‘Wo Udu Je Kru Oma Ga!’

“Wha kru udu ga! Mẹ re ase akpọ na no.”—JỌN 16:33, NW.

 1. Fikiọ ewegrẹ egaga nọ emọ Izrẹl e te rẹriẹ ovao dhe evaọ Kenan, didi uduotahawọ a kẹ rai?

TAO re emọ Izrẹl e tẹ nwane fa Ethẹ Jọdan vrẹ ruọ Ẹkwotọ Eyaa na, Mosis ọ ta kẹ ae nnọ: “Wha wo ogaga avọ emamọ aruọwha, wha dhozọ họ hayo ọwhọ rai o mu owhai hi: keme Ọnowo na Ọghẹnẹ rai ọ rẹ te jọ kugbe owhai.” Koyehọ Mosis o se Joshua, ọnọ o ti su emọ Izrẹl ruọ Kenan, ọ tẹ wariẹ ohrẹ na kẹe inọ o kru udu ga. (Iziewariẹ 31:6, 7) Uwhremu na, Jihova omariẹ ọ ta udu họ Joshua nnọ: “Wo udu avọ oma ukruga . . . Thakpinọ wo udu, avọ oma ukruga.” (Joshua 1:6, 7, 9) Eme eyena e jọ ẹruoke. Emọ Izrẹl na a te gwọlọ udu re a rẹriẹ ovao dhe ewegrẹ egaga rai nọ e rrọ abọdekọ Jọdan na.

 2. Oghẹrẹ uyero vẹ ma rrọ nẹnẹ, kọ eme ma gwọlọ?

² Nẹnẹ na, u kiọkọ omojọ re Ileleikristi uzẹme a fa ruọ akpọ kpokpọ nọ a ya eyaa riẹ na, yọ a gwọlọ aruọwha re wọhọ Joshua. (2 Pita 3:13; Eviavia 7:14) Dede na, uyero mai u wo ohẹriẹ no orọ Joshua. Joshua ọ rehọ egbọdọ gbe izuẹ họre. Ma be họre ohọre abọ-ẹzi, ma rẹ rehọ ekwakwa-ẹmo iwo họre vievie he. (Aizaya 2:2-4; Ahwo Ẹfẹsọs 6:11-17) Ofariẹ, Joshua ọ rẹriẹ ovao dhe ohọre imuozọ buobu nọ a rueva Ẹkwotọ Eyaa na no dede. Rekọ rọkẹ omai, enẹna họ oke nọ ma rọ rẹriẹ ovao dhe ohọre mai nọ o mai muozọ kpobi—tao re ma tẹ fa ruọ akpọ ọkpokpọ na. Jọ ma t’ẹme te iyero jọ nọ e gwọlọ aruọwha.

Fikieme O jẹ Gwọlọ Omodawọ Ogaga Mi Omai?

 3. Eme Ebaibol na i dhesẹ via kpahe ọwegrẹ ologbo mai?

³ Jọn ukọ na o kere nnọ: “Ma riẹ nọ mai e rọ Ọghẹnẹ, jegbe akpọ na ọsoso ọ rọ obọ ogaga oyoma na.” (1 Jọn 5:19) Eme yena i dhesẹ ugogo oware nọ o soriẹ nọ o rọ gwọlọ omodawọ ogaga mi Ileleikristi re a sae yọrọ ẹrọwọ rai. Nọ Oleleikristi o te kru ẹgbakiete riẹ, o rẹ jọ abọjọ ekie kẹ Setan Ẹdhọ na. Fikiere, Setan ọ be nya wọhọ ‘okpohrokpo nọ o bi do enu,’ be daoma guegue je mu Ileleikristi ẹrọwọ lọ. (1 Pita 5:8) Evaọ uzẹme, ọ wọ ẹmo so Ileleikristi nọ a wholo na avọ egbẹnyusu rai. (Eviavia 12:17) Evaọ ẹmo-ofio nana, ọ bẹ rehọ ahwo-akpọ ruiruo enọ e be rehọ aro-koko hayo ogbori ru ẹgwọlọ riẹ gba. O gwọlọ aruọwha re a sai mudhe ga kẹ Setan avọ ẹgba riẹ kpobi.

 4. Didi unuovẹvẹ Jesu ọ kẹ, rekọ okwakwa vẹ Ileleikristi uzẹme a dhesẹ no?

⁴ Nọ Jesu ọ riẹ nọ Setan avọ ẹgba riẹ a te rehọ ẹgba rai kpobi wọso emamọ usi na, Ọ vẹvẹ ilele riẹ unu nnọ: “A re ti fi owhai họ uye obẹbẹ, a re ti kpe owhai; erẹwho na kpobi i re ti mukpahe owhai fiki odẹ mẹ.” (Matiu 24:9) Eme yena i rugba evaọ ikpe-udhusoi ọsosuọ, yọ i bi rugba nẹnẹ re. Evaọ uzẹme, ukpokpoma nọ Isẹri Jihova ọgbọna jọ a nyaku no o ga te onọ a riẹ n’otọ avọ otọ ze. Ghele na, Ileleikristi uzẹme a bi kru udu ga evaọ okenọ a tẹ rẹriẹ ovao dhe otunyẹ otiọye na. A riẹ nnọ “ozodhẹ ohwo okpahe ẹta,” yọ a gwọlọ kie ruọ ẹta na ha.—Itẹ 29:25.

 5, 6. (a) Otọ iyero vẹ ma jọ gwọlọ aruọwha? (b) Eme Ileleikristi uzẹme a re ru nọ a te fi aruọwha rai họ odawọ?

⁵ U te no ukpokpoma no, ise-abọ efa e riẹ nọ e gwọlọ aruọwha mi omai. Rọkẹ otujọ, o rrọ use-abọ re a ta emamọ usi na kẹ erara. O rrọ odawọ aruọwha kẹ emọ isukulu jọ evaọ okenọ a te se ai re a so ole eyaa omarọkẹ orẹwho hayo rọ kẹ obiala. Nọ eyaa itieye na kẹ orẹwho e rrọ oware nọ u kpomahọ egagọ na, emaha Ileleikristi a rọ aruọwha gbaemu no re a j’owọ nọ o rẹ were Ọghẹnẹ, yọ emamọ owojẹ rai o wha evawere ze no.

⁶ Ma gwọlọ aruọwha re evaọ okenọ otu ọwọsuọ a tẹ be rehọ ekwakwa awhusi vaha iyẹrẹ iyoma kpahe idibo Ọghẹnẹ hayo a tẹ be daoma rehọ “izi gba ẹguae ọraha” re a ruẹse whaha egagọ uzẹme. (Olezi 94:20) Wọhọ oriruo, ẹvẹ o rẹ jọ omai oma otẹrọnọ a gẹle iyẹrẹ nọ a kẹ kpahe Isẹri Jihova evaọ ebe awhusi, iredio, hayo etẹlivisiọne, hayo e tẹ tubẹ rrọ erue dede? Kọ u re gb’omai unu? Ijo. Ma re rẹro eware itieye na. (Olezi 109:2) Yọ u re gb’omai unu hu okenọ otujọ a tẹ rọwo evuẹ erue hayo enọ a gẹle evaọ ekwakwa awhusi, keme “ohwo ogheghẹ ọ rẹ rọwo eware kpobi.” (Itẹ 14:15) Ghele na, Ileleikristi omarokpotọ a rẹ rọwo ẹme kpobi nọ a ta kpahe inievo rai hi, yọ a rẹ kuvẹ hẹ re iyẹrẹ ọrue e whaha ae ekpohọ iwuhrẹ Ileleikristi, re a si enẹ h’emu evaọ iruo odibọgba na, hayo nyuhu ẹrọwọ rai. Ukpoye, a re “dhesẹ oma [rai] wọhọ iruiruo Ọghẹnẹ . . . eva adhẹwẹ gbe ababọ adhẹwẹ eva ẹdhọemu oyoma oguo gbe ẹdhọemu ezi oguo. [Iwegrẹ] a rehọ omai wọhọ eviẹwẹ, [rekọ] omai [ghinọ] etuzẹme.”—2 Ahwo Kọrint 6:4, 8.

 7. Enọ ọkiẹriwo vẹ ma rẹ sae nọ oma mai?

⁷ Nọ o je kere se Timoti, Pọl ọ ta nọ: “Ọghẹnẹ ọ kẹ omai ẹzi ozọ-odhẹ hẹ rekọ ẹzi ogaga . . . Whọ gbẹ vuoma isẹri ise kẹ Ọnowo mai hi.” (2 Timoti 1:7, 8; Mak 8:38) Nọ ma se eme eyena no na, ma sae nọ oma mai nnọ: ‘Kọ mẹ be vuoma ẹrọwọ mẹ, manikọ me wo aruọwha? Evaọ eria iruo mẹ (hayo evaọ isukulu), mẹ be jọ ahwo nọ a wariẹ omẹ họ riẹ nnọ mẹ yọ Osẹri Jihova, manikọ me bi ru re ahwo a seba ẹriẹ nọ mẹ yọ Osẹri? Kọ oma o rẹ vo omẹ re me wo ohẹriẹ no amọfa, manikọ mẹ be rọ evawere dhesẹ via nọ me wo ohẹriẹ no amọfa fiki usu nọ me wo kugbe Jihova?’ Otẹrọnọ ohwo jọ o wo iroro ivẹ kpahe ewhowho emamọ usi na hayo ọ gwọlọ kielele iroro ogbotu, jọ ọ kareghẹhọ uthubro nọ Jihova ọ kẹ Joshua: “Wo udu avọ oma ukruga.” O thọrọ owhẹ ẹro ho, orọnikọ iroro ibe iruiruo hayo erọ ibe emọ isukulu mai họ oware nọ u muẹme he, rekọ eriwo Jihova avọ Jesu Kristi.—Ahwo Galesha 1:10.

Oghẹrẹ nọ Ma Sai ro Wo Aruọwha

 8, 9. (a) Eva okejọ, ẹvẹ a ro fi aruọwha ọ Ileleikristi ọsosuọ họ odawọ? (b) Eme Pita avọ Jọn a ru evaọ oke nọ a guegue ai, kọ eme ọ via kẹ ae avọ inievo rai?

⁸ Ẹvẹ ma sai ro wo oghẹrẹ aruọwha nọ o re fi obọ họ kẹ omai kru ẹgbakiete mai evaọ etoke obẹbẹ nana? Whaọ, ẹvẹ Ileleikristi ọsosuọ a sai ro wo aruọwha? Roro kpahe oware nọ o via evaọ okenọ izerẹ ikpehru gbe ekpako na evaọ Jerusalẹm a vuẹ Pita avọ Jọn inọ a se usiuwoma ba ẹta evaọ odẹ Jesu. Ilele na a se, a te guegue ai je si obọ no ai. Kẹsena, a te kuomagbe inievo na, aikpobi a tẹ lẹ kugbe, anọ: “Ọnowo who je riwi eha nọ arese enẹna, whaọ ru kẹ idibo ra re a wo aruọwha nọ a rẹ rọ ta ẹme ra.” (Iruẹru 4:13-29) Evaọ uyo, Jihova ọ tẹ rehọ ẹzi ofuafo bọ ae ga, yọ wọhọ epanọ isu Ju a ta uwhremu na, a rehọ ewuhrẹ rai ‘vọ Jerusalẹm.’—Iruẹru 5:28.

⁹ J’oma roma totọ kiẹ oware nọ o via evaọ oke yena riwi. Nọ isu ahwo Ju na a guegue ilele na, a ku rie họ nọ a re serihọ fiki otunyẹ hẹ. Ukpoye, ilele na a lẹ kẹ aruọwha nọ a rẹ gbẹ rọ ta usiuwoma na. A te ru lele olẹ rai, Jihova ọ tẹ rehọ ẹzi riẹ bọ ae ga. Oware nọ o via kẹ ae na u dhesẹ nọ eme nọ Pọl o kere kpahe uyero ofa jọ evaọ ikpe jọ nọ i lele i rie, i kie kpahe Ileleikristi eva oke nọ a te bi kpokpo ai. Pọl ọ ta nọ: “Mẹ rẹ sai ru eware kpobi eva ọnọ ọbe kẹ omẹ eri.”—Ahwo Filipai 4:13.

10. Ẹvẹ oware nọ o via kẹ Jerimaya na u re ro fi obọ họ kẹ otu nọ ọ dhozọ no otọ ze?

¹⁰ Ẹvẹ o rẹ jọ otẹrọnọ ohwo ọ rrọ ọdhozọ n’otọ ze? Kọ ọ sae rọ aruọwha gọ Jihova ghele evaọ otọ ọwọsuọ? E! Kareghẹhọ epanọ o jọ Jerimaya oma nọ Jihova ọ rehọ iẹe mu wọhọ ọruẹaro. Upelẹ ọzae na ọ tẹ ta nọ: “Mẹ ọmaha.” O rrọ vevẹ, o rri oma riẹ nnọ o te he. Ghele na, Jihova ọ rehọ eme enana bọ e ga: “Whọ ta nọ, ‘Mẹ ọmaha ha’; ahwo nọ me reti vi owhẹ bru kpobi whọ rẹ te nya bruẹ, gbe onọ mẹ ta kẹ owhẹ kpobi whọ rẹ ta. Whọ jọ ozọ rai umu owhẹ hẹ, keme mẹ rọ kugbe owhẹ nọ mẹ rẹ te thọ owhẹ.” (Jerimaya 1:6-10) Jerimaya o fi eva họ Jihova, fikiere, ọ rehọ ẹgba Jihova fi ozodhẹ riẹ kparobọ o te ti zihe ruọ osẹri aruọwha evaọ Izrẹl.

11. Eme o bi fi obọ họ kẹ Ileleikristi nẹnẹ jọ wọhọ Jerimaya?

¹¹ Ileleikristi nọ a wholo nẹnẹ a wo iruo nọ i tho erọ Jerimaya, yọ avọ obufihọ “otu obuobu” erọ “igodẹ efa” na, a ruabọhọ ewhowho ẹjiroro Jihova makọ evaọ aro ababọ-osegboja, ẹkoko, gbe ukpokpoma. (Eviavia 7:9; Jọn 10:16) A bi wo uduotahawọ no eme nọ Jihova ọ ta kẹ Jerimaya na ze: ‘Ozọ u mu owhẹ hẹ.’ O rẹ thọrọ ae ẹro vievie he inọ Ọghẹnẹ o vi rai uwou gbe nnọ ovuẹ riẹ a bi whowho na.—2 Ahwo Kọrint 2:17.

Iriruo Aruọwha nọ I Fo Aro O ro Kele

12. Emamọ oriruo aruọwha vẹ Jesu o fi họ otọ, kọ ẹvẹ ọ rọ t’udu họ ilele riẹ awọ?

¹² Ma rẹ sai wo obufihọ evaọ omodawọ mai re ma wo aruọwha otẹrọnọ ma roro kpahe iriruo amọfa, wọhọ Jerimaya, enọ e j’owọ aruọwha no. (Olezi 77:12) Wọhọ oriruo, ma tẹ kiẹ odibọgba Jesu riwi, aruọwha riẹ evaọ okenọ Setan ọ dawo ẹe gbe okenọ ọ rẹriẹ ovao dhe ọwọsuọ ọgaga ọrọ isu ahwo Ju o re duobọ te omai udu. (Luk 4:1-13; 20:19-47) Evaọ ẹgba Jihova, Jesu o dikihẹ kothi, yọ tao re ọ tẹ te nwani whu, ọ ta kẹ ilele riẹ nnọ: “Evaọ akpọ na, wha re ti wo ẹlahiẹ; rekọ [wha kru udu ga], mẹ re ase akpọ na no.” (Jọn 16:33; 17:16) Otẹrọnọ ilele Jesu a nya lele oriruo riẹ, a re ti fi kparobọ re. (1 Jọn 2:6; Eviavia 2:7, 11, 17, 26) Rekọ o gwọlọ nọ a re “kru udu ga.”

13. Uduotahawọ vẹ Pọl ọ rọ kẹ ahwo Filipai?

¹³ Nọ Jesu o whu te ikpe jọ no, a fi Pọl avọ Saelas họ uwou odi evaọ Filipai. Uwhremu na, Pọl ọ ta udu họ ukoko obọ Filipai awọ re a “dikihẹ ga eva ẹzi ọvo, avọ iroro evo nọ a re ro kuomagbe họre kẹ orọwọ usiuwoma na, wha jọ ewegrẹ rai i ru oware ovuovo nọ o rẹ jẹ idudu họ owhai ẹro ho.” Re ọ bọ ae ga evaọ onana uruo, Pọl ọ ta nọ: “Onana [Ileleikristi nọ a bi kpokpo na] oka imuẹro ẹraha [enọ i bi kpokpo ae na], rekọ yọ o rọ usiwo rai, nọ uno obọ Ọghẹnẹ ze. Keme a rehọ eriẹ kẹ owhai no nọ, fiki Kristi orọnikọ wha rẹ rọ ẹro suẹe ọvo ho, rekọ wha rẹ ruẹ uye fiki riẹ re.”—Ahwo Filipai 1:27-29.

14. Eme o no aruọwha Pọl ze evaọ Rom?

¹⁴ Okenọ Pọl o kere se ukoko obọ Filipai, ọ wariẹ jọ uwou-odi, rekọ okionana evaọ obọ Rom. Ghele na, ọ gbẹ jẹ ta usiuwoma kẹ amọfa avọ aruọwha. Eme o no rie ze? O kere nnọ: “A jọ eva eria isuisuẹsu kpobi riẹ onana, jegbe ahwo kpobi a riẹ nọ uwou-odi onya mẹ orọ fiki Kristi; a ru imoni na buobu fievahọ Ọnowo na fiki uwoudi onya mẹ, a tẹ jẹ mai wo udu nọ a rọ ta ẹme Ọghẹnẹ ababọ ozọ.”—Ahwo Filipai 1:13, 14.

15. Diẹse ma sai jo duku emamọ iriruo ẹrọwọ nọ e rẹ bọ ọtamuo mai nọ ma rẹ rọ jọ avọ aruọwha ga?

¹⁵ Oriruo Pọl ọ rẹ k’omai aruọwha. Ere ọvona o rrọ kpahe emamọ iriruo erọ Ileleikristi ọgbọna nọ i thihakọ ukpokpoma no evaọ erẹwho nọ e rrọ otọ esuo-ọtahobọ hayo isu-egagọ. A gbiku ibuobu enana jọ họ emagazini Uwou-Eroro gbe Awake! na jegbe Yearbooks of Jehovah’s Witnesses no. Nọ who bi se ikuigbe yena, kareghẹhọ inọ ahwo nọ a gbe iku rai na yọ ahwo gheghe wọhọ omai; rekọ nọ a jọ otọ iyero egaga, Jihova ọ kẹ rai ẹgba nọ o vi orọ igheghe, a te thihakọ. O sai mu omai ẹro nnọ o ti ru ere k’omai re otẹrọnọ uyero na o gwọlọ ere.

Edikihẹ Aruọwha Mai O rẹ Were Jihova jẹ Kẹe Ọghọ

16, 17. Ẹvẹ mai nẹnẹ ma sai ro dhesẹ aruọwha?

¹⁶ Ohwo o te dikihẹ ga kẹ uzẹme avọ ẹrẹreokie, yọ oware aruọwha. O tubẹ rrọ aruọwha viere nọ ohwo o te dikihẹ ga ghelọ ozọ nọ o riẹe ẹro. Evaọ uzẹme, Oleleikristi kpobi ọ rẹ sai dhesẹ aruọwha ọ tẹ ghinẹ gwọlọ ru oreva Jihova, ọ tẹ gbae mu nọ ọ rẹ yọrọ ẹrọwọ riẹ, ọ tẹ rẹro so Ọghẹnẹ ẹsikpobi, jẹ kareghẹhọ ẹsikpobi inọ Jihova ọ rehọ ẹgba kẹ ahwo buobu wọhọ ọyomariẹ no evaọ oke nọ u kpemu. Ofariẹ, nọ ma tẹ kareghẹhọ nnọ edikihẹ aruọwha mai o be were Jihova jẹ kẹ e ọghọ, u re ru ọtamuo mai ga viere nọ oma o gbẹ rọ lọhọ omai hi. Ma gba riẹ mu no re ma thihakọ ẹkoko hayo olahiẹ fikinọ ma you rie didi.—1 Jọn 2:5; 4:18.

¹⁷ O rẹ thọrọ omai ẹro vievie he inọ okenọ ma tẹ be ruẹ uye fiki ẹrọwọ mai, orọnikọ u dhesẹ nnọ ma ru oware jọ thọ họ. (1 Pita 3:17) Uye u bi te omai fikinọ ma be kpare esuo-okpehru Jihova, bi ru onọ u kiehọ, gbe fikinọ ma rrọ erọ akpọ na ha. Fiki onana Pita ukọ na ọ ta nọ: “Otẹrọnọ wha riẹ ru wha tẹ ruẹ ọyawa riẹ, wha vẹ rehọ ithihakọ ruẹ e, wha re wo ajiri obọ Ọghẹnẹ.” Pita o te je fibae nnọ: “Jọ enọ e be ruẹ uye wọhọ epa oreva Ọghẹnẹ a riẹ ru, re a rehọ izi rai họ obọ Ọghẹnẹ nọ ọ rọ uvi [ọmemama].” (1 Pita 2:20; 4:19) Ẹhẹ, ẹrọwọ mai ọ rẹ were Ọghẹnẹ oyoyou mai, Jihova, jẹ wha ọghọ sei. Ẹvẹ onana o rọ ẹjiroro ọgaga te nọ ma re ro dhesẹ aruọwha!

Ẹmeọta Kugbe Enọ E Rrọ Udu-Esuo

18, 19. Nọ ma tẹ rehọ aruọwha dikihẹ aro obruoziẹ, ovuẹ vẹ ma be rehọ ere whowho na?

¹⁸ Nọ Jesu ọ ta kẹ ilele riẹ nnọ a ti kpokpo ae no, o te fibae inọ: “[Ahwo] a rẹ te rehọ owhai kẹ egbẹguae, a rẹ te jọ evaọ iwou-egagọ rai fa owhai, ere a rẹ te rehọ owhai tha aro eba gbe ivie fiki mẹ, kpere e jọ isẹi kẹ ae gbe ahwo Egedhọ.” (Matiu 10:17, 18) Re ohwo ọ sae rẹriẹ ovao dhe oguẹdhọ hayo osu fiki ota nọ a bọwo e riẹ o gwọlọ aruọwha. Ghele na, ma tẹ rọ aruọwha rehọ uvẹ utioye na se isẹri kẹ ahwo yena, yọ ma be rẹriẹ uyero obẹbẹ ruọ uvẹ nọ ma re ro ru omamọ oware jọ gba. Evaọ edhere ọyena, ma be rehọ ovuẹ Jihova nọ a kere fihọ Olezi avọ 2 na te enọ i bi gu omai ẹdhọ na obọ, onọ o ta nọ: “Wha jọ enẹna wo areghẹ, O whai ivie! Wha wo unuovẹvẹ, O whai ibruoziẹ akpọ na. Wha rehọ ọwhọ, avọ ozodhẹ gọ ỌNOWO.” (Olezi 2:10, 11) Ẹsibuobu, okenọ a tẹ wọ ota họ Isẹri Jihova uzou evaọ okọto, ibruoziẹ a re kuenu kẹ ufuoma egagọ, yọ oyena o rẹ k’omai evawere gaga. Ghele na, ibruoziẹ jọ i fi oma rai h’otọ no re otu ọwọsuọ a dẹ ae rehọ. Ikereakere na e ta kẹ ibruoziẹ itieye na nọ: “Wha wo unuovẹve.”

¹⁹ Jọ ibruoziẹ e riẹ nnọ uzi Jihova Ọghẹnẹ họ onọ o mai kpehru kpobi. Jọ a kareghẹhọ nnọ ahwo akpọ kpobi, te ibruoziẹ, a ti guọvunu kẹ Jihova Ọghẹnẹ avọ Jesu Kristi. (Ahwo Rom 14:10) Rọ k’omai, makọ ibruoziẹ ahwo-akpọ a bruoziẹ k’omai hayo a bru kẹ omai hi, ma wo ẹjiroro kpobi nọ ma re ro wo aruọwha keme Jihova ọ be th’omai uke. Ebaibol na e ta nọ: “O ghale ahwo kpobi nọ a rọ ẹro suẹe.”—Olezi 2:12.

20. Fikieme ma jẹ sae were eva otẹrọnọ ma re thihakọ ukpokpoma gbe ọtaraha?

²⁰ Evaọ Ovuẹ obọ Ugbehru na, Jesu ọ ta nọ: “Eva e were owhai nọ ahwo a tẹ la owhai eka, a vẹ kẹ owhai uye, a vẹ ta erue oghẹrẹ eware iyoma kpobi họ uzou rai fiki mẹ. Ghọghọ, eva e were owhai hrọ keme osa rai nọ o rọ obọ odhiwu o rẹ ruaro, keme ere a kẹ eruẹaro nọ e kake rọ owhai jọ uye.” (Matiu 5:11, 12) Uzẹme o rrọ, ukpokpoma o rẹ kẹ evawere he, rekọ edikihẹ ga mai ghelọ ukpokpoma, gbe eme ọtaraha nọ i bi no ekwakwa awhusi ze, o rẹ k’omai oghọghọ. Edikihẹ ga mai o dhesẹ nnọ ma bi ru Jihova eva were yọ ma ti wo eghale riẹ. Edikihẹ aruọwha mai o dhesẹ nnọ ma wo uvi ẹrọwọ yọ o rẹ k’omai imuẹro nnọ ma wo ọjẹrehọ Ọghẹnẹ. Evaọ uzẹme, u dhesẹ nnọ ma fi eva họ Jihova riẹriẹriẹ. Evafihọ itieye na e r’oja kẹ Oleleikristi, wọhọ epanọ uzoẹme n’otha na u ti dhesẹ.

Eme Who Wuhrẹ?

• Didi oghẹrẹ iyero nẹnẹ o gwọlọ aruọwha?

• Ẹvẹ ma sae rọ bọ aruọwha?

• Amono họ emamọ iriruo aruọwha jọ?

• Fikieme o jẹ gwọlọ nnọ ma rẹ j’owọ avọ aruọwha?

[Iwoho nọ e rrọ ẹwẹ-obe avọ 21]

Simone Arnold (nọ a re se Liebster enẹna) evaọ Germany, Widdas Madona evaọ Malawi, gbe Lydia avọ Oleksii Kurdas evaọ Ukraine a dhesẹ aruọwha je bi mudhe kẹ ukumuomu na

[Iwoho nọ e rrọ ẹwẹ-obe avọ 22]

Ma be vuoma emamọ usi na ha

[Uwoho nọ o rrọ ẹwẹ-obe avọ 23]

Aruọwha nọ Pọl o dhesẹ evaọ uwou-odi u fi obọ họ wha emamọ usi na h’aro

[Uwoho nọ o rrọ ẹwẹ-obe avọ 24]

Ma tẹ rehọ aruọwha dhesẹ edikihẹ Ikereakere mai kẹ oguẹdhọ, yọ ma bi whowho ovuẹ nọ u w’uzou