Dikihẹ Ga Avọ Imuẹro Egaga

Obọ Ufihọ kẹ Izoge avọ Uthubro Ẹruoke

EPAFRAS yọ Oleleikristi ikpe-udhusoi ọsosuọ nọ o kpohọ Rom. Ghele na, avọ emamọ ẹjiroro, iroro riẹ i je kpohọ Kọlọsi, okpẹwho jọ evaọ Esia Minor. Ọ jọ etẹe whowho emamọ usi na yọ ababọ avro o fiobọhọ kẹ ahwo Kọlọsi na jọ zihe ro ilele Jesu Kristi. (Ahwo Kọlọsi 1:7) Epafras o wo ọdawẹ ọgaga kẹ ibe enọ e rọwo evaọ Kọlọsi, keme Pọl ukọ na o kere se ae no obọ Rom ze inọ: “Ẹpafras . . . o yere owhai, ọ be hẹ kareghẹ họ owhai eva olẹ riẹ, re wha dikihẹ ga avọ imuẹro eva oreva Ọghẹnẹ.”—Ahwo Kọlọsi 4:12.

Epọvo na re, esẹ gbe ini Ileleikristi inẹnẹ a rẹ lẹ kẹ ewoma abọ-ẹzi emọ rai gaga. Esẹ gbe ini enana a rẹ daoma kọ uyoyou rọkẹ Ọghẹnẹ fihọ idu emọ rai re a sai dikihẹ ga evaọ ẹrọwọ na.

Izoge Ileleikristi buobu e yare obufihọ evaọ eyerikugbe use-abọ nọ a be rẹriẹ ovao ku evaọ isukulu gbe eria efa no. Ọmọtẹ ikpe 15 jọ ọ ta nọ: “Ebẹbẹ mai i bi yoma viere. Uzuazọ o vọ avọ ozọ gaga. Ma gwọlọ obufihọ!” Kọ a k’uyo kẹ ayare izoge gbe elẹ eyewọ eg’Ọghẹnẹ itieye na no? E! ‘Ọrigbo nọ o wo ẹrọwọ avọ areghẹ na’ ọ kẹ uthubro nọ u no Ebaibol ze no. (Matiu 24:45) Uzoẹme onana o fodẹ ebe jọ nọ i fiobọhọ kẹ izoge idu ẹko udhusoi buobu no re a “dikihẹ ga avọ imuẹro” egaga. Joma t’ẹme kpahe ebe enana jọ.

“Rri . . . Isẹri Ekpokpọ 15,000!”

Evaọ August 1941, ogbotu nọ o bu te 115,000 o kokohọ evaọ St. Louis, Missouri, U.S.A., rọkẹ okokohọ Isẹri Jihova nọ ọ mae rro kpobi rite oke oyena. Eva ẹdẹ urere riẹ—“Ẹdẹ Emọ”—oware wọhọ emọ 15,000 nọ e keria kẹle eplatfọmo na a gaviezọ ziezi nọ Joseph F. Rutherford ọ jẹ t’ẹme kpahe uzoẹme na “Emọ Ovie Na.” Kẹle ekuhọ ẹme riẹ, Rutherford nọ ọ kpako te ikpe 71 no ọ tẹ ta avọ uvo ọsọmọ nọ:

“Whai kpobi . . . emọ nọ e rọwo . . . re a yoẹme kẹ Ọghẹnẹ avọ Ovie riẹ, iviena wha dikihẹ.” Emọ na kpobi i te dikihẹ usu ovo. Brọda Rutherford o te whowho nọ: “Rri, bu vi isẹri ekpokpọ 15,000 erọ Uvie na!” Abọtehe ọgaga o te lele iei. Oruẹme na o te fibae nọ: “Whai kpobi nọ wha te daoma re wha ta kẹ amọfa kpahe uvie Ọghẹnẹ na . . . , iviena wha ta nọ Ee.” Emọ na i te bo gaga nọ “Ee!” Kẹsena o te dhesẹ obe okpokpọ na Children, onọ a dederehọ avọ abọtehe okrẹkri.

Nọ ẹme ọjaja ọnana o kuhọ no, uhie uthethei izoge o tẹ nya kpohọ obọ eplatfọmo na, oria nọ Brọda Rutherford ọ jẹ rehọ obe okpokpọ na kẹ ae ọvọvẹ. Oware nọ o via na o tẹ lẹliẹ irui su no ogbotu na aro ze. Ohwo jọ nọ ọ jọ etẹe ọ ta nọ: “Ohwo nọ o wo ubiudu utho ọvo ughe izoge nọ i [bi dhesẹ] evaifihọ gbe ẹrọwọ ọvọvọ fihọ Ọghẹnẹ rai, Jihova, o rẹ wọ họ.”

Evaọ okokohọ ọyena nọ ọ rẹ thọrọ ẹro ho na, izoge 1,300 e họ-ame ro dhesẹ omarọkẹ rai kẹ Jihova via. Ibuobu rai i gbe kru ẹrọwọ rai ga rite inẹnẹ. A bi fiobọhọ evaọ ikoko rai, a fialoma via wọhọ ahwo unevaze Ebẹtẹle, hayo bi ruiruo wọhọ imishọnare evaọ ekwotọ efa. Uzẹme, “Ẹdẹ Emọ” gbe obe na Children u kpomahọ idu izoge buobu krẹkri!

“O Wọhọ nọ E rẹ Nyaze eva Ẹruoke”

Evaọ etoke ikpe ọ 1970, Isẹri Jihova a kporo ebe esa efa nọ i duobọte udu izoge idu ẹko udhusoi buobu. Enana họ Listening to the Great Teacher, Your Youth—Getting the Best out of It, gbe Obe Ikuigbe Ebaibol Mẹ. Evaọ 1982 a te muọ ọruẹrẹhọ “Young People Ask . . . ” (Izoge E be Nọ . . . ) na họ ekporo fihọ emagazini Awake! na. Izoẹme enana i dhobọte udu emaha gbe ekpako no. “K’aso k’aso me re yere Ọghẹnẹ fikinọ a bi kporo izoẹme enana,” ere ọmọ ikpe 14 jọ ọ ta. Ọmọ ikpe 13 jọ ọ ta nọ: “Izoẹme na e were omẹ, o wọhọ nọ e rẹ nyaze eva ẹruoke.” Eyewọ gbe ekpako Ileleikristi nọ a ro mu a rọwo nọ izoẹme enana yọ erọ ẹruoke yọ e rẹ kẹ erere.

Rite 1989 oware wọhọ izoẹme 200 erọ “Young People Ask . . . ” e roma via no evaọ Awake! Eva Okokohọ Ubrotọ “Omarọkẹ Ọghẹnẹ” eva ukpe oyena, a te siobọno obe na Questions Young People Ask—Answers That Work. Kọ u fiobọhọ kẹ izoge dikihẹ ga no evaọ ẹrọwọ na? Izoge esa jọ i kere inọ: “Obe onana yọ okwakwa igbunu k’omai evaọ ewo otoriẹ ebẹbẹ mai gbe ẹriẹ epanọ ma re ro fi ai kparobọ. Ma yere owhai fiki isiuru rai kpahe ewoma mai.” Izoge buobu nọ i bi sei wariẹ akpọ na họ a rọwo ere.

“U Furie Ohọo Mai”

Evaọ 1999, Isẹri Jihova i te ru okwakwa uthubro ẹruoke ofa rọkẹ izoge—ividio na Young People Ask—How Can I Make Real Friends? O wha eme ajọwha ze. “Ividio nana i duobọte udu mẹ gaga,” ere ọmọ ikpe 14 jọ ọ ta. “O te jọ abọjọ emu abọ-ẹzi mai ẹsikpobi,” ere oni jọ nọ ọye ọvo ọ rọ ọ ta. “O rẹ sasa udu re ma riẹ nọ Ogbẹnyusu obọdẹ mai, Jihova, o ghine you izoge jẹ be rẹrote ai evaọ ukoko akpọ-soso riẹ,” ere uvovo aye jọ ọ ta.

Eme ividio na i rugba no? Izoge e ta nọ: “U fiobọhọ k’omẹ muẹrohọ usu mẹ no, re mẹ whoma h’ahwo nọ a rrọ ukoko na, je ru Jihova fihọ ogbẹnyusu mẹ.” “U fiobọhọ k’omẹ rọ aro dhe ehwa mẹ no.” “U fiobọhọ k’omẹ dikihẹ ga no evaọ ọtamuo mẹ re mẹ gọ Jihova te epanọ ẹgba mẹ o te.” Yọ imava orọo jọ a kere nnọ: “Ma yere owhai no udu mai ze fiki ‘emu’ ọnana nọ wha k’omai na. U furie ohọo mai.”

Evaọ erugba iruo nọ Ọghẹnẹ ọ kẹ riẹ, ‘ọrigbo nọ o wo ẹrọwọ avọ areghẹ’ nọ a wholo na ọ ruẹrẹ emu abọ-ẹzi ẹruoke họ no kẹ ahwo kpobi nọ a jẹ riẹ rehọ. Yọ ẹvẹ oghọghọ na o rro te re ma ruẹ epanọ ithubro Ikereakere itieye na i bi fiobọhọ kẹ izoge re a “dikihẹ ga avọ imuẹro eva oreva Ọghẹnẹ”!