ve tovrẹ kpohọ odhiwu je su no obei ze? Ohwo nọ ọ rẹ sai ru onana—je tube ru vrẹ ere họ Jesu Kristi. (Luk 1:32, 33) Eva Pẹntikọst 33 C.E. nọ Kristi o whu, kparoma, je tovrẹ kpohọ odhiwu no, Ọghẹnẹ o ‘te ru ei wo uzou eware kpobi nọ e rrọ ukoko na.’ (Ahwo Ẹfẹsọs 1:20-22; Iruẹru 2:32-36) Kristi ọ tẹ rehọ ere muhọ esuo, dede na umutho ahwo jọ ọvo o je su. Ahwo ọsosuọ nọ e jọ otọ isuẹsu riẹ họ Ileleikristi nọ a wholo na, ‘Izrẹl Ọghẹnẹ,’ enọ i ru Izrẹl abọ-ẹzi via.—Ahwo Galesha 6:16; Ahwo Kọlọsi 1:13.

² Nọ Pẹntikọst 33 C.E. yena o vrẹ no evaọ oware wọhọ ikpe 30, Pọl ukọ na ọ kẹ imuẹro inọ Kristi o ri wo ogaga Uvie vọvọ họ, rekọ ọ jọ “obọze Ọghẹnẹ, be hẹrẹ bẹse nọ a re ti ru ewegrẹ riẹ họ uthihi awọ riẹ.” (Ahwo Hibru 10:12, 13) Kẹsena, kẹle obọ ekuhọ ikpe-udhusoi ọsosuọ orọ ekele edẹ mai na, ukọ na Jọn nọ ọ kpako no na ọ tẹ jọ eruẹaruẹ ruẹ Jihova, Osu Ehrugbakpọ na nọ ọ be rehọ Kristi Jesu mu wọhọ Ovie ọrọ Uvie odhiwu nọ a ro mu obọ na. (Eviavia 11:15; 12:1-5) Nọ ma te roro te oria nọ ma te no evaọ ikuigbe akpọ na, ma rẹ sae ruẹ imuẹro ilogbo nọ i dhesẹ nọ evaọ 1914 Kristi o ro muhọ esuo wọhọ Ovie Mesaya evaọ obọ odhiwu.a

 3. (a) Edhere ọfa vẹ usiuwoma Uvie na o rọ da owọ muotọ no anwọ 1914 ze? (b) Enọ vẹ ma rẹ sae nọ oma mai?

³ Ẹhẹ, anwọ 1914 ze usiuwoma Uvie na o da owọ muotọ no evaọ edhere ọfa. Kristi o muhọ esuo no gidigba wọhọ Ovie ọrọ Uvie Ọghẹnẹ nọ o rrọ obọ odhiwu, dede na “eva evie ewegrẹ” riẹ. (Olezi 110:1, 2; Matiu 24:14; Eviavia 12:7-12) Ofariẹ, idibo omarokpotọ riẹ wariẹ akpọ na họ a be rehọ ajọwha yo-ẹme kẹ udu esuo riẹ ẹkwoma Ebaibol nọ a bi ro wuhrẹ ahwo evaọ akpọ na soso, iruo ewuhrẹ nọ a rẹ ruẹ obọ riẹ hẹ evaọ ikuigbe ohwo-akpọ. (Daniẹl 7:13, 14; Matiu 28:18) Ileleikristi nọ a rehọ ẹzi wholo na, nọ e rrọ “emọ uvie na,” a be gbodibo wọhọ “unuẹworo Kristi.” Ogbotu ọrọ “igodẹ efa” nọ i bi vi haro na a be rehọ oma kpotọ tha enọ a rehọ ẹzi wholo na uke bi ru iruo wọhọ enyukọ erọ Uvie Ọghẹnẹ. (Matiu 13:38; 2 Ahwo Kọrint 5:20; Jọn 10:16) O make rrọ ere na, u fo nọ ma rẹ kiẹ oma mai riwi sọ mai omomọvo o gine vuhu udu-esuo Kristi mu. Kọ ma be dadamu roma kpotọ kẹe? Ẹvẹ ma sae rọ roma kpotọ kẹ Ovie nọ o bi su evaọ obọ odhiwu? Joma kake ta ẹme kpahe ẹjiroro nọ ma jẹ roma kpotọ kẹ Kristi.

Ovie nọ Uruemu-Aghae Riẹ O be Wọ Ahwo nọ O bi Su Roma Kpotọ

 4. Eva etoke odibọgba otọakpọ riẹ, eme Jesu o ru wọhọ Ovie nọ a salọ?

⁴ Edẹro kẹ eware nọ o ru no gbe uruemu-aghae riẹ o be wọ omai yo-ẹme kẹ Kristi. (1 Pita 1:8) Nọ Jesu ọ jọ otọakpọ wọhọ Ovie nọ a salọ, o dhesẹ ẹmẹvo ọrọ eware nọ o ti ru wọhọ Ovie okenọ o ti su akpọ na soso evaọ oke nọ Ọghẹnẹ o fihọ. Ọ kuọ ahwo nọ ohọo u je kpe. O siwi enọ e jẹ mọ, enọ i tuaro, enọ e ko, enọ i diezọ, gbe enọ i dienu. Ọ tubẹ kpare ahwo jọ nọ a whu zihe ziọ uzuazọ. (Matiu 15:30, 31; Luk 7:11-16; Jọn 6:5-13) U te no ere no, nọ ma tẹ riẹ kpahe uzuazọ nọ Jesu o yeri okenọ ọ jọ otọakpọ u re fi obọ họ kẹ omai riẹ uruemu-aghae riẹ—maero kọ uyoyou oma-olahiẹ riẹ, onọ u ru rie nọ o ro fo kẹ Osu otọakpọ evaọ obaro. (Mak 1:40-45) Napoléon Bonaparte ọ ta kpahe onana nọ: “Alexander, Caesar, Charlemagne, gbe mẹ omamẹ ma rehọ uvie-ivie dikihẹ, rekọ ẹvẹ ma sai ro ru ikpeware enana? Ogaga. Jesu Kristi ọvo họ ohwo nọ ọ rọ uyoyou rehọ Uvie riẹ dikihẹ, yọ rite inẹnẹ, ima ahwo buobu a rẹ rehọ fiki riẹ whu.”

 5. Fikieme uruemu-aghae Jesu u ro si ahwo uru tere?

⁵ Fikinọ Jesu ọ jọ wowolẹ avọ eva i ro kpotọ, ahwo nọ ọkora o jọ oma fiki ebẹbẹ gbe itunyẹ sa-sa, a je wo omosasọ no uruemu ẹwo riẹ gbe iwuhrẹ riẹ nọ e rẹ kẹ ọbọga ze. (Matiu 11:28-30) Oma o jẹ were emaha na re a jọ kugbei. Ọwhọ ọ wọ ahwo nọ a wo orimuo avọ omarokpotọ zihe ruọ ilele riẹ. (Matiu 4:18-22; Mak 10:13-16) Adhẹẹ gbe ororokẹ nọ o wo kẹ amọfa o wha riẹ ze nọ eyae buobu nọ i wo ozodhẹ Ọghẹnẹ a rọ rehọ oma kpotọ kẹe, otu rai jọ buobu a daoma, rehọ oke, gbe ekwakwa rai rẹrote Jesu nọ o bi ru iruo odibọgba riẹ na.—Luk 8:1-3.

 6. Ọdawẹ iroro vẹ Jesu o dhesẹ okenọ Lazarọs o whu?

⁶ Kristi o dhesẹ abọjọ ọrọ ọdawẹ nọ o wo kẹ amọfa eva okenọ Lazarọs ogbẹnyusu ọghaghae riẹ o whu. Akọriọ Meri avọ Mata ọ da riẹ te epanọ ọ sai ro kru imẹ-idio riẹ hẹ, kẹsena “ọ tẹ viẹ.” Ọ ‘rova’—fiki edada gbe uweri ulogbo dede nọ ọ riẹ nọ omoke jọ krẹ ọ te kpare Lazarọs zihe ziọ uzuazọ. Fiki uyoyou gbe ohrọ riẹ, Jesu ọ tẹ rehọ ogaga nọ Ọghẹnẹ ọ kẹ riẹ rọ kpare Lazarọs no uwhu ze.—Jọn 11:11-15, 33-35, 38-44.

 7. Fikieme Jesu o ro te ohwo nọ ma rẹ roma kpotọ kẹ? (Rri ẹkpẹti nọ ọ rrọ ẹwẹ-obe avọ 31 na re.)

⁷ Epanọ Jesu o wo uyoyou ga te kẹ oware nọ u kiẹrẹe je wo evedha te kpahe eviẹhọ gbe emuemu u mu omai urirẹ. Isiava ọ jowọ avọ uduowha le ethueki uvo-uthe no evaọ etẹmpol na. (Matiu 21:12, 13; Jọn 2:14-17) Ofariẹ, nọ ọ jọ otọakpọ evaọ oma-uwo, ọ ruẹ oghẹrẹ uye sa-sa, onọ o kẹ riẹ ovuhumu orọ oghẹrẹ uye gbe ebẹbẹ nọ i bi te omai ahwo-akpọ. (Ahwo Hibru 5:7-9) Jesu ọ tẹ jẹ riẹ epanọ o jọ re a mukpahe je kienyẹ ohwo gheghe. (Jọn 5:15-18; 11:53, 54; 18:38–19:16) Ukuhọ riẹ, ọ rehọ uduowha roma kẹ uwhu-oja re ọ ruẹsi ru ẹjiroro Ọsẹ riẹ gba jẹ kẹ ahwo nọ a rrọ otọ esuo riẹ uzuazọ ebẹdẹ bẹdẹ. (Jọn 3:16) Kọ uruemu-aghae itieye nọ Kristi o dhesẹ na e gbẹ wọ owhẹ nọ whọ rẹ rọ dadamu gbodibo kẹe ẹsikpobi? (Ahwo Hibru 13:8; Eviavia 5:6-10) Rekọ eme o gwọlọ re ohwo ọ sae jọ otọ esuo Kristi Ovie na?

Oware nọ O Gwọlọ re A Sae Jọ Otọ Esuo Na

 8. Eme a gwọlọ mi enọ e rrọ otọ esuo Kristi?

⁸ Roro kpahe oriruo nana: Re ohwo ọ sae jọ ọmotọ orẹwho ofa o gwọlọ ugogo itee jọ nọ ohwo na ọ rẹ nya te. A rẹ sae gwọlọ mi ahwo nọ a wo isiuru ekpohọ orẹwho ofa nọ a re wo emamọ uruemu, jẹ nyate itee jọ evaọ abọ omokpokpọ. Epọvo na re, o gwọlọ nọ ahwo nọ a rrọ otọ esuo Kristi a rẹ yọrọ utee ukpehru orọ ẹfuọ uruemu gbe emamọ edikihẹ abọ-ẹzi.—1 Ahwo Kọrint 6:9-11; Ahwo Galesha 5:19-23.

 9. Ẹvẹ ma sai ro dhesẹ nọ ma be roma kpotọ kẹ Kristi?

⁹ Jesu ọ gwọlọ re inọ ahwo nọ a rrọ otọ esuo riẹ a rẹ roma kpotọ kẹe gbe Uvie riẹ. A re dhesẹ omarokpotọ utioye na ẹkwoma ẹrria lele eware nọ o wuhrẹ evaọ okenọ ọ jọ otọakpọ wọhọ Ovie nọ a salọ. Wọhọ oriruo, a rẹ rehọ isiuru Uvie na gbe oreva Ọghẹnẹ uruo karo kẹ ilale eyero akpọ. (Matiu 6:31-34) A rẹ jẹ daoma rehọ osegboja dhesẹ oghẹrẹ uruemu Kristi, nọ a tẹ make rrọ otọ edawọ ebẹbẹ. (1 Pita 2:21-23) Ofariẹ, ahwo nọ a rrọ otọ esuo Kristi a rẹ raro kele oriruo riẹ ẹkwoma iroro obọrai nọ a re ro ru ewoma kẹ amọfa.—Matiu 7:12; Jọn 13:3-17.

10. Oghẹrẹ vẹ a sai ro dhesẹ nọ a be roma kpotọ kẹ Kristi evaọ (a) uviuwou gbe (b) ukoko na?

¹⁰ Ilele Jesu a re je dhesẹ nọ a be roma kpotọ kẹ Kristi ẹkwoma ọkpọ uruemu riẹ nọ a re dhesẹ evaọ iviuwou rai. Wọhọ oriruo, ezae uwou-orọo a re dhesẹ nọ a be roma kpotọ kẹ Ovie obọ odhiwu rai ẹkwoma ọkpọ uruemu Kristi nọ a re ro lele eyae gbe emọ rai yeri. (Ahwo Ẹfẹsọs 5:25, 28-30; 6:4; 1 Pita 3:7) Eyae uwou-orọo a re dhesẹ nọ a be roma kpotọ kẹ Kristi ẹkwoma ẹyọrọ ẹfuọ uruemu gbe edhesẹ “omaurokpotọ avọ ẹzi udhedhẹ.” (1 Pita 3:1-4; Ahwo Ẹfẹsọs 5:22-24) U re dhesẹ nọ emọ a be roma kpotọ kẹ Kristi nọ a tẹ be raro kele oriruo ẹmeoyo riẹ. Okenọ ọ jọ uzoge, Jesu ọ jọ otọ ẹmeoyo ọsẹgboni riẹ, dede nọ a jọ ahwo-akpọ sebaẹgba. (Luk 2:51, 52; Ahwo Ẹfẹsọs 6:1) Ahwo nọ a rrọ otọ esuo Kristi a rẹ rehọ unevaze yo-ẹme kẹe, daoma raro kele iei ẹkwoma ‘ohwohwo nọ a re weri kẹ, je you wọhọ inievo’ gbe ẹkwoma “ohrọ” nọ a re wo kẹ ohwohwo. A rẹ daoma jọ wọhọ Kristi, wo “udu udhedhẹ. [A rẹ] rọ uyoma fi-ifo uyoma ha, hayo ofu fi-ifo ofu hu.”—1 Pita 3:8, 9; 1 Ahwo Kọrint 11:1.

Enọ E Rrọ Otọ Esuo Kristi A re Koko Izi Riẹ

11. Izi vẹ ahwo nọ a rrọ otọ esuo Kristi a re koko?

¹¹ Wọhọ epanọ ahwo nọ a gwọlọ jọ emotọ orẹwho ofa a re koko izi orẹwho okpokpọ na, ere ahwo nọ a rrọ otọ esuo Kristi a re koko “uzi Kristi na” ẹkwoma uzuazọ rai nọ a re yeri lele eware kpobi nọ Jesu o wuhrẹ je juzi rai. (Ahwo Galesha 6:2) Maero, a rẹ roma kpotọ koko “uzi uvie na,” uyoyou. (Jemis 2:8) Ẹvẹ a re ro koko izi enana?

12, 13. Ẹvẹ ma rẹ rọ dadamu koko “uzi Kristi na”?

¹² Ahwo nọ a rrọ otọ esuo Kristi yọ ahwo sebaẹgba nọ a wo ethobọ re. (Ahwo Rom 3:23) Fikiere, u fo nọ a re wo “uvi uyoyou” re a ruẹsi ‘you ohwohwo no eva ze.’ (1 Pita 1:22) Nọ “ohwo jọ o te wo eguago kpahe ọrivẹ riẹ,” Ileleikristi a rẹ rehọ ẹmeoyo fi uzi Kristi na họ iruo ẹkwoma ‘ithihakọ nọ a re wo kẹ ohwohwo’ jẹ rọ ‘vrẹ ohwo.’ Nọ a te bi koko uzi nana, u re fi obọ họ kẹ ai kpairoro vrẹ sebaẹgba amọfa je wo ẹjiroro nọ a re ro you ohwohwo. Kọ eva e gbẹ be were owhẹ nọ whọ rọ rrọ kugbe ahwo nọ a rehọ fiki ẹmeoyo kẹ Ovie oyoyou mai na rehọ uyoyou gẹgọ, “onọ orọ ọwhẹgbe eware kpobi”?—Ahwo Kọlọsi 3:13, 14.

¹³ Ofariẹ, Jesu ọ ta nọ uyoyou nọ o fi oriruo riẹ hotọ o ga vi onọ ahwo a re dhesẹ kẹ omoma rai gheghe. (Jọn 13:34, 35) Nọ ma te bi dhesẹ uyoyou kẹ ahwo nọ a you omai ọvo, kiyọ ma rehọ edhere ọvo woma ‘vi amọfa’ ha. O tẹ rrọ ere kiyọ uyoyou mai u te he. Jesu ọ ta udu họ omai awọ nọ ma raro kele uyoyou Ọsẹ riẹ ẹkwoma ewo uyoyou nọ a kẹ ujaje riẹ, onọ o rẹ wọ omai you makọ ewegrẹ nọ i mukpahe je bi kpokpo omai. (Matiu 5:46-48) Uyoyou nana o rẹ jẹ wọ enọ e rrọ otọ Uvie na thihakọ dadamu iruo rai nọ e mai wuzou na. Iruo vẹ ye?

A Dawo Omarokpotọ Rai

14. Fikieme iruo usiuwoma ota na i ro wuzou tere?

¹⁴ Ahwo nọ a rrọ otọ Uvie Ọghẹnẹ a wo iruo nọ i wuzou gaga enẹna, onọ a re ro ‘se isẹri uvie Ọghẹnẹ.’ (Iruẹru 28:23) O roja re a ru ere keme Uvie Mesaya na o te kpare esuo ehrugbakpọ Jihova. (1 Ahwo Kọrint 15:24-28) Nọ ma tẹ be ta usiuwoma na ahwo nọ a be gaviezọ kẹ omai a jẹ sai wo uvẹ nọ a rẹ rọ ziọ otọ Uvie Ọghẹnẹ. Ofariẹ, oghẹrẹ nọ ahwo a jowọ lele ovuẹ yena oye Kristi Ovie na o ti rri ro gu ahwo-akpọ ẹdhọ. (Matiu 24:14; 2 Ahwo Tẹsalonika 1:6-10) Fikiere, ugogo edhere nọ ma re ro dhesẹ nọ ma be roma kpotọ kẹ Kristi họ, nọ ma te bi yo ẹme kẹ ujaje riẹ nọ ma rẹ rọ vuẹ amọfa usiuwoma Uvie na.—Matiu 28:18-20.

15. Eme ọ so riẹ nọ o rọ rrọ odawọ kẹ Ileleikristi re a sae yọrọ omarokpotọ?

¹⁵ Setan ọ be dao idhere nọ i te rie obọ kpobi rọ wọso iruo usiuwoma ota na, yọ isu ahwo-akpọ a bi dhesẹ ovuhumuo kẹ udu-esuo nọ Ọghẹnẹ ọ kẹ Kristi na ha. (Olezi 2:1-3, 6-8) Oyejabọ nọ Jesu ọ rọ vẹvẹ ilele riẹ unu nọ: “ ‘Odibo ọrẹ ro vi Olori riẹ hẹ.’ Re a te kpokpo mẹ, a re kpokpo owhai re.” (Jọn 15:20) Fikiere, Ileleikristi a rrọ ohọre abọ-ẹzi nọ u bi fi omarokpotọ rai họ odawọ.—2 Ahwo Kọrint 10:3-5; Ahwo Ẹfẹsọs 6:10-12.

16. Ẹvẹ ahwo nọ a rrọ otọ Uvie na a rẹ rọ rehọ “eware Ọghẹnẹ kẹ Ọghẹnẹ”?

¹⁶ Nọ o rrọ ere na, ahwo nọ a rrọ otọ Uvie Ọghẹnẹ a rẹ roma kpotọ kẹ Ovie rai nọ a rẹ ruẹ hẹ, yọ orọnikọ a re dhesẹ orivo kẹ esuo ahwo-akpọ họ. (Taitọs 3:1, 2) Jesu ọ ta inọ jọ a rehọ “eware Siza kẹ Siza, gbe eware Ọghẹnẹ kẹ Ọghẹnẹ.” (Mak 12:13-17) Fikiere, ahwo nọ a rrọ otọ esuo Kristi a re yo ẹme kẹ izi egọmeti nọ e wọso izi Ọghẹnẹ hẹ. (Ahwo Rom 13:1-7) Dede na, okenọ ogbẹgwae okọto ahwo Ju a dhesẹ orivo kẹ uzi Ọghẹnẹ, ta kẹ ilele Jesu nọ a siọ usiuwoma ota ba, ilele na a dhesẹ edikihẹ rai via whawha avọ adhẹẹ inọ a re “yo ẹme Ọghẹnẹ vi o rọ ahwo.”—Iruẹru 1:8; 5:27-32.

17. Fikieme ma sae rọ rehọ uduowha rẹriẹ ovao dhe ẹdawọ omarokpotọ?

¹⁷ Uzẹme, re ahwo nọ a rrọ otọ esuo Kristi a sai yo ẹme kẹ Ovie rai evaọ otọ ukpokpoma o gwọlọ uduowha. Ghele na, Jesu ọ ta nọ: “Eva e were owhai nọ ahwo a tẹ la owhai eka, a vẹ kẹ owhai uye, a vẹ ta erue oghẹrẹ eware iyoma kpobi họ uzou rai fiki mẹ. Ghọghọ, eva e were owhai hrọ keme osa rai nọ o rọ obọ odhiwu o rẹ ruaro.” (Matiu 5:11, 12) Ilele Kristi erọ ikpe udhusoi ọsosuọ a ruẹ uzẹme orọ eme eyena rono eware nọ e via kẹ ai ze. Makọ okenọ a fa ai eviaviẹ fikinọ a ruabọhọ jẹ ta usiuwoma Uvie na, a ghọghọ “epanọ a kele ai gbe enọ ighine te erọjẹfiẹ fiki odẹ na. Kẹdẹ kẹdẹ a jẹ jọ eva uwou egagọ-ode gbe obọ uwou seri uwuhrẹ Jesu Kristi họ họ.” (Iruẹru 5:41, 42) U fo nọ a re yere owhai keme wha bi dhesẹ oghẹrẹ ẹzi ẹmeoyo ọvona nọ wha bi ro thihakọ ebẹbẹ, ẹyao, uweri uwhu ohwo nọ wha you, hayo omukpahọ.—Ahwo Rom 5:3-5; Ahwo Hibru 13:6.

18. Eme ẹme nọ Jesu ọ ta kẹ Pọntiọs Pailet na o dhesẹ?

¹⁸ Okenọ Jesu ọ gbẹ jọ Ovie nọ a salọ kpahe no ọvo, ọ ta kẹ Osu Ubrotọ Rom na, Pọntiọs Pailet nọ: “Uvie mẹ o rrọ orọ akpọ na ha; uvie mẹ ohẹ jọ orọ akpọ na, idibo mẹ e hẹ họre kẹ omẹ re a se omẹ ba ẹrehọ kẹ ahwo Ju; rekọ enẹna uvie mẹ orọ etenẹ hẹ.” (Jọn 18:36) Fikiere, ahwo nọ a rrọ otọ esuo Uvie odhiwu a re fi ẹmo ho yọ a re wobọ evaọ ozighi ahwo-akpọ ọvuọvo gbe he. Evaọ ẹmeoyo kẹ “Ovie Udhedhẹ” na, a rẹ jọ abọ ọvuọvo ho evaọ iruẹru itu sasa nọ e rrọ akpọ na.—Aizaya 2:2-4; 9:6, 7.

Osaohwa Ebẹdẹ Bẹdẹ kẹ Ahwo nọ A Roma Kpotọ kẹ Esuo Na

19. Fikieme ahwo nọ a rrọ otọ esuo Kristi a sai ro rri kpohọ obaro na avọ udufihọ?

¹⁹ Ahwo nọ a roma kpotọ kẹ Kristi, “Ovie ivie” na, a wo udufihọ kpahe oware nọ obaro na o te wha ze. A be rehọ ọwhọ hẹrẹ edhesẹvia ọrọ ogaga uvie nọ Ọghẹnẹ ọ kẹ riẹ. (Eviavia 19:11–20:3; Matiu 24:30) Okiọkotọ “emọ uvie” nọ i wo omarokpotọ nọ a rehọ ẹzi wholo na, a bi rẹro ukuoriọ oghaghae rai nọ a ti ro su wọhọ ivie kugbe Kristi evaọ obọ odhiwu. (Matiu 13:38; Luk 12:32) Otu “igodẹ efa” erọ Kristi nọ e roma kpotọ a be rehọ ọwhọ hẹrẹ ọjẹrehọ rai, nọ Ovie rai o ti ro bo nọ: “Wha nyaze, enọ Ọsẹ mẹ ọ ghale, wha te reuku uvie nọ a ruẹrẹ kẹ owhai nọ emuhọ akpọ na ze.” (Jọn 10:16; Matiu 25:34) Fikiere, ajọ o jọ ọtamuo ahwo kpobi nọ a rrọ otọ esuo Uvie na re a ruabọhọ dadamu gbodibo kẹ Kristi Ovie na.

[Oruvẹ-obotọ]

Kọ Whọ Sae k’Iyo Nana Vevẹ?

• Fikieme Kristi o ro fo ohwo nọ ma re yo-ẹme kẹ?

• Ẹvẹ ahwo nọ a rrọ otọ esuo Kristi a re ro dhesẹ nọ a be roma kpotọ kẹe?

• Fikieme o rọ rrọ isiuru mai re ma dadamu usu mai kugbe Kristi Ovie na?

[Ẹkpẹti nọ o rrọ ẹwẹ-obe avọ 31]

IRUEMU-AGHAE EFA NỌ JESU O DHESẸ

Ababọ Ọriẹwẹ—Jọn 4:7-30

Ohrọ—Matiu 9:35-38; 12:18-21; Mak 6:30-34.

Uyoyou oma-olahiẹ—Jọn 13:1; 15:12-15.

Edikihẹ-ọwhawha—Matiu 4:1-11; 28:20; Mak 11:15-18.

Ororokẹ—Mak 7:32-35; Luk 7:11-15; Ahwo Hibru 4:15, 16.

Orimuo—Matiu 15:21-28.

[Uwoho nọ o rrọ ẹwẹ-obe avọ 29]

U re dhesẹ nọ ma dadamu bi koko “uzi Kristi na” nọ ma te bi dhesẹ uyoyou kẹ ohwohwo

[Iwoho nọ e rrọ ẹwẹ-obe avọ 31]

Kọ iruemu-aghae Kristi e be wọ owhẹ dadamu gbodibo kẹe?