Kọ Whọ Kareghẹhọ?

Kọ whọ reawere ese Uwou-Eroro nọ i kpozi kẹle na? Dai rri sọ whọ sae kẹ iyo enọ nọ e rrọ obotọ na:

• Okevẹ ebuẹva-isi na a rọ nyae ruẹ Jesu?

Ebaibol jọ e ta kpahe onana inọ: “Orọnikọ aso nọ a ro yẹ Jesu nọ ọ rọ jọ etehe-ọrẹ-erao nọ ithuru-igodẹ na e rọ nyae rue riẹ na oye ebuẹva-isi na e rọ nya ha. Emera jọ e ruemu no taure a tẹ te nyae ruẹ Jesu. Evaọ oke yena Jesu ọ jọ ‘ọmọ-adobọ’ evaọ obọ ‘uwou.’ (Mat. 2:7-11) O hae jọnọ aso nọ a ro yẹ Jesu ebuẹva-isi na a rọ nyae rue riẹ jẹ rehọ igoru gbe ekẹ eghaghae efa ru ei ọghọ, kọ Meri oni riẹ ọ hae te rọ evra esese ivẹ ọvo ru akpẹwẹ evaọ obọ etẹmpol na nọ edẹ 40 i te no?—1/1 ẹwẹ-obe avọ 31.

• Eme ahwo buobu a re ru re a sai yeri uzuazọ nọ o rẹ wha evawere se ai?

Ohwo ọ rẹ sae nọ inọ, ‘Kọ mẹ sai ru inwene jọ evaọ uzuazọ mẹ re me si obọ no eware nọ i wuzou tere he?’ Nwanọ ere Amy o ru. O fe, rekọ eva e jẹ were iẹe he. Ọ tẹ te ruẹ inọ fikinọ o bi le efe akpọ na, ọ whoma vru no ẹrọwọ na no. Fikiere, ọ tẹ jiroro inọ ọ rẹ rọ iruo Uvie na karo, o te ru iruo ọkobaro evaọ imikpe jọ. Amy ọ ta nọ, “Rekọ enẹna eva e be were omẹ vi okenọ mẹ jẹ rehọ oke mẹ kpobi ruiruo kẹ akpọ na.”—1/15, ẹwẹ-obe avọ 19.

• “Oge” vẹ Jesu ọ jẹ ta ẹme kpahe evaọ eme riẹ nọ a kere fihọ Matiu 24:34 na?

Ẹsibuobu Jesu o je fi ẹme oyoma ba ẹme na “oge” rọ ta ẹme evaọ okenọ ọ tẹ be ta ẹme kẹ hayo kpahe ahwo muomu. Rekọ o fi ẹme oyoma bae he nọ ọ jẹ ta ẹme kẹ ilele riẹ, enọ a be te rọ ẹzi ọfuafo wholo kẹle na. Ae họ enọ e sai ti wo otoriẹ eme nọ ọ ta evaọ Matiu 24:32, 33 na. Fikiere, o wọhọ nọ ilele riẹ nọ a rọ ẹzi ọfuafo wholo evaọ ikpe-udhusoi ọsosuọ gbe oke urere akpọ na họ oge nọ Jesu ọ ta ẹme te na.—2/15, ẹwẹ-obe avọ 23-24.

• Wọhọ epanọ Jemis 3:17 o ta, oghẹrẹ uruemu vẹ u fo nọ ma re wo?

Ẹfuọ o gwọlọ inọ ma rẹ siọ eware iyoma vẹrẹ vẹrẹ, ababọ oke oraha. (Emu. 39:7-9) Ma rẹ jẹ jọ dhedhẹ, whaha ofu hayo oware kpobi nọ o rẹ wha ozighi ze. Fikiere u re woma re mai omomọvo ọ nọ omariẹ nọ: ‘Kọ a riẹ omẹ wọhọ ọnọ ọ rẹ gwọlọ udhedhẹ manikọ ọnọ o re ru ozighi? Kọ mẹ yọ ohwo nọ o re lele ahwo whọ kẹse kẹse? Kọ mẹ yọ ọnọ o re kru ofu emu hu, ọnọ ọ rẹ kaki ru amọfa eva dha? Kọ mẹ rẹ kake rọ vrẹ amọfa manikọ me re sikẹ inọ onọ mẹ ta ọvo a rẹ rehọ?’—3/15, ewẹ-obe avọ 24-25.

• Fikieme Jesu ọ rọ rehọ ẹmẹrera rovie aro ọzae nọ o tuaro na? (Mak 8:22-26)

Ebaibol na e nwani dhesẹ ugogo oware nọ o soriẹ ze he. Rekọ o wọhọ inọ ẹmẹrera nọ o ro rovie aro ọzae nọ o tuaro anwẹdẹ na u ru rie lọhọ kẹ ọzae na re elo ọre na o rehọ ẹmẹrera reriae aro. O wọhọ nọ Jesu o ru onana fiki ororokẹ nọ o wo kẹ ọzae nọ o tuaro na.—4/1, ẹwẹ-obe avọ 30.