Uzou Avọ 71

Sebaẹrọwọ Aro Koko Otu Farisi

OZỌ u je mu ọsẹ gbe oni ọyareware nọ o tuaro vẹre na nọ a rehọ ai ziọ aro otu Farisi na. A riẹ nọ a gba riẹ mu no nnọ ohwo nọ o fi ẹrọwọ họ Jesu kpobi a re lei no uwou-egagọ na no. U re yoma k’ohwo gaga otẹrọnọ a mu ohwo imuẹwho, maero rọ kẹ uviuwou oyogbere. Fikiere ọsẹ gbe oni riẹ a be yọrọ oma.

Otu Farisi na a tẹ nọ nọ: “Kọ ọmọzae rai nọ wha ta nọ wha yẹ tuaro na, ọ na? Kẹvẹ ọ [be] rọ ruẹ ude enẹna?”

Ọsẹ gbe oni na a tẹ rọwo nọ: “Ma riẹ nọ ọmọzae mai, gbe epanọ a ro yẹ i [tuaro]; rekọ epanọ ọrọ ruẹ ude enẹna ma riẹ hẹ, hayo ọnọ o rovie aro riẹ ma riẹ hẹ.” Ababọ avro ọmọzae rai ọ ta oware nọ o via kpobi kẹ ai no, rekọ avọ areghẹ ọsẹ gbe oni na a tẹ ta nọ: “Wha nọe; ọ kpako uno, ọye ọvo ọ rẹ ta o rọ oma riẹ.”

Fikiere, otu Farisi na a tẹ wariẹ se ọzae na. Enẹna a tẹ gwọlọ guegue ei ẹkwoma edhesẹ inọ a ruẹ oware nọ a re ro kru Jesu no. A tẹ ta nọ: “Kẹ Ọghẹnẹ oro; ma riẹ nọ ohwo ọnana ọrahauzi.”

Ọzae nọ o tuaro vẹre na ọ vro ẹme rai hi, o muẹrohọ nọ: “Jọ ọrahauzi, mẹ riẹ hẹ.” Rekọ o te fibae nọ: “Oware ovo mẹ riẹ [họ], me tuaro oke jọ, enẹna mẹ tẹ ruẹ ude.”

Nọ a be daoma re a jọ eme riẹ ruẹ afuẹwẹ na, otu Farisi na a tẹ wariẹ nọe inọ: “Eme o ru kẹ owhẹ? Ẹvẹ o ro rovie aro ra?”

Ọzae na o te gu unoma nọ: “Mẹ ta kẹ owhai vẹre i no, rekọ wha daezọ họ[.] Fikieme wha jẹ be wariẹ guọlọ yo?” Avọ ijehwẹ, ọ tẹ nọ inọ: “Wha be guọlọ jọ ilele riẹ re?”

Uyo onana o tẹ lẹliẹ eva dha otu Farisi na. A tẹ ta kẹe nọ: ‘Whẹ yọ olele riẹ, rekọ mai ilele Mosis. Ma riẹ nọ Ọghẹnẹ ọ ta ẹme kẹ Mosis, rekọ ohwo ọnana, ma riẹ obonọ o nọze he.’

Be ta avọ igbunu, ọyareware omurokpotọ na ọ tẹ kuyo nọ: “Emejọ, whaọ onana oware urirẹ! Wha riẹ obonọ o nọze he, rekọ o rovie aro mẹ.” Didi ekuhọ a sae si no onana tha? Ọyareware na ọ tẹ fodẹ uzi nọ aikpobi a rọwo: “Ma riẹ nọ Ọghẹnẹ o re yo ẹme erahaizi hi, rekọ ọ nọ ọrọ Ọghẹnẹ ẹgọ kpobi, nọ o re ru oreva riẹ, Ọghẹnẹ o re yo ẹme riẹ. Nọ emuhọ akpọ ze a ri yo nọ ohwo jọ o rovie aro ohwo nọ a yẹ tuaro ho.” Fikiere, ekuhọ na o re vevẹ: “Ohwo ọnana o gbe no obọ Ọghẹnẹ ze he, ọ hẹ sai ru oware ovo ho.”

Otu Farisi na a wo uyo ovo kẹ eme eliọliọ itieye na ha. A gwọlọ rọwo uzẹme na ha, fikiere a tẹ r’eme fa ọzae na ova: “Udevie uzioraha a je yẹ owhẹ, who ve wuhrẹ omai?” A te lei ruọ otafe, ẹsejọhọ onọ u dhesẹ nọ a le rie no uwou-egagọ na no.

Nọ Jesu ọ riẹ kpahe oware nọ a ru no, ọ tẹ gwọlọ ọzae na via ọ tẹ ta nọ: ‘Kọ whọ be rọwo Ọmọ ohwo?’

Evaọ uyo, ọyareware nọ o tuaro vẹre na ọ tẹ nọ nọ: “Olori, ono ọ rọ nọ mẹ jẹ rọwo iẹ?”

Jesu ọ tẹ kuyo nọ: “Ọye họ ọnọ ọ be ta ẹme kẹ owhẹ na.”

Idudhe na, ọzae na o te kigwẹ kẹ Jesu, anọ: “Olori, mẹ rọwo.”

Jesu o te ru ei vevẹ nọ: “Fiki oziẹobro [ọnana] mẹ jẹ ze evaọ akpọ nana, re enọ e ruẹ ude he e ruẹse ruẹ ude, enọ e be ruẹ ude i ve ti tuaro.”

Nọ ọ ta ere no, otu Farisi nọ e be gaviezọ na a tẹ nọe inọ: “Kọ ma tuaro re?” Otẹrọnọ a rẹ rọwo inọ a jọ iroro tuaro, a rẹ ruẹ inoma gu kpahe Jesu nọ a be wọso. Wọhọ epanọ Jesu ọ ta kẹ ai: “Orọnọ wha tuaro, wha he wo uzioraha ha.” Ghele na, avọ eva egaga a te si ikẹ inọ a tuaro ho gbe nọ a gwọlọ elo abọ-ẹzi hi. Fikiere Jesu o te muẹrohọ nọ: “Enẹna wha ta nọ, ‘Wha ruẹ ude’, uzioraha rai o tẹ gbẹrọ.” Jọn 9:19-41.

▪ Fikieme ozọ u je mu ọsẹ gbe oni ọyareware otuaro na okenọ a se ai ziọ aro otu Farisi na, kọ didi uyo a rehọ areghẹ kẹ?

▪ Ẹvẹ otu Farisi na a rọ gwọlọ guegue ọzae nọ o tuaro vẹre na?

▪ Didi ikẹ-isio areghẹ ọzae na o lẹliẹ eva dha otu Farisi na?

▪ Fikieme otu Farisi na a gbẹ ruẹ unoma gu kẹ ọwọsuọ nọ a jẹ wọso Jesu hu?