Eme Ebaibol na Ọ Ta Kpahe Orọo gbe Enọ E re Rọo Ho?

Evaọ eria jọ, ahwo a re roro nọ ohwo o gbe wo ọzae hayo aye he, ọ rẹ sae wereva ha. Rekọ orọnọ ahwo kpobi nọ a rọo no eva e be were he yọ orọnọ ahwo kpobi nọ a re te rọo ho eva e be were he he. Uzẹme na họ, Ebaibol na o dhesẹ nọ te ohwo ọ rọo hayo ọ rọo ho yọ okẹ nọ u no obọ Jihova ze.

1. Irere jọ vẹ ohwo nọ ọ re rọo ho o re wo?

Ebaibol na ọ ta nọ: “Ohwo kpobi nọ ọ rọo ọ [rẹ] riẹ ru, rekọ ohwo kpobi nọ ọ rọo ho ọ te mae riẹ ru.” (Se 1 Ahwo Kọrint 7:32, 33, 38.) Oghẹrẹ vẹ ohwo nọ ọ rọo ho ọ rẹ rọ “mae riẹ ru”? Ileleikristi nọ e re rọo ho a wo ọrivẹ hẹ nọ o gwọlọ nọ a rẹ rẹrote. Fikiere, a rẹ mai wo oke kẹ omobọ rai. Wọhọ oriruo, ejọ e be rehọ oke rai ru iruo ziezi kẹ Jihova, ẹsejọ dede a rẹ kwa kpohọ erẹwho efa nyae ta usi uwoma na. Mai wuzou na, a rẹ sai wo oke ziezi nọ a re ro ru eware nọ i re si ai kẹle Jihova.

2. Irere jọ vẹ i re noi ze nọ ohwo ọ tẹ rọo wọhọ epanọ uzi egọmeti o ta?

U wo irere nọ i re te ohwo nọ ọ rọo no, wọhọ epanọ o rẹ jọ kẹ ohwo nọ ọ rọo ho na. Ebaibol na ọ ta nọ “imava i woma vi omọvo.” (Ọtausiuwoma Na 4:9) Ẹme nana uzẹme dẹẹ maero rọkẹ Ileleikristi nọ i bi lele ehrẹ Ebaibol evaọ orọo rai. Nọ ọzae avọ aye a tẹ rọo lele uzi, a rẹ ya eyaa nọ a ti you ohwohwo, rọ adhẹẹ kẹ ohwohwo, je rri ohwohwo ghaghae. Fikiere, udu o rẹ mai te ai otọ vi ezae-avọ-eyae nọ a be rria kugbe gheghe ọvo. Yọ ere ọvona udu u re te emọ rai otọ re.

3. Ẹvẹ Jihova o rri orọo?

Nọ Jihova ọ tuọ orọo ọsosuọ na họ, ọ ta nọ: “Ọzae ọ rẹ . . . nyasiọ ọsẹ riẹ gbe oni riẹ ba ọ vẹ talamu aye riẹ.” (Emuhọ 2:24) Jihova ọ gwọlọ nọ ezae-avọ-eyae a re you ohwohwo jẹ talamu ohwohwo evaọ edẹ uzuazọ rai kpobi. Okenọ ọ kuvẹ nọ orọo o sae rọ fa ọvo họ nọ ọzae hayo aye na o te bruẹnwae. Nọ o tẹ via ere, Jihova ọ kẹ ohwo nọ ọzae hayo aye riẹ o bruẹnwae na udu nọ ọ sae rọ jiroro sọ ọ rẹ fa orọo na.a (Matiu 19:9) Jihova ọ kuvẹ hẹ re Ileleikristi a wo vrẹ aye ọvo hayo ọzae ọvo.—1 Timoti 3:2.

GBE WUHRẸ EWARE EFA

4. Rọ oke ra ruiruo ziezi nọ whọ re rọo ho na

Jesu o rri uvẹ nọ ohwo ọ rọ rọo ho wọhọ okẹ. (Matiu 19:11, 12) Se Matiu 4:23, kẹsena wha vẹ ta ẹme kpahe onọ nana:

• Nọ orọnọ Jesu ọ rọo ho na, ẹvẹ ọ rehọ uvẹ yena gọ Ọsẹ riẹ je fiobọhọ kẹ amọfa te?

Ileleikristi nọ e re rọo ho a sai wo oghọghọ nọ a te ru epanọ Jesu o ru na. Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.

IVIDIO: Whai Inievo nọ E Rọo Ho (3:11)

• Emamọ eware vẹ Ileleikristi nọ e rọo ho a rẹ sae rọ uvẹ rai ru?

Kọ whọ riẹ?

Ebaibol na ọ fodẹ unuikpe nọ ohwo ọ rẹ kpako te re ọ tẹ te rọo ho. Rekọ ọ ta nọ u fo re ohwo ọ hẹrẹ bẹsenọ ọ rẹ “vrẹ udhudhu ọmoha no,” okenọ isiuru egaga kẹ owezẹ ọzae-avọ-aye e sai ro ru ei bẹbẹ re uzoge ọ jẹ emamọ iroro.—1 Ahwo Kọrint 7:36.

5. Rri otọ mu nọ whọ tẹ be salọ ohwo nọ whọ rẹ rọo

Iroro jọ nọ e mai wuzou nọ whọ rẹ jẹ evaọ uzuazọ họ, ohwo nọ whọ rẹ rọo. Se Matiu 19:4-6, 9, kẹsena wha vẹ ta ẹme kpahe onọ nana:

• Fikieme u gbe fo ho re Oleleikristi ọ họrọ ruọ orọo?

Ebaibol na ọ sai fiobọhọ kẹ owhẹ riẹ emamọ iruemu nọ u fo nọ ohwo nọ whọ gwọlọ rehọ o re wo. Rekọ mai wuzou na, gwọlọ ohwo nọ o you Jihova nọ whọ rẹ rehọ.b Se 1 Ahwo Kọrint 7:39 gbe 2 Ahwo Kọrint 6:14. Kẹsena wha vẹ ta ẹme kpahe enọ nana:

• Fikieme u ro fo nọ ohwo nọ ma gbẹ rrọ ukoko na ọvo ma rẹ rehọ?

• Ẹvẹ who roro nọ Jihova o ti rri rie nọ ma tẹ rehọ ohwo nọ o you rie he?

6. Rri orọo epanọ Jihova o rri rie

Evaọ Izrẹl oke anwae, ezae jọ e jẹ siọ eyae rai fiki oriobọ. Se Malakae 2:13, 14, 16, kẹsena wha vẹ ta ẹme kpahe onọ nana:

• Fikieme o rẹ rọ dha Jihova eva nọ ohwo ọ tẹ fa orọo riẹ, o gbẹ rrọ fiki ẹjiroro nọ Ebaibol na ọ ta nọ a rẹ rọ fa orọo ho?

Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.

IVIDIO: Orọo Yọ Ọgbakugbe Ebẹdẹ Bẹdẹ (4:30)

• Otẹrọnọ ọzae hayo aye ra ọ rrọ ukoko na ha, eme whọ rẹ sai ru re evawere e jọ orọo ra?

7. Koko izi nọ Jihova ọ kẹ kpahe orọo

IVIDIO: Whọ Sai Koko Izi nọ Jihova O Fihọ kẹ Orọo (4:14)

Se Ahwo Hibru 13:4, kẹsena wha vẹ ta ẹme kpahe enọ nana:

• Kọ who roro nọ ohwo ọ sai gine koko izi nọ Jihova ọ kẹ kpahe orọo? Fikieme whọ rọ ta ere, hayo kọ fikieme who gbe ro roro ere he?

Jihova ọ gwọlọ nọ Ileleikristi a re kere orọo rai fihotọ evaọ obọ egọmeti, yọ a tẹ fa orọo na a re je kere iei fihotọ re. Keme evaọ erẹwho buobu, ere egọmeti ọ ta nọ a re ru. Se Taitọs 3:1, kẹsena wha vẹ ta ẹme kpahe onọ nana:

• Otẹrọnọ whọ rọo no, kọ whọ ruọ orọo ra lele epanọ uzi egọmeti o ta?

EME WHO WUHRẸ NO?

Te ohwo ọ rọo hayo ọ rọo ho yọ okẹ nọ u no obọ Jihova ze. Eko ahwo ivẹ na a sai wo evawere nọ a te bi ru oreva Jihova.

Ọkiẹkpemu

• Ẹvẹ ohwo nọ ọ re rọo ho ọ sae rọ rehọ oke riẹ ruiruo ziezi?

• Fikieme Ebaibol na ọ rọ ta nọ ohwo nọ ọ rrọ ukoko na ọvo a rẹ rehọ?

• Eme ọvo Ebaibol na ọ ta nọ ọ sae lẹliẹ orọo fa?

KIẸ KPAHE EFA

Eme u dhesẹ re a rọo “evaọ Olori na ọvo”?

“Enọ Ahwo nọ A s’Ebe” (Uwou-Eroro Na, Ahrẹ 1, 2004)

Rri ividio ekpẹkpẹe ivẹ jọ nọ e sai fiobọhọ kẹ owhẹ jẹ emamọ iroro nọ whọ tẹ gwọlọ nya usu-orọo hayo nọ whọ tẹ gwọlọ rọo.

Omaruẹrẹkpahe Kẹ Orọo (11:53)

Rri oware nọ o lẹliẹ oniọvo-ọmọzae jọ ta nọ eware nọ Jihova ọ kẹ riẹ i woma vi enọ o siobọno kpekufiẹ.

Me je Rẹro nọ O ti Wuhrẹ Uzẹme Na (1:56)

Eware jọ vẹ u fo nọ ohwo o re roro kpahe taure ọ tẹ te jiroro nọ ọ be fa orọo hayo hẹriẹ?

“Rọ Ọghọ Kẹ Oware nọ ‘Ọghẹnẹ O Kugbe No’” (Uwou-Eroro Na, Akpegbivẹ 2018)