Bọ Uruemu Ẹmeoyo Nọ Urere Na U Bi Si Kẹle Na

“Ẹme [Shailo] ahwo na kpobi a re ti yo.”—EMUHỌ 49:10.

 1. (a) Evaọ oke anwae, didi oware ẹmeoyo kẹ Jihova o gwọlọ? (b) Didi eruẹaruẹ kpahe ẹmeoyo Jekọp ọ ruẹ?

ẸMEOYO kẹ Jihova o gwọlọ nọ a re yo ẹme kẹ ahwo ẹro riẹ re. Ahwo nana a kugbe enjẹle, esẹ-uviuwou, iguẹdhọ, izerẹ, eruẹaro, gbe ivie. A tube se agbara ivie Izrẹl na agbara-uvie Jihova. (1 Iruẹru-Ivie 29:23) Rekọ u yoma gaga, inọ, isu Izrẹl buobu a ghẹmeeyo kẹ Ọghẹnẹ, a tẹ wha okpẹtu se oma rai gbe enọ a je su. Rekọ Jihova o vu ahwo omarokpotọ riẹ wa ababọ ẹruore he; ọ kẹ rai omosasọ ẹkwoma eyaa ọrọ eromuo Ovie nọ ọ kare ogbekuo, ọnọ otu nọ o kiẹrẹe na a ti yo ẹme kẹ avọ omawere. (Aizaya 9:6, 7) Okenọ Jekọp, ọsẹ-anwae na, o je whu ọ ruẹaro kpahe ovie obaro ọnana, inọ: “Ọkpọ-uvie na ọ sai no obọ Juda ha, ọkpọ osu-isuẹsu ọ sai no agada awọ riẹ hẹ, bẹsenọ ọ rẹ te tha bru [Shailo] ọnọ o te i, ẹme riẹ ahwo na kpobi a re ti yo.”—Emuhọ 49:10.

 2. Eme họ otofa “Shailo,” kọ ẹvẹ esuo uvie riẹ o rẹ te kẹre te?

² “Shailo” yọ ubiẹme Hibru nọ otofa riẹ o rrọ “Ọnọ O Wo Rie.” Ẹhẹ, Shailo ọ rẹ te re uvie, nọ a rehọ ọkpọ-uvie gbe ogaga esuo dhesẹ na, wọhọ epanọ ọkpọ osu-isuẹsu na o dikihẹ kẹ. Ofariẹ, esuo uvie riẹ o re ti te “ahwo na kpobi” orọnikọ emọ Jekọp ọvo ho. Onana o rọwo kugbe eyaa Jihova kẹ Abraham inọ: “Emọ ra i re ti wo unuighẹ ewegrẹ rai, evaọ [ubi] ra erẹwho akpọ na kpobi i je wo oghale.” (Emuhọ 22:17, 18) Jihova ọ fere “ubi” nana via evaọ 29 C.E. okenọ ọ rehọ ẹzi ọfuafo wholo Jesu ọrọ Nazarẹt na.—Luk 3:21-23, 34; Ahwo Galesha 3:16.

Uvie Ọsosuọ Jesu

 3. Didi esuo Jesu o wo okenọ o tovrẹ kpohọ odhiwu no?

³ Okenọ Jesu o tovrẹ kpohọ odhiwu, ọ nwane rehọ ọkpọ nọ o re ro su ahwo akpọ na ẹsiẹsiẹe he. (Olezi 110:1) Dede na, ọ re “uvie” nọ o jo wo ahwo nọ a bi yo ẹme kẹe. Pọl ukọ na o dhesẹ uvie oyena via nọ o kere nọ: ‘Ọghẹnẹ o si omai no ogaga ebi, ọ tẹ rehọ omai ze uvie Ọmọ oyoyou riẹ na.’ (Ahwo Kọlọsi 1:13) Esiwo ọnana o muhọ evaọ Pẹntikọst 33 C.E. okenọ a ku ẹzi ọfuafo ku ilele ẹrọwọ Jesu.— Iruẹru 2:1-4; 1 Pita 2:9.

 4. Idhere vẹ ilele ọsosuọ Jesu a ro dhesẹ ẹmeoyo rai, kọ ẹvẹ Jesu o ro dhesẹ ae wọhọ ẹko?

⁴ Wọhọ “unuẹworo Kristi,” ilele nọ a rọ ẹzi wholo na a tẹ rọ ẹmeoyo mu amọfa nọ i ti zihe ro ibe “emotọ” evaọ uvie abọ-ẹzi ọyena họ ekoko họ. (2 Ahwo Kọrint 5:20; Ahwo Ẹfẹsọs 2:19; Iruẹru 1:8) Fibae, enana a rẹ “jọ iroro gbe oziẹ-obro ọvo” re a ruẹse re awere ọjẹrehọ Ovie rai Jesu Kristi. (1 Ahwo Kọrint 1:10) Wọhọ ẹko, a ru ‘ọrigbo nọ o wo ẹrọwọ avọ areghẹ’ hayo ẹko odibo oruọzewọ via.—Matiu 24:45; Luk 12:42.

Oghale Fiki Ẹmeoyo kẹ “Odibo” Ọghẹnẹ

 5. No oke anwae ze, ẹvẹ Jihova o ro wuhrẹ ahwo riẹ no?

⁵ No anwọ emuhọ ze, Jihova ọ be hae rọ iwuhrẹ kẹ ahwo riẹ ẹsikpobi. Wọhọ oriruo, okenọ ahwo Ju a zihe no Babilọn ze no, Ẹzra gbe ezae efa nọ i te, orọnikọ a je se Uzi Ọghẹnẹ kẹ ahwo na ọvo ho, rekọ a ru uzi na “vevẹ” re, ‘dhesẹ iẹ ziezi je ru otofa’ Ẹme Ọghẹnẹ vẹ.—Nehemaya 8:8.

 6, 7. Ẹvẹ utu ọrigbo na ọ rọ rehọ ẹkwoma Ugboma Esuo riẹ kẹ emu abọ-ẹzi ẹruoke no, kọ fikieme omarokpotọ kẹ utu ọrigbo na u ro fo?

⁶ Evaọ ikpe-udhusoi ọsosuọ na, okenọ ẹme oyawo o roma via evaọ 49 C.E., ugboma esuo orọ ẹko ọrigbo ọsosuọ na a rọ oma olẹ roro kpahe ẹme na a tẹ rọ Ikereakere ku ẹme na họ. Nọ a rọ ẹkwoma ileta whowho ẹjiroro rai na via, ikoko na a yo ẹme kẹ ọkpọvio nọ a kẹ na a tẹ re awere efe oghale Ọghẹnẹ. (Iruẹru 15:6-15, 22-29; 16:4, 5) Epọvo na o rọ enẹna re, ọrigbo ẹrọwọ na ọ rehọ ẹkwoma Ugboma Esuo riẹ ru eme nọ i wuzou vẹ no, wọhọ seomaba-edhehọ Ileleikristi, ẹfuọ azẹ, eroruiruo imu egaga gbe utaba nọ a re se. (Aizaya 2:4; Iruẹru 21:25; 2 Ahwo Kọrint 7:1) Jihova ọ ghale ahwo riẹ no fiki ẹmeoyo rai kẹ Ẹme riẹ gbe ọrigbo ẹrọwọ na.

⁷ Ẹkwoma ẹmeoyo kẹ utu ọrigbo na, ahwo Ọghẹnẹ a bi dhesẹ ẹmeoyo rai kẹ Olori na, Jesu Kristi. Ẹmeoyo otiọye na o w’uzou viere nẹnẹ fiki udu-esuo ulogbo nọ a kẹ Jesu no, wọhọ epanọ Jekọp ọ ruẹaro riẹ evaọ okenọ ọ kẹle uwhu no.

Shailo O Zihe Ro Uvi Osu Otọakpọ

 8. Ẹvẹ gbe oke vẹ a ro ru udu-esuo Kristi kẹre?

⁸ Eruẹaruẹ Jekọp na i dhesẹ nọ “ahwo na kpobi a re ti yo” ẹme kẹ Shailo. U re vevẹ, esuo Kristi ọ te kẹre vi Izrẹl abọ-ẹzi. Ẹvẹ ọ te kẹre te? Eviavia 11:15 o kuyo nọ: “Uvie akpọ nana u re ti zihe ruọ uvie Ọnowo mai gbe orọ Kristi riẹ, ọye o re ti suẹ bẹdẹ bẹdẹ.” (Ẹjẹlẹ ibiẹme na ọmai.) Ebaibol i dhesẹ nnọ udu-esuo yena u te Jesu obọ evaọ ekuhọ ‘eke ihrẹ’ eruẹaruẹ na—“oke ahwo Egedhọ na”—evaọ 1914.a (Daniẹl 4:16, 17; Luk 21:24) Evaọ ukpe oyena, ‘ọzino’ Kristi wọhọ Ovie Mesaya nọ a rẹ ruẹ hẹ na o ro muhọ, jegbe oke riẹ nọ o re ro ‘muhọ esu evaọ udevie ewegrẹ riẹ.’—Matiu 24:3; Olezi 110:2.

 9. Eme Jesu o ru okenọ a kẹe Uvie no, kọ didi ukpokpoma onana o wha se ahwo-akpọ, maero kọ ilele riẹ?

⁹ Oware ọsosuọ nọ Jesu o ru okenọ a kẹe ogaga uvie no họ o gele ohwo aghẹmeeyo na—Setan—avọ idhivẹri riẹ “ze otọ akpọ.” No anwọ oke oyena ze, izi imuomu enana a ru rie bẹbẹ gaga no re a yo ẹme kẹ Jihova, a te je dhesẹ oware kẹ ahwo-akpọ no. (Eviavia 12:7-12; 2 Timoti 3:1-5) Evaọ uzẹme, uzedhe ahwo nọ Setan o bi fiẹmo abọ-ẹzi na họ erọ Jihova nọ a wholo na, “enọ i [bi] koko izi Ọghẹnẹ, enọ i [bi] se isẹi kẹ Jesu,” gbe egbẹnya “igodẹ efa” rai.—Eviavia 12:17; Jọn 10:16.

10. Orugba eruẹaruẹ Ebaibol vẹ o kẹ imuẹro inọ ẹmo Setan mukpahe Ileleikristi uzẹme na o ti kie kpe ei?

¹⁰ Rekọ, ohọre na u ti kie kpe Setan keme onana họ ‘ẹdẹ Olori na,’ yọ uvumọ oware o sae whaha Jesu “obọ-okparọ” họ. (Eviavia 1:10; 6:2) Wọhọ oriruo, ọ te ruẹ nọ a kpe oka urere na họ ahwo 144,000 Izrẹl abọ-ẹzi na. Ọ te jẹ thọ “otu obuobu jọ, nọ ohwo ọvo ọ sai kele he, nọ i no erẹwho kpobi ze, erua gbe ahwo gbe erọo-unu.” (Eviavia 7:1-4, 9, 14-16) Rekọ, wo ohẹriẹ no egbẹnya rai nọ a wholo na, enana i ti zihe ro ahwo otọakpọ ẹmeoyo erọ Jesu. (Daniẹl 7:13, 14) Akpọ na nọ a rrọ na o kẹ imuẹro nọ a rẹ ruẹ inọ Shailo ọ ghinẹ rrọ Osu “uvie akpọ nana.”—Eviavia 11:15.

Enẹna Họ Oke nọ A rẹ rọ “Kezọ Usiuwoma” Na

11, 12. (a) Amono ọvo a te zọ vrẹ ekuhọ uyerakpọ nana? (b) Didi uruemu enọ i bi kie lele “ẹzi akpọ na” a bi dhesẹ?

¹¹ Enọ e gwọlọ uzuazọ ebẹdẹ bẹdẹ kpobi a re wuhrẹ ẹmeoyo hrọ, keme Ebaibol na ọ ta vevẹ inọ “enọ e riẹ Ọghẹnẹ hẹ, gbe enọ e kezọ usiuwoma Jesu Ọnowo mai hi” a te zọ vrẹ ẹdẹ orukele Ọghẹnẹ hẹ. (2 Ahwo Tẹsalonika 1:8) Dede na, okegbe omuomu nana avọ ẹzi ọkparesuọ riẹ wọso izi gbe ehri-izi Ebaibol na o bi ru ẹmeoyo kẹ emamọ usi na jọ bẹbẹ gaga.

¹² Ebaibol i dhesẹ ẹzi uzou-uveghe kẹ Ọghẹnẹ nana wọhọ “ẹzi akpọ na.” (1 Ahwo Kọrint 2:12) Bi dhesẹ oghẹrẹ nọ o bi ro kpomahọ ahwo, Pọl ukọ na o kere se Ileleikristi ikpe-udhusoi ọsosuọ nọ e jọ Ẹfẹsọs nọ: “Ẹsiẹnwae wha jẹhẹ nya lele epanọ akpọ ọ rọ, wọhọ epanọ osu ogaga ofou na ọ rọ, ọnọ ẹzi riẹ o bi ru iruo eva emọ udu uyoma enẹna. Udevie enọ mai kpobi a jarọ je yeri okejọ fiki urusio iwo mai, no ma je he kie lele ẹguọlọ iwo eva mai, fikiere ma tẹ jọ emọ ofu wọhọ epanọ edekọ e rọ.”—Ahwo Ẹfẹsọs 2:2, 3.

13. Ẹvẹ Ileleikristi a sae ghinẹ rọ whaha ẹzi akpọ na, kọ avọ irere vẹ?

¹³ O rrọ oware evawere inọ, Ileleikristi ahwo Ẹfẹsọs na a jọ irigbo kẹ ẹzi aghẹmeeyo yena bẹdẹ bẹdẹ hẹ. Ukpoye, a zihe ruọ emọ ẹmeoyo erọ Ọghẹnẹ ẹkwoma omarokpotọ kẹ ẹzi riẹ gbe ibi iwoma buobu riẹ nọ a jẹ mọ. (Ahwo Galesha 5:22, 23) Epọvo na re nẹnẹ, ẹzi Ọghẹnẹ—ẹgba nọ ọ mae ga kpobi evaọ ehrugbakpọ na—o bi fi obọ họ kẹ ima ahwo buobu yo ẹme kẹ Jihova, re a sai wo “[imuẹro] ẹruore na rite urere.”—Ahwo Hibru 6:11; Zekaraya 4:6.

14. Ẹvẹ Jesu ọ rọ vẹvẹ Ileleikristi edẹ urere na kpobi unu kpahe ugogo eware nọ e te dawo ẹmeoyo rai?

¹⁴ Jẹ kareghẹhọ inọ ma wo uketha ulogbo orọ Shailo, ọnọ tei te Ọsẹ riẹ a te kẹ uvumọ ọwegrẹ uvẹ hẹ—idhivẹri hayo ohwo-akpọ—re a dawo ẹmeoyo mai vi onọ ma rẹ sae wha. (1 Ahwo Kọrint 10:13) Evaọ uzẹme, re u fi obọ họ k’omai evaọ ẹmuofio abọ-ẹzi mai, Jesu o dhesẹ ugogo ebẹbẹ jọ nọ ma te rẹriẹ ovao ku evaọ edẹ urere enana. O ru onana ẹkwoma ileta ihrẹ nọ ọ rọ kẹ Jọn ukọ na evaọ eruẹaruẹ. (Eviavia 1:10, 11) Uzẹme, i wo obọdẹ ohrẹ kẹ Ileleikristi oke oyena, rekọ orugba rai i kie kpahe ‘ẹdẹ Olori na,’ anwọ 1914 ze. Fikiere, ẹvẹ u fo te inọ ma gaviezọ kẹ evuẹ enana!b

Whaha Ababọ-Osegboja, Ọfariẹ-Ogbe, gbe Ilale-Efe

15. Fikieme ma jẹ yọrọ oma kẹ ẹbẹbẹ nọ o kpomahọ ukoko obọ Ẹfẹsọs na, kọ ẹvẹ ma sai ro ru ere? (2 Pita 1:5-8)

¹⁵ Jesu o kere ileta ọsosuọ riẹ se ukoko obọ Ẹfẹsọs. Nọ o jiri ukoko na kẹ ithihakọ riẹ no, Jesu ọ tẹ ta nọ: “Rekọ mẹ rehọ fiki onana whọku owhẹ, fiki epanọ whọ se uyoyou ọsosuọ ra ba no.” (Eviavia 2:1-4) Nẹnẹ, Ileleikristi jọ nọ i wo ọwhọ gaga vẹre a ku uyoyou ogaga nọ a wo kẹ Ọghẹnẹ vẹre fiẹ no. Oyena o rẹ sai whrehe usu ohwo kugbe Ọghẹnẹ, yọ enẹ họ oke o gbẹ riẹ. Ẹvẹ a sae rọ wariẹ bọ uyoyou utiọye na? Ẹkwoma uwuhrẹ Ebaibol ẹsikpobi, ekpohọ iwuhrẹ, olẹ, gbe eroro. (1 Jọn 5:3) Uzẹme, onana o gwọlọ ‘omodawọ,’ rekọ omodawọ na o rrọ uvrẹvru hu. (2 Pita 1:5-8) Otẹrọnọ okenọ whọ ghinẹ kiẹ oma ra riwi ziezi whọ ruẹ nọ uyoyou ra u dhẹ no, kpọ ẹbẹbẹ na vi vẹrẹ vẹrẹ, evaọ ẹmeoyo kẹ uduotahawọ Jesu na: “Roro re who vuhu oria ekie ra, re who ku eva rẹriẹ zihe kpo ẹta iruo ra ọsosuọ.”—Eviavia 2:5.

16. Didi iruemu enwoma abọ-ẹzi e jọ ikoko Pẹgamọm gbe Thiatira, kọ fikieme eme ọ Jesu ro se ai i je fo kẹ oke mai na?

¹⁶ A jiri Ileleikristi nọ e jọ obọ Pẹgamọm gbe Thiatira fiki ekiete, ithihakọ, gbe ọwhọ rai. (Eviavia 2:12, 13, 18, 19) Ghele na, otu jọ nọ i bi dhesẹ ẹzi omuomu ọ Belam gbe Jẹzibẹl a be raha ae, enọ e rehọ ọfariẹ-ogbe avọ egagọ Bale wha ogbekuo fihọ Izrẹl anwae. (Ikelakele 31:16; 1 Ivie 16:30, 31; Eviavia 2:14, 16, 20-23) Kọ ẹvẹ kpahe oke mai na—‘ẹdẹ Olori na’? Kọ iruemu iyoma evona e gbẹ r’otọ? E, keme ọfariẹ-ogbe họ oware nọ a gbẹ be mai ro si ahwo no ukoko evaọ udevie ahwo Ọghẹnẹ. Fikiere, ẹvẹ u wuzou te re ma whaha usu kugbe ahwo nọ e rẹ sae raha uruemu mai—te enọ e rrọ eva gbe otafe ukoko na! (1 Ahwo Kọrint 5:9-11; 15:33) Enọ e gwọlọ jọ erọ ẹmeoyo Shailo a rẹ jẹ whaha aruọza nọ o wo irekọ jegbe ebe avọ ifoto ẹbẹba Itanẹte.—Emọs 5:15; Matiu 5:28, 29.

17. Ẹvẹ eriwo gbe uruemu ahwo jọ evaọ Sadis gbe Laodisia u ro wo ohẹriẹ no epanọ Jesu ọ ruẹ uyero abọ-ẹzi rai?

¹⁷ U te no umutho ahwo jọ no, a jiri ukoko nọ o jọ obọ Sadis na vievie he. O wo “odẹ,” hayo oma inọ o rrọ uzuazọ, rekọ ababọ-osegboja abọ-ẹzi o ro riẹ azẹ no te epanọ evaọ aro Jesu o “whu” no. Okafe gheghe a bi jo dhesẹ nọ a bi yo ẹme kẹ usiuwoma na. Ọwhọkuo na ọ ga yọ! (Eviavia 3:1-3) Uruemu ovona o rrọ ukoko obọ Laodisia re. Ọ be rọ efe seha, ta nọ: “Me fe hrọ no,” rekọ rọ kẹ Kristi, ọ “rọ ọkora, nyouzou, yogbe, tuaro jẹ bafihọ.”—Eviavia 3:14-17.

18. Ẹvẹ ohwo ọ sae rọ whaha ẹjọ ọyẹlẹ abọ-ẹzi evaọ aro Ọghẹnẹ?

¹⁸ Nẹnẹ, Ileleikristi jọ nọ i wo ẹrọwọ vẹre a kie ruọ oghẹrẹ aghẹmeeyo ọvona no re. O sae jọ nọ a kẹ ẹzi akpọ na uvẹ re u mi ai iroro oma ovẹrẹ no, a te no ere wo uruemu oyẹlẹ abọ-ẹzi kpahe uwuhrẹ Ebaibol, olẹ, iwuhrẹ Ileleikristi, gbe odibọgba na. (2 Pita 3:3, 4, 11, 12) Ẹvẹ u wuzou te re ahwo otiọye na a yo ẹme kẹ Kristi ẹkwoma ele efe abọ-ẹzi—ẹhẹ, re a jọ obọ Kristi “dẹ igoru nọ a wozẹ no eva erae”! (Eviavia 3:18) Uvi efe ọyena o gwọlọ nọ a re “fe eva iruo iwoma, eva efuafo avọ ọghọ-oruo.” Ma tẹ raha ekwakwa mai kẹ eware eghaghae itieye na, yọ ma bi ‘fi otọhotọ uwoma họ kẹ oma mai kẹ obaro na, re uzuazọ nọ o ghine rrọ uvi uzuazọ o ruẹse te omai obọ.’—1 Timoti 6:17-19.

A Jiri Rai kẹ Ẹmeoyo Rai

19. Didi ajiri gbe uduotahawọ Jesu ọ rọ kẹ Ileleikristi obọ Smaena gbe Filadelfia?

¹⁹ Ikoko nọ e jọ Smaena gbe Filadelfia e riẹ ru gaga evaọ ẹmeoyo, keme ileta Jesu ro se ai i wo ọwhọkuo ho. Ọ ta kẹ erọ Smaena nọ: “Mẹ riẹ ukpokpoma ra gbe uvuhu ra (rekọ yọ [who fe] ghele).” (Eviavia 2:9) Ẹvẹ a wo ohẹriẹ no enọ e rrọ Laodisia te, enọ e jẹ rọ efe akpọ rai seha rekiyọ a ghinẹ rrọ iyogbe koikoi! Uzẹme, eva e rẹ were Ẹdhọ họ re ọ ruẹ ohwo nọ o bi dhesẹ ẹrọwọ gbe ẹmeoyo kẹ Kristi. Fikiere, Jesu ọ vẹvẹ unu nọ: “Whọ dhẹ ozọ eware nọ whọ bete ruẹ uye rai hi, riri, ukumuomu na ọ be guọlọ re omu otu rai jọ fihọ uwouodi, re ọ jawo owhai, otiẹsejọ eva edẹ ikpe wha reti wo ẹlahiẹ. Fi eva họ ri bọwo ẹdẹ uwhu, mẹ rẹte kẹ owhai etu uvie uzuazọ.” (Eviavia 2:10) Epọvo na re, Jesu o jiri erọ Filadelfia, ọ ta nọ: “Who koko eme mẹ whọ vro odẹ mẹ hẹ. Mẹ te tha vẹrẹ; kru o nọ who wo ga, re ohwo ọvo ọ se owhẹ etu-uvie ra ba emio.”—Eviavia 3:8, 11.

20. Ẹvẹ ima ahwo buobu nẹnẹ a ro koko eme ọ Jesu no, kọ ghelọ oghẹrẹ iyero vẹ?

²⁰ Evaọ ‘ẹdẹ Olori na,’ onọ u muhọ evaọ 1914, okiọkotọ ẹrọwọ gbe egbẹnya igodẹ efa rai, enọ i bu te ima buobu no enẹna, a koko eme ọ Jesu ẹkwoma abọ ajọwha nọ a bi wo evaọ odibọgba na gbe ekru ẹgbakiete rai. Wọhọ inievo ikpe-udhusoi ọsosuọ rai, ejọ e ruẹ uye fiki ẹmeoyo rai kẹ Kristi no, a tube gbolo ejọ fihọ uwou-odi gbe ega uye no dede. Amọfa a koko eme ọ Jesu no ẹkwoma ewo ‘ẹro ọlọlọhọ,’ dede nọ akpọriọ gbe uvou-uthei o wariẹ e rai họ. (Matiu 6:22, 23) Ẹhẹ, evaọ okegbe gbe uyero kpobi, Ileleikristi uzẹme a be rọ ẹmeoyo rai ru udu Jihova ghọghọ.—Itẹ 27:11.

21. (a) Owha-iruo abọ-ẹzi vẹ utu ọrigbo na a ti gbe rugba? (b) Ẹvẹ ma sai ro dhesẹ nọ ma ghinẹ gwọlọ yo ẹme kẹ Shailo?

²¹ Nọ ma be kẹle uye ulogbo na, ‘ọrigbo nọ o wo ẹrọwọ avọ areghẹ na’ a gbẹ dadamu re a yo ẹme kẹ Kristi, Olori na. Onana u kugbe ẹruẹrẹhọ emu abọ-ẹzi ẹruoke kẹ uviuwou Ọghẹnẹ. Fikiere ajọ ma gbe wo ovuhumuo kẹ ukoko igbunu esuo Jihova gbe eware nọ ọ be rọ kẹ na. Evaọ edhere ọnana, ma bi dhesẹ omarokpotọ mai kẹ Shailo, ọnọ ọ te rehọ uzuazọ ebẹdẹ bẹdẹ hwa ahwo ẹmeoyo riẹ kpobi osa.—Matiu 24:45-47; 25:40; Jọn 5:22-24.

[Oruvẹ-obotọ]

Kọ Whọ Kareghẹhọ?

• Wọhọ epanọ Jekọp ọ ruẹaro riẹ eva oke uwhu riẹ, didi iruo Jesu o bi ti ru?

• Ẹvẹ ma re ro dhesẹ nọ ma vuhu Jesu mu wọhọ Shailo, kọ didi ẹzi ma rẹ whaha?

• Didi ohrẹ obọdẹ kẹ edẹ mai na e rrọ ileta nọ a kere se ikoko ihrẹ erọ obe Eviavia na?

• Idhere vẹ ma sae rọ raro kele ikoko obọ Smaena gbe Filadelfia anwae na?

[Iwoho nọ e rrọ ẹwẹ-obe avọ 26]

Jihova ọ rẹ ghale ahwo riẹ fikinọ a bi yo ẹme kẹ “odibo” ẹrọwọ riẹ

[Uwoho nọ o rrọ ẹwẹ-obe avọ 27]

Okpokpoho Setan o bi ru ẹmeoyo kẹ Ọghẹnẹ fihọ use-abọ

[Iwoho nọ e rrọ ẹwẹ-obe avọ 29]

Usu ogaga kugbe Jihova u re fi obọ họ k’omai yo ẹme kẹe