KPAHE UZOẸME UKE NA: Urere Akpọ na O Be Lẹliẹ Ozọ Mu Ahwo Jọ, Efa I Rẹro Riẹ Bẹ no

Ẹvẹ o rrọ owhẹ oma kpahe December 21, 2012, ẹdẹ nọ ahwo buobu a je rẹro nọ akpọ na o ti re na? Ẹsejọhọ udu u kie owhẹ vi fikinọ oware nọ who je roro nọ o te via, nọ o jẹ lẹliẹ ozọ mu owhẹ, o via ha; hayo o kẹ owhẹ uye fikinọ emamọ oware jọ nọ who je rẹro nọ o te via, o via ha; hayo whọ hẹrẹ bẹ, whọ tẹ dhugbẹ kpairoro vrẹ. Kọ ẹdẹ yena nọ ahwo a je rẹro riẹ na yọ ogbẹta gheghe?

Kọ ẹvẹ kpahe “urere akpọ na” nọ Ebaibol ọ ta kpahe na? (Matiu 24:3) Ahwo jọ a be dhozọ nọ akpọ na ọ te to muotọ. Amọfa a bi rẹro oghẹrẹ nọ akpọ na o ti ro re. Yọ ohẹrẹ o bẹ amọfa buobu no. Kọ o sae jọnọ enana kpobi yọ iku-esia manikọ uzẹme?

Oware nọ Ebaibol na ọ ta kpahe urere akpọ na o rẹ sai gbe owhẹ unu. Ebaibol na ọ tuduhọ omai awọ re ma rri kpohọ obaro avọ evawere, o tẹ jẹ ta nọ oma o rẹ sae lọhọ ahwo jọ fikinọ a rẹro urere akpọ na bẹ no. Ma tuduhọ owhẹ awọ nọ who roro kpahe iyo nọ Ebaibol na ọ kẹ kpahe enọ nọ ahwo jọ a nọ no kpahe urere akpọ na.

UYO NỌ EBAIBOL NA Ọ KẸ: ‘[Ọghẹnẹ] o fi otọhotọ akpọ na họ re o seba ekporo.’—OLEZI 104:5.

A te rehọ erae hayo oware ofa jọ raha akpọ na ha. Ukpoye, Ebaibol o wuhrẹ nọ akpọ na ma te rria bẹdẹ bẹdẹ. Olezi 37:29 o ta nọ: “Ikiẹrẹe e rẹ te rehọ otọ na reuku, a vẹ jẹ ria ae bẹdẹ.”—Olezi 115:16; Aizaya 45:18.

Nọ Ọghẹnẹ ọ ma akpọ na no, ọ tẹ ta nọ o “re wowoma,” yọ ere ọvona o gbe bi rri akpọ na. (Emuhọ 1:31) Ukpenọ Ọghẹnẹ ọ raha akpọ na, ọ ya eyaa nọ ọ te ‘raha enọ e be raha akpọ na,’ yọ ọ te kuvẹ hẹ re oware jọ o raha akpọ na.—Eviavia 11:18.

Rekọ ẹme nọ a kere fihọ obe 2 Pita 3:7 o rẹ sai gbe owhẹ unu. O ta nọ: ‘A ruẹrẹ ihru gbe akpọ nọ erọ enẹna kpahe kẹ erae.’ Kọ onana u gbe dhesẹ nọ akpọ na ọ te to muotọ? Uzẹme riẹ họ, ẹsejọ nọ Ebaibol ọ tẹ fodẹ “ihru” hayo idhiwu, “akpọ” gbe “erae,” i re wo otofa ofa. Wọhọ oriruo, obe Emuhọ 11:1 o ta nọ: “Akpọ na ọsoso ẹrọo unu ọvuọvo a jẹ ta.” Akpọ nọ a jọ etenẹ fodẹ na u dhesẹ ahwo-akpọ.

Ẹme nọ Pita ukọ na ọ ta taure ọ tẹ te ta ẹme nana, gbe eme efa nọ ọ ta lele iei, i dhesẹ nọ ihru hayo idhiwu, akpọ, gbe erae nọ ọ fodẹ na i wo otofa ofa. Owọ avọ 5 gbe ọrọ avọ 6 i dhesẹ nọ urere akpọ na o te jọ wọhọ epaọ edẹ Noa. Owhe-ologbo na ọ raha akpọ yena, rekọ otọakpọ na o gbẹ jariẹ. “Akpọ” nọ Ebaibol ọ ta nọ a rọ ame raha na u dhesẹ ahwo omuomu gbe otu ozighi nọ e jẹ rria evaọ oke yena. (Emuhọ 6:11) Owhe na ọ raha “ihru” hayo idhiwu re, koyehọ ahwo nọ i je su evaọ oke yena. Epọvo na re, obe 2 Pita 3:7 o be ta kpahe ọraha nọ Ọghẹnẹ ọ te raha irumuomu nọ e rrọ akpọ na gbe enọ i bi su ei, wọhọ ẹsenọ a rehọ erae mahe oware.

UYO NỌ EBAIBOL NA Ọ KẸ: ‘Akpọ na avọ urusio riẹ e te vrẹ, rekọ ohwo nọ o ru oreva Ọghẹnẹ ọ rẹ jọ bẹdẹ.’—1 JỌN 2:17.

“Akpọ” nọ a jọ etenẹ ta nọ ọ te vrẹ na yọ ahwo nọ i bi ru oreva Ọghẹnẹ hẹ nọ e rrọ akpọ na, orọnikọ otọakpọ na dẹe he. Wọhọ epanọ ohwo o re hwere erara kufiẹ ọ vẹ nyasiọ emamọ eware ba uwou na, ere Ọghẹnẹ o ti hwere hayo “kpe” ahwo omuomu no otọakpọ na re ahwo owoma a ruẹse reawere riẹ. (Olezi 37:9) Fikiere ma rẹ sae ta nọ “urere akpọ na” yọ emamọ oware.

Ebaibol jọ ọ fa “urere akpọ na” evaọ oghẹrẹ nọ o rẹ lẹliẹ ahwo wo emamọ eriwo kpahe obaro na, wọhọ oriruo, ọ fa riẹ nọ “urere uyero-akpọ na.” (Matiu 24:3, NW) Nọ orọnọ ahwo owoma gbe otọakpọ mai na a te zọ evaọ urere akpọ na, kọ onana u gbe dhesẹ nọ akpọ ọkpokpọ ọ be tha? Ebaibol na ọ rọwokugbe onana, keme ọ ta kpahe “akpọ nọ ọ be tha [na].”—Luk 18:30.

Evaọ “akpọ nọ ọ be tha [na],” Jesu o ti zihe ahwo-akpọ kpohọ oghẹrẹ nọ Ọghẹnẹ ọ ma rae vẹre. (Matiu 19:28) Ma vẹ te reawere

• Aparadase evaọ otọakpọ nọ o vọ avọ ufuoma gbe ọruẹriọ.—Aizaya 35:1; Maeka 4:4.

• Iruo nọ e rẹ kẹ evawere.—Aizaya 65:21-23.

• Ẹyao ọ gbẹ te jọ họ.—Aizaya 33:24.

• Owho o gbẹ te jọ họ.—Job 33:25.

• A te kpare ahwo nọ a whu no ze.—Jọn 5:28, 29.

Ma te ru “oreva Ọghẹnẹ,” ozọ urere akpọ na u re mu omai hi. Ukpoye, kọ ma re rẹro riẹ.

UYO NỌ EBAIBOL NA Ọ KẸ: ‘Nọ wha ruẹ eware enana nọ i bi ti ruẹ, wha riẹ nọ uvie Ọghẹnẹ o kẹle no.’—LUK 21:31.

Evaọ obe nọ ọgba-eriariẹ jọ nọ a re se Richard Kyle o kere kpahe edẹ urere na, ọ ta nọ “eware nọ i bi nwene idudhe gbe eware okpẹtu e be lẹliẹ ahwo ta oghoghẹrẹ eme kpahe oke nọ urere akpọ na o te rọ ze.” O rrọ ere, maero nọ ahwo a gbe bi wo otoriẹ oware nọ o be wha enana kpobi ze he.

Orọnikọ eware nọ e jẹ via evaọ oke rai, eye e lẹliẹ eruẹaro nọ a fodẹ evaọ Ebaibol na kere kpahe urere akpọ na ha. Ukpoye, ẹzi Ọghẹnẹ o fi obọ họ kẹ ai kere kpahe eware nọ e te via evaọ urere akpọ na. Joma ta kpahe eruẹaruẹ yena jọ sọ i bi gine rugba evaọ oke mai na.

• Ẹmo, ohọwo, etọ nọ i bi nuhu, gbe oghoghẹrẹ eyao.—Matiu 24:7; Luk 21:11.

• Umuomu nọ u bi viharo.—Matiu 24:12.

• Ahwo nọ e be raha otọakpọ na.—Eviavia 11:18.

• Ahwo nọ a you omobọ rai, you igho, je you omawere siọ Ọghẹnẹ ba.—2 Timoti 3:2, 4.

• Iviuwou nọ e be tahaku.—2 Timoti 3:2, 3.

• Ahwo a bi muẹrohọ eware nọ i bi dhesẹ nọ ma rrọ edẹ urere na ha.—Matiu 24:37-39.

• Usiuwoma Uvie Ọghẹnẹ nọ a be ta evaọ otọakpọ na soso.—Matiu 24:14.

Jesu ọ ta nọ ma tẹ ruẹ “eware enana kpobi” nọ e be via, ma riẹ nọ urere akpọ na o kẹle no. (Matiu 24:33) Isẹri Jihova a rọwo nọ eware nana kpobi nọ e be via na i dhesẹ nọ ma rrọ edẹ urere na no, yọ onana u bi ru nọ a be rọ ta usiuwoma na evaọ ekwotọ udhusoi akuava gbe ọgba gbe ezeza (236).

UYO NỌ EBAIBOL NA Ọ KẸ: ‘Okenọ ahwo a rẹ te ta nọ, oke onana oke udhedhẹ gbe omofọwẹ, idudhe na ọraha ọ vẹ nwane bru ae ze, nwane wọhọ epanọ aye ọ rẹ thuẹ othuẹ eyẹ, a rẹ sae dhẹ vabọ họ.’—1 AHWO TẸSALONIKA 5:3.

Ebaibol ọ rehọ ọraha nọ o ti no obọ Ọghẹnẹ ze te akpọ na wawọ epanọ aye ọ rẹ thuẹ othuẹ eyẹ, eva na e rẹ siọ aye na ba ẹda ha, yọ e rẹ tha idudhe. A rehọ etoke nọ u ti su kpohọ urere akpọ na dhesẹ aye nọ o dihọ, keme aye nọ o dihọ ọ rẹ jọ omariẹ riẹ nọ oke eyẹ riẹ o be kẹle no. Edọkita ọ rẹ sae fodẹ ẹdẹ nọ aye na o ti yẹ, rekọ ọ gbẹ maki yẹ ẹdẹ yena ha, u re gbe mu ei ẹro ghele nọ ọ te seba eyẹ ẹdẹjọ họ. Epọvo na re, fikinọ urere na o ze he evaọ oke nọ ahwo a je rẹro riẹ, oyena u dhesẹ hẹ inọ ma rrọ “edẹ urere” na ha.—2 Timoti 3:1.

Ohwo ọ rẹ sai roro nọ, ‘otẹrọnọ eware nọ e be via i bi dhesẹ nọ ma kẹle urere akpọ na no, fikieme ahwo buobu a gbẹ be ruẹ onana vuhumu hu?’ Ebaibol na ọ ta vevẹ nọ urere na o tẹ kẹle no, ahwo buobu a ti gbolaro kẹ eware nọ i bi dhesẹ nọ edẹ urere na ma rrọ na. Ukpenọ a rọwo nọ eware nọ e be via na i dhesẹ nọ ma rrọ edẹ urere na, a te bi se ahwo nọ e rọwo ẹkoko, be ta nọ: ‘Anwọ okenọ esẹ mai i ro kie ruọ owezẹ na, eware kpobi e gbẹ rọ wọhọ epanọ e rọ no emuhọ akpọ na ze.’ (2 Pita 3:3, 4) Fikiere, eware nọ i bi dhesẹ nọ ma rrọ edẹ urere na e rrọ vevẹ, rekọ ahwo buobu a bi gbolaro kẹ ae.—Matiu 24:38, 39.

Ma jọ uzoẹme nana ta kpahe eria Ebaibol sa-sa no ro dhesẹ nọ urere akpọ na o kẹle no.a Kọ whọ gwọlọ gbẹ riẹ kpahe eware efa nọ i dhesẹ nọ urere akpọ na o kẹle no? O tẹ rrọ ere, ta kẹ Isẹri Jihova re a dhesẹ imuẹro itieye na no Ebaibol na ze kẹ owhẹ. A rẹ sae nyaze obọ uwou ra, hayo oria ofa nọ u kiehọ owhẹ oma, hayo evaọ ifonu dede. A ti mi owhẹ ugho ho, rekọ omoke ra jọ a gwọlọ, yọ a re gbiku irere nọ who ti wo no onana ze he.