Uzou 10

Uvie “Nọ A rẹ Raha Ha”

 1, 2. (a) Didi uzẹme a muẹrohọ kpahe eware nọ e be jọ akpọ via nẹdẹ tẹdẹ, gbe oghẹrẹvẹ? (b) Eme ọvo họ ifue riẹ?

EWARE nọ e be jọ akpọ via kẹdẹ kẹdẹ i dhesẹ uzẹme na nọ ahwo a rẹ te ruẹ evawere he fikinọ a siọ esuo Jihova, jẹ be daoma nọ a re su omobọ rai. Eyero esuo ohwo ọvuọvo nọ o rehọ irere ababọ okienyẹ se ahwo no ọ riẹ hẹ. Dede nọ ahwo a nyaharo evaọ eriariẹ viọ epaọ ọsosuọ no, a re sai si emuemu no ho, a re sai fi ẹyao kparobọ jẹ rehọ oba te uwhu hu, makọ rọ kẹ ohwo jọ nọ ọ rọ otọ rai dede. Ukpoye, erẹwho na a gbe bi ku ekwakwa emo ekpokpọ jegbe enọ e mai yoma. Ozighi ethube o bi vihọ. Eriariẹ eware i kuo, uvouthei gbe ogbori i kuomagbe be nua otọ, ame gbe ofou na no. Unuigho eware nọ i bi duola kpehru gbe odubẹ iruo i bi ru ei ga thesiwa kẹ ibuobu re a wo eyero uzuazọ. Ahwo a be gwọlọ edhere nọ a rẹ sai rọ dhẹ noi.—Okoko. 8:9.

² Eme họ ifue riẹ? Uvie Ọghẹnẹ, nọ Jesu o wuhrẹ ilele riẹ nọ a lẹ kẹ na. (Mat. 6:9, 10) Ẹvẹ ma rẹ vọ avọ uyere te inọ ufuoma nọ ọ te rọ ze o kẹle ino enẹna!

 3. (a) Wo obọ kugbe Uvie nana, eme o j’obọ odhiwu via evaọ 1914 C.E.? (b) Fikieme oyena u je wuzou k’omai?

³ Anwọ 1914 C.E. ze, Uvie Ọghẹnẹ evaọ obọ Jesu Kristi o ro mu esuo họ.a Evaọ ukpe yena, eware nọ Daniẹl ọ ruẹ evaọ eruẹaruẹ na e ghinẹ rọ rehọ oma via evaọ obọ odhiwu. “Ọnọ ọ rọ no Oke Anwae ze” na, Jihova Ọghẹnẹ, ọ rehọ “isuẹsu gbe oruaro gbe uvie rọ kẹ” Ọmọ ohwo, Jesu Kristi, “re ahwo kpobi, erẹwho gbe evẹrẹ kpobi, re a ruẹse gọ e.” Jẹ niyẹrẹ kpahọ eruẹaruẹ na, Daniẹl o te kere nọ: “Isuẹsu riẹ e rẹ jọ bẹdẹ bẹdẹ, o nọ u re re he, uvie riẹ họ onọ o rẹ raha ha.” (Dan. 7:13, 14) Ẹkwoma Uvie nana ze Ọghẹnẹ o ti ro ru ei lọhọ kẹ ahwo nọ i you ẹrẹreokie re a reawere eware ezi buobu nọ ọ jiroro riẹ okenọ o fi ọsẹ gbe oni ọsosuọ mai họ Aparadase.

 4. Didi eme kpahọ Uvie na e rọ isiuru k’omai, kọ fikieme?

⁴ Enọ e be rehọ omakpotọ kẹ Uvie nana a wo isiuru gaga kpahe ebabọ gbe oghẹrẹ nọ egọmeti ọnana o bi ro ruiruo. A gwọlọ riẹ oware nọ o bi ru enẹna, oware nọ o ti ru evaọ obaro jegbe oware nọ o gwọlọ mi ai. A be kiẹe riwi ziezi, eva ere oruo, ovuhumuo rai rọ kẹe o tẹ be rro a tẹ be jẹ thoma rai re a ta kẹ amọfa kpahe iẹe.—Ol. 48:12, 13.

Ọkiẹriwo nọ U re Duobọ te Udu

 5. (a) Ẹvẹ Ikereakere na i dhesẹ esuo ọnọ a dhesẹ ẹkwoma Uvie Mesaya na? (b) Fikiere, ẹvẹ oware nọ ma wuhrẹ kpahe Uvie na u ro kpoma họ omai?

⁵ Oware ovo jọ nọ ọkiẹriwo otiọye na o rovie via họ Uvie Mesaya na yọ edhesẹ esuo obọ Jihova. Ọye ọ rehọ “isuẹsu gbe oruaro gbe uvie” rọ kẹ Ọmọ riẹ. Fikiere, nọ Uvie na o mu esuo họ, irru nọ i no obọ odhiwu ze i te whowho iei gbagba anọ: “Uvie akpọ nana u re ti zihe ruọ uvie ỌNOWO mai [Jihova Ọghẹnẹ] gbe orọ Kristi riẹ, ọye [Jihova] o re ti suẹ bẹdẹ bẹdẹ.” (Evia. 11:15) Fikiere eware kpobi nọ ma ruẹ kpahọ Uvie nana gbe oware nọ o ru u re si omai kẹle Jihova omariẹ. O rẹ k’omai ẹgwọlọ nọ ma rẹ rọ rehọ oma kpotọ kẹ esuo riẹ bẹdẹ bẹdẹ.

 6. Fikieme o jẹ mae rọ isiuru k’omai inọ Jesu Kristi họ osu nọ ọ rọ tha Jihova?

⁶ Ẹvẹ u woma te nọ Jihova o ro fiọ Jesu Kristi họ akaba uvie wọhọ ọnọ ọ rọ ethabọ Riẹ evaọ isuẹsu! Wọhọ Osu Iruo nọ Ọghẹnẹ ọ rehọ ma akpọ na gbe ohwo, Jesu ọ riẹ ẹgwọlọ mai viọ epanọ mai ohwo jọ ọ rẹ sai riẹ. Ofariẹ, o dhesẹ ‘evawere riẹ kẹ emọ ahwo’ no emuhọ ikuigbe ohwo ze. (Itẹ 8:30, 31; Kọl. 1:15-17) Uyoyou oyena o rro te epanọ ọye ọvo ọ rọ ziọ akpọ na re ọ rehọ uzuazọ riẹ kẹ wọhọ ẹtanigbo fiki rai. Fikiere, o te ru ufuoma no emuemu gbe uwhu lọhọ k’omai, jegbe uvẹ uzuazọ ebẹdẹ bẹdẹ.—Mat. 20:28.

 7. (a) Wo ohẹriẹ no esuo nọ ohwo akpọ jọ o su no, fikieme egọmeti nana ọ te rọ rria tọ? (b) Didi usu ‘ọrigbo oruọzewọ, nọ o wo areghẹ’ na o wo kugbe egọmeti obọ odhiwu na?

⁷ Ọnana yọ egọmeti nọ ọ te dọmu, jẹ rria tọ. Ekwakwa nọ e te lẹliẹe rria tọ na họ imuẹro uzẹme na inọ Jihova o re whuẹ hẹ. (Hab. 1:12; Ol. 146:3-5, 10) Wo ohẹriẹ no ivie akpọ, Jesu Kristi, ọnọ Ọghẹnẹ o mu ọkwa ovie họ obọ no, o re whuẹ gbe he. (Rom 6:9; 1 Tim. 6:15, 16) Amọfa nọ i ti kuomagbe Kristi evaọ ekaba uvie odhiwu họ 144,000, idibo omarokpotọ Ọghẹnẹ nọ i no “k’oria k’oria gbe evẹrẹ gbe ahwo gbe orẹwho ze.” Enana a rehọ uzuazọ nọ u re whu hu rọ kẹ ai re. (Evia. 5:9, 10; 1 Kọr. 15:42-44, 53) Ibuobu rai e rọ obọ odhiwu no enẹna, yọ okiọkotọ rai nọ e gbẹ rọ otọakpọ na i ru otu ‘ọrigbo oruọzewọ, nọ o wo areghẹ’ na via, nọ e be rehọ omakpotọ wha isiuru Uvie na haro evaọ obonẹ.—Mat. 24:45-47.

 8, 9. (a) Didi okpomahọ omohẹriẹ yoma Uvie na o ti si no? (b) Fikiere, otẹrọnọ ma rẹ whaha re ma siọ ewegrẹ Uvie Ọghẹnẹ ba ẹ jọ, didi ukoko jegbe iruo vẹ ma rẹ whaha oma ekugbe?

⁸ Kẹle na, evaọ oke nọ Jihova o ve fihọ, egbaẹmo ikpikpakpe riẹ a te wọ re a ru otọakpọ na fo. A te rehọ ọraha ebẹdẹ bẹdẹ te ahwo nọ a sa nọ a rẹ riẹ Ọghẹnẹ hẹ, nọ e se nọ a re vuhu esuo riẹ mu hu, jegbe enọ e be rehọ ọruẹrẹfihotọ uyoyou nọ o ru lọhọ ẹkwoma Jesu Kristi ze na se ẹkoko. (2 Tẹs. 1:6-9) Onana o be te jọ ẹdẹ Jihova, oke nọ a be hẹrẹ anwọ ẹdẹ na rọ kẹ ẹkpare odẹ riẹ wọhọ Osu Ehrugbakpọ.

⁹ Egagọ erue kpobi, jegbe egọmeti ahwo gbe egbaẹmo rai kpobi, nọ osu muomu akpọ nana nọ a rẹ ruẹ hẹ na nọ e be kpọ na, a te raha ai no bẹdẹ bẹdẹ. Enọ i bi dhesẹ omarai wọhọ abọ akpọ ọnana ẹkwoma ilale oriobọ rai, ababọ oruọzewọ, edhere uzuazọ ọfariẹ a re ti whuẹ. Setan gbe idhivẹri riẹ a ti si ai no nọ a gbẹ te nya kugbe enọ e be rria akpọ na ha, a vẹ te ghinẹ gbae ifi odu ikpe. Ẹvẹ ufuoma nana o te rro te rọ kẹ enọ i you ẹrẹreokie kpobi!—Evia. 18:21, 24; 19:11-16, 19-21; 20:1, 2.

Ẹjiroro Riẹ—Oghẹrẹ nọ A Ro Wo Ai

10. (a) Ẹvẹ Uvie Mesaya na o ti ro ru ẹjiroro Jihova kpahọ akpọ na gba? (b) Eme onana u ti dhesẹ kẹ ahwo nọ e be rria otọakpọ na evaọ oke yena?

¹⁰ Uvie Mesaya ọnana u ti ru ẹjiroro ọsosuọ Ọghẹnẹ kẹ otọakpọ na gba. (Emu. 2:8, 9, 15; 1:28) Rite inẹnẹ na, ohwo ọ re sae wha ẹjiroro ọyena haro ho. Dede na, “akpọ nọ be tha na” a rehọ e riẹ ziọ otọ Ọmọ ohwo, Jesu Kristi no. Enọ e zọ no ikpakpe ẹdhoguo Jihova rọ kpahọ eyero anwae ọnana a ti ruiruo kugbe evaọ otọ Kristi wọhọ Ovie, te rehọ evawere ru onọ ọ ta kẹ ai kpobi re otọakpọ na o ti zihe ruọ Aparadase akpọ soso. (Hib. 2:5-9) Ahwo akpọ kpobi a ti wo omawere iruo abọ rai, a ve je ti wo erere vọvọ buobu no eware nọ i ti no otọ na tha.—Ol. 72:1, 7, 8, 16-19; wawo Aizaya 65:21, 22.

11. (a) Ẹvẹ ẹgbagba iroro jegbe ugboma a te rọ rehọ ae via rọ kẹ enọ e te jọ otọ Uvie na? (b) Eme u ti kugbe onana?

¹¹ Okenọ a ma Adamu avọ Ivi, a jọ gbagba, o tẹ te jọ ẹjiroro Ọghẹnẹ re a rọ emọ rai vọ akpọ na, nọ aikpobi a te reawere ọ iroro gbe ugboma ogbagba. Evaọ otọ esuo Uvie yena, ẹjiroro yena ọ te ziọ oruaro uzẹme. Onana o te gwọlọ esino eware kpobi nọ emuemu ọ wha ze, fikiere Kristi ọ vẹ te jọ orọnọ wọhọ Ovie ọvo ho rekọ wọhọ Ozerẹ Okpehru re. Avọ odiri o ve ti fiobọhọ kẹ otu omarokpotọ nọ e rọ otọ riẹ re a wo erere no aghare idhe ẹtanigbo uzuazọ ohwo riẹ. Ibiaro nọ i tu i re ti rovie. Ezọ nọ i di i re ti rovie. Ohọ-oma nọ u siikpru no fikiọ owho hayo ẹyao o vẹ te jọ bọbọbọ viọ ọrọ ọmaha. Omoyẹlẹ ogaga u ve ti noi no, omokpokpọ ojaja u ve nwene ie. Ẹdẹ ọ be tha nọ ohwo ọvuọvo ọ gbẹ te ta nọ, “Mẹ be mọ” họ, keme ahwo nọ e be dhozọ Ọghẹnẹ a te kẹ ai ufuoma ro no owha umuemu gbe eware nọ o whaze.—Wawo Aizaya 33:22, 24; 35:5, 6; Job 33:25; Luk 13:11-13.

12. (a) Eme ọfa ẹgbagba ohwo ọ gwọlọ? (b) Ẹvẹ a ti ro wo oyena te obọ, kọ eme u ti noi tha?

¹² Re a wo ẹgbagba, dede, u kugbe eware efa viọ ugboma okpokpọ gbe iroro ekpokpọ. U kugbe edhesẹ ekwakwa oma Jihova, keme a ma ohwo eva ‘uwoho Ọghẹnẹ, eva ithatho riẹ.’ (Emu. 1:26) Fikiere, o rẹ te gwọlọ ewuhrẹ ologbo. Onana yọ eyero ọkpokpọ nọ “ẹrẹreokie ọ be rria,” fikiere, wọhọ epanọ Aizaya ọruẹaro na ọ ruẹaro riẹ, “ahwo nọ e rọ akpọ na a ve wuhrẹ ẹrẹreokie.” (2 Pit. 3:13; Aiz. 26:9) Okwakwa onana u re su kpohọ udhedhẹ—udevie ahwo erẹwho kpobi, udevie erivẹ ekpekpe, evaọ uviuwou gbe, maero, kugbe Ọghẹnẹ omariẹ. (Aiz. 32:17; Ol. 85:10-13) Enọ i ti wuhrẹ ẹrẹreokie a ti wuhrẹ ai ẹmẹrera kpahọ ẹgwọlọ Ọghẹnẹ rọ kẹ ai. Nọ uyoyou kẹ idhere Jihova o bi wo owọ didi evaọ udu rai na, a ve ti lele enana evaọ kabọ kabọ izuazọ rai. Ọzae ọgbagba na Jesu ọ sae ta nọ, ‘Me bi ru eware nọ e be were Ọsẹ mẹ kẹse kẹse.’ (Jọn 8:29) Ẹvẹ uzuazọ u ti wo awere te nọ oyena o te jọ uzẹme kẹ ahwo akpọ kpobi!

Irugba nọ I Muẹro no Enẹna

13. Rehọ enọ nọ e rọ obọ ehru na rọ ta kpẹkpẹ irugba Uvie na jegbe oware nọ ma rẹ hai ru.

¹³ Enẹna emamọ irugba Uvie na yọ imuẹro ivevẹ rọkẹ ahwo nọ i wo ibiaro ẹrọwọ. Enọ nọ erọ obaro gbe eria Ikereakere na e te kareghẹhọ owhẹ eware enana jọ, jegbe eware nọ enọ e rọ otọ Uvie na a rẹ sai ru je bi ru enẹna:

Ono Ovie na ọ kake jẹ owọ mukpahe, kọ eme o no rie ze? (Evia. 12:7-10, 12)

Eva Matiu 24:14, didi iruo efa Jesu ọ ruẹaro nọ o ti ru nọ ọ tẹ keria akaba uvie riẹ no jegbe taure ọ tẹ te raha irumuomu na?

Ẹvẹ a bi ro ru iruo nana gba? Amono a bi wo abọ kugbei? (Ol. 110:3; Evia. 14:6, 7)

Fikieme isu omuhrowo gbe egagọ ọwọsuọ a gbe re sai whaha iẹe ha? (Iruẹru 5:38, 39; Zek. 4:6)

Fikiọ iruo awuhrẹ nọ a be wha haro, didi inwene e rehọ oma via no evaọ izuazọ enọ e be rehọ oma kẹ isuẹsu Uvie? (Aiz. 2:4; 1 Kọr. 6:9-11)

Ekwakwa Uvie na nọ E te Jọ Bẹdẹ

14. (a) Ẹvẹ i Kristi o ti su kri te? (b) Eme a ti rugba evaọ oke yena?

¹⁴ Nọ a te gbolo Setan avọ idhivẹri riẹ fihọ ọgọdọ odidi na no, Jesu Kristi kugbe ibe ereuku riẹ nọ i bu te 144,000, a ve ti su odu ikpe. (Evia. 20:6) Eva oke yena a te rehọ ahwo ziọ ẹgbagba. Egọmeti gbe udu-esuo gbe ogaga nọ i bi mukpahe Jihova kpobi a ti si ai no. Nọ a te ru oyena no, Jesu ọ vẹ te rehọ Uvie na zihe kẹ Ọsẹ riẹ, “re Ọghẹnẹ ọ te jọ eva eware kpobi rọ kẹ kohwo kohwo.”—1 Kọr. 15:24, 28.

15. Ẹvẹ o jẹ rọ uzẹme nnọ Uvie nana ‘o rẹ ziọ ọraha ha’?

¹⁵ Oria Jesu rọ kpahọ akpọ na o ve ti nwene. Ghele na, esuo riẹ ọ te jọ “o nọ u re re he” jegbe Uvie riẹ “onọ o rẹ raha ha.” (Dan. 7:14) Evaọ edhere vẹ? Inọ udu-esuo yena o te ruọ obọ amọfa nọ i wo ẹjiroro sa ha. Orugba Uvie oyena ‘o rẹ ziọ ọraha ha.’ Oware nọ Uvie na o ti ru re ọ kpare odẹ gbe ẹjiroro Jihova kpehru kpahọ otọakpọ na u ti dikihẹ bẹdẹ bẹdẹ.

[Footnotes]

Eme Ọkiẹkpemu

● Fikieme Uvie Ọghẹnẹ ọvo ọ jẹ rọ ifue kẹ ebẹbẹ ahwo? Okevẹ u ro mu esuo họ?

● Eme ọ be mae jọ Uvie Ọghẹnẹ gbe eware nọ o ti ru gba si owhẹ urru? Fikieme?

● Didi orugba Uvie na ma rẹ sae ruẹ enẹna? Didi abọ ma wo evaọ enana?

[Caption on pages 84, 85]

Ẹrẹreokie họ oware nọ ahwo na a ti wuhrẹ