ENỌ AHWO NỌ A S’EBE

Ohwo nọ ma you o te whu, ma rẹ viẹ keme ọ gbẹ rrọ kugbe omai hi. Dede nọ Jesu o you Lazarọs, orọnikọ uwhu riẹ u fou Jesu họ oviẹ na ha. Ukpoye ohrọ nọ o wo kẹ imoni gbe egbẹrioma Lazarọs o wha oviẹ na ze wọhọ epanọ eme efa nọ e wariẹ oria ikere na họ i dhesẹ.—Jọn 11:36.

Okenọ Jesu o yo nọ Lazarọs ọ be mọ, ọ nwani siawọ nyai siwi ei hi. Ikuigbe na e ta nọ: “Nọ o yo nọ [Lazarọs] ọ be mọ, ọ tẹ daji oria nọ ọ jọ edẹ ivẹ.” (Jọn 11:6) Eme ọ lẹliẹ Jesu daji? U wo ẹjiroro nọ o ro ru ere. Ọ ta nọ: “Ẹyao ọnana ọrọ ọ rọ uwhu hu, rekọ fiki oruaro Ọghẹnẹ, re ọmọ Ọghẹnẹ ọ ja riẹ wo oruaro.” (Jọn 11:4) Oghẹrẹ vẹ ẹyao Lazarọs na ọ gbẹ rọ rrọ “ọ rọ uwhu hu”? Jesu ọ gwọlọ rọ uwhu Lazarọs na dhesẹ “oruaro Ọghẹnẹ” via. Evaọ oghẹrẹ vẹ? Jesu o bi ti ru oware igbunu jọ, ọ be te kpare ogbẹnyusu riẹ nọ o whu no na ziọ uzuazọ.

Jesu ọ rọ uwhu dhesẹ owezẹ evaọ okenọ o je lele ilele riẹ ta ẹme kpahe uwhu Lazarọs na. Oyejabọ nọ ọ rọ ta kẹ ae nọ: “Mẹ rẹ nya re mẹ rọyẹe no owezẹ.” (Jọn 11:11) Wọhọ epanọ ọsẹ hayo oni ọ rẹ rọwo ọmọ riẹ no owezẹ ze na, ere o rrọ kẹ Jesu re ọ kpare Lazarọs no uwhu ze. Fikiere, ẹjiroro ọvuọvo ọ riẹ hẹ nọ o rẹ rọ da Jesu nọ Lazarọs o whu.

Nọ o rrọ ere na, kọ ugogo eme o fou Jesu họ oviẹ? Eme nọ e wariẹ ikuigbe na họ e kẹ uyo na re. Okenọ Jesu ọ ruẹ oniọvo-ọmọtẹ Lazarọs nọ a re se Meri gbe amọfa nọ a be viẹ, “o te dimẹ eva ẹzi, ọ tẹ rọ ẹrova.” Nọ Jesu ọ ruẹ epanọ oware na o be da ahwo na te, o kẹ riẹ uye te epanọ ọ jẹ ‘rọ rova.’ Onana u ru nọ “Jesu ọ [rọ] viẹ.” O kẹ Jesu uye gaga nọ ọ ruẹ nọ uweri o da ahwo riẹ nana nọ o you gaga na oma fia.—Jọn 11:33, 35.

Ikuigbe nana i dhesẹ nọ Jesu o wo ogaga nọ ọ te rọ kpare iyoyou mai nọ i whu no ziọ uzuazọ jẹ kẹ ae omokpokpọ evaọ akpọ ọkpokpọ nọ ọ be tha na. U te je fi obọ họ kẹ omai riẹ nọ Jesu o wo ọdawẹ kẹ otu nọ ahwo rai a whu no fiki uye nọ Adamu o fi omai họ. Oware ofa nọ ikuigbe nana e rẹ sai wuhrẹ omai họ, u fo nọ ma re wo ọdawẹ kẹ ahwo nọ a rrọ uweri fiki uwhu omoni rai.

Jesu ọ riẹ nọ ọ te kpare Lazarọs. Ghele na, uyoyou gbe ọdawẹ nọ o wo kẹ inievo gbe egbẹrioma Lazarọs u ru nọ ọ rọ viẹ. Ere ọvona u fo nọ ọdawẹ ọ rẹ wọ omai “lele enọ e rẹ viẹ gbẹ viẹ.” (Rom 12:15) Nọ ohwo ọ tẹ viẹ yọ u dhesẹ hẹ inọ o wo ẹrọwọ fihọ ẹruore ẹkparomatha na ha. Dede nọ Jesu ọ be te kpare Lazarọs, ọ viẹ. Oviẹ Jesu u fi emamọ oriruo hotọ kẹ omai, u dhesẹ nọ ma re wo ọdawẹ kẹ otu nọ ohwo o whu ku.