“Wha Muẹroh’otọ”

“Fikiere wha muẹroh’otọ, keme wha riẹ ẹdẹ nọ Olori rai ọ te tha ha.”—MATIU 24:42, NW.

 1. Ẹvẹ idibo Jihova nọ e gọ kri no a bi roro kpahe ikpe ibuobu erọ iruo omarọkẹ rai? Fodẹ oriruo jọ.

IDIBO Jihova buobu nọ e gọ kri no a wuhrẹ uzẹme na evaọ okenọ a gbẹ jọ emoha. Wọhọ ọhreki nọ ọ ruẹ uzuu oghaghae ọ jẹ zẹ eware nọ o wo kpobi re ọ ruẹse dẹe, emọ-uwuhrẹ Ebaibol ọwhọ enana a vro oma rai jẹ rehọ izuazọ rai mudhe kẹ Jihova no. (Matiu 13:45, 46; Mak 8:34) Ẹvẹ o re rai oma nọ a be hẹrẹ vi epanọ a rẹro nọ o te jọ re a ruẹ orugba ẹjiroro Ọghẹnẹ kpahe otọakpọ na? A be rowo obọ họ! A rọwo kugbe Brọda A. H. Macmillan, ọnọ okenọ ọ jọ egagọ omarọkẹ Ọghẹnẹ raha oke te enwenọ ikpe 60 no, ọ ta nnọ: “Mẹ gba riẹ mu vi epaọ ọsosuọ no re me thihakọ evaọ ẹrọwọ mẹ. O lẹliẹ uzuazọ fo ẹrria kẹ omẹ no. U gbe bi fiobọhọ kẹ omẹ rẹriẹ ovao ku obaro na ababọ ozodhẹ.”

 2. (a) Ohrẹ ẹruoke vẹ Jesu ọ rọ kẹ ilele riẹ? (b) Didi enọ ma ti roro kpahe evaọ uzoẹme onana?

² Kọ ẹvẹ kpahe owhẹ? Unuikpe nọ whọ rrọ kpobi kẹhẹ, roro kpahe eme Jesu na: “Fikiere wha muẹroh’otọ, keme wha riẹ ẹdẹ nọ Olori rai ọ te tha ha.” (Matiu 24:42, NW ) Eme elọlọhọ eyena i wo uzẹme ogbẹgbẹdẹ. Ma riẹ ẹdẹ nọ Olori na ọ te nyaze ti gu uyerakpọ omuemu nana ẹdhọ họ, yọ u du gwọlọ nọ ma rẹ riẹe dede he. Rekọ u fo re ma rria evaọ oghẹrẹ edhere nọ, ọ tẹ nyaze, ma gbẹ rowo obọ họ. Evaọ abọ nana, didi iriruo ma rẹ jọ Ebaibol na ruẹ nọ i ti fiobọhọ k’omai muẹroh’otọ? Ẹvẹ Jesu o ro dhesẹ ẹgwọlọ nana? Kọ didi imuẹro ma wo nẹnẹ nọ u dhesẹ nnọ ma be rria edẹ urere akpọ nana nọ ọ riẹ Ọghẹnẹ hẹ na?

Oriruo Unuovẹvẹ

 3. Ẹvẹ ahwo buobu nẹnẹ a ro tho ahwo edẹ Noa?

³ Evaọ idhere buobu, ahwo nẹnẹ na a wọhọ ezae gbe eyae nọ e jẹ rria evaọ edẹ Noa. Eva oke oyena, ozighi ọ vọ otọakpọ na, yọ iroro udu ahwo kpobi “evọ avọ eyoma kẹse kẹse.” (Emuhọ 6:5) Iruẹru eyero uzuazọ e da ruọ ibuobu oma. Rekọ, taure ọ tẹ te rehọ Ẹvo ologbo na ze, Jihova ọ kẹ ahwo uvẹ nọ a re ro kurẹriẹ. O vi Noa re ọ ta usiuwoma, Noa o te yoẹme—zihe ro “ọvuẹovuẹ ẹrẹreokie” ẹsejọhọ evaọ ikpe 40 hayo 50 hayo bu viere. (2 Pita 2:5) Rekọ ahwo na a gbolaro kẹ ovuẹ unuovẹvẹ Noa. A muẹroh’otọ họ. Fikiere, evaọ ukuhọ riẹ, Noa avọ uviuwou riẹ ọvo a zọ vrẹ ẹdhoguo obrukpe Jihova.—Matiu 24:37-39.

 4. Ẹvẹ a sae rọ ta nnọ odibọgba Noa ọ kparobọ, kọ ẹvẹ a sae rọ ta epọvo na kpahe iruo usiuwoma ota mai?

⁴ Kọ odibọgba Noa ọ kparobọ? Whọ rehọ umutho ahwo nọ a j’owọ roro iei hi. Evaọ uzẹme, usiuwoma ota Noa u ru ẹjiroro riẹ gba makọ oghẹrẹ owọ nọ ahwo na a jẹ. Fikieme? Keme o kẹ ahwo uvẹ ulele nọ a rẹ rọ salọ sọ a rẹ gọ Jihova hayo a rẹ gọe he. Kọ ẹvẹ kpahe ẹkwotọ usiuwoma ota ra? Makọ a be kẹ emamọ uyo ho, whọ be kparobọ gaga. Fikieme? Keme ẹkwoma usiuwoma ota na, who bi whowho unuovẹvẹ Ọghẹnẹ, yọ whọ be rọ ere ru uwou nọ Jesu o vi ilele riẹ na gba.—Matiu 24:14; 28:19, 20.

Abọgbekẹ Eruẹaro Ọghẹnẹ

 5. (a) Didi iyero e d’otọfia evaọ Juda evaọ edẹ Habakuk, kọ didi owọ ahwo na a jẹ kẹ ovuẹ eruẹaruẹ riẹ? (b) Ẹvẹ ahwo Juda a ro dhesẹ omukpahe kẹ eruẹaro Jihova?

⁵ Ikpe buobu nọ Ẹvo na ọ vrẹ no, uvie Juda o tẹ raha kuotọ. Edhọgọ, ababọ uvi-oziẹ, okienyẹ, makọ ikpakpe dede e dotọfia. Jihova o te vi Habakuk re ọ vẹvẹ ahwo na unu nnọ a gbe kurẹriẹ hẹ, okpẹtu o ti te ai oma no obọ ahwo Kaldia, hayo Babilọn ze. (Habakuk 1:5-7) Rekọ ahwo na a tehe ezọ di. Ẹsejọhọ a roro nnọ, ‘Kiyọ eme, bu vi ikpe udhusoi nọ i kpemu, Aizaya ọruẹaro na ọ kẹ unuovẹvẹ ovo na, rekọ uvumọ oware o re via ha!’ (Aizaya 39:6, 7) Orọnikọ isu Juda jọ a tehe ezọ di kẹ ovuẹ na ọvo ho rekọ a je kpokpo ewhovuẹ na. Okejọ, a daoma re a kpe Jerimaya ọruẹaro na, yọ a hae te kparobọ ogbẹrọ Ahikam nọ o dhomahọ ẹme na ha. Avọ eva nọ e dha riẹ fiki ovuẹ eruẹaruẹ ọfa jọ, Jehoakim Ovie na o te kpe Yuraija ọruẹaro na.—Jerimaya 26:21-24.

 6. Ẹvẹ Jihova ọ rọ bọ Habakuk ga?

⁶ Ovuẹ Habakuk o jọ avọ aruọwha re, yọ o dha ahwo eva wọhọ epaọ orọ Jerimaya, ọnọ Ọghẹnẹ ọ kẹ ẹgba re ọ ruẹaro ọraha ikpe 70 ọrọ Juda. (Jerimaya 25:8-11) Fikiere, ma rẹ sai w’otoriẹ oware nọ o wha uweri Habakuk ze nọ o bo nọ: “O ỌNOWO, ẹvẹ me re bo ubo obọufihọ se owhẹ krite, nọ owhẹ ore yo ho? Hayo bo se owhẹ nọ ‘Oja yo’, no who re siwẹ hẹ?” (Habakuk 1:2) Jihova ọ rọ eme uduotahawọ enana kẹ Habakuk uyo: “Eruaruẹ na e be hẹrẹ oke rai; o re ti ru ei vẹrẹ—ọrue ọ riẹ hẹ. O tẹ rọ nọ u bi lehie, hẹrẹ iẹe; ọ rẹ seba ẹtha ha, ọ te raha oke he.” (Habakuk 2:3) Fikiere Jihova o wo “oke” nọ ọ te rọ rehọ ẹdhoguo-okienyẹ gbe otunyẹ t’oba. O tẹ wọhọ nọ u bi lehie evaọ ẹro riẹ, udu u re no Habakuk awọ họ, hayo kọ o re fi oma h’otọ họ. Ukpoye, ọ rẹ “hẹrẹ iẹe,” rria kẹdẹ kẹdẹ avọ oma ovẹrẹ. Ẹdẹ Jihova o ti lehie he!

 7. Fikieme a rọ ma ọraha ọfa kẹ Jerusalẹm evaọ ikpe-udhusoi ọsosuọ C.E.?

⁷ Oware wọhọ ikpe 20 nọ Jihova ọ t’ẹme kẹ Habakuk no, a tẹ raha Jerusalẹm, okpẹwho Juda. Uwhremu na a tẹ wariẹ bọe, a tẹ kpọ eware ethọthọ buobu nọ e jẹ kẹ Habakuk idhọvẹ na vi. Rekọ, evaọ ikpe-udhusoi ọsosuọ C.E., a tẹ wariẹ kpoka ọraha họ okpẹwho na fiki ababọ-ẹrọwọ ahwo riẹ. Avọ ohrọ, Jihova ọ tẹ ruẹrẹhọ kẹ ahwo evezi re a zọ. Evaọ oke nana, Jesu Kristi, ọruẹaro ologbo kpobi na, ọye o vi rọ kẹ ovuẹ na. Evaọ 33 C.E., Jesu ọ ta kẹ ilele riẹ nọ: “Rekọ nọ wha rẹ te ruẹ Jerusalem nọ itu ẹmo ewariẹ họ, kẹsena wha rẹ riẹ nọ ẹraha riẹ ọkẹle ino. Kẹsena e nọ e rọ evaọ Judia evẹ dhẹ kpo igbehru.”—Luk 21:20, 21.

 8. (a) Eme ọ via kẹ Ileleikristi jọ nọ Jesu o whu no? (b) Ẹvẹ eme eruẹaruẹ Jesu kpahe Jerusalẹm i ro rugba?

⁸ Ikpe na e be nyaharo na, o sae jọ nọ u je gbe Ileleikristi jọ evaọ Jerusalẹm unu kpahe okenọ eruẹaruẹ Jesu i ti ro rugba. Whaọ, roro kpahe oma nọ ibuobu rai a lahiẹ no. Ẹsejọhọ a se emamọ iruo buobu fiki ọtamuo rai re a muẹroh’otọ. Oke o be nyaharo na, kọ oma o lọhọ e rai? Kọ a ku rie họ nnọ a be raha oke rai, bi roro nnọ eme ọ Jesu i kie kpahe oge obaro jọ, orọnikọ ọrai hi? Evaọ 66 C.E., eruẹaruẹ Jesu i te muhọ erugba evaọ okenọ egbaẹmo Rom a wariẹ Jerusalẹm họ. Enọ i muẹroh’otọ a vuhu oka na mu, dhẹ no okpẹwho na, jẹ dhẹ vabọ no ọraha Jerusalẹm.

Edhesẹ Ẹgwọlọ nọ A re Ro Muẹroh’otọ

 9, 10. (a) Ẹvẹ whọ rẹ rehọ eme ekpẹkpẹe obọra ro dhesẹ ọtadhesẹ Jesu ọrọ erigbo nọ e jẹ hẹrẹ ezihetha olori rai no eha-orọo riẹ ze na? (b) Fikieme ẹhẹrẹ olori rai o sae rọ jọ bẹbẹ kẹ erigbo na? (c) Fikieme o jẹ jọ erere kẹ erigbo na re a wo odiri?

⁹ Evaọ edhesẹ ẹgwọlọ nọ a re ro muẹroh’otọ, Jesu ọ rehọ ilele riẹ wawo erigbo nọ e be hẹrẹ ezihetha olori rai no eha-orọo ze. A riẹ aso nọ o ti ro kpozi na—rekọ auwa vẹ? No ighọjọ ezeza vrẹ? No ighọjọ izii vrẹ? Udeviaso? A riẹ hẹ. Jesu ọ ta nọ: “Otẹrọnọ [olori na] ọ nyaze ohẹrẹ-oke avọ ivẹ, hayo esa, o te di ai họ [nọ a bi roro ere], idibo eyena i wo oghale!” (Luk 12:35-38) Dai roro irẹro idibo enana. Edo kpobi, uwoho nọ o dhẹ kpobi o rẹ kpare irẹro rai: ‘Thakpinọ olori mai ọna ha?’

¹⁰ Kọ ẹvẹ otẹrọnọ olori na o kpozi evaọ etoke ighọjọ izii nya e ruọ udeviaso? Kọ erigbo na kpobi, te enọ i ruiruo gaga no anwọ ohiohiẹ ze na, a te ruẹrẹ oma kpahe re a yere iei, manikọ ejọ e te wezẹ no? Kọ ẹvẹ otẹrọnọ olori na o kpozi evaọ etoke udeviaso nya e ruọ ighọjọ esa irioke? Kọ udu u ti no erigbo na jọ awọ, tube fu ovao dede fikinọ olori rai ọ jọ ẹro rai lehie?a Enọ a dihọ nọ i bi roro evaọ okenọ olori na o kpozi ọvo họ enọ a ti whowho nnọ a wo evawere. Eme ọ Itẹ 13:12 i ghine kie kpahe ae: “Oware nọ ohwo o rẹro riẹ nọ u te rie ei obọ họ o rẹ kẹ ẹe idhọvẹ, rekọ oware nọ ohwo o rẹro riẹ nọ u te rie i obọ o wọhọ ure uzuazọ.”

11. Ẹvẹ olẹ u re ro fiobọhọ k’omai muẹroh’otọ?

¹¹ Evaọ etoke nọ o rọ wọhọ nọ o bi lehie na, eme o re fiobọhọ kẹ ilele Jesu muẹroh’otọ? Okenọ ọ jọ ọgbọ Getsemane taure a te ti mu ei, Jesu ọ ta kẹ ikọ esa riẹ jọ nnọ: “Wha roro hẹ lẹ, re wha siọ ẹdawọ ba ẹruọ.” (Matiu 26:41) Ikpe buobu evaọ obaro, Pita, ọnọ ọ jariẹ evaọ oke oyena, ọ kẹ ibe Ileleikristi ọkpọ ohrẹ oyena. O kere nọ: “Urere eware kpobi o kẹlino; fikiere wha jaja aro vi wha je he roro hẹ lẹ olẹ rai.” (1 Pita 4:7) O rọ vevẹ, olẹ nọ u re nevaze o rẹ jọ abọ uzuazọ Oleleikristi mai. Uzẹme, u fo re ma hae lẹ Jihova kẹse kẹse re o fiobọhọ k’omai muẹroh’otọ.—Ahwo Rom 12:12; 1 Ahwo Tẹsalonika 5:17.

12. Didi ohẹriẹ o rọ omuroro gbe ẹromuhotọ?

¹² Muẹrohọ nnọ Pita ọ ta re nọ: “Urere eware kpobi o kẹlino.” Ẹvẹ o kẹle te no? Uvumọ edhere ọ riẹ nọ ahwo-akpọ a sae rọ riobọhọ uzedhe ẹdẹ gbe auwa na ha. (Matiu 24:36) Rekọ ẹhẹriẹ ọ rọ udevie omufodẹ, onọ Ebaibol na o ta nọ ma whaha, avọ irẹro urere na, onọ o tuduhọ nọ a ru. (Wawo 2 Timoti 4:3, 4; Taitọs 3:9.) Ovẹ họ edhere ọvo jọ nọ ma sai ro muẹroh’otọ rẹro urere na? Ẹkwoma ẹro nọ ma re muhotọ kẹ imuẹro na inọ urere na o kẹlino. Fikiere joma kiẹ imuẹro ezeza jọ riwi nọ i dhesẹ nnọ ma be rria edẹ urere akpọ nana nọ ọ riẹ Ọghẹnẹ hẹ na.

Obọdẹ Imuẹro Ezeza

13. Ẹvẹ eruẹaruẹ Pọl nọ a kere fihọ 2 Timoti uzou avọ 3 na o rọ k’owhẹ imuẹro nnọ ma be rria “edẹ urere” na?

¹³ Orọ ọsosuọ, ma be ruẹ orugba eruẹaruẹ Pọl ukọ na kpahe “edẹ urere” na vevẹ. Pọl o kere nọ: “Rekọ riẹ onana, nọ eva edẹ urere oke ẹbẹbẹ te tha, keme ahwo a re ti you oma-obọrai, je you igho, a ve ti heri-oheri avọ oma-ovia gbe ekaela, a re ti yo ẹme e nọ i yẹ rai hi, a rẹ te jọ ababọ uyere-ọghọ gbe ababọ ẹfuọ, a wo eva egaga, a re koko eya ha, a rẹ raha odẹ ahwo, a wo oma-onyẹ hẹ, avọ ofu-ọkpoo, a re mukpahe ahwo ezi, otu ovivie, avọ uzou-uveghe, otu okpiro, enọ i yowọ enu-awere siọ Ọghẹnẹ ba, a rẹ yọrọ oghẹrẹ egagọ avẹ vro ogaga nọ o rọ eva riẹ. Si oma no oghẹrẹ ahwo otiọye. Dede yọ ahwo omuomu [gbe] otu eviẹhọ a re ti no eyoma ruọ onọ o mai yoma, eviẹwẹ [gbe] enọ a viẹhọ.” (2 Timoti 3:1-5, 13) Kọ ma be ruẹ eruẹaruẹ nana nọ o bi rugba nẹnẹ? Enọ i rri uzẹme na vo ọvo a rẹ vro riẹ!b

14. Ẹvẹ eme nọ a jọ Eviavia 12:9 ta kpahe Ẹdhọ na i bi ro rugba nẹnẹ, kọ eme ọ te via kẹe kẹle na?

¹⁴ Orọ avivẹ, ma be ruẹ imuẹro egele Setan avọ idhivẹri riẹ no obọ odhiwu ze, evaọ orugba Eviavia 12:9. Ma jọ etẹe se nnọ: “Fikiere a te gele odudu ologbo na fihọ otọ, oriọvọ anwae na ọnọ a re se Ukumuomu gbe Setan na, ọnọ ọ rẹ viẹ akpọ kpobi họ na—a te gele ie ze otọ akpọ, a te gele ikọ riẹ lele ie.” Onana o wha uye buobu ziọ otọakpọ na no. Evaọ uzẹme, iye buobu i te ahwo-akpọ no, maero anwọ 1914 ze. Rekọ eruẹaruẹ nọ e rrọ Eviavia na i fibae nnọ okenọ a gele Ẹdhọ ziọ otọakpọ, ọ riẹ nnọ “oke riẹ o re kpẹkpẹre.” (Eviavia 12:12) Evaọ etoke nana, Setan o bi fi ilele Kristi nọ a wholo na ẹmo. (Eviavia 12:17) Ma ghinẹ ruẹ imuẹro ohọre nana no evaọ oke mai na.c Rekọ, kẹle na, a te gba Setan fihọ ọgọdọ odidi re “ọ siọ erẹwho na ba ẹviẹhọ.”—Eviavia 20:1-3.

15. Ẹvẹ Eviavia 17:9-11 o rọ kẹ imuẹro inọ ma be rria oke urere na?

¹⁵ Orọ avesa, ma be rria etoke “ovie” avọ eree nọ ọ rrọ ọrọ urere nọ a fodẹ evaọ eruẹaruẹ nọ a kere fihọ Eviavia 17:9-11 na. Jọn ukọ na ọ jọ etenẹ fodẹ ivie ihrẹ, nọ i dikihẹ kẹ egaga-esuo akpọ ihrẹ—Ijipti, Asiria, Babilọn, Midia avọ Pasia, Grisi, Rom, gbe Ogaga-Esuo Akpọ agbava orọ Britain gbe America na. Ọ tẹ jẹ ruẹ ‘ovie avọ eree’ nọ ‘o no ọrọ avọ ihrẹ na ze.’ Ovie avọ eree ọnana—ọrọ urere nọ Jọn ọ ruẹ na—o dikihẹ kẹ Okugbe Erẹwho na. Jọn ọ ta nnọ ovie avọ eree nana ‘o kpohọ ọraha,’ yọ a gbẹ fodẹ ovie otọakpọ ọfa viere he.d

16. Ẹvẹ izẹme na evaọ orugba ẹmema ewezẹ Nebukadneza na i ro dhesẹ nọ ma be rria edẹ urere na?

¹⁶ Orọ avọ ene, ma be rria etoke nọ a rehọ awọ ẹmema ewezẹ Nebukadneza dhesẹ na. Daniẹl ọruẹaro na ọ f’otọ ewezẹ igbunu ọrọ ẹmema ologbo nọ o wo oma ohwo na. (Daniẹl 2:36-43) Abane ekpọna erọ ẹmema na i dikihẹ kẹ egaga akpọ sa-sa, muhọ rono uzou na (Uvie Babilọn) je kpotọ ziọ awọ gbe iziawọ na (egọmeti nọ i bi su nẹnẹ na). Egaga akpọ nọ a rehọ ẹmema ọyena dhesẹ na e roma via no. Obọnana ma be rria etoke nọ a rọ awọ ẹmema na dhesẹ. A fodẹ ogaga ofa nọ u ti lele eyena ha.e

17. Ẹvẹ iruo usiuwoma ota Uvie mai o rọ k’omai imuẹro efa inọ ma be rria oke urere na?

¹⁷ Orọ avọ isoi, ma be ruẹ usiuwoma ota akpọ-soso nọ u bi rugba, onọ Jesu ọ ta nọ o te via taure ekuhọ uyerakpọ nana o tẹ te nwane ze. Jesu ọ ta nọ: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.” (Matiu 24:14) Nẹnẹ na, eruẹaruẹ yena i bi rugba vi epaọ anwẹdẹ. Uzẹme, ekwotọ jọ e riẹ nọ a ti dhobọte he, yọ o sae jọ nnọ evaọ ẹruoke Jihova, uvẹ iruo buobu u ti rovie fihọ. (1 Ahwo Kọrint 16:9) Ghele na, Ebaibol na ọ ta ha inọ Jihova ọ te hẹrẹ bẹsenọ a re se isẹri kẹ omomọvo nọ ọ rọ otọakpọ na kpobi no. Ukpoye, a rẹ ta usiuwoma na te ẹgwọlọ Jihova. Kẹsena urere na o vẹ nyaze.—Wawo Matiu 10:23.

18. Eme o rọ vevẹ nọ o te via kpahe ejọ nọ a wholo na evaọ okenọ uye ulogbo na u ti muhọ, kọ ẹvẹ a rẹ rọ riẹ onana?

¹⁸ Orọ avọ ezeza, unu uvi ilele Kristi nọ a wholo o be kawo, dede nọ ejọ e te gbẹ jọ otọakpọ na okenọ uye ulogbo na u ti muhọ. Ibuobu okiọkotọ na e kpako no, yọ evaọ ikpe na kpobi na unu enọ a ghine wholo na o be kawo. Dede na, be ta kpahe uye ulogbo na, Jesu ọ ta nnọ: “A gbẹ kpẹre edẹ eyena ha, a hẹ sai siwi ohwo ọvo ho; rekọ fiki epa enọ a sanọe a jẹ te kpẹre edẹ eyena.” (Matiu 24:21, 22) Fikiere, u muẹro inọ, ejọ “enọ a sanọe” erọ Kristi na e te gbẹ jọ otọakpọ evaọ okenọ uye ulogbo na u ti muhọ.f

Eme Ọ Rọ Obaro?

19, 20. Fikieme o rọ kpata k’omai enẹna vi anwẹdẹ re ma jaja aro vi je muẹroh’otọ?

¹⁹ Eme ọ rọ obaro k’omai? Oke isiuru o rọ obaro tha. Pọl ọ vẹvẹ unu nnọ “ẹtha Ọnowo na ọ wọhọ epanọ oji ọ rẹ tha aso.” Be ta kpahe ahwo nọ a wọhọ nnọ a wo ereghẹ akpọ, ọ ta nọ: “Okenọ ahwo a rẹ te ta nọ, ‘Oke onana oke udhedhẹ gbe omofọwẹ,’ idudhe na ọraha ọ vẹ nwane bru ae ze.” Fikiere, Pọl ọ tẹ hrẹ enọ i bi se eme riẹ nọ: “Fikiere wha jọ oma wezẹ hẹ, epanọ edekọ i re ruo; rekọ wha je oma siọ owezẹ ba re ma jọ aruro.” (1 Ahwo Tẹsalonika 5:2, 3, 6) Evaọ uzẹme, ahwo nọ a be rẹro so ikoko ahwo-akpọ re e rehọ udhedhẹ gbe omofọwẹ ze a be f’aro kẹ uzẹme na. Ahwo otiọye na a wezẹ vru no!

²⁰ Ọraha uyerakpọ nana ọ te tha kpregede. Fikiere, hai rẹro ẹdẹ Jihova. Ọghẹnẹ omariẹ ọ ta kẹ Habakuk nnọ: “Ọ te raha oke he”! Evaọ uzẹme, ma re muẹroh’otọ enẹna vi epaọ anwẹdẹ.

[Oruvẹ-obotọ]

Kọ Whọ Kareghẹhọ?

• Didiọ iriruo Ikereakere e rẹ sai fiobọhọ k’omai muẹroh’otọ?

• Ẹvẹ Jesu o ro dhesẹ ẹgwọlọ ẹromuhotọ?

• Imuẹro ezeza vẹ i dhesẹ nnọ ma be rria edẹ urere na?

[Iwoho nọ e rrọ ẹwẹ-obe avọ 3]

A. H. Macmillan ọ rọ oruọzewọ gọ Jihova kẹle ikpe udhosa

[Uwoho nọ o rrọ ẹwẹ-obe avọ 4]

Jesu ọ rehọ ilele riẹ wawo erigbo nọ i bi muẹroh’otọ