UWUHRẸ 01
Ẹvẹ Ebaibol na Ọ Sai ro Fiobọhọ Kẹ Owhẹ?
Enwenọ ohwo kpobi ọ gwọlọ riẹ kpahe oghẹrẹ nọ uzuazọ o rrọ, oware nọ ahwo a be rọ ruẹ uye, bi whu, gbe epanọ akpọ na ọ te jọ evaọ obaro. Ma rẹ jẹ ruawa kpahe eware nọ ma bi ru kẹdẹ kẹdẹ, eware wọhọ, oghẹrẹ nọ ma rẹ rọ re eva vọ hayo epanọ ma sai ro wo evawere evaọ uviuwou mai. Ahwo buobu a be ruẹ nọ Ebaibol na o bi fiobọhọ kẹ ae ruẹ iyo enọ nọ i wuzou evaọ uzuazọ, gbe ehrẹ nọ i bi fiobọhọ kẹ ai yeri emamọ uzuazọ. Kọ whọ riẹ ohwo jọ nọ Ebaibol na ọ rẹ sai fiobọhọ kẹ?
1. Enọ jọ vẹ Ebaibol na ọ kẹ uyo rai?
Ebaibol na ọ kẹ uyo enọ nana nọ i wuzou na. Enọ wọhọ: Ẹvẹ uzuazọ u ro muhọ? Fikieme ma rọ rrọ uzuazọ? Fikieme emamọ ahwo a be rọ ruẹ uye? Eme ọ rẹ via nọ ohwo o te whu? Otẹrọnọ ohwo kpobi ọ gwọlọ udhedhẹ, kọ fikieme a bi ro fi ẹmo evaọ eria buobu? Eme ọ te via kẹ otọakpọ na evaọ obaro? Ebaibol na ọ tuduhọ omai awọ nọ ma daoma re ma gwọlọ iyo enọ itieye na, yọ ima ahwo buobu a jọ Ebaibol na ruẹ iyo enọ nana nọ i te rai udu no.
2. Ẹvẹ Ebaibol na ọ sai ro fiobọhọ kẹ omai wo evawere kẹdẹ kẹdẹ?
Ebaibol na ọ kẹ omai emamọ ehrẹ. Wọhọ oriruo, o ta kpahe epanọ iviuwou a re ro wo uvi evawere. Ọ vuẹ omai oware nọ ma rẹ sai ru nọ idhọvẹ e tẹ rrọ omai oma, gbe epanọ ma sai ro wo evawere evaọ iruo hayo okọ mai. Who ti wuhrẹ oware nọ Ebaibol na ọ ta kpahe eware nana gbe efa buobu nọ ma ti wuhrẹ obe nana kugbe na. Whọ te ruẹ vuhumu nọ “Ikereakere na kpobi, [oware kpobi nọ o rrọ Ebaibol na] . . . e rẹ kẹ erere.”—2 Timoti 3:16.
Orọnikọ obe nana o be rehọ ẹta Ebaibol na ha. Ukpoye, u ti ru owhẹ se je wuhrẹ Ebaibol na kẹ omara. Fikiere, ma be tuduhọ owhẹ awọ nọ who se eria Ebaibol nọ e rrọ iwuhrẹ sa-sa evaọ obe nana jẹ rehọ ae wawo oware nọ who bi wuhrẹ.
GBE WUHRẸ EWARE EFA
Wuhrẹ kpahe epanọ Ebaibol na o ro fiobọhọ kẹ ahwo no, epanọ whọ sai ro se Ebaibol na o vẹ were owhẹ oma, gbe oware nọ u ro woma re a fiobọhọ kẹ owhẹ wo otoriẹ riẹ.
3. Ebaibol na ọ sae kpọ omai
Ebaibol na ọ wọhọ elo etọche. Ma te se Ebaibol na ọ sai fiobọhọ kẹ omai jẹ emamọ iroro jẹ sae riẹ eware nọ e te via evaọ obaro.
Se Olezi 119:105, kẹsena wha vẹ ta ẹme kpahe enọ nana:
Oghẹrẹ vẹ ohwo nọ o kere olezi nana o rri Ebaibol na?
Kọ ẹvẹ whẹ omara o rri Ebaibol na?
4. Ebaibol na ọ sae kẹ iyo enọ nọ ma wo
Aye jọ ọ jọ Ebaibol na ruẹ iyo enọ nọ e jẹ kẹe uye evaọ ikpe buobu. Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
Evaọ ividio na, oghẹrẹ enọ vẹ aye nana ọ jẹ nọ?
Ẹvẹ Ebaibol na nọ o wuhrẹ u ro fiobọhọ kẹe?
Ebaibol na ọ tuduhọ omai awọ nọ ma hae nọ enọ. Se Matiu 7:7, kẹsena wha vẹ ta ẹme kpahe onọ nana:
Enọ vẹ whọ gwọlọ nọ, nọ Ebaibol na ọ sae kẹ uyo rai?
5. Ebaibol na ọ rẹ sae were owhẹ oma ese
O rẹ were ahwo buobu re a se Ebaibol na, yọ a bi gine wo erere noi ze. Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
Evaọ ividio na, ẹvẹ izoge na a rri obe use?
Kọ fikieme Ebaibol na nọ a re se o be rọ were ae?
Ebaibol na ọ ta nọ ọ rẹ sai wuhrẹ omai re ma wo omosasọ gbe ẹruore. Se Ahwo Rom 15:4, kẹsena wha vẹ ta ẹme kpahe onọ nana:
Kọ o were owhẹ re who wo omosasọ gbe ẹruore nọ Ebaibol na ọ ta kpahe na?
6. Amọfa a rẹ sai fiobọhọ kẹ omai wo otoriẹ Ebaibol na
U te no ese nọ ma re se Ebaibol na kẹ omobọ mai no, ahwo buobu a ruẹ nọ u re fiobọhọ kẹ ae nọ a tẹ be ta ẹme kpahe Ebaibol na kugbe amọfa. Se Iruẹru Ikọ 8:26-31, kẹsena wha vẹ ta ẹme kpahe onọ nana:
Ẹvẹ ma sai ro wo otoriẹ Ebaibol na?—Rri owọ avọ 30 gbe 31.
Omọfa jọ o fiobọhọ kẹ ọzae Ẹtiopia na wo otoriẹ Ikereakere na. Epọvo na nẹnẹ re, ahwo buobu a ruẹ nọ u re fiobọhọ gaga nọ a te lele amọfa ta ẹme kpahe Ebaibol na
AHWO JỌ A RẸ TA NỌ: “Ebaibol na nọ ohwo o re wuhrẹ yọ oke oraha kufiẹ gheghe.”
Ẹvẹ who roro? Kọ fikieme?
EME WHO WUHRẸ NO?
Ebaibol na o wo ehrẹ nọ ma sai ro yeri uzuazọ kẹdẹ kẹdẹ, o kẹ uyo enọ nọ i wuzou, yọ o rẹ kẹ omai omosasọ gbe ẹruore.
Ọkiẹkpemu
Oghẹrẹ ehrẹ vẹ ma rẹ sae ruẹ evaọ Ebaibol na?
Enọ jọ vẹ Ebaibol na ọ kẹ uyo rai?
Eme whọ gwọlọ wuhrẹ evaọ Ebaibol na?
KIẸ KPAHE EFA
Wuhrẹ kpahe epanọ ehrẹ Ebaibol na e sai ro fiobọhọ kẹ omai nẹnẹ.
“Ehrẹ Ebaibol Na—I re Kie Kpo Ho” (Uwou-Eroro Na Ọrọ 1 2018)
Rri epanọ Ebaibol na o ro fiobọhọ kẹ ọzae jọ nọ o wo iroro-me-fioka ha no anwọ emaha riẹ ze.
Wuhrẹ eware nọ Ebaibol na ọ ta nọ e rẹ lẹliẹ evawere jọ uviuwou.
“Eware 12 nọ I re Ru Evawere jọ Uviuwou” (Awake! Ọrọ avọ 2 2018)
Ahwo buobu a riẹ ohwo nọ o bi su akpọ na ha, rekọ who ti wuhrẹ oware nọ Ebaibol na ọ ta kpahe onana.