1921 Ikpe Udhusoi Nọ I Kpemu

Re Emọ-Uwuhrẹ Ebaibol na a sae ta usi uwoma na, a re wo udu. A re whowho “usi uwoma” kẹ ahwo nọ a wo omaurokpotọ. A ve je whowho “ẹdẹ orukele” kẹ ahwo omuomu re.

Brọda J. H. Hoskin nọ ọ jẹ rria obọ Canada ọ ta usi uwoma na ududu dede nọ a jẹ wọso ẹe. Evaọ ubrobọ emuhọ 1921, ọ nyaku ọtausiuwoma egagọ jọ. Enẹ Brọda Hoskin o ro mu ẹme họ kẹe: “Joma rọ Ebaibol ta ẹme kugbe. Otẹrọnọ eria jọ e riẹ nọ mẹ avọ owhẹ ma jọ rọwo fihọ oware ọvona ha, ma sai ku ẹme na họ dhedhẹ, ọvuọ oboriẹ ọ vẹ nya.” Rekọ o via ere he. Brọda Hoskin ọ ta nọ: “Ma re tubẹ ta ẹme te iminiti bro ho na, ọzae na ọ tẹ rọ obọ tehe ẹthẹ riẹ gaga. Me tube roro nọ ughẹgbe nọ ọ jọ ẹthẹ na u ti whu no dede.”

Ọ tẹ va no otọ ze nọ: “Eme who gbe kpobọ unuẹthẹ ahwo nọ a riẹ Ọghẹnẹ hẹ?” Brọda Hoskin ọ tẹ gba omariẹ, ọ kpahe ẹme ọvo kẹe he. Rekọ nọ o je no etẹe, ọ tẹ be jọ udu riẹ roro nọ, ‘Whaọ uruemu ohwo nọ ọ riẹ Ọghẹnẹ hẹ o dhesẹ na.’

Okiokiọ riẹ nọ ọzae na ọ jẹ kẹ ovuẹ evaọ obọ egagọ riẹ, ọ tẹ jẹ ta eme iyoma kpahe Brọda Hoskin. Brọda Hoskin ọ ta nọ: “Ọ tẹ jẹ vẹvẹ ahwo ichọche riẹ unu kpahe omẹ be ta kẹ ae nọ mẹ họ ohwo nọ ọ rẹ mai gu ọrue evaọ ẹwho na, inọ u fo nọ a rẹ sa omẹ kpe.” Rekọ oware nana o whaha oniọvo na usi uwoma ha. Ọ gbẹ jẹ ta usi uwoma kẹ ahwo buobu ghele. Ọ ta nọ: “Mẹ ta usi uwoma ziezi evaọ ẹkwotọ yena. Ahwo ẹkwotọ na jọ nọ mẹ ta usi uwoma kẹ a tubẹ ta nọ, ‘Ma riẹ nọ whẹ ohwo Ọghẹnẹ!’ A ta nọ mẹ tẹ gwọlọ oware jọ kpobi, mẹ vuẹ ae, a te kẹ omẹ.”

Re ahwo nọ a je wuhrẹ Ebaibol a sae nyaharo ziezi, Emọ-Uwuhrẹ Ebaibol na a jẹ hai kere izoẹme jọ fihọ emagazini Awake! nọ a jẹ hai se The Golden Age oke yena.a Uzoẹme jọ o jariẹ nọ a jẹ hai ro wuhrẹ emaha na. O jẹ hai wo enọ nọ esẹgbini a re ro wuhrẹ emọ rai. Esẹgbini a rẹ “nọ emọ rai enọ na, a ve fiobọhọ kẹ ae gwọlọ iyo rai evaọ Ebaibol.” Enọ wọhọ “Bro ebe e rrọ Ebaibol na?” e jẹ hai fiobọhọ kẹ ai riẹ igogo eware jọ kpahe Ebaibol na. Enọ efa wọhọ “Kọ Oleleikristi kpobi o re rẹro ukpokpoma?” e jẹ hai fiobọhọ kẹ emaha na ruẹrẹ udu rai kpahe re a sae ta usi uwoma ababọ ozọ.

Enọ jọ e jariẹ nọ a jẹ hae ruẹrẹ fihọ kẹ ahwo nọ a riẹ iwuhrẹ Ebaibol jọ no. Iyo rai e jẹ hae jọ uko ọsosuọ obe na Studies in the Scriptures. Omaa iwuhrẹ Ebaibol nana i fiobọhọ kẹ ahwo buobu. Rekọ evaọ Awake! Akpegbivẹ 21, 1921, a te whowho nọ izoẹme nana e te gbẹ romavia evaọ emagazini na ha. Fikieme a ro ru ere?

Inievo nọ e jẹ rẹrote iruo ukoko na oke yena a ruẹ nọ u fo re ahwo nọ ma bi wuhrẹ Ebaibol kugbe obọ a hae rọ uzoẹme ọvuọvo unọjọ utọjọ wuhrẹ igogo eware nọ Ebaibol ọ ta. Fikiere a te siobọno obe na The Harp of God evaọ amara Akpegbọvo 1921. Ahwo nọ a rehọ obe na nọ a gwọlọ wuhrẹ, a re fi odẹ rai hotọ kẹ isukulu nọ a re se The Harp Bible Study Course nọ a te hae rọ jọ obọ uwou wuhrẹ omobọ rai. A ruẹrẹ uwuhrẹ nana họ evaọ oghẹrẹ nọ emọ-uwuhrẹ na a rẹ rọ riẹ “omaa nọ Ọghẹnẹ o ti ro ru re ahwo-akpọ a wo uzuazọ ebẹdẹ bẹdẹ.” Kọ ẹvẹ a jẹ hai ro ru uwuhrẹ nana?

Nọ ohwo ọ tẹ rehọ obe na no, a ve vi ekade sei nọ a re kere oria nọ ọ te jọ obe na se fihọ. Oka nọ o lele i rie, a ve vi ekade ọfa sei nọ u wo enọ nọ ọ rẹ sae ruẹ iyo rai evaọ oria nọ o se na. Ọ rẹ jọ eme urere ekade na ruẹ oria nọ o ti se evaọ oka notha.

Koka koka, evaọ eka ikpegbivẹ, ukoko nọ o kẹle ọmọ-uwuhrẹ na u re vi ekade sei. Inievo nọ e kpako no evaọ ukoko gbe inievo nọ e be sae nya nuwou ruọ uwou tere he fiki oma nọ o ga rai hi, a re vi ekade na se emọ-uwuhrẹ na. Wọhọ oriruo, oniọvo jọ nọ a re se Anna K. Gardner, evaọ Millvale, nọ o rrọ Pennsylvania, obọ America ọ ta nọ: “Obe The Harp of God nọ a siobọno na u ru nọ oniọvo-ọmọtẹ mẹ nọ a re se Thayle nọ ọ be sae nya ha o ro wo iruo buobu evaọ ukoko na. Ọ jẹ hae ruẹrẹ ekade nọ enọ e rẹ jọ na họ vi se emọ-uwuhrẹ koka koka.” Nọ emọ-uwuhrẹ na a te wuhrẹ eria nọ a vi se ae na kpobi no, ukoko na u ve ru epanọ oniọvo jọ ọ rẹ rọ nyai wuhrẹ iẹe eware efa evaọ Ebaibol na.

Evaọ obọ ekuhọ ukpe 1921, Brọda J. F. Rutherford o te kere ileta se ikoko na kpobi inọ: “Ma riẹ usi uwoma na ta ziezi jẹ tae evaọ eria buobu enukpe nana vi ukpe ofa jọ kpobi.” Ọ tẹ jẹ ta nọ: “Iruo e gbẹ vọ otọ. Fikiere wha tuduhọ amọfa awọ re a kuomagbe omai evaọ obọdẹ iruo nana.” Ere inievo na a gine ru. Ukpe nọ u lele i rie, koyehọ 1922, a tẹ jẹ ta usi uwoma Uvie na ududu vi epaọ anwẹdẹ.