Ẹrria Te Omarọkẹ Ileleikristi Evaọ Ufuoma

“Oria nọ Ẹzi Ọnowo na ọrọ, etẹe ufoma o rẹ jọ.” —2 AHWO KỌRINT 3:17.

 1. Amono Isẹri Jihova a rehọ oma mudhe kẹ, kọ fikieme a jẹ be rehọ ikoko jọ ruiruo?

ISẸRI JIHOVA a rọwo nnọ egagọ rai e te jọ bẹdẹ. Fikiere a wo irẹro “ẹzi gbe uzẹme” nọ a rẹ rọ gọ Ọghẹnẹ bẹdẹ bẹdẹ. (Jọn 4:23, 24) Wọhọ emama nọ i wo uvẹ ẹsalọ, Ileleikristi enana a rehọ eva rai kpobi mudhe kẹ Jihova Ọghẹnẹ no o tẹ jẹ rọ ọtamuo rai re a rria tei. Fikiere, a rẹro so Ẹme Ọghẹnẹ gbe ẹzi ọfuafo riẹ. Nọ a be rehọ udu kpobi le omarọkẹ Ileleikristi rai haro evaọ ufuoma nọ Ọghẹnẹ ọ rẹ kẹ na, Isẹri na a bi dhesẹ adhẹẹ kẹ egọmeti nọ “a kẹ udu na” jẹ be rehọ eria izi gbe eruẹrẹfihọ rai ruiruo ziezi. (Ahwo Rom 13:1; Jemis 1:25) Wọhọ oriruo, Isẹri na a be rehọ Watch Tower Society ruiruo wọhọ okwakwa uzi—onọ u wo egha sa-sa evaọ ekwotọ buobu—re u fiobọhọ kẹ ai ru iruo obufihọ kẹ ibe ahwo-akpọ rai gb’unu, maero evaọ abọ-ẹzi. Rekọ Isẹri na a roma mudhe kẹ Ọghẹnẹ no, orọnikọ rọ kẹ ukoko jọ họ, yọ omarọkẹ Jihova rai o te jọ bẹdẹ.

 2. Fikieme Isẹri Jihova a je wo ovuhumuo gaga kẹ Watch Tower Society gbe ikoko itieye na?

² Wọhọ idibo nọ e roma mudhe kẹ Ọghẹnẹ no, o gba Isẹri Jihova họ re a lele uthubro Jesu re a ‘ru ilele ahwo erẹwho kpobi, họ ae ame evaọ odẹ Ọsẹ, gbe Ọmọ gbe ẹzi ẹri, wuhrẹ ai.’ (Matiu 28:19, 20) Iruo enana e te gbẹ nyaharo rite ekuhọ eyero-akpọ na, keme Jesu ọ ta re nọ: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.” (Matiu 24:3, 14) Kukpe kukpe, ijini ọ Watch Tower Society gbe ekwakwa efa i bi kporo ima Ebaibol, ebe, ibroshọ, gbe emagazini buobu kẹ Isẹri Jihova evaọ iruo usiuwoma ota akpọ soso rai. Fikiere, eria uzi enana i w’iruo gaga evaọ obufihọ kẹ idibo Ọghẹnẹ nọ e roma mudhe no re a ruẹse rria te oma nọ a ro mudhe kẹe.

 3. Oghẹrẹ vẹ Isẹri Jihova a jẹ rọ rehọ ẹme na “Society” ruiruo vẹre?

³ Ohwo jọ ọ rẹ sae vro nnọ oghẹrẹ nọ Isẹri na a rẹ rọ fodẹ Watch Tower Society na—hayo onọ a re se ẹsibuobu wọhọ “Society”—u dhesẹ nọ a rri rie rro vi okwakwa uzi gheghe. Kọ a gbe rri rie fihọ atanure kpahe eme egagọ? Obe na Jehovah’s Witnesses—Proclaimers of God’s Kingdom u ru ẹme ọnana vevẹ ta nọ: “Okenọ Uwou-Eroro Na [June 1, 1938, ọrọ Oyibo] o ta kpahe ‘Society,’ onana u dhesẹ, orọnikọ okwakwa uzi jọ ọvo ho, rekọ ugboma Ileleikristi nọ a kẹ ẹzi enọ e rehọ ukoko oyena mu jẹ be rehọ iẹe ruiruo.”a Fikiere ẹme na o dikihẹ kẹ ‘ọrigbo ẹrọwọ avọ areghẹ na.’ (Matiu 24:45) Eriwo ọnana Isẹri na a be rọ rehọ ẹme na “Society” ruiruo. Dede na, oria uzi oyena avọ ‘ọrigbo areghẹ avọ ẹrọwọ na’ e rọ eme nọ i tho oma ha. A salọ esẹro Watch Tower Society na, rekọ ẹzi ọfuafo Jihova họ onọ u wholo Isẹri nọ i ru ‘ọrigbo ẹrọwọ’ na via.

 4. (a) Didi eme Isẹri buobu a rẹ ta re a sae whaha orithọ? (b) Fikieme ma jẹ jọ owowa kpahe ẹme nọ ma rẹ ta?

⁴ Re a whaha orithọ, Isẹri Jihova a be daoma yọrọ oma kpahe ẹme nọ a rẹ ta. Ukpenọ a rẹ ta nọ, “enẹ Society o wuhrẹ,” o rẹ were Isẹri buobu re a ta eme wọhọ, “Ebaibol na o ta” hayo, “enẹ me roro nọ Ebaibol na u wuhrẹ.” Kọ enẹ a bi ro dhesẹ iroro nọ Osẹri kpobi ọ jẹ no evaọ ọjẹrehọ iwuhrẹ Ebaibol jẹ be whaha iroro ethọthọ na inọ izi egagọ jọ e gba Isẹri na kugbe. Dede na, u fo re oghẹrẹ ẹme nọ a rẹ ta o jọ oware avro ho. Keme, oghẹrẹ ẹme nọ a rẹ ta o rẹ j’oja otẹrọnọ o rẹ whaha orithọ. O gwọlọ owowa Ileleikristi. Ebaibol na ọ hrẹ omai nọ ma “siọ avro ba fiki eme.” (2 Timoti 2:14, 15) Ikereakere na e tẹ jẹ fodẹ ehri-uzi onana: “Otẹrọnọ wha be jẹ ẹvẹrẹ nọ o wo otọ họ, kẹvẹ ohwo ọ rẹ sae riẹ onọ a tae?”—1 Ahwo Kọrint 14:9.

Ẹzi Ọghẹnẹ U Ru Ẹgwọlọ Izi Kpotọ

 5. Ẹvẹ a re wo otoriẹ 1 Ahwo Kọrint 10:23 na fihọ?

⁵ Pọl ukọ na o muẹrohọ nọ: “ ‘Eware kpobi e rọ uzi’, rekọ eware kpobi i wo obufihọ họ.” O te fibae nọ: “ ‘Eware kpobi e rọ uzi’, rekọ orọnọ eware kpobi [e] gbunu hu.” (1 Ahwo Kọrint 10:23) Orọnikọ Pọl ọ be ta nọ u fo re a ru eware nọ Ẹme Ọghẹnẹ o mukpahe he. A tẹ rehọ ai wawo izi 600 nọ a rọ kẹ Izrẹl anwae, izi nọ e be kpọ uzuazọ Ileleikristi nẹnẹ e rọ kakao gheghe. Fikiere, eware buobu e riẹ nọ ohwo ọ rẹ rọ iroro obọ riẹ ru. Ohwo nọ ọ rehọ oma mudhe kẹ Jihova no ọ rẹ reawere ufuoma nọ u re no ekpakpọ ẹzi Ọghẹnẹ ze. Nọ o ru uzẹme na họ oriẹ no, Oleleikristi o re lele iroro riẹ nọ a rọ Ebaibol wuhrẹ no jẹ rẹro so ekpakpọ Ọghẹnẹ ẹkwoma ẹzi ọfuafo. Onana u re fiobọhọ kẹ Oleleikristi nọ ọ roma mudhe no re ọ riẹ oware nọ o rẹ ‘bọga’ avọ onọ u re ‘fiobọhọ’ kẹe gbe amọfa. Ọ rẹ riẹ nnọ iroro nọ ọ be jẹ u ti kpomahọ usu obọ riẹ kugbe Ọghẹnẹ, ọnọ ọ roma mudhe kẹ na.

 6. Eva iwuhrẹ Ileleikristi, ẹvẹ ma sai ro dhesẹ nọ ma ru uzẹme na họ omai no?

⁶ Osẹri o re dhesẹ nọ o ru uzẹme na họ oriẹ no ẹkwoma ẹme nọ ọ rẹ jọ iwuhrẹ Ileleikristi kpahe. Evaọ emuhọ, ọ rẹ sai se no obe nọ a bi ro ru ewuhrẹ na ze. Rekọ uwhremu na ọ vẹ te nyaharo te epanọ ọ rẹ rọ rehọ ẹme obọ riẹ dhesẹ iwuhrẹ Ebaibol. Kọ enẹ ọ rẹ rọ kẹ imuẹro inọ ọ be bọ ẹgba iroro riẹ, orọnikọ ẹwariẹ eme nọ amọfa a ta ọvo ho. Re ọ rehọ eme obọ riẹ ta ẹme lahwe re ọ jẹ riẹ epanọ ọ rẹ ta ẹme nọ ọ gba, o rẹ wha evawere sei je dhesẹ nnọ ọ jọ iroro riẹ rọwo ẹme na.—Ọtausiuwoma Na 12:10; wawo Ahwo Rom 14:5b.

 7. Didi ẹjiroro idibo Jihova jọ a jẹ n’eva ze no?

⁷ Uyoyou kẹ Ọghẹnẹ gbe erivẹ họ onọ o be wọ Isẹri Jihova. (Matiu 22:36-40) Uzẹme, ọkpọ uyoyou Kristi o gba rai kugbe wọhọ ukoko inievo akpọ soso. (Ahwo Kolosi 3:14; 1 Pita 5:9) Rekọ wọhọ omama ufuoma ẹsalọ, u no omomọvo eva ze re o whowho emamọ usi Uvie Ọghẹnẹ, re ọ kẹnoma no esuo, re o sioma no azẹ, re ọ whaha oghẹrẹ aruọzaha jọ, re ọ jẹ rria lele ute Ebaibol. Enana e rọ iroro nọ a gbahọ ae he. Yọ edhere uzuazọ nọ enọ e gwọlọ jọ Isẹri a salọ kẹ omobọ rai taure a tẹ te j’owọ omarọkẹ Ileleikristi.

A re Guọvunu kẹ Ugboma Esuo?

 8. Didi enọ i fo nọ a re ru vẹ?

⁸ Ebaibol na o dhesẹ vevẹ inọ a rẹ gba Ileleikristi uzẹme họ re a gọ Ọghẹnẹ hẹ. O ta nọ: “Whaọ Ọnowo na họ Ẹzi: jegbe oria nọ Ẹzi Ọnowo na ọrọ, etẹe ufoma o rẹ jọ.” (2 Ahwo Kọrint 3:17) Rekọ okugbe vẹ ọ rọ uzẹme onana kugbe ‘ọrigbo ẹrọwọ avọ areghẹ’ avọ Ugboma Esuo riẹ?—Matiu 24:45-47.

 9, 10. (a) Ẹvẹ ehri-uzi uzou-uwo u ro w’iruo evaọ ukoko Ileleikristi? (b) Eme elele ehri-uzi uzou-uwo o gwọlọ evaọ ukoko Ileleikristi ikpe-udhusoi ọsosuọ na?

⁹ Re a kuyo onọ onana, ma re roro kpahe ehri-uzi ọ uzou-uwo Ikereakere na. (1 Ahwo Kọrint 11:3) Eva Ahwo Ẹfẹsọs 5:21-24, a vuhu Kristi mu wọhọ ‘ọnọ o wuzou ukoko na,’ ọnọ a rẹ “rehọ oma kpotọ kẹ.” Isẹri Jihova a wo otoriẹ inọ inievo ẹzi Jesu họ enọ i ru ọrigbo ẹrọwọ gbe areghẹ na via. (Ahwo Hibru 2:10-13) A rehọ ẹko ọrigbo ẹrọwọ ọnana mu re ọ kẹ ahwo Ọghẹnẹ ‘emuore ẹzi eva ẹruoke.’ Evaọ oke urere onana, Kristi ọ rehọ ọrigbo ọnana mu no re “o riwi uwou riẹ.” Fikiere u fo nọ ohwo nọ o se oma riẹ Oleleikristi kpobi ọ rehọ adhẹẹ kẹ ọkwa riẹ.

¹⁰ Ẹjiroro uzou-uwo họ re a ruẹse yọrọ okugbe re u je muẹro nọ ‘eware kpobi e rọ kpatiẹ jẹ gba kiete.’ (1 Ahwo Kọrint 14:40) Re a wo onana evaọ ikpe-udhusoi ọsosuọ na, a salọ umutho Ileleikristi jọ nọ a kẹ ẹzi ro no ẹko ọrigbo ẹrọwọ avọ areghẹ na ze re a jọ ubiẹro kẹ ẹko na kpobi. Wọhọ epanọ eware nọ e via i dhesẹ, ẹruọsa nọ ugboma esuo ikpe-udhusoi ọsosuọ ọnana a kẹ u wo ọjerehọ gbe oghale Jihova. Ileleikristi ikpe-udhusoi ọsosuọ a rehọ evawere dede ọruẹrẹfihotọ na rehọ. Ẹhẹ, a dede i rie rehọ jẹ ghọghọ kẹ emamọ iyẹrẹ nọ i no rie ze.—Iruẹru 15:1-32.

11. Ẹvẹ a re rri Ugboma Esuo ọgbọna?

¹¹ Aghare ọruẹrẹfihotọ otiọye na o gbẹ rọ. Nẹnẹ, Ileleikristi ikpe nọ a wholo họ enọ i ru Ugboma Esuo Isẹri Jihova via, aikpobi a rọ Ileleikristi kri te ikpe buobu no. A be rọ ọkpọvio abọ-ẹzi kẹ Isẹri Jihova, wọhọ epanọ ugboma esuo ikpe-udhusoi ọsosuọ o jọ na. (Iruẹru 16:4) Wọhọ Ileleikristi ọsosuọ, Isẹri na a be rehọ evawere rri bru inievo ekpako Ugboma Esuo na kẹ ekpakpọ gbe ọkpọvio nọ o no Ebaibol ze kpahe ẹme egagọ. Dede nọ ahwo Ugboma Esuo na a rọ erigbo Jihova gbe Kristi, wọhọ epanọ ibe Ileleikristi rai a rọ na, Ebaibol na ọ hrẹ omai nọ: “Wha yo ẹme e nọ i bi su owhai re wha rehọ oma kpotọ kẹ ae; keme ae a be sẹro izi rai, wọhọ ahwo nọ a rẹ te niyẹrẹ re a rọ [evawere ru] onana o jọ rọ ofuhu, keme oyena u re wo erere kẹ owhai hi.”—Ahwo Hibru 13:17.

12. Ono Oleleikristi ọvuọvo o re guọvunu kẹ?

¹² Kọ ọkwa ẹruọsa nọ Ikereakere na i muhọ Ugboma Esuo na obọ na u dhesẹ nọ omomọvo Isẹri Jihova o re guọvunu iruo riẹ kẹe? Orọnikọ ere eme Pọl nọ o kere se Ileleikristi obọ Rom i dhesẹ hẹ: “Fikieme who je bi bruoziẹ omoni ra? Kọ fikieme [whọ be rọ] jẹ omoni ra fiẹ na? Keme mai kpobi a ti dikihẹ aro akaba oziẹobro Ọghẹnẹ. . . . Ere mai kpobi ma ti ro gu ọvuọ ẹkẹunu riẹ kẹ Ọghẹnẹ.”—Ahwo Rom 14:10-12.

13. Fikieme Isẹri Jihova a jẹ n’iyẹrẹ iruo usiuwoma ota rai?

¹³ Dede na, kọ o gbẹ rọ uzẹme inọ omomọvo Isẹri na a rẹ n’iyẹrẹ iruo usiuwoma ota rai? Ẹhẹ, rekọ a fodẹ ẹjiroro onana evaọ omobe Isẹri jọ, onọ o ta nọ: “Ilele Jesu Kristi ọsosuọ a wo isiuru ẹnẹ iyẹrẹ ẹnyaharo iruo usiuwoma na. (Mak 6:30) Nọ iruo na e be nyaharo na, a ve kere iyẹrẹ na fihọ oria ovo gbe eware nọ ahwo nọ a bi ru iruo emamọ usi na a nyaku kpobi. . . . (Iruẹru 2:5-11, 41, 47; 6:7; 1:15; 4:4) . . . Ẹvẹ o jọ uduotahawọ te kẹ ibe iruiruo Ileleikristi ẹrọwọ eyena re a yo iyẹrẹ eware nọ a bi ru gba! . . . Epọvo na, ukoko Jihova ọgbọna o be daoma wo okerefihotọ iruo nọ a bi ru evaọ orugba Matiu 24:14.”

14, 15. (a) Ẹvẹ 2 Ahwo Kọrint 1:24 u ro kie kpahe Ugboma Esuo na? (b) Eme omomọvo Ileleikristi o re fiobọhọ ro ru ọtamuo omobọ riẹ, kọ eva ovuhumuo uzẹme ovẹ?

¹⁴ Ugboma Esuo na yọ ọruẹrẹfihotọ oyoyou gbe oriruo ẹrọwọ nọ o fo aruorokele. (Ahwo Filipai 3:17; Ahwo Hibru 13:7) Ẹkwoma Kristi nọ a bi yoẹme kẹ je lele, a rẹ sae wariẹ eme Pọl na: “Orọnikọ ma wo [ogaga] orọwọ rai hi, rekọ obufihọ ma rọ kẹ oghọghọ nọ wha wo na, keme fiki orọwọ wha sai ro dikihẹ na.” (2 Ahwo Kọrint 1:24) Ẹkwoma eware nọ a bi muẹrohọ, Ugboma Esuo na o rẹ riobọ họ irere ezọgaviẹ kẹ ohrẹ Ebaibol, j’iroro kpahe efihiruo izi gbe ehri-izi Ebaibol, vẹvẹ unu kpahe enwoma ototọ, jẹ rehọ uduotahawọ nọ a gwọlọ kẹ ‘ibe iruiruo.’ Kọ enẹ o bi ro ruiruo ọkwa-odibo Ileleikristi riẹ gba, fiobọhọ kẹ ai yọrọ oghọghọ rai, jẹ bọ ai ga evaọ ẹrọwọ na re a sai dikihẹ ga.—1 Ahwo Kọrint 4:1, 2; Taitọs 1:7-9.

¹⁵ Otẹrọnọ Osẹri ọ j’iroro fiki ohrẹ Ebaibol nọ Ugboma Esuo na o kẹ, udu obọ riẹ ọ rọ j’iroro otiọye na keme uwuhrẹ Ebaibol obọ riẹ o kẹ riẹ imuẹro nnọ onana u kiehọ. Ẹme obọ Ọghẹnẹ o bi kpomahọ Osẹri kpobi re o fi uvi ohrẹ Ikereakere nọ Ugboma Esuo o kẹ h’iruo, avọ ovuhumuo ọvọvọ inọ iroro nọ ọ jẹ kpobi u ti kpomahọ usu obọ riẹ kugbe Ọghẹnẹ, ọnọ ọ roma mudhe kẹ.—1 Ahwo Tẹsalonika 2:13.

Emọ-Iwuhrẹ gbe Isoja

16. Dede nọ ẹjiroro kpahe uruemu yọ ẹme obọ ohwo, fikieme a je bi si ejọ no ukoko?

¹⁶ Rekọ otẹrọnọ ẹjiroro kpahe uruemu o rọ ẹme obọ ohwo, eme jabọ a je bi si Isẹri Jihova jọ no ukoko? Ohwo ọvuọvo ọ rẹ rehọ udu obọ riẹ fodẹ uzioraha nọ o gwọlọ esino ukoko ho. Ukpoye, a jọ Ikereakere na gwọlọ owojẹ onana ọvo okenọ omọvo ukoko na jọ ọ tẹ raha uzi ulogbo jọ ababọ ekurẹriẹ, wọhọ enọ a fodẹ evaọ obe Ahwo Kọrint Ọsosuọ uzou 5 na. Fikiere, nọ a rẹ sai si Oleleikristi no ukoko fiki igberedia na, onana o rẹ via ọvo otẹrọnọ ohwo na ọ se nọ ọ rẹ jẹ obufihọ abọ-ẹzi nọ ithuru-igodẹ iyoyou na a kẹ riẹ. Isẹri Jihova ọvo họ ahwo nọ a bi lele uruemu Ileleikristi onana ha. The Encyclopedia of Religion o muẹrohọ inọ: “Okegbe kpobi o wo udu nọ o rẹ rọ thọ oma riẹ mukpahe ahwo aghẹmeeyo nọ e rẹ sai fi ewoma rai kpobi họ awa. Evaọ oria egagọ, a re dhesẹ udu onana ẹkwoma orọwọ na inọ ọwhọkuo [esino] na u re kpomahọ edikihẹ ohwo kugbe Ọghẹnẹ.”

17, 18. Ẹvẹ a sai ro dhesẹ ewoma esino-ukoko?

¹⁷ Isẹri Jihova yọ emọ-uwuhrẹ Ebaibol na. (Joshua 1:8; Olezi 1:2; Iruẹru 17:11) Ọruẹrẹfihotọ ewuhrẹ Ebaibol nọ Ugboma Esuo na ọ be kẹ a rẹ sae rehọ iẹe wawo ọruẹrẹfihotọ isukulu nọ ogbẹgwae isukulu a rẹ ruẹrẹ fihọ. Dede nọ ogbẹgwae na omariẹ họ ehri eware nọ a bi wuhrẹ na ha, o rẹ ruẹrẹ eware nọ a re wuhrẹ họ, j’iroro oghẹrẹ nọ a re ro wuhrẹ ai, jẹ rehọ ọkpọvio nọ o fo kẹ. Otẹrọnọ ohwo jọ o veghe uzou siọ ute isukulu na, o je bi kpokpo emọ-isukulu edekọ, hayo kpomovuọ họ isukulu na oma, a rẹ sai lei no isukulu. Udu-esuo isukulu na u wo udu nọ u re ro ru oware nọ o rẹ kẹ emọ-isukulu na kpobi erere.

¹⁸ U te no emọ-ewuhrẹ nọ a rọ no, Isẹri Jihova a rọ isoja Jesu Kristi, enọ a kẹ udu re a “họre uvi ohọre orọwọ na.” (1 Timoti 6:12; 2 Timoti 2:3) N’otọ ze, uruemu nọ o reria obọ nọ u fo kẹ osoja Oleleikristi hi o rẹ sae wha evedha Ọghẹnẹ ze. Wọhọ ohwo nọ a rehọ ufuoma ẹsalọ ma, osoja Oleleikristi ọ rẹ sae j’iroro nọ u je rie, rekọ ọ rẹ whowha oware nọ u no iroro ejẹ riẹ ze. Pọl ọ j’iroro nọ: “Alakpa-ẹmo ọvuọvo o re kielele eware akpọ diodi hi, keme ọ rẹ guọlọ re o ru orọ eva ọnọ ọ sane riẹ gba. Ọnọ ọ be dhẹ ọgbohrẹ o re wo etu-uvie he, ajokpa nọ o re koko izi ọgbohrẹ ọdhẹ na gba.” (2 Timoti 2:4, 5) Ileleikristi nọ e kpako, kugbe erọ Ugboma Esuo na, a rọ otọ Osu rai, Jesu Kristi, bi koko “izi” na re a ruẹsi wo osa uzuazọ ebẹdẹ bẹdẹ na.—Jọn 17:3; Eviavia 2:10.

19. Nọ ma kiẹ uzẹme ọ omarọkẹ Ileleikristi riwi no na, eme o re mu omai ẹro?

¹⁹ Kọ imuẹro na i gbe dhesẹ nọ Isẹri Jihova yọ idibo Ọghẹnẹ, orọnikọ erigbo ahwo ho? Wọhọ Ileleikristi omarọkẹ nọ e be reawere ufuoma nọ Kristi o ro ru ai emuyẹ na, a be kuvẹ kẹ ẹzi Ọghẹnẹ gbe Ẹme riẹ re o kpọ izuazọ rai nọ a be gọ kugbe inievo rai evaọ ukoko Ọghẹnẹ na. (Olezi 133:1) Imuẹro onana u re je si avro jọ kpobi no kpahe ehri ẹgba rai. Kugbe ọso-ilezi na, a rẹ sae so nọ: “ỌNOWO họ eri gbe ojese mẹ; udu mẹ o rọ kpahe iẹ; o te fiobọhọ kẹ omẹ, eva mẹ e te ghọghọ, ole mẹ me re ti ro jiri ei.”—Olezi 28:7.

[Footnotes]

Ẹvẹ Whọ te k’Uyo?

◻ Ẹvẹ Watch Tower Society gbe ikoko uzi itieye na i bi ro fiobọhọ kẹ Isẹri Jihova?

◻ Ẹvẹ Ileleikristi a bi ro wo erere no iruo Ugboma Esuo Isẹri Jihova ze?

◻ Fikieme ahwo Jihova a jẹ n’iyẹrẹ iruo usiuwoma ota rai?

◻ Otọ iyero vẹ esino ukoko Oleleikristi nọ ọ roma mudhe no u je fo?

[Picture on page 16]

Ugboma esuo ikpe-udhusoi ọsosuọ na a jẹ yọrọ okugbe ewuhrẹ

[Pictures on page 20]

Nya akpọ na wariẹ, Isẹri Jihova a be reawere ufuoma nọ Kristi o ro ru ai emuyẹ