UWUHRẸ AVỌ 03
Kọ Whọ Sai Fievahọ Ebaibol Na?
Whọ rẹ jọ Ebaibol na ruẹ eyaa buobu gbe ehrẹ buobu. Ẹsejọhọ whọ gwọlọ wuhrẹ eware nọ e rrọ Ebaibol na, rekọ omozọ o dina rrọ owhẹ ẹro, fikiere whọ be gwọlọ yọroma. Kọ u gine fo re who fievahọ eyaa gbe ehrẹ nọ e rrọ obe anwae otiọye? Kọ whọ sae ginẹ rọwo oware nọ Ebaibol na ọ ta, inọ whọ sai yeri uzuazọ evawere enẹna gbe evaọ obaro? Ima ahwo buobu a rọwo ere. Yọ ma gwọlọ nọ who wuhrẹ re whọ ruẹ sọ o sae jọ ere kẹ owhẹ re.
1. Kọ Ebaibol na yọ obe uzẹme manikọ obe iku-esia?
Ebaibol na ọ ta nọ eme nọ e rrọ eva riẹ yọ “eme egbagba nọ e rrọ uzẹme.” (Ọtausiuwoma Na 12:10) A jariẹ gbiku eware nọ e via dẹẹ gbe ahwo dẹẹ nọ a rria evaọ okenọ u kpemu. (Se Luk 1:3; 3:1, 2.) Igbiku buobu gbe ahwo nọ a rẹ kiẹ otọ gwọlọ eware anwae a kiẹ via no inọ ideti, ahwo, eria, gbe eware sa-sa nọ e via nọ a gbiku rai fihọ Ebaibol na ginọ uzẹme.
2. Fikieme ma sae rọ ta nọ Ebaibol na yọ obe nọ a re fievahọ dede nọ o kri no?
Ebaibol na ọ fodẹ eware buobu nọ ahwo a riẹ hẹ evaọ okenọ a ro kere iei. Wọhọ oriruo, o ta kpahe eware jọ nọ egba-eriariẹ a bi wuhrẹ kpahe nẹnẹ na. Evaọ okenọ a ro kere Ebaibol na, ahwo buobu a rọwo eware itieye na nọ e rrọ eva riẹ na ha. Rekọ evaọ oke mai na, egba-eriariẹ a kiẹ via no inọ eware yena ginọ uzẹme. Fikiere, a rẹ sai “fievahọ [iẹe] ẹsikpobi, enẹna rite ebẹdẹ bẹdẹ.”—Olezi 111:8.
3. Fikieme ma sai ro fievahọ oware nọ Ebaibol na ọ ta kpahe obaro na?
Eruẹaruẹa buobu e rrọ Ebaibol na nọ e ta kpahe “eware nọ a ri ti ru hu.” (Aizaya 46:10) Ebaibol na ọ ta kpahe eware buobu nọ ma re se kpahe evaọ ikuigbe na oke krẹkri taure e tẹ te via, yọ epanọ ọ ta rai e via dẹẹ. O tẹ jẹ ta kpahe eware sa-sa nọ e be via evaọ akpọ na nẹnẹ na. Evaọ uwuhrẹ nana, ma te kiẹ eruẹaruẹ Ebaibol jọ riwi. U ti gbe owhẹ unu nọ whọ te ruẹ nọ e rrọ gbagba!
GBE WUHRẸ EWARE EFA
Wuhrẹ kpahe epanọ eware nọ egba-eriariẹ ọgbọna a kiẹ via e rọ rọwokugbe Ebaibol na, gbe obọdẹ eruẹaruẹ jọ nọ e rrọ Ebaibol na.
4. Eware nọ egba-eriariẹ a kiẹ via e rọwokugbe Ebaibol na
Evaọ oke anwae, ahwo buobu a rọwo nọ otọakpọ na o rrọ ehru oware jọ. Kporo IVIDIO na.
Rri ẹme nọ a kere fihọ obe Job oware wọhọ ikpe idu esa gbe egba isoi (3,500) nọ i kpemu. Se Job 26:7, kẹsena wha vẹ ta ẹme kpahe onọ nana:
Kọ ẹme nọ Ebaibol na ọ ta inọ otọakpọ na ọ rrọ “ehru oware ovo ho” na u gbe gbowhẹ unu? Fikieme whọ rọ ta ere?
Evaọ etoke ikpe 1800, koyehọ oware wọhọ ikpe egba ivẹ (200) nọ i kpemu ọvo, ahwo a te ti ro wo otoriẹ oghẹrẹ nọ ma be sai ro wo ame ẹsikpobi evaọ akpọ na. Rekọ rri ẹme nọ Ebaibol na ọ ta no vẹre evaọ oware wọhọ ikpe idu esa gbe egba isoi (3,500) nọ i kpemu. Se Job 36:27, 28, kẹsena wha vẹ ta ẹme kpahe enọ nana:
Eme ọ were owhẹ evaọ edhere ọlọlọhọ nọ Ebaibol na o ro dhesẹ oghẹrẹ nọ ma be sai ro wo ame ẹsikpobi na?
Kọ eria Ebaibol nọ who se no obọnana i ru owhẹ fievahọ Ebaibol na vi epaọ anwẹdẹ?
5. Ebaibol na ọ ta kpahe eware jọ nọ i wuzou nọ e te via
Se Aizaya 44:27–45:2, kẹsena wha vẹ ta ẹme kpahe onọ nana:
Igogo eware vẹ Ebaibol na ọ ta fihotọ no ikpe egba ivẹ (200) taure Babilọn o te ti kie?
Ikuigbe i dhesẹ nọ Sairọs ovie Pasia avọ ogbaẹmo riẹ a fi Babilọn kparobọ evaọ ukpe 539 B.C.E.b A kpọ ame ethẹ nọ ọ wariẹ okpẹwho na rri obọfa. Kẹsena a tẹ rọ inuethẹ okpẹwho na nọ i rovie fihọ evaọ oke yena rọ ruọ ẹe eva je fi ei kparobọ ababọ ẹmo nọ a fi. O vrẹ ikpe idu ivẹ gbe egba isoi (2,500) no nọ oware nana o rọ via, rekọ rite inẹnẹ na okpẹwho Babilọn o gbẹ raha kuotọ. Rri ẹme nọ Ebaibol na ọ ta kpahe Babilọn.
Se Aizaya 13:19, 20, kẹsena wha vẹ ta ẹme kpahe onọ nana:
Ẹvẹ eruẹaruẹ nana nọ e ta kpahe Babilọn na i ro rugba?
Babilọn nọ ọ raha kuotọ evaọ ofẹ jọ Iraq ọgbọna
6. Ebaibol na ọ ta kpahe eware nọ ma be ruẹ evaọ akpọ na nẹnẹ na
Ebaibol na o se oke nana nọ ma be rria na “edẹ urere na.” (2 Timoti 3:1) Rri eware nọ Ebaibol na ọ ta nọ e te via evaọ oke nana:
Se Matiu 24:6, 7, kẹsena wha vẹ ta ẹme kpahe onọ nana:
Eware jọ vẹ Ebaibol na ọ ta nọ e te via evaọ edẹ urere na?
Se 2 Timoti 3:1-5, kẹsena wha vẹ ta ẹme kpahe enọ nana:
Iruemu vẹ Ebaibol na ọ ta nọ ahwo buobu a ti dhesẹ evaọ edẹ urere na?
Iruemu nana vẹ who muẹrohọ nọ ahwo a bi dhesẹ?
AHWO JỌ A RẸ TA NỌ: “Ebaibol na yọ obe iku-esia.”
Rọkẹ owhẹ, eme ọ kẹ owhẹ imuẹro nọ Ebaibol na yọ obe nọ ma rẹ sai fievahọ?
EME WHO WUHRẸ NO?
Ikuigbe, eware nọ egba-eriariẹ a kiẹ via, gbe eruẹaruẹ i dhesẹ nọ whọ rẹ sai gine fievahọ Ebaibol na.
Ọkiẹkpemu
Kọ Ebaibol na yọ obe uzẹme manikọ obe iku-esia?
Eware jọ vẹ egba-eriariẹ a kiẹ via no nọ e rọwokugbe Ebaibol na?
Kọ who roro nọ Ebaibol na ọ ta oware nọ o te via evaọ obaro? Fikieme whọ rọ ta ere, hayo kọ fikieme who gbe ro roro ere he?
KIẸ KPAHE EFA
Kọ u wo eware jọ nọ Ebaibol na ọ ta, nọ egba-eriariẹ a kiẹ via no nọ a jẹ ruẹ nọ e thọ?
“Kọ Eware nọ Egba-Eriariẹ A Kiẹ Via E Rọwokugbe Ebaibol Na?” (Uzoẹme nọ o rrọ itanẹte)
Eware vẹ whọ ruẹ nọ e be via evaọ “edẹ urere na”?
“Eruẹaruẹ Ebaibol 6 nọ I bi Rugba” (Uwou-Eroro Na, Asoi 1, 2011)
Wuhrẹ kpahe epanọ eruẹaruẹ Ebaibol nọ e ta kpahe Uvie Griki i ro rugba.
Wuhrẹ kpahe epanọ eruẹaruẹ Ebaibol na i ro ru ọzae jọ nwene oghẹrẹ nọ o rri Ebaibol na vẹre.
a Eruẹaruẹ yọ evuẹ nọ i no obọ Ọghẹnẹ ze kpahe eware nọ e te via evaọ obaro.
b Otofa B.C.E. họ “Taure ekele oke mai na o te ti te,” yọ otofa C.E. họ “Ekele oke mai na.”