Jọn Ọ Gwọlọ Yo Mi Jesu

Enwenọ ẹgbukpe ọna nọ Jọn Ọhọahwo-Ame na ọ rọ rrọ uwou-odi. Ghele na, o bi yo kpahe iruo igbunu nọ Jesu o bi ru. Dai roro epanọ o jọ Jọn oma nọ ilele riẹ a vuẹe nọ Jesu ọ kpare ọmọzae aye-uku jọ evaọ obọ Nein no uwhu ze. Rekọ Jọn ọ gwọlọ yo no unu Jesu ze kpahe oware nọ enana kpobi i dhesẹ. Fikiere Jọn o te vi ilele ivẹ riẹ bru rie. Nyai ru eme? O vi rai nyae nọ Jesu nọ: “Whẹ họ Ọnọ Ọ be Nyaze na, manikọ ma rẹro ọfa?”—Luk 7:19.

Kọ u fo nọ Jọn ọ rẹ nọ onọ yena? Whaọ Jọn yọ uvi ọg’Ọghẹnẹ, ọnọ ọ họ Jesu ame evaọ enwenọ ikpe ivẹ nọ i kpemu jẹ ruẹ epanọ ẹzi Ọghẹnẹ ọ rọ ruọ Jesu oma, o te je yo urru Ọghẹnẹ nọ o ta nọ ọ jẹ Jesu rehọ. Ma sae nwane ta nọ ẹrọwọ Jọn o muhọ ewhrehe no ho. O hae jọ ere, Jesu ọ hae te ta eme ezi Jọn evaọ okenọ o vi ilele riẹ bru Jesu na ha. Rekọ otẹrọnọ ẹrọwọ Jọn o whrehe he, fikieme ọ rọ nọ oghẹrẹ onọ utioye?

Ẹsejọhọ Jọn ọ gwọlọ yo mi Jesu dẹẹ sọ ọye họ Mesaya na. Onana o sae bọ ẹrọwọ Jọn ga evaọ uwou-odi nọ ọ be jọ reakọ na. Ma sai je rri onọ Jọn na no abọ ọfa ze. Ọ riẹ eruẹaruẹ Ebaibol nọ i dhesẹ nọ Ọnọ Ọghẹnẹ O Wholo na ọ te jọ ovie gbe osiwi. Ghele na, Jọn ọ rrọ uwou-odi dede nọ Jesu ọ họ-ame te emerae buobu no. Fikiere Jọn ọ be nọ sọ omọfa ọ be nyaze nọ ọ te rehọ ẹta Jesu, ọnọ o ti ru eruẹaruẹ nọ e ta kpahe Mesaya na kpobi gba.

Ukpenọ Jesu ọ ta kẹ ilele Jọn nọ, ‘Ẹhẹ, mẹ họ Ọnọ ọ be nyaze na,’ Jesu o te ru eware nọ e kẹ rai imuẹro nọ Ọghẹnẹ họ ọnọ o bi fiobọhọ kẹe siwi eyao sa-sa na. Kẹsena ọ tẹ vuẹ ilele Jọn nọ: “Wha nyae vuẹ Jọn eware nọ wha bi yo jẹ be ruẹ na: Enọ i tuaro i mu ude họ ẹruẹ no, enọ e ko e be nya, a bi siwi emoti, enọ i diezọ i bi yo ẹme, a be kpare enọ i whu no ze, yọ a be ta usi uwoma na kẹ iyogbere.”—Matiu 11:4, 5.

Onọ Jọn na o sai dhesẹ nọ o bi rẹro nọ Jesu o ti ru eware igbunu nọ e rro vi enọ o bi ru na, gbe nọ ẹsejọhọ o ti si ei no uwou-odi. Rekọ Jesu ọ be ta kẹ Jọn nọ o du rẹro nọ o ti ru eware nọ e rro vi enana ha.

Nọ ilele Jọn a nyavrẹ no, Jesu ọ tẹ vuẹ ogbotu na nọ Jọn ọ rro vi ọruẹaro. Jọn họ “ukọ” Jihova nọ a fodẹ evaọ Malakae 3:1 na. Ọye ọvona a se Elaeja ọruẹaro na evaọ Malakae 4:5, 6. Jesu o ru ẹme na vẹ nọ: “Uzẹme mẹ be ta kẹ owhai, evaọ usu ahwo nọ eyae i yẹ, ọnọ ọ rro vi Jọn Ọhọahwo-Ame na ọ riẹ hẹ, rekọ ọnọ ọ mae kawo evaọ Uvie obọ odhiwu ọ rro vi ei.”—Matiu 11:11.

Ẹme nọ Jesu ọ ta na inọ ohwo nọ ọ mae kawo evaọ Uvie obọ odhiwu ọ rro vi Jọn u dhesẹ nọ Jọn ọ te ruọ Uvie obọ odhiwu hu. Jọn ọ ruẹrẹ edhere na họ kẹ Jesu rekọ o whu no taure Kristi o te ti rovie edhere odhiwu kẹ ahwo. (Ahwo Hibru 10:19, 20) Rekọ Jọn yọ uvi ọruẹaro Ọghẹnẹ, yọ ọ te jọ otọ esuo Uvie Ọghẹnẹ evaọ obọ otọakpọ obonẹ.