Jọ Kugbe Ukoko Jihova Kpekpekpe

JEMIS olele na o kere nọ: “Wha si kẹle Ọghẹnẹ, o re ti si kẹle owhai.” (Jem. 4:8) Ẹhẹ, dede nọ ma gba ha na, Jihova o kpehru hrọ hayo thabọ hrọ họ nọ o gbe ro yo elẹ mai hi. (Iruẹru 17:27) Ẹvẹ ma sai ro si kẹle Ọghẹnẹ? Ma rẹ sai ru onana ẹkwoma usu okpekpe nọ ma re mu kugbe Jihova, nọ ma rẹ jọ lẹ sei no udu ze. (Ol. 39:12) Ma rẹ sai je mu usu okpekpe kugbe Ọghẹnẹ ẹkwoma Ẹme riẹ, Ebaibol na nọ ma re wuhrẹ ẹsikpobi. Enẹ ma rẹ rọ riẹ Jihova Ọghẹnẹ, ẹjiroro riẹ, gbe oreva riẹ kẹ omai. (2 Tim. 3:16, 17) Onana u re ru omai you Jihova je wo uvi ozodhẹ nọ ma gbe ro ru ei eva dha ha.​—Ol. 25:14.

² Rekọ, ẹkwoma Ọmọ riẹ Jesu ọvo, o rọ lọhọ re ma si kẹle Jihova. (Jọn 17:3; Rom 5:10) Uvumọ ohwo-akpọ ọ rẹ sai ru omai riẹ iroro Jihova woma vi epanọ Jesu o ru na ha. Ọ riẹ Ọsẹ riẹ totọ te epanọ ọ sae rọ ta nọ: “Ohwo ọvo ọ riẹ Ọmọ na ha ajokpaọ Ọsẹ na, yọ ohwo ọvo ọ riẹ Ọsẹ na ha ajokpaọ Ọmọ na gbe ohwo kpobi nọ u je Ọmọ na nọ o re dhesẹ Ọsẹ na kẹ.” (Luk 10:22) Fikiere, nọ ma tẹ be romatotọ se ebe Usi Uwoma na re ma wuhrẹ kpahe oghẹrẹ nọ Jesu o je roro je rri eware, yọ ma bi wuhrẹ epanọ Jihova o re roro je rri eware. Eware itieye na nọ ma re wuhrẹ u re si omai kẹle Ọghẹnẹ mai ziezi.

³ Nọ orọnọ Ọmọ Ọghẹnẹ o wuzou mai na, ma re wo usu okpekpe kugbe Jihova nọ ma tẹ rrọ kugbe abọ otọakpọ ukoko riẹ nọ u bi fiobọhọ kẹ omai wuhrẹ epanọ ma re ro ru oreva Ọghẹnẹ na. Wọhọ epanọ a ruẹaro riẹ evaọ Matiu 24:45-47, Olori na, Jesu Kristi, ọ rehọ “ọrigbo nọ a re fievahọ nọ o wo areghẹ na” mu no re ọ rehọ emu kẹ ahwo Ọghẹnẹ “evaọ ẹruoke.” Nẹnẹ, ọrigbo nọ a re fievahọ na ọ be rehọ emu ẹme Ọghẹnẹ buobu kuọ omai. Jihova ọ be rehọ ọrigbo nana hrẹ omai inọ ma se Ẹme riẹ kẹdẹ kẹdẹ, kpohọ iwuhrẹ ẹsikpobi, je wobọ ziezi evaọ ewhowho “usi uwoma Uvie na.” (Mat. 24:14; 28:19, 20; Jos. 1:8; Ol. 1:1-3) U fo vievie he re ma rehọ ubiẹro ohwo-akpọ gheghe rri ọrigbo nọ a re fievahọ na. Ma rẹ daoma jọ kugbe abọ otọakpọ ukoko Jihova kpekpekpe je ru oware nọ a ta kẹ omai. Onana u ti si omai kẹle Jihova Ọghẹnẹ mai ziezi, je fiobọhọ kẹ omai fi edawọ kparobọ.

⁴ Ẹsejọhọ whọ rrọ ukoko na te ikpe buobu no. O tẹ rrọ ere, kiyọ who thihakọ edawọ buobu no. Rekọ o tẹ make rọnọ u ri kri nọ whọ riẹ Jihova je bi kuomagbe ahwo riẹ hẹ, whọ riẹ nọ Setan Ẹdhọ ọ rẹ wọso ohwo kpobi nọ ọ be romakpotọ kẹ esuo Jihova. (2 Tim. 3:12) Fikiere, te who thihakọ eware buobu no hayo umutho eware who thihakọ rai no, whọ dhozọ họ hayo whọ jọ oma o lọhọ owhẹ hẹ. Jihova ọ ya eyaa nọ o ti fiobọhọ kẹ owhẹ, yọ o ti siwi owhẹ jẹ kẹ owhẹ uzuazọ evaọ obaro.​—Hib. 13:5, 6; Evia. 2:10.

⁵ Mai kpobi ma te gbẹ nyaku edawọ evaọ edẹ nọ i kiọkọ kẹ uyero-akpọ Setan nana. Anwọ okenọ a rọ rehọ Uvie Ọghẹnẹ mu evaọ 1914, a gbẹ kẹ Setan uvẹ nọ o re ro kpobọ odhiwu nọ Jihova ọ rrọ họ. A gbolo i rie ziọ otọakpọ, oria nọ a keke riẹ avọ ikọ imuomu riẹ ba. Uye u bi vihọ evaọ otọakpọ, yọ a bi kpokpo idibo Jihova vi epaọ anwẹdẹ fikinọ eva e be dha Setan, u te je dhesẹ nọ ma be rria edẹ urere esuo omuomu riẹ nọ o bi ro su ahwo-akpọ.​—Evia. 12:1-12.

⁶ Eva e be dha Setan rrorrorro fikinọ a ru oma vuẹe no, yọ ọ riẹ nọ omoke kakao o wo. Tei te idhivẹri riẹ a be daoma kpobi re a whaha iruo usi uwoma ota Uvie na jẹ raha okugbe idibo Jihova. Onana u ru nọ ma rọ rrọ ẹmo, onọ Ebaibol ọ ta kpahe, inọ: “Ma wo ohọre, yọ orọnikọ azẹ gbe uwo ma bi lele họre he, rekọ ma bi lele egọmeti na họre, bi lele enọ e rrọ udu-esuo na họre, bi lele isu akpọ ebi nana họre, bi lele izi imuomu nọ e rrọ obọ eria idhiwu na họre.” Otẹrọnọ ma rẹ kparobọ evaọ abọ Jihova, ma re fi oma họ otọ evaọ ohọre na vievie he, rekọ ma rẹ whẹ ẹgọ-ẹmo mai na họ ẹsikpobi. O gba omai họ nọ ma re “dikihẹ ga wọso iruẹru ẹghẹ Ẹdhọ.” (Ẹf. 6:10-17) Onana o gwọlọ nọ ma re thihakọ.

⁷ Otofa ithihakọ họ “ẹgba nọ ohwo o re ro dikihẹ ga nọ ọ tẹ rẹriẹ ovao dhe uye hayo okpẹtu.” Rọkẹ ahwo nọ a be gọ Ọghẹnẹ, ithihakọ u dhesẹ epanọ ohwo o re dikihẹ kothi evaọ eruo oware nọ u kiehọ ghelọ ọbẹwẹ, ọwọsuọ, ukpokpoma, hayo eware efa nọ Ẹdhọ avọ ahwo riẹ a re ru re i ru omai siobọno uzuazọ ẹgbakiete nọ ma bi yeri evaọ aro Ọghẹnẹ. Oleleikristi ọ rẹ daoma wo ithihakọ. Onana o rẹ rehọ oke. Nọ usu mai kugbe Ọghẹnẹ o be kpekpe vi epaọ anwẹdẹ na, ma te sai thihakọ vi epaọ anwẹdẹ. Ma te bi thihakọ edawọ esese nọ i bi te omai evaọ oke nọ ma ro mu Ọghẹnẹ họ ẹgọ, ma te ga ziezi, ma vẹ te sai thihakọ edawọ nọ e ga viere nọ i ti te omai hrọ. (Luk 16:10) Ma rẹ hẹrẹ re edawọ ilogbo i te omai taure ma tẹ jiroro nọ ma re dikihẹ ga evaọ ẹrọwọ na ha. Ma rẹ gbaemu no re edawọ na e tẹ te nyaze. Pita ukọ na o dhesẹ nọ u fo re ma wo ithihakọ gbe iruemu efa nọ idibo Ọghẹnẹ i re wo, o kere nọ: “Wha dawo ẹgba rai kpobi re wha fi ewoma ba ẹrọwọ rai, wha fi eriariẹ ba ewoma rai, wha fi oma-onyẹ ba eriariẹ rai, wha fi ithihakọ ba oma-onyẹ rai, wha fi omarọkẹ Ọghẹnẹ ba ithihakọ rai, wha fi uyoyou-inievo ba omarọkẹ Ọghẹnẹ rai, wha fi uyoyou ba uyoyou-inievo rai.”​—2 Pita 1:5-7; 1 Tim. 6:11.

⁸ Jemis ọ jọ ileta riẹ fodẹ epanọ u wuzou te re ma wo ithihakọ, o kere nọ: “Inievo mẹ, wha ghọghọ gaga nọ oghoghẹrẹ edawọ i te bi te owhai, keme wha riẹ nọ ẹrọwọ rai nọ a dawo evaọ edhere nana o rẹ wha ithihakọ ze. Rekọ wha kuvẹ re ithihakọ i ru iruo riẹ gba, re wha sae gbunu jẹ kare afuẹwẹ evaọ kabọ kabọ, oware ovo o gbẹ kare owhai hi.” (Jem. 1:2-4) Jemis ọ ta nọ Ileleikristi a re rẹro edawọ jẹ ghọghọ nọ edawọ i te te ai keme i re ru omai wo ithihakọ. Kọ ere whọ be hai rri edawọ? Jemis o te dhesẹ nọ ithihakọ o wo iruo nọ o re ru re o ruẹsi ru uruemu mai woma ziezi je ru nọ Ọghẹnẹ ọ rẹ rọ jẹ omai rehọ ziezi. Ẹhẹ, ithihakọ mai o re dhe ẹgẹga kẹdẹ kẹdẹ nọ ma be rẹriẹ ovao dhe edawọ je bi fi ai kparobọ na. Ithihakọ o vẹ lẹliẹ omai wo iruemu iwoma efa nọ u fo nọ ma re wo.

⁹ Ma te bi thihakọ, o rẹ were Jihova; o te whae ze nọ ọ te rọ kẹ omai uzuazọ ebẹdẹ bẹdẹ. Jemis ọ ta re nọ: “Eva e were ohwo nọ ọ ruabọhọ bi thihakọ odawọ, keme nọ Ọghẹnẹ o te kuenu kẹe no, o ti wo etu-uvie uzuazọ, onọ Jihova ọ ya eyaa nọ ọ te kẹ enọ i you Rie te urere.” (Jem. 1:12) Ẹhẹ, ma bi thihakọ re ma sai wo uzuazọ. Ma gbe wo ithihakọ họ, ma rẹ sae daji uzẹme na ha. Ma te kie kẹ isiuru akpọ, ma ti kie zihe kpobọ akpọ. Ma gbe wo ithihakọ họ, ma ti gbe wo ẹzi Jihova ha, yọ ma gbe wo ẹzi na ha, kiyọ ma te sae mọ ubi riẹ evaọ uzuazọ mai hi.

¹⁰ Re ma gbẹ sai thihakọ evaọ oke obẹbẹ nana, o gwọlọ nọ ma re rri uye-oruẹ wọhọ epanọ u fo nọ Oleleikristi o re rri rie. Kareghẹhọ nọ Jemis o kere nọ: “Wha ghọghọ gaga.” O sae jọ bẹbẹ re a ru ere nọ ohwo ọ tẹ be ruẹ uye evaọ ugboma hayo nọ odawọ na o tẹ be wha idhọvẹ sei gaga. Rekọ kareghẹhọ inọ who gbe thihakọ họ o sai ru nọ who gbe wo uzuazọ evaọ obaro ho. Oware jọ nọ o via kẹ ikọ na u re fiobọhọ kẹ omai ruẹ epanọ ma sae rọ ghọghọ nọ uye u te te omai. A rẹ ruẹ iku na evaọ obe Iruẹru Ikọ, yọ u se nọ: “A te se ikọ na ruọ eva, a tẹ fa ae, a tẹ vẹvẹ ai unu inọ a gbẹ rọ odẹ Jesu ta ẹme ofa ha, a te siobọno ai. Fikiere a tẹ nyavrẹ no aro ogbẹgwae Sanhẹdrin na be ghọghọ fikinọ Ọghẹnẹ o rri rai te ahwo nọ a re kpomovuọ họ oma fiki odẹ Jesu.” (Iruẹru 5:40, 41) Ikọ na a vuhumu nọ uye-oruẹ rai na yọ imuẹro inọ a ru lele ujaje Jesu gbe inọ Jihova ọ jẹ rai rehọ. Ikpe jọ e vrẹ no, nọ Pita o je kere ileta ọsosuọ riẹ nọ ọ rọ ẹgba ẹzi kere, ọ ta ẹme kpahe erere nọ o re noi ze nọ ohwo ọ tẹ be ruẹ uye fiki ẹrẹreokie.​—1 Pita 4:12-16.

¹¹ U wo oware ofa jọ nọ o via kẹ Pọl avọ Saelas. Nọ a jẹ ta usi uwoma evaọ Filipai, a te mu ai jẹ gba eku họ ai uzou inọ a be wha ozighi fihọ ẹwho na je bi whowho iruemu nọ i fo ho. Fikiere, a te kpe ai gaga je gbolo ai fihọ uwou-odi. Ikuigbe Ebaibol na e ta kẹ omai nọ okenọ a gbẹ jọ uwou-odi na avọ emela rai nọ i gbe bi hwẹ, “evaọ ubrobọ udevie aso, Pọl avọ Saelas a tẹ jẹ lẹ jẹ be so ole ro jiri Ọghẹnẹ, yọ ahwo uwou-odi na a be gaviezọ kẹ ae.” (Iruẹru 16:16-25) Pọl avọ ọrivẹ riẹ a rri uye nọ a jẹ ruẹ fiki Kristi wọhọ oware nọ u dhesẹ nọ a be riẹ ru evaọ aro Ọghẹnẹ gbe ahwo-akpọ, a te je rri rie wọhọ uvẹ nọ a re gbe ro se isẹri kẹ enọ e gwọlọ gaviezọ kẹ usi uwoma na. Oyena u ru nọ amọfa a ro wo uzuazọ. Evaọ aso yena, oriekarọ na avọ uviuwou riẹ a gaviezọ je zihe ruọ ilele. (Iruẹru 16:26-34) Pọl avọ Saelas a fievahọ Jihova, a rẹroso ogaga riẹ, je fievahọ nọ o ti fiobọhọ kẹ ae evaọ uye-oruẹ rai. Jihova o ru oma vo ai hi.

¹² Evaọ oke mai na re, Jihova ọ kẹ omai eware kpobi no nọ i re fiobọhọ kẹ omai nọ odawọ u te te omai. Ọ gwọlọ nọ ma thihakọ. Ọ kẹ omai Ebaibol na nọ a rọ ẹkwoma ẹzi riẹ kere re u fiobọhọ kẹ omai wo eriariẹ egbagba kpahe ẹjiroro riẹ. Onana u re ru ẹrọwọ mai ga. Ma wo uvẹ nọ ma re ro kuomagbe enọ ma gbẹ rrọ ẹrọwọ na, je ru iruo Ọghẹnẹ. Ma te je wo uvẹ nọ ma rẹ rọ rehọ ẹkwoma olẹ sẹro usu okpekpe kugbe Jihova omariẹ. Ọ rẹ gaviezọ kẹ elẹ mai nọ ma re ro jiri ei jẹ yare nọ o fiobọhọ kẹ omai yeri uzuazọ ofuafo evaọ aro riẹ. (Fil. 4:13) Yọ oware jọ nọ ma re rri vo ho họ ẹgba nọ ma re wo nọ ma te bi roro kpahe ẹruore nọ a fihọ aro mai na.​—Mat. 24:13; Hib. 6:18; Evia. 21:1-4.

¹³ Edawọ nọ ma be rẹriẹ ovao ku nẹnẹ e wọhọ enọ ilele Jesu Kristi evaọ ikpe-udhusoi ọsosuọ a rẹriẹ ovao ku. Evaọ oke mai na, ahwo ọwọsuọ nọ amọfa a ta erue kẹ kpahe omai a ta eme edada kẹ Isẹri Jihova je tube kpomovuọ họ ai oma hayo kpe ai ukpe ugbobọ no dede. Wọhọ epanọ o jọ evaọ oke ikọ na, ahwo egagọ erue nọ Ebaibol na o fere iwuhrẹ gbe iruemu egagọ erue rai via a rrọ emu ọwọsuọ na buobu. (Iruẹru 17:5-9, 13) Nọ a tẹ be wọso ahwo Jihova, a rẹ wọ ẹme na kpohọ ekọto, yọ evaọ ẹsejọ a rọ ere wo ufuoma no. (Iruẹru 22:25; 25:11) O make rrọ ere na, isu jọ a fi awhaha họ iruẹru egagọ mai no, a bi ru onana re a whaha omai iruo usi uwoma ota na. (Ol. 2:1-3) Nọ o tẹ via ere, ma rẹ rehọ aruọwha lele oriruo ikọ na nọ e ta nọ: “Ọghẹnẹ họ osu nọ ma re yoẹme kẹ orọnikọ ahwo ho.”​—Iruẹru 5:29.

¹⁴ Nọ ẹzi orẹwho-mẹ-oja u bi dhe ẹgẹga evaọ akpọ na soso na, a be gba ahwo nọ a bi whowho usi uwoma na họ vi epaọ anwẹdẹ re a nyasiọ iruo nọ Ọghẹnẹ ọ kẹ rai ba. Idibo Ọghẹnẹ kpobi a ruẹ nọ u wuzou gaga enẹna re a muẹrohọ unuovẹvẹ nọ o rrọ Eviavia 14:9-12 kpahe “arao ojihẹ na avọ ẹmema riẹ” nọ a rẹ gọ. Ma ruẹ epanọ eme Jọn na i wuzou te, inọ: “Etenẹ o jọ gwọlọ ithihakọ mi erẹri na, enọ i bi koko ijaje Ọghẹnẹ je kru ẹrọwọ nọ a fihọ Jesu gaga.”

¹⁵ Edawọ nọ e rẹ romavia fiki ẹmo, egọmeti nọ a rọ ọgbahọ nwene, hayo ukpokpoma gbe awhaha nọ a fihọ iruo mai o rẹ sai ru ei bẹbẹ kẹ owhẹ re who kpohọ ewuhrẹ hayo ta usi uwoma evaọ ẹgbede. Ẹsejọhọ wha te sai gbe kuomagbe wọhọ ukoko ho. O sae jọ nọ edhere ọvo ọ riẹ nọ whọ te rọ ta ẹme kugbe uwou ogha ha. O sae jọ nọ esẹro okogho e te sai gbe weze kpohọ ikoko ho. Ẹsejọhọ ebe i gbe ti kpozi hi. Kọ otẹrọnọ ojọ evaọ usu eware nana o via, eme who re ru?

¹⁶ Uyo na họ, ru oware kpobi nọ whọ rẹ sai ru wọhọ epanọ uyero na o kẹ uvẹ riẹ. Whọ sai gbe ru uwuhrẹ omobọ ra. Umutho ahwo a sai kokohọ iwou inievo na ru iwuhrẹ. A sae rehọ ebe nọ a wuhrẹ vrẹ no gbe Ebaibol na ro ru iwuhrẹ. Whọ ruawa hayo bru okpakpa ha. Ẹsejọhọ Utu Ẹruorote Na a te sae gbẹ edhere jọ nọ a ti ro lele inievo jọ ta ẹme ababọ oke oraha.

¹⁷ O tẹ make rọnọ oware jọ o wha riẹ ze nọ whọ rọ rrọ oria nọ oniọvo ọfa ọ rrọ họ, kareghẹhọ nọ Jihova avọ Ọmọ riẹ, Jesu Kristi, a rrọ kugbe owhẹ. Ẹruore ra ọ sae gbẹ jọ gaga. Jihova ọ sai gbe yo elẹ ra, yọ ọ sae rọ ẹzi riẹ kẹ owhẹ ẹgba. Rẹroso iẹe je lele oghẹrẹ nọ ọ te kpọ owhẹ. Kareghẹhọ nọ whẹ yọ odibo Jihova gbe olele Jesu Kristi. Fikiere, nọ uvẹ nọ whọ rẹ rọ ta usi uwoma u te rovie, ru ere ziezi. Jihova ọ te ghale omodawọ ra, yọ ẹsejọhọ kẹle na, amọfa a ti kuomagbe owhẹ evaọ egagọ uzẹme.​—Iruẹru 4:13-31; 5:27-42; Fil. 1:27-30; 4:6, 7; 2 Tim. 4:16-18.

¹⁸ Otẹrọnọ whọ rẹriẹ ovao dhe uwhu wọhọ epanọ o jọ kẹ ikọ na gbe amọfa, fievahọ “Ọghẹnẹ nọ ọ rẹ kpare enọ i whu no ze.” (2 Kọr. 1:8-10) Ẹrọwọ nọ who fihọ ẹkparomatha na o sai fiobọhọ kẹ owhẹ thihakọ ọwọsuọ nọ ọ mae ga dede. (Luk 21:19) Kristi Jesu o fi oriruo na hotọ; ọ riẹ nọ o te kru ẹrọwọ riẹ evaọ odawọ nọ u te rie, o te kẹ amọfa udu thihakọ. Who te thihakọ, o sai ru inievo ra thihakọ re.​—Jọn 16:33; Hib. 12:2, 3; 1 Pita 2:21.

¹⁹ U te no ukpokpoma gbe ọwọsuọ no, ebẹbẹ efa e sae jariẹ nọ o gwọlọ nọ who re thihakọ rai. Wọhọ oriruo, usi uwoma ota o gbẹ be ruọ ahwo jọ oma ha fikinọ ahwo ẹkwotọ rai a be rọwo gaviezọ họ. Amọfa a bi lele ẹyao ugboma hayo ẹyao iroro muabọ, hayo a bi thihakọ ebẹbẹ efa nọ e da ugboma ohẹhẹ ohwo-akpọ fia na. Pọl ukọ na omariẹ o je thihakọ oghẹrẹ odawọ jọ nọ u je kpomahọ iruo riẹ evaọ egagọ Jihova hayo nọ u ru rie jọ bẹbẹ ẹsejọ. (2 Kọr. 12:7) Yọ Epafrodaitọs, Oleleikristi ikpe-udhusoi ọsosuọ nọ ọ jọ ohwo Filipai ọ jọ “ọkora fikinọ [egbẹnyusu riẹ a] yo inọ ọ jẹ mọ.” (Fil. 2:25-27) Fikinọ mai gbe amọfa ma gba ha, ma sai ru eware jọ nọ e rẹ wha ebẹbẹ ilogbo ze. Ẹwhọ ọ sae romavia evaọ udevie Ileleikristi hayo ahwo uviuwou fiki uruemu rai nọ u wo ohẹriẹ. Rekọ ahwo nọ a bi lele ohrẹ Ẹme Jihova a sai thihakọ ebẹbẹ itieye na jẹ sai fi ai kparobọ.​—Izik. 2:3-5; 1 Kọr. 9:27; 13:8; Kọl. 3:12-14; 1 Pita 4:8.

²⁰ Ma rẹ talamu ọnọ Jihova o ro mu Ọnọ o wuzou ukoko na, Jesu Kristi. (Kọl. 2:18, 19) U fo nọ ma re lele ekpakpọ “ọrigbo nọ a re fievahọ nọ o wo areghẹ na” gbe enọ a ro mu esẹro. (Hib. 13:7, 17) Ma te bi lele ọruẹrẹfihotọ ukoko Ọghẹnẹ je bi yoẹme kẹ enọ e be kobaro, mai kpobi ma te rọ okugbe ru oreva Jihova. O gwọlọ nọ ma rẹ lẹ ẹsikpobi. Kareghẹhọ inọ a tẹ maki mu owhẹ fihọ uwou-odi hayo mu owhẹ ọvo fihọ oria jọ o sae whaha ẹme nọ whọ rẹ ta kugbe Ọsẹ oyoyou obọ odhiwu mai hi hayo raha okugbe nọ ọ rrọ ukoko na ha.

²¹ Joma gbaemu jẹ rọ ithihakọ ru utho nọ ma sai ru kpobi evaọ iruo usi uwoma ota nọ a kẹ omai na, tilẹmu iruo nọ Jesu Kristi ọ kẹ ilele riẹ nọ a ru evaọ okenọ ọ kparoma ze no inọ: “Fikiere wha nya, re wha ru ahwo zihe ruọ ilele evaọ udevie ahwo erẹwho na kpobi, wha họ ae ame evaọ odẹ Ọsẹ na gbe Ọmọ na gbe ẹzi ọfuafo na, wha wuhrẹ ae re a ru eware kpobi nọ me jie uzi rai kẹ owhai.” (Mat. 28:19, 20) Wọhọ Jesu, joma thihakọ. Joma fi ẹruore Uvie na gbe irẹro uzuazọ ebẹdẹ bẹdẹ na họ aro mai ẹsikpobi. (Hib. 12:2) Nọ ma rrọ ilele Kristi nọ e họ-ame no na, ma wo uvẹ-ọghọ nọ ma bi ro wobọ evaọ orugba eruẹaruẹ Jesu kpahe “oke urere uyero-akpọ na.” Ọ ta nọ: “A te ta usi uwoma Uvie na evaọ akpọ na soso re o jọ isẹri kẹ erẹwho na kpobi, kẹsena urere na o vẹ te ze.” (Mat. 24:3, 14) Ma tẹ rọ omamai kpobi kẹ iruo yena evaọ etoke nana, eva e te were omai nọ ma te rria bẹdẹ bẹdẹ evaọ akpọ ọkpokpọ okiẹrẹe Jihova!