Orọo Gbe Emọ-iyẹ Evaọ Oke Urere Nana

‘Oke nọ u kiọkọ o rẹ kpẹkpẹe.’—1 KỌR. 7:29.

 1. (a) Eware vẹ e rrọ usu “ẹbẹbẹ” nọ ahwo a rẹriẹ ovao dhe nẹnẹ? (b) Fikieme inwene nọ e be romavia evaọ iviuwou e jẹ rrọ ọdawẹ k’omai?

EBAIBOL e ta nọ “eva oke urere” na a ti fi ẹmo, etọ i ti nuhu, ohọo u ti mu, yọ eyao nọ i re vo e te jariẹ. (Dan. 8:17, 19; Luk 21:10, 11) Ebaibol na e tẹ jẹ vẹvẹ unu inọ oke onana o te jọ etoke obẹbẹ nọ inwene ilogbo e te jọ roma via evaọ ikuigbe ohwo-akpọ. Idhọvẹ nọ e te jọ iviuwou yọ “ẹbẹbẹ” jọ nọ o ti ru “edẹ urere” na jọ gaga. (2 Tim. 3:1-4) Fikieme inwene nana e rọ rrọ ọdawẹ k’omai? Keme e nya eria kpobi duwu no jẹ ga te epanọ i bi ro kpomahọ oghẹrẹ nọ Ileleikristi a bi rri orọo gbe emọ-iyẹ nẹnẹ. Ẹvẹ o rọ rrọ ere?

 2. Ẹvẹ ahwo-akpọ a bi rri orọo gbe orọo-ofa?

² O rẹ lọlọhọ gaga nẹnẹ re a fa orọo, o tẹ jẹ rrọ odode, evaọ erẹwho buobu a be fa erọo kiti vi epaọ anwẹdẹ. Rekọ, jọ o thọrọ omai ẹro ho inọ oghẹrẹ nọ Jihova Ọghẹnẹ o rri orọo gbe orọo-ofa u wo ohẹriẹ gaga no epanọ ahwo-akpọ a bi rri rie. Kọ ẹvẹ Jihova o tube rri orọo gbe orọo-ofa?

 3. Ẹvẹ Jihova avọ Jesu Kristi a rri orọo?

³ Jihova Ọghẹnẹ ọ gwọlọ nọ enọ e rọo no a rọ ọghọ kẹ eyaa orọo rai. Okenọ ọ to orọo ọzae avọ aye ọsosuọ na họ, Jihova ọ ta nọ “ọzae ọ rẹ . . . gbalọ aye riẹ, a vẹ jọ uwo ovo.” Jesu Kristi ọ wariẹ ẹme ọyena uwhremu na o te je fibae inọ: “Fikiere onọ Ọghẹnẹ o kugbe no, a jọ ohwo ọvo ọ hẹriẹ e he.” Jesu ọ tẹ jẹ ta nọ: “Kohwo kohwo nọ o siobọno aye riẹ o gbẹrọ fiki ẹnwae-obro ho, ọ jẹ rehọ ọfa, o bruẹnwae.” (Emu. 2:24; Mat. 19:3-6, 9) Fikiere, Jihova avọ Jesu a rri orọo wọhọ oware nọ o rẹ fa ha ajokpanọ ọzae hayo aye na o whu. (1 Kọr. 7:39) Nọ o rọnọ orọo yọ ọruẹrẹfihotọ Ọghẹnẹ na, orọo-ofa yọ oware nọ a rẹ rọ zaro ho. Ebaibol e tubẹ ta dede nnọ Jihova o mukpahe orọo nọ a fa otẹrọnọ ẹnwae-obro o wha riẹ ze he.a—Se Malakae 2:13-16; 3:6.

Mu Ọghọ Kẹ Orọo

 4. Fikieme izoge Ileleikristi jọ a be rọ vioja inọ a rehọ okpakpa ruọ orọo?

⁴ Ahwo a be rọ ọfariẹ-ogbe họ nẹnẹ. Kẹdẹ kẹdẹ a bi dhesẹ iwoho nọ e rẹ kpare isiuru ọfariẹ-ogbe kẹ ahwo. Iwoho nana e rẹ sai kpomahọ omai, maero kọ izoge iyoyou mai nọ ma gbẹ rrọ ukoko na. Ẹvẹ izoge Ileleikristi a re rri eware etọtọ nana nọ e rẹ sae kpare isiuru na dede nọ a be daoma gba oma rai? Ejọ e rehọ e riẹ nnọ ukpenọ a ti gbe ọfariẹ kọ a rẹ dhugbẹ kake rọo. A roro nọ enẹ a sae rọ whaha ọfariẹ-ogbe. Rekọ a tẹ rọo te omoke jọ no, ejọ e vẹ ta inọ a hae riẹ nnọ enẹ eware e te jọ, a hae gbẹ hẹrẹ omojọ. Fikieme? Keme nọ omoke jọ o tẹ vrẹ no, a vẹ te ruẹ nọ eware buobu nọ e rẹ were ọjọ, e rẹ were ọdekọ họ. Nọ o tẹ via ere, yọ ọzae avọ aye otiọye na a rẹriẹ ovao ku ẹbẹbẹ ologbo no.

 5. Eme o re fi obọ họ kẹ enọ e rọo no re a sai ru eyaa nọ a yaa evaọ ẹdẹ ehaa orọo rai gba? (Rri eme oruvẹ-obotọ na.)

⁵ O rẹ kẹ uye gaga nọ ohwo ọ tẹ rehọ ibe Oleleikristi nọ o wo ohẹriẹ gaga no oghẹrẹ nọ o roro nọ ọ rrọ. (1 Kọr. 7:28) Rekọ, eware e tẹ make ga kẹhẹ, Ileleikristi uzẹme a riẹ inọ orọnikọ orọo-ofa nọ o rọwokugbe Ikereakere na ha a re ro ku ebẹbẹ orọo họ họ. Fikiere, u fo nọ ma rẹ jọ ukoko na fi obọ họ jẹ rehọ adhẹẹ kẹ ahwo nọ a be daoma gaga re a ruẹ nọ a daji orọo rai fikinọ a gwọlọ ru eyaa nọ a yaa evaọ ẹdẹ ehaa orọo rai gba.b

 6. Ẹvẹ izoge Ileleikristi nọ e re rọo ho a re rri orọo?

⁶ Kọ whẹ yọ uzoge nọ ọ re rọo ho? Otẹrọ ere, ẹvẹ who rri orọo. Whọ rẹ sae whaha ebẹbẹ buobu nọ whọ tẹ hẹrẹ bẹsenọ whọ rẹ kpako te evaọ ikpe, iroro, gbe evaọ abọ-ẹzi re who te ti mu usu orọo họ ẹnya kugbe oniọvo-ọmọtẹ hayo ọrọ ọmọzae. Ma riẹ nọ Ebaibol e fodẹ unu ikpe jọ họ nọ ohwo o re te re ọ tẹ te rọo.c Rekọ, Ebaibol i dhesẹ inọ u re woma re whọ hẹrẹ bẹsenọ whọ rẹ vrẹ etoke nọ isiuru owezẹ e rẹ rọ jọ gaga na. (1 Kọr. 7:36) Fikieme? Keme isiuru owezẹ e rẹ sae lẹliẹ ohwo jiroro thọ onọ o rẹ sae wha ebẹbẹ ze evaọ obaro. Kareghẹhọ, inọ ehrẹ nọ Jihova ọ kẹ kpahe orọo evaọ Ebaibol na e rrọ rọkẹ ewoma ra gbe evawere ra.—Se Aizaya 48:17, 18.

Yọrọ Emọ Ra Ziezi

 7. Eme emoha jọ nọ a ruọ orọo obọ a bi ru, kọ ẹvẹ onana o rẹ rọ wha idhọvẹ ziọ orọo?

⁷ Emezae avọ emetẹ jọ nọ a rọo a bi yẹ emọ dede nọ ae omarai a gbẹ rọ emaha. A ri dhomamu re a riẹ ohwohwo ziezi taure a te ti yẹ ọmọ họ, kpakiyọ o gwọlọ inọ a rẹ rẹro te ọmọ nọ a yẹ t’aso t’uvo. Nọ oni na ọ jẹ te tẹrovi epanọ ọ rẹ rọ rẹrote ọmọ ọboba na, ọzae na o ve ti roro nọ aye na ọ be kẹe ova ha. Ofariẹ, owezẹ nọ ọmọ na ọ rẹ whaha ae ẹsibuobu o rẹ sae wha idhọvẹ fihọ udevie rai imava na. Kẹsena a ve ti vuhumu inọ ufuoma nọ a wo vẹre o gbẹ riẹ hẹ. Enẹna a gbẹ te sai kpohọ oria hayo ru oware kpobi evaọ oke nọ u je rai hi, wọhọ epanọ o jọ vẹre. Kọ eme a re ru nọ eware i nwene no na?

 8. Ẹvẹ u fo nọ a re rri emọ-iyẹ, kọ fikieme?

⁸ Wọhọ epanọ u fo nọ a re rri orọo ghaghae na, ere u fo nọ a re rri emọ-iyẹ wọhọ owha-iruo gbe uvẹ-ọghọ nọ u no obọ Ọghẹnẹ ze. O tẹ make gwọlọ nọ Ileleikristi nọ e rọo no a re nwene oghẹrẹ nọ a bi yeri uzuazọ rai fikinọ a yẹ ọmọ no, a rẹ daoma ru inwene nana evaọ emamọ edhere. Nọ orọnọ Jihova ọ ma ahwo-akpọ evaọ oghẹrẹ nọ a sai ro yẹ emọ na, eyewọ a re rri ọmọ nọ a yẹ na wọhọ “ukuoriọ . . . nọ u no obọ ỌNOWO ze.” (Ol. 127:3) Esẹgbini nọ e rrọ Ileleikristi a rẹ daoma wọ owha-iruo rai wọhọ eyewọ nọ e gwọlọ ru oware nọ u kiehọ ‘evaọ aro Ọnowo na.’—Ẹf. 6:1.

 9. (a) Eme ọmọ-ọyọrọ o kẹre te? (b) Eme ọzae ọ rẹ sai ru ro fi obọ họ kẹ aye riẹ kru oma ga evaọ abọ-ẹzi?

⁹ Ọmọ-ọyọrọ o rẹ rehọ ikpe omolahiẹ buobu. O gwọlọ omodawọ gbe oke ziezi. U fo re ọzae nọ ọ rrọ Oleleikristi ọ riẹ inọ a te yẹ ọmọ no, evaọ ikpe buobu, ọmọ na ọ te whaha aye riẹ ẹmeoyo evaọ iwuhrẹ, yọ o ti wo uvẹ tere he rọkẹ ewuhrẹ omobọ riẹ gbe eroro kpahe ẹme Ọghẹnẹ. Onana o rẹ sai kpomahọ edikihẹ abọ-ẹzi riẹ yoyoma. Re a yọrọ ọmọ ziezi o gwọlọ nọ ọzae na ọ rẹ dao utho ẹgba riẹ kpobi re o fi obọ họ evaọ ẹruorote ọmọ na. Nọ a te no ewuhrẹ ze no, ọ sae rehọ eme jọ nọ a ta ro gbiku kugbei re eme buobu e siẹe ba evru ku. Ọ sai je fi obọ họ kẹ aye riẹ wọ ọmọ na re aye riẹ ọ sai wo uvẹ ta usiuwoma Uvie na ziezi.—Se Ahwo Filipai 2:3, 4.

10, 11. (a) Ẹvẹ a rẹ rọ rehọ “ọkpọvio iroro ọrọ Jihova” yọrọ emọ? (b) Fikieme u je fo re a jiri esẹgbini Ileleikristi buobu?

¹⁰ Orọnikọ re a kẹ ọmọ emuore, emuẹgọ, jẹ rẹro tei evaọ okenọ ọ tẹ be mọ ọvo họ a yọrọ ọmọ ziezi hi. Maero kọ evaọ edẹ urere muomu nana, u fo re a wuhrẹ emọ emamọ uruemu nọ a gbẹ rrọ emaha na. U fo re esẹgbini a rehọ “ọwhọkuo gbe ọkpọvio iroro ọrọ Jihova” rọ yọrọ emọ rai. (Ẹf. 6:4, NW) “Ọkpọvio iroro” nana o gwọlọ nọ esẹgbini a rẹ kọ iroro Jihova họ udu ọmọ na no oke ọmaha ze rite etoke ikpe uzoge nọ e vọ avọ ebẹbẹ na.—2 Tim. 3:14, 15.

¹¹ Nọ Jesu ọ ta kẹ ilele riẹ inọ a nyai ru ilele no “erẹwho kpobi” ze, onana u kugbe obọ nọ esẹgbini a re fihọ kẹ emọ rai re a jọ ilele. (Mat. 28:19, 20) Onana o re bẹbẹ keme ahwo ogbekuo a wariẹ izoge họ. Fikiere, mai kpobi ma re jiri esẹgbini nọ e sai wuhrẹ emọ rai zihe ruọ Ileleikristi nọ e rehọ oma mudhe no. A rehọ ẹkwoma ẹrọwọ gbe omodawọ rai wọhọ uvi eyewọ ‘kparobọ’ vi akpọ na no.—1 Jọn 5:4.

Enọ E Rọo Ho Hayo Enọ I Yẹ Emọ họ Fiki Obọdẹ Ẹjiroro

12. Fikieme Ileleikristi jọ a rọ kpairoro vrẹ orọo tao?

¹² Nọ orọnọ ‘oke nọ u kiọkọ o rẹ kpẹkpẹe’ yọ uyerakpọ na u bi nwene na, Ebaibol e tẹ tuduhọ omai awọ inọ ma roro kpahe irere nọ i re te ohwo nọ ọ rọo ho. (1 Kọr. 7:29-31) Fiki onana, Ileleikristi jọ a salọ inọ a rẹ rọo vievie he hayo inọ a rẹ hẹrẹ ikpe buobu re a tẹ te rọo. Mai woma na, orọnikọ a be rehọ ufuoma nọ a wo na ro le eware akpọ họ. Ibuobu a jiroro inọ a rẹ seba ẹrọo re a sae rehọ ‘iroro nọ e hẹriẹ hẹ’ gọ Jihova. (Se 1 Ahwo Kọrint 7:32-35.) Ileleikristi jọ nọ e rọo ho a rrọ ekobaro hayo bi ru iruo evaọ Ebẹtẹle. Ejọ nọ e gwọlọ re Jihova ọ gbẹ rehọ ai ru iruo ziezi a daoma te epanọ a ro kpohọ Isukulu Ewuhrẹ Odibọgba na no. Makọ ejọ nọ i ru iruo odibọgba oke-kpobi na te oria jọ taure a tẹ te jiroro inọ a rẹ rọo, a ruẹ inọ eware nọ a wuhrẹ evaọ etoke ikpe yena kpobi i bi fi obọ họ kẹ ae evaọ orọo rai.

13. Fikieme ezae avọ eyae Ileleikristi jọ a rọ jiroro inọ a re yẹ hẹ?

¹³ Oware ofa jọ nọ o be via evaọ eria sa-sa evaọ akpọ na họ, ezae avọ eyae buobu a jiroro inọ a re yẹ hẹ. Ejọ i bi ru ere fikiọ ẹbẹbẹ ugho; efa re a ruẹsi wo uvẹ fiki iruo ilogbo nọ a rrọ. A rẹ sae jọ udevie Ileleikristi ruẹ ezae avọ eyae jọ enọ e gwọlọ yẹ emọ họ. Rekọ, ẹjiroro nọ a be mai ro ru onana họ re a wo uvẹ gọ Jihova ziezi. Inievo itieye na a be reawere orọo ghele. U no rai eva ze inọ a rẹ rehọ iruo Uvie na karo kẹ eware ezi jọ nọ orọo o rẹ wha ze. (1 Kọr. 7:3-5) Ezae avọ eyae itieye na enọ e be gbodibo kẹ Jihova gbe inievo rai na a rrọ iruo esẹro okogho, esẹro ubrotọ, hayo ahwo uviuwou Ebẹtẹle. Efa e rrọ ekobaro hayo imishọnare. Jihova ọ te kareghẹhọ iruo rai gbe uyoyou nọ a dhesẹ kẹ odẹ riẹ.—Hib. 6:10.

“Ukpokpoma”

14, 15. “Ukpokpoma” vẹ esẹgbini nọ e rrọ Ileleikristi a rẹ sai wo?

¹⁴ Pọl ukọ na ọ ta kẹ Ileleikristi nọ e rọo no inọ a ti wo “ukpokpoma.” (1 Kọr. 7:28) Ukpokpoma nana u kugbe okenọ ọzae hayo aye na, emọ rai, hayo esẹgbini rai nọ e who no a tẹ be mọ. O sae jẹ jọ ẹbẹbẹ nọ o re no ẹyọrọ emọ rai ze. Wọhọ epanọ ma ta evaọ obọ emuhọ uzoẹme nana, Ebaibol e ta inọ evaọ “edẹ urere” na, “oke ẹbẹbẹ [o] te tha.” Ojọ evaọ usu ebẹbẹ na họ emọ “a re ti yo ẹme e nọ i yẹ rai hi.”—2 Tim. 3:1-3.

¹⁵ Re a yọrọ emọ yọ owha-iruo ulogbo kẹ esẹgbini Ileleikristi. “Oke ẹbẹbẹ” nọ ahwo-akpọ a yeri ku na u bi kpomahọ omai re. Fikiere, eyewọ Ileleikristi a rẹ ruẹrẹ oma kpahe kẹse kẹse re a thọ emọ rai no ogbekuo “akpọ” na. (Ẹf. 2:2, 3) Rekọ ẹsejọ omodawọ esẹgbini jọ o sae jọ ofofe! Otẹrọnọ ọmọzae hayo ọmọtẹ nọ a jọ uviuwou Oleleikristi yọrọ o kie no egagọ Jihova, onana o sae jọ “ukpokpoma” hayo idhọvẹ kẹ esẹgbini nọ e rehọ ẹme Ọghẹnẹ ro wuhrẹ iẹe.—Itẹ 17:25.

“Uye Obẹbẹ Ruaro O rẹ te Jọ”

16. “Uye” vẹ Jesu ọ ruẹaro riẹ?

¹⁶ Uye ofa jọ o rrọ obaro tha nọ o te rro gaga vi ebẹbẹ kpobi nọ e rrọ orọo gbe ẹyọrọ emọ. Nọ Jesu ọ jẹ ruẹaro kpahe ọzino riẹ gbe ekuhọ uyerakpọ nana, ọ ta nọ: “Uye obẹbẹ ruaro o rẹ te jọ, u tioye o te jọ no emuhọ akpọ na ze ri te enẹ hẹ, ijo, o gbẹ sae jọ ofa ha.” (Mat. 24:3, 21) Uwhremu na Jesu o te dhesẹ inọ “otu obuobu” ọ rẹ te zọ evaọ ‘uye ulogbo na.’ Fiba onana, Setan avọ ahwo riẹ a te gbẹ họre Isẹri Jihova nọ e rẹ gwọlọ ẹme he na. Ababọ avro, onana o te jọ etoke ọbẹbẹ kẹ omai kpobi—te ekpako te emaha.

17. (a) Ẹvẹ ma sai ro rẹro uye ulogbo nọ o rrọ obaro tha na avọ udu? (b) Eme u re kpomahọ oghẹrẹ nọ ma re rri orọo gbe emọ-iyẹ?

¹⁷ O make rrọ ere na, ma re du ruawa oware nọ o rrọ obaro tha ha. Esẹgbini nọ i kru ẹrọwọ rai a rẹ sai rẹro inọ te ai te emọ esese rai a te zọ. (Se Aizaya 26:20, 21; Zef. 2:2, 3; 1 Kọr. 7:14) Rekọ, evaọ enẹna, jọ ẹkareghẹhọ inọ oke obẹbẹ ma be rria na u kpomahọ eriwo mai kpahe orọo gbe emọ-iyẹ evaọ oke urere nana. (2 Pita 3:10-13) Evaọ enẹ oruo, makọ ma rọo hayo ma rọo ho, t’oma yẹ t’oma yẹ hẹ, oghẹrẹ nọ ma bi yeri uzuazọ mai o vẹ te wha ujiro se Jihova gbe ukoko Ileleikristi na.

[Oruvẹ-obotọ]

Ọkiẹkpemu

• Fikieme izoge Ileleikristi a gbẹ rọ rehọ okpakpa ruọ orọo ho?

• Eme ẹyọrọ ọmọ o gwọlọ?

• Fikieme Ileleikristi jọ a rọ jiroro inọ a rẹ rọo ho, hayo a re yẹ hẹ?

• “Ukpokpoma” vẹ o rẹ sai te eyewọ Ileleikristi?

[Uwoho nọ e rrọ ẹwẹ-obe avọ 17]

Eme o rọ rrọ oware areghẹ re izoge Ileleikristi a kpako omojọ re a tẹ rọo?

[Uwoho nọ e rrọ ẹwẹ-obe avọ 18]

Ọzae ọ rẹ sai fi obọ họ kẹ aye riẹ rẹrote ọmọ re ọ sai w’obọ ziezi evaọ ẹgọ Ọghẹnẹ

[Uwoho nọ e rrọ ẹwẹ-obe avọ 19]

Fikieme ezae avọ eyae Ileleikristi jọ a rọ jiroro inọ a re yẹ hẹ?