Ẹme Jihova Ọ Rrọ Uzuazọ Oruvẹ no Obe Eviavia Ze—II

EME o rrọ obaro hẹrẹ enọ e be gọ Jihova Ọghẹnẹ gbe enọ e gọ riẹ hẹ? Eme o te via kẹ Setan avọ idhivẹri riẹ? Didi eghale ahwo-akpọ nọ a gọ Ọghẹnẹ a ti wo evaọ etoke Esuo Odu Ikpe Kristi na? A rẹ jọ Eviavia 13:1–22:21 ruẹ iyo enọ nana gbe enọ efa nọ i wuzou.a A rẹ jọ izou Ebaibol nana ruẹ eruẹaruẹ 9 urere evaọ usu eruẹaruẹ 16 nọ Jọn ukọ na ọ ruẹ evaọ ubrobọ ekuhọ ikpe-udhusoi ọsosuọ na.

Jọn o kere nọ: “Oghale ute ọnọ o se eme aruọruẹ na via, oghale ute enọ i yo rai gbe enọ i koko eme nọ e riẹe eva.” (Evia. 1:3; 22:7) Ese gbe efihiruo eme nọ e rrọ obe Eviavia na i re kpomahọ udu mai, bọ ẹrọwọ mai ga fihọ Ọghẹnẹ gbe Ọmọ riẹ, Jesu Kristi, o vẹ jẹ lẹliẹ omai wo ẹruore.b—Hib. 4:12.

A KU IGEBULE IHRẸ EVEDHA ỌGHẸNẸ NA

(Evia. 13:1–16:21)

Eviavia 11:18 e ta nọ: “Erẹwho na kpobi a te je mu ofu, rekọ ofu [Ọghẹnẹ] ọ tẹ ze, oke [nọ a rẹ rọ] raha erọ ọ raha akpọ na.” Bi dhesẹ epanọ onana o te rọ via, eruẹaruẹ avọ eree u dhesẹ iruẹru ọrọ “arao nọ . . . o wo izei ikpe gbe izou ihrẹ” na.—Evia. 13:1.

Evaọ eruẹaruẹ avọ izii na, Jọn ọ ruẹ “Omogodẹ na nọ o dikihẹ ugbehru Zayọn, avọ ahwo idu udhuhrẹ gbe ene.” A dẹ rai “no udevie” ahwo-akpọ ze. (Evia. 14:1, 4) Kẹsena iwhowhovia erọ ikọ-odhiwu i te lele iei. Evaọ eruẹaruẹ nọ u lele i rie, Jọn ọ tẹ ruẹ “ikọ-odhiwu ihrẹ avọ iye ihrẹ.” U muẹro inọ Jihova họ ọnọ ọ ta kẹ ikọ-odhiwu na re a ku “igebule ihrẹ ofu [riẹ] na họ” abọ sa-sa ọrọ akpọ Setan. Eware nọ e rrọ egebule na họ iwhowhovia gbe unuovẹvẹ ọrọ ẹdhoguo Ọghẹnẹ. (Evia. 15:1; 16:1) Eruẹaruẹ ivẹ nana i dhesẹ eware efa nọ e te via nọ i w’obọ kpahe uye avọ esa na gbe eware nọ e via okenọ a kporo ọgba avọ ihrẹ na.—Evia. 11:14, 15.

Enọ Ikereakere nọ A Kẹ Iyo Rai:

13:8—Eme họ “obe uzuazọ Omogodẹ” na? Onana yọ uko-obe ẹwoho nọ edẹ enọ i ti lele Jesu Kristi su evaọ Uvie obọ odhiwu riẹ e rrọ. Edẹ enọ a rọ ẹzi wholo nọ e gbẹ rrọ otọakpọ na, enọ i wo ẹruore uzuazọ obọ odhiwu e riẹ re.

13:11-13—Ẹvẹ “arao” nọ o wo izei ivẹ na o bi ro ru wọhọ odudu je ru erae no obọ odhiwu ze? Arao nọ o wo izei ivẹ na, koyehọ Ogaga-Esuo Akpọ Britain gbe America, o be t’ẹme wọhọ arao odudu keme o be rehọ iguegue gbe ozighi gba ahwo họ re a roma kpotọ kẹ esuo riẹ. Edhere nọ o bi ro ru erae no odhiwu ze họ o bi ru wọhọ ọruẹaro, be ta inọ a fi erẹwho nọ e jọ ọzadhe kẹ udhedhẹ kparobọ evaọ emo akpọ-soso ivẹ nọ a fi vrẹ no na.

16:17—Eme họ otofa ẹme na inọ a frẹ ame egebule avọ ihrẹ na “kpehru,” koyehọ fihọ ofou? Ofou nana o dikihẹ kẹ iroro nọ e wọhọ erọ Setan, “ẹzi riẹ [nọ] o bi ru iruo eva emọ udu uyoma enẹna.” Uyerakpọ omuomu Setan kpobi o bi se ofou enua nana rehọ.—Ẹf. 2:2.

Eware nọ Ma Jariẹ Wuhrẹ:

13:1-4, 18. “Arao” nọ o dikihẹ kẹ esuo ahwo-akpọ ọ “vaze eva abade,” koyehọ, no udevie ahwo nọ a vọ avọ ozighi ze. (Aiz. 17:12, 13; Dan. 7:2-8, 17) Arao nana, nọ Setan o ro mu jẹ kẹ ẹgba na, o wo inọmba na 666, onọ u dhesẹ inọ esuo ohwo-akpọ o thabọ gaga no ẹgbagba. Ma te wo otoriẹ oware nọ arao na o rrọ u re fi obọ họ kẹ omai re ma siẹe ba elele hayo re ma siẹe ba ẹgọ wọhọ epanọ ahwo-akpọ buobu a be gọe na.—Jọn 12:31; 15:19.

13:16, 17. Dede nọ o rẹ sae jọ bẹbẹ k’omai re ma ‘dẹ hayo zẹ,’ ma rẹ kuvẹ hẹ re arao na ọ kpọ uzuazọ mai. Ma tẹ rọwo inọ ma re wo ‘oka arao na evaọ obọze hayo aruezo’ u dhesẹ inọ ma be kẹ arao na uvẹ re o kpọ owojẹ gbe iroro mai.

14:6, 7. Usiuwoma nọ ukọ-odhiwu na o whowho na u wuhrẹ omai inọ ma rẹ rọ ovẹrẹ whowho emamọ usi Uvie Ọghẹnẹ nọ a ro mu no na. Ma re fi obọ họ kẹ emọ-uwuhrẹ Ebaibol mai re a wo uvi ozodhẹ Ọghẹnẹ re a jẹ rọ oruaro kẹ Jihova.

14:14-20. Nọ “ivuẹvu akpọ na,” koyehọ, ekokohọ enọ a bi ti siwi, u te kuhọ no, yọ oke u te no nọ ukọ-odhiwu na o re ro gbolo “ibi okakọ akpọ na” fihọ “oria udi-uthere ofu Ọghẹnẹ.” A vẹ te raha okakọ na no bẹdẹ bẹdẹ, koyehọ egọmeti ogbekuo nọ Setan o bi ro su ahwo-akpọ avọ “ekru” ibi iyoma riẹ. Ma rẹ daoma re okakọ akpọ na o siọ omai ba ewholo.

16:13-16. Ukumuomu avọ idhivẹri riẹ a be viẹ ivie akpọ na họ re a ruẹ nnọ igebule ihrẹ erọ ofu Ọghẹnẹ na e siọ udu uyoma rai ba enwene, ukpoye kọ a te bẹbẹ ae họ re a wọso Jihova.—Mat. 24:42, 44.

16:21. Nọ ekuhọ akpọ na o bi sikẹle na, a te rehọ eme egaga whowho ẹdhoguo Jihova kpahe uyerakpọ muomu Setan, eme nọ e wọhọ ekpalekpa ame. Ghele na, ahwo-akpọ buobu a te gbẹ la Ọghẹnẹ eka.

OVIE OBOKPARỌ NA O MUHỌ ESU NO

(Evia. 17:1–22:21)

“Babilọn Ologbo na,” koyehọ egagọ erue akpọ-soso, yọ abọ ọtọtọ ọrọ akpọ muomu Setan. Eruẹaruẹ avọ 11 na u dhesẹ i rie wọhọ “ogberẹ ologbo na,”—ogberẹ aye—“nọ ọ keria ehru arao ọwawae na.” Uwhremu na “izei ikpe” na, koyehọ arao ojihẹ nọ aye na ọ keria na, ọ be te raha aye na muotọ. (Evia. 17:1, 3, 5, 16) A jọ eruẹaruẹ nọ u lele onana rehọ ogberẹ na dhesẹ “okpẹwho ologbo,” whowho ekie riẹ, jẹ vẹvẹ ahwo Ọghẹnẹ unu inọ a “nya siẹ e ba.” Ahwo buobu a viẹ okenọ a raha okpẹwho ologbo na. Rekọ oghọghọ o jọ obọ odhiwu fiki “orọwo omogodẹ na.” (Evia. 18:4, 9, 10, 15-19; 19:7) Evaọ eruẹaruẹ avọ 13 na, ọnọ ọ dhẹ “esi ọfuafo” na o lele erẹwho na fiẹmo. Ọ tẹ raha akpọ muomu Setan.—Evia. 19:11-16.

Kọ eme ọ te via kẹ “odudu na, oriọvọ anwae na nọ a rese Setan hayo Ukumuomu”? Okevẹ a ti gbolo ei fihọ “ẹtẹre erae” na? Yọ ẹme jọ nọ eruẹaruẹ avọ 14 o ta kpahe. (Evia. 20:2, 10) Eruẹaruẹ ivẹ urere na i dhesẹ oghẹrẹ nọ uzuazọ o te jọ evaọ etoke esuo Odu-Ikpe na. Nọ “eviavia” na i bi kuhọ na, Jọn ọ ruẹ ‘ethẹ ame uzuazọ nọ o bi su udevie iyẹrẹ okpẹwho na vrẹ,’ a te zizie “e nọ uruame u re kpe” re a te da ame uzuazọ.—Evia. 1:1; 22:1, 2, 17.

Enọ Ikereakere nọ A Kẹ Iyo Rai:

17:16; 18:9, 10—Fikieme “ivie akpọ na” a bi ro weri ogberẹ nọ ae ọvo a kpe na? A weri rie fiki erere nọ a jẹ jọ obọ riẹ wo. Nọ a raha Babilọn Ologbo na no kẹsiẹ ivie akpọ na a te rọ ruẹ epanọ o je fi obọ họ kẹ ai te. Aye na o je fi obọ họ kẹ ae rehọ odẹ Ọghẹnẹ ruru eware iyoma nọ a je ru. Babilọn Ologbo na o te je fi obọ họ kẹ ai bẹbẹ izoge na kpohọ ẹmo. Ofariẹ, o je ru ahwo roma kpotọ kẹ esuo rai.

19:12—Ẹvẹ o rọ rọnọ Jesu ọvo ọ riẹ odẹ riẹ nọ a fodẹ hẹ na? O wọhọ nọ odẹ nana u dikihẹ kẹ ekwa gbe uvẹ-ọghọ, wọhọ enọ a fodẹ evaọ Aizaya 9:6 na, enọ Jesu ọ be reawere rai evaọ etoke ẹdẹ Olori na. Ọye ọvo ọ riẹ odẹ nana keme o wo uvẹ-ọghọ nọ o rrọ oghẹrẹsa, yọ ọye ọvo ọ riẹ oware nọ u dhesẹ re ohwo o wo ọkwa okpehru otiọye na. Rekọ inievo Jesu a ti lele iei w’obọ evaọ obọdẹ iruo jọ nọ Jihova ọ kẹ riẹ, o vẹ te wọhọ ẹsenọ o ‘kere odẹ okpokpọ riẹ họ aruezo rai.’—Evia. 3:12.

19:14—Amono a ti lele Jesu ziọ ẹmo Amagẹdọn? Enọ e te jọ usu “ogbotu-ẹmo” nọ i ti kuomagbe Jesu evaọ ẹmo Ọghẹnẹ na họ ikọ-odhiwu avọ enọ a rọ ẹzi wholo na enọ i wo osohwa obọ odhiwu rai no.—Mat. 25:31, 32; Evia. 2:26, 27.

20:11-15—Odẹ amono a kere fihọ ‘obe uzuazọ’ na? Edẹ ahwo nọ e rrọ obe nana họ ahwo kpobi nọ i bi ti wo uzuazọ ebẹdẹ bẹdẹ—Ileleikristi nọ a rọ ẹzi wholo, otu obuobu na, idibo Ọghẹnẹ enọ i bi ti wo erere no “ẹkparomatha enọ ikiete” na ze. (Iruẹru 24:15; Evia. 2:10; 7:9) A ti kere edẹ enọ e be te ziọ uzuazọ evaọ ‘ẹkparomatha enọ i kiete he na’ họ ‘obe uzuazọ’ na otẹrọnọ a ru lele ithubro nọ e rrọ “eva ebe” nọ a ti rovie evaọ etoke Odu-Ikpe na. Rekọ a rẹ sai voro odẹ ohwo no obe na. A re voro edẹ enọ a rọ ẹzi wholo na no obe na ha nọ a te thihakọ rite uwhu. (Evia. 3:5) Edẹ ahwo nọ i ti wo uzuazọ evaọ otọakpọ e vẹ te ruọ obe na ribri nọ a tẹ sae kparobọ evaọ odawọ urere nọ o te tha eva ekuhọ odu-ikpe na.—Evia. 20:7, 8.

Eware nọ Ma Jariẹ Wuhrẹ:

17:3, 5, 7, 16. “Areghẹ nọ o nehru ze” u re fi obọ họ k’omai wo otoriẹ ‘eware igbunu aye na gbe arao ọwawae nọ ọ wọ riẹ na.’ (Jem. 3:17) A kake riẹ arao ẹwoho nana wọhọ Ọvọ Erẹwho na, uwhremu na o tẹ roma via wọhọ Erẹwho Okugbe na. Kọ u gbe fo re oware igbunu nana nọ ma riẹ no na o lẹliẹ omai rọ ajọwha whowho emamọ usi Uvie Ọghẹnẹ je whowho ẹdẹ ẹdhoguo Jihova?

21:1-6. U mu omai ẹro gaga inọ eghale nọ a ruẹaro rai evaọ etoke esuo Uvie na i ti rugba. Fikieme? Keme a ta kpahe eruẹaruẹ na nnọ: “A ru rie no!”

22:1, 17. “Ethẹ ame uzuazọ na” u dhesẹ eruẹrẹfihotọ Jihova nọ o bi ro siwi ahwo-akpọ ẹmeoyo no uzioraha gbe uwhu. Umutho ame nana jọ o riẹ nẹnẹ. Orọnikọ ma rẹ rọ evawere jẹ uzizie nana rehọ ọvo ho rekọ ma rẹ rọ ọwhọ zizie amọfa re a te da “ame uzuazọ na” ọvọvẹ!

[Oruvẹ-obotọ]

[Uwoho nọ o rrọ ẹwẹ-obe avọ 5]

Eghale nọ ahwo-akpọ nọ i yoẹme a te reawere rai i ti woma kẹhẹ evaọ etoke esuo Uvie na!