Enọ Ahwo Nọ A S’ebe

Jesu ọ ta nọ: “Wha ya re wha ruọ unu ohwahwa; keme mẹ ta kẹ owhai, ibuobu e rẹ te guọlọ iẹe ẹruọ, a rẹ sae ruẹ e he.” (Luk 13:24) Eme họ otofa ẹme riẹ na, kọ ẹvẹ u ro fo nẹnẹ?

Ma re wo otoriẹ oria isiuru onana viere nọ ma te roro kpahe oware nọ o jẹ via. Oware wọhọ emerae ezeza taure o te ti uwhu, Jesu ọ jọ evaọ Jerusalẹm evaọ ekareghẹhọ ọwariẹ-romudhe etẹmpol na. Ọ ta nọ ọye họ othuru igodẹ Ọghẹnẹ, rekọ ọ riobọhọ họ nnọ ahwo Ju na kpobi a rọ usu igodẹ itieye na ha keme a se nọ a rẹ gaviezọ. Nọ ọ ta nọ tei te Ọsẹ riẹ “ọvo,” ahwo Ju na a tẹ tọlọ itho re a fi ei. Ọ tẹ dhẹ kpohọ Peria evaọ abobe Jọdan.—Jọn 10:1-40.

Ọzae jọ ọ tẹ jọ obei nọe inọ: “Olori, enọ a re ti siwẹ e rẹ kakao?” (Luk 13:23) Emamọ onọ ọ nọ na, keme ahwo Ju oke oyena a rehọ e riẹ nnọ umutho ahwo jọ ọvo a ti fo kẹ esiwo. Who te muẹrohọ uruemu rai, who re du roro bẹ hẹ re whọ riẹ ahwo nọ a riwi fihọ umutho ahwo na. Ẹvẹ a roro thọ te, wọhọ epanọ eware nọ e via eva obaro i ti dhesẹ na!

Evaọ ole ikpe ivẹ, Jesu ọ jọ udevie rai, bi wuhrẹ, bi ru eware igbunu, jẹ be kẹ ae uvẹ nọ a rẹ rọ jọ ereuku Uvie odhiwu. Eme o no rie ze? Ae, maero kọ isu rai, a be r’obọ s’udu inọ emọ Abraham a rọ gbe nnọ ae a mu Uzi Ọghẹnẹ h’obọ. (Matiu 23:2; Jọn 8:31-44) Rekọ a bi vuhumu jẹ kuyo kẹ urru Othuru-Igodẹ Owoma na ha. O wọhọ epaọ ẹsenọ a rovie ẹthẹ fihọ kẹ ae, a tẹ rueva riẹ a vẹ kẹ ae osa ọrọ omọvo Uvie na nọ a rẹ jọ, rekọ a se. Umutho ahwo gheghe, enọ e mai no udevie iruori na ze, a kezọ kẹ ovuẹ uzẹme Jesu, j’owọ, jẹ talamu ei.—Luk 22:28-30; Jọn 7:47-49.

Evaọ ẹdẹ Pẹntikọst 33 C.E., erọ uwhremu na họ enọ a rehọ ẹzi wholo. (Iruẹru 2:1-38) A jọ usu iruiruo ababọ ẹrẹreokie nọ Jesu ọ fodẹ nọ a te viẹ jẹ riakọ na ha fikinọ a rehọ uvẹ nọ a kẹ rai ruiruo ziezi hi.—Luk 13:27, 28.

Fikiere, evaọ ikpe-udhusoi ọsosuọ na, “ibuobu” na họ ahwo Ju na kpobi, maero kọ isu egagọ na. Enana e be rehọ ugbunu ta nọ a gwọlọ aruoriwo Ọghẹnẹ—rekọ ute gbe idhere obọ rai a bi le, orọnikọ erọ Ọghẹnẹ hẹ. Wo ohẹriẹ, ‘ekakao’ nọ e kezọ fiki uvi isiuru re a jọ abọ Uvie na a zihe ruọ enọ a wholo erọ ukoko Ileleikristi na.

Enẹna muẹrohọ efihiruo nọ ọ mae kẹre nọ ọ roma via evaọ edẹ mai na. Ahwo nọ a re kele mu hu nọ i bi kpohọ ichọche Kristẹndọm a wuhrẹ i rai inọ a ti kpohọ odhiwu. Ghele na, ẹgwọlọ ọnana o wo owọ no iwuhrẹ egbagba Ikereakere na ze he. Wọhọ epanọ o jọ kẹ ahwo Ju anwae, ahwo nana a gwọlọ aruoriwo Ọghẹnẹ otẹrọnọ u kiehọ ae oma.

Rekọ ma wo umutho ahwo jọ evaọ oke mai na nọ e roma kpotọ kezọ kẹ ovuẹ Uvie na no, rehọ oma rai mudhe kẹ Jihova no, jẹ nyaze otọ aruoriwo riẹ no. Onana o wha riẹ ze nọ a ro zihe ruọ “emọ uvie na” no. (Matiu 13:38) A muọ “emọ” itieye nọ a wholo na họ ezizie eva Pẹntikọst 33 C.E. U kri no nọ Isẹri Jihova a be rọ ta nọ imuẹro Ọghẹnẹ nọ o bi ro yeri kugbe ahwo riẹ u dhesẹ nọ use a se otu obọ odhiwu na. Fikiere, ahwo nọ a wuhrẹ uzẹme Ebaibol no kẹle na a w’otoriẹ no inọ enẹna a be kẹ ẹruore uzuazọ ebẹdẹ bẹdẹ evaọ otọakpọ aparadase. Unu enana u bu vi erọ okiọkotọ Ileleikristi nọ a wholo nọ u bi dhe ẹkẹkao na no, enọ i ghine wo ẹruore ekpohọ odhiwu na. Luk 13:24 o nwani w’iruo dẹẹ kẹ ahwo nọ a wo irẹro ekpohọ odhiwu hu, rekọ u wo ohrẹ areghẹ kẹ ae.

Ẹkwoma ẹkpakpa inọ ma daoma mai, orọnikọ Jesu ọ jẹ ta nọ ọye hayo Ọsẹ riẹ a fi ezadhe họ edhere re e whaha omai hi. Rekọ ma wo otoriẹ no Luk 13:24 ze inọ ijaje Ọghẹnẹ e rọ re i bru enọ i te he n’oma. “Wha ya” o gwọlọ omodawọ, ẹrọvia oma mai. Fikiere ma rẹ sae nọ oma mai nọ, ‘Kọ mẹ be rọ oma mẹ via?’ A rẹ sae fa Luk 13:24 kpẹkpẹ nọ, ‘Mẹ gwọlọ daoma mẹ kpobi re mẹ rehọ unuẹthẹ ọhwahwa na rueva keme ibuobu e te gwọlọ rueva rekọ a sae te ruẹe he. Fikiere kọ mẹ be ghinẹ daoma mẹ? Mẹ wọhọ ohwo nọ ọ rọ afe-ughe be dhohrẹ, ọnọ o siobọno eware riẹ kpobi re o wo osa na? Ohwo otiọye na o re wo iroro ivẹ hẹ, ọ rẹ lọhọ obọ họ. Ere mẹ rọ?’

Eme ọ Jesu na i dhesẹ nọ ahwo jọ a te gwọlọ rọ ‘unu ohwahwa na rueva’ okenọ eware i te kiehọ ae oma, oke kpobi nọ u je rai. Uruemu utioye na o rẹ sai kpomahọ omomọvo Isẹri. Ahwo jọ a rẹ sai roro nọ, ‘Mẹ riẹ kpahe Ileleikristi omarọkẹ nọ e lahiẹ oma rai ikpe buobu, a siobọno eware buobu; ghele, evaọ oke uwhu rai, yọ ekuhọ eyero omuomu ọnana ọ te ze he. Fikiere, mẹ te dina lọhọ obọ omojọ, rria uzuazọ olọlọhọ.’

O rẹ lọlọhọ re a roro ere, rekọ u ghine wo areghẹ? Wọhọ oriruo, kọ ikọ na a roro ere? Vievie. A fi egagọ uzẹme họ oria ọsosuọ—bọo oke uwhu rai. Wọhọ oriruo, Pọl ọ ta nọ: “[Kristi] ma re woro . . . Fiki onana mẹ jẹ be ruẹ uye, họre avọ ogaga mẹ kpobi fiki iruo riẹ, nọ o rọ oma mẹ ru iruo ilogbo.” Uwhremu na o kere nọ: “Keme fiki onana ma jẹ be ruẹ uye, be họra, keme ma rehọ ẹruore mai kpahe Ọghẹnẹ uzuazọ na, ọye nọ rọ Osiwi ahwo kpobi, omaero kọ otu nọ ọ rọwo.”—Ahwo Kọlọsi 1:28, 29; 1 Timoti 4:10.

Ma riẹ nọ uvi oware Pọl o ru na nọ ọ rọ daoma riẹ kpobi. Ẹvẹ eva e rẹ vọ omai kpobi te otẹrọnọ ma rẹ sae ta wọhọ epanọ Pọl ọ ta: “Mẹ họre uvi ohọre na no, mẹ dhẹ ogbohrẹ na no, mẹ yọrọ orọwọ na no.” (2 Timoti 4:7) Fikiere rọwo kugbe eme Jesu nọ e rọ Luk 13:24, kohwo kohwo ọ rẹ sae nọ inọ, ‘Kọ mẹ be dao utho oma mẹ kpobi? Ẹhẹ, kọ mẹ be kẹ imuẹro buobu inọ me bi si ohrẹ Jesu na t’udu: “Ya re wha ruọ unu ohwahwa” na?’