Ono Họ Utu Ẹruorote Isẹri Jihova Na?

Utu Ẹruorote na họ enọ e be kpọ iruẹru Isẹri Jihova evaọ akpọ na soso, yọ ahwo nọ a rrọ utu na a bu hu, umutho ezae jọ nọ e vọ avọ otoriẹ. Iruo rai e rrọ abava:

• Ae a be rẹrote ebe nọ a bi kere no Ebaibol ze, te iwuhrẹ Isẹri Jihova gbe isukulu sa-sa nọ Isẹri Jihova i wo.​—Luk 12:42.

• Ae a be kpọ iruo usi uwoma ota Isẹri Jihova evaọ akpọ na soso. A tẹ jẹ be kpọ oghẹrẹ nọ a rẹ rehọ igho unevaze ruiruo riwi.

Utu Ẹruorote na u bi lele oriruo nọ “ikọ na gbe ekpako na evaọ obọ Jerusalẹm” a fihotọ evaọ ikpe-udhusoi ọsosuọ, enọ e jiroro ilogbo nọ ukoko Ileleikristi na soso a re lele. (Iruẹru Ikọ 15:2) Orọnikọ ahwo nọ a rrọ Utu Ẹruorote na họ enọ i bi su ukoko Isẹri Jihova ha. Oware nọ Ebaibol na ọ ta a re lele, yọ a riẹ vevẹ nọ Jesu Kristi họ ọnọ Jihova Ọghẹnẹ o ro mu ọnọ o Wuzou ukoko na.​—1 Ahwo Kọrint 11:3; Ahwo Ẹfisọs 5:23.

Ahwo nọ a rrọ Utu Ẹruorote na họ Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, gbe Jeffrey Winder. Aikpobi na a bi ruiruo evaọ oria nọ u wuzou Isẹri Jihova evaọ akpọ na soso nọ o rrọ Warwick, New York, U.S.A.

Utu Ẹruorote na o rehọ egbẹgwae ezeza mu nọ e be rẹrote iruo sa-sa, yọ omọvo jọ evaọ Utu Ẹruorote na ọ be jọ ogbẹgwae ọvo hayo tube bu vrẹ dede ruiruo.

• Ogbẹgwae Utu Ẹruọsa: Ogbẹgwae nana oye o be rẹrote eme kpobi nọ i kpohọ ekọto, oye o rẹ jowọ epanọ a rẹ rọ dhogbo nọ okpẹtu o tẹ via, oye ọvona o rẹ jowọ nọ a tẹ be jọ oria jọ kpokpo Isẹri Jihova evaọ akpọ na, gbe eware efa nọ o gwọlọ owojẹ okpakpata.

• Ogbẹgwae Ẹruorote Ahwo Uwou Ogha: Ogbẹgwae nana oye o be rẹrote ahwo nọ e be jọ Ebẹtẹle ruiruo.

• Ogbẹgwae Ebe-Iwhowho: Ogbẹgwae nana oye o be rẹrote eware nọ a bi printi kpobi evaọ ukoko na jẹ dhogbo epanọ i re ro te ikoko sa-sa obọ, oye ovona o be rẹrote ebabọ eria egagọ, ebabọ iwou efafa gbe ebabọ iwou ogha.

• Ogbẹgwae Iruo Ukoko: Oye o be rẹrote iruo “usi uwoma Uvie na.”​—Matiu 24:14.

• Ogbẹgwae Ewuhrẹ: Oye o be rẹrote eware kpobi nọ a re wuhrẹ evaọ iwuhrẹ, ikokohọ, isukulu, gbe ikporakporo avọ ividio sa-sa.

• Ogbẹgwae Ebe-Ikere: Ogbẹgwae nana oye u bi kere ebe kpobi nọ a bi printi na gbe enọ a bi fihọ oria evuẹ itanẹte mai na gbe iruo efafa nọ a bi ru na.

U te no iruo nana nọ a be rẹrote nọ egbẹgwae nana a be jọ fiobọhọ na no, Utu Ẹruorote na o rẹ gba ẹgwae koka koka epanọ a sae rọ rẹrote ukoko na. Evaọ ẹgwae nana, a rẹ ta ẹme kpahe oware nọ Ebaibol na ọ ta, ukuhọ riẹ a vẹ jiroro nọ i lele ekpakpọ ẹzi ọfuafo na, a rẹ daoma jọ ẹgbunu ọvo evaọ iroro kpobi nọ a be jẹ.​—Iruẹru Ikọ 15:25.

Nọ ezae nọ a fievahọ nọ i bi fiobọhọ kẹ Utu Ẹruorote na evaọ egbẹgwae sa-sa nọ ma fodẹ na. (1 Ahwo Kọrint 4:2) Ezae nana a riẹ iruo nọ a kẹ rai ziezi evaọ ogbẹgwae sa-sa nọ a fi rai họ na, yọ a re kpohọ ẹgwae ogbẹgwae na re koka koka. Dede nọ a wo udu nọ a sae rọ jiroro oware nọ ukoko na u re ru hu, a rẹ kẹ emamọ ohrẹ gaga gbe evuẹ egbagba nọ i kiekpahe ẹme nọ ọ rrọ otọ, yọ a rẹ daoma ru lele onọ ogbẹgwae na o rọwo fihọ kpobi, a ve je muẹrohọ oware nọ u bi noi ze sọ ẹnyaharo o bi noi ze. Yọ ẹsejọ Utu Ẹruorote na u re vi ae re a nyae tuduhọ inievo mai nọ e rrọ eria sa-sa evaọ akpọ na, hayo a rẹ kẹ ae ẹme nọ a re ru evaọ egwae ẹgbukpe hayo evaọ ẹdẹ nọ emọ-isukulu Giliad a bi ro nwrotọ.