Uzou Avivẹ

Kpare Jihova Kpehru Wọhọ Ọghẹnẹ Uzẹme Ọvo Na

 1. Ono họ Ọghẹnẹ uzẹme ọvo na?

EBAIBOL na ọ ta nọ dede nọ ibuobu e riẹ nọ a bi rri wọhọ eghẹnẹ, “rọ kẹ omai, Ọghẹnẹ ọvo ọ rọ, [Ọsẹ] na.” (1 Ahwo Kọrint 8:5, 6) “Ọghẹnẹ ọvo” ọyena họ Jihova, Ọnọma eware kpobi na. (Iziewariẹ 6:4; Eviavia 4:11) Jesu o se rie “Ọghẹnẹ mẹ Ọghẹnẹ rai.” ( Jọn 20:17) Ọ rọwo kugbe Mosis, ọnọ ọ kake ta vẹre no inọ: “ỌNOWO na họ Ọghẹnẹ; uno [rie] ei no ọfa ọ rọ họ.” (Iziewariẹ 4:35) Jihova o kpehru gaga vi oware jọ kpobi nọ a rẹ gọ, wọhọ emedhọ, ahwo-akpọ nọ a ru fihọ eghẹnẹ, hayo ọwegrẹ riẹ Setan Ẹdhọ na, “ọghẹnẹ akpọ nana.” (2 Ahwo Kọrint 4:3, 4) Wo ohẹriẹ no enana kpobi, Jihova họ ‘Ọghẹnẹ uzẹme ọvo na,’ wọhọ epanọ Jesu o se rie.—Jọn 17:3.

 2. Nọ ma bi wuhrẹ kpahe Ọghẹnẹ na, ẹvẹ u fo nọ u re kpomahọ izuazọ mai?

² Ahwo ovuhumuo nọ a wuhrẹ kpahe ekwakwa isiuru Ọghẹnẹ, gbe eware nọ o ru k’omai no gbe enọ o ti gbe ru k’omai, a re si kẹle iẹe. Nọ uyoyou rai kẹ Jihova o be rro na, oma o rẹ wọ ae re a kpare iẹe kpehru. Evaọ oghẹrẹ vẹ? Edhere jọ họ a rẹ ta kẹ amọfa kpahe iẹe. Ahwo Rom 10:10 o ta nọ: “Ọ [rẹ] rehọ igbenu riẹ ta via, a vẹ rọ ere siwi ei.” Edhere ọfa họ aro nọ a re ro kele iei evaọ ẹmeunu gbe uruemu. Ahwo Ẹfẹsọs 5:1 o ta nọ: ‘Wha rọ aro kele Ọghẹnẹ, wọhọ emọ iyoyou.’ Re a ru ere vọvọ ziezi, u fo re ma riẹ Jihova wọhọ epanọ ọ ghinẹ rrọ.

 3. Ekwakwa Ọghẹnẹ vẹ e mae viodẹ?

³ Evaọ oma Ebaibol na soso, eme buobu e riẹ nọ i dhesẹ ekwakwa Ọghẹnẹ nọ e viodẹ via. Ekwakwa ilogbo ene riẹ họ areghẹ, uvi-ẹdhoguo, ogaga, gbe uyoyou. ‘Obọ riẹ areghẹ ọ rrọ.’ ( Job 12:13) ‘Idhere riẹ kpobi yọ erọ uvi-ẹdhoguo.’ (Iziewariẹ 32:4) O wo ‘ẹgba ologbo.’ (Aizaya 40:26) ‘Ọghẹnẹ họ uyoyou.’ (1 Jọn 4:8) Dede na, evaọ usu ekwakwa ilogbo ene Ọghẹnẹ na, ovẹ o mae viodẹ, nọ o mai dhesẹ oghẹrẹ Ọghẹnẹ nọ ọ rrọ?

“Ọghẹnẹ Họ Uyoyou”

 4. Didi okwakwa Ọghẹnẹ o wọ riẹ ma ehrugbakpọ na gbe eware kpobi nọ e rrọ uzuazọ?

⁴ Roro kpahe oware nọ o wọ Jihova ma ehrugbakpọ na gbe emama iwareghẹ ẹzi gbe erọ ahwo-akpọ. Kọ areghẹ hayo ogaga riẹ? Ijo, keme dede nọ Ọghẹnẹ ọ rehọ enana ruiruo, eye họ oware nọ o wọ riẹe he. Yọ uvi-ẹdhoguo riẹ u du gwọlọ nọ ọ rẹ ghale okẹ uzuazọ kugbe amọfa ha. Ukpoye, uyoyou ulogbo Ọghẹnẹ oye o wọ riẹ rọ ghale oghọghọ ẹria wọhọ ohwo areghẹ kugbe amọfa. Uyoyou o wọ riẹ jiroro nọ ahwo-akpọ ẹmeoyo a te rria bẹdẹ bẹdẹ evaọ Aparadase. (Emuhọ 1:28; 2:15) Uyoyou o wọ riẹ ru ọruẹrẹhọ kẹ esino obrukpe nọ uzioraha Adamu o wha se ahwo-akpọ.

 5. Wọhọ epanọ Ebaibol ọ ta, okwakwa vẹ Jihova ọ rrọ ehri riẹ, kọ fikieme?

⁵ Fikiere, evaọ usu ekwakwa Ọghẹnẹ kpobi, onọ o mae viodẹ họ uyoyou. O rrọ oma riẹ. Epanọ areghẹ, uvi-ẹdhoguo, gbe ogaga riẹ i wuzou te na, Ebaibol na e ta nọ Jihova yọ ovo rai jọ họ. Rekọ Ebaibol na e ta nọ ọye họ uyoyou. Ẹhẹ, Jihova họ uyoyou dẹẹ. Onana yọ uyoyou nọ ehri-izi o be kpọ, orọnikọ ọwhọ-eva ha. Ehri-uzi uzẹme gbe ẹrẹreokie họ eware nọ e be kpọ uyoyou Ọghẹnẹ. Oye họ oghẹrẹ uyoyou nọ o mai kpehru kpobi, wọhọ epanọ Jihova Ọghẹnẹ omariẹ o dhesẹ i rie via na. Uyoyou utioye na họ odhesẹvia ababọ oriobọ yọ imuẹro owojẹ nọ a rẹ ruẹ i re lele iei ẹsikpobi.

 6. Eme o ru rie lọhọ k’omai re ma raro kele Ọghẹnẹ, dede nọ o kpehru vi omai?

⁶ Okwakwa igbunu uyoyou nana họ oware nọ u bi fiobọhọ kẹ omai raro kele Ọghẹnẹ otiọye na. Wọhọ ahwo-akpọ iruori, nọ e gba ha, enọ i re ruthọ, ma rẹ sai roro nọ ma sai ti ru ere avọ obokparọ họ. Rekọ oriruo ọfa ọrọ uyoyou ulogbo Jihova ọna: Ọ riẹ kpahe ọnyaba mai yọ ọ gwọlọ ẹgbagba mi omai hi. Ọ riẹ nọ evaọ obọnana ma thabọ no ẹgbagba gaga. (Olezi 51:5) Oye jabọ nọ Olezi 130:3, 4 o jẹ ta nọ: “O ỌNOWO, otẹrọnọ, who roro imuemu mai, ỌNOWO kọ ono ọ rẹ sai dikihẹ? Rekọ who wo erọvrẹ.” Ẹhẹ, Jihova yọ “Ọghẹnẹ nọ ọ vọ avọ ohrọ gbe aruoriwo, ọ rẹ kaki muofu hu, o wo uyoyou nọ o rẹ rẹriẹ hẹ.” (Ọnyano 34:6) “Whẹ, ỌNOWO, whọ vọ avọ ewoma gbe erọvrẹ.” (Olezi 86:5) Ẹvẹ eme nana e rrọ uduotahawọ te! Ẹvẹ o rrọ omosasọ te re a gọ Ọghẹnẹ ogbunu nana jẹ ruẹ ẹruọsa ohrọ uyoyou riẹ!

 7. Ẹvẹ a sae rọ ruẹ uyoyou Jihova evaọ iruo emama riẹ?

⁷ A sae jẹ ruẹ uyoyou Jihova evaọ iruo emama riẹ. Dai roro kpahe eware iwoma buobu nọ Jihova ọ kẹ no fiki omawere mai, wọhọ igbehru iwowoma, owhawho, ewa, gbe ebade. Ọ k’omai emuore evaọ oghoghẹrẹ sa-sa nọ e rẹ were omai unu jẹ lẹliẹ omai jọ uzuazọ. Ofariẹ, Jihova ọ k’omai idodo iwowoma avọ ore-awere buobu jegbe emama erao oghẹrẹ sa-sa. O ru eware nọ e rẹ kẹ ahwo-akpọ omawere, dede nọ o gba riẹ họ re o ru eware eyena ha. Uzẹme, nọ ma be rria akpọ omuomu nana evaọ uyero ọ sebaẹgba mai na, ma rẹ sae reawere emama riẹ vọvọ họ. (Ahwo Rom 8:22) Rekọ dai roro oware nọ Jihova o ti ru k’omai evaọ Aparadase! Ọso-ilezi na ọ k’omai imuẹro nọ: “Who rovie abọ ra, who te bi ru [emamọ] ẹgwọlọ eware nọ i wo uzuazọ kpobi rọ kẹ ae.”—Olezi 145:16.

 8. Ovẹ họ oriruo uyoyou Jihova k’omai nọ o mae rro?

⁸ Ovẹ họ oriruo uyoyou Jihova kẹ ahwo-akpọ nọ o mae rro? Ebaibol na o ru rie vevẹ nọ: “Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.” ( Jọn 3:16) Kọ fiki ewoma ahwo Jihova o ro ru onana? Ahwo Rom 5:8 o kuyo nọ: “Onana Ọghẹnẹ oro ru uyoyou riẹ gba kẹ omai keme okenọ ma gbẹ jọ erahaizi, Kristi o te whu kẹ omai.” Ẹhẹ, Ọghẹnẹ o vi Ọmọ ọgbagba riẹ ziọ otọakpọ re ọ rọ uzuazọ riẹ kẹ wọhọ idhe ẹtanigbo re ọ ta omai no obrukpe uzioraha gbe uwhu. (Matiu 20:28) Onana u rovie edhere fihọ kẹ ahwo nọ a you Ọghẹnẹ re a wo uzuazọ ebẹdẹ bẹdẹ. Ma rẹ kẹ uyere inọ, uyoyou Ọghẹnẹ o kẹre te enọ e gwọlọ ru oreva riẹ kpobi, keme Ebaibol na ọ ta k’omai nọ: “Ọghẹnẹ ọ rẹ jẹ ahwo ọvo rehọ họ, rekọ evaọ korẹwho korẹwho ọnọ ọ jarae dhẹe o je ru onọ ukiẹrẹe ọ rẹ rehọ iẹe.”—Iruẹru 10:34, 35.

 9. Ẹvẹ uzẹme na inọ Jihova ọ rehọ Ọmọ riẹ kẹ re ọ t’omai n’igbo u re kpomahọ omai?

⁹ Ẹvẹ uzẹme na inọ Jihova ọ rehọ Ọmọ riẹ k’omai wọhọ ẹtanigbo, onọ u rovie edhere kẹ uzuazọ ebẹdẹ bẹdẹ, u re kpomahọ epanọ ma rẹ rehọ izuazọ mai ruiruo enẹna? O rẹ lẹliẹ uyoyou mai kẹ Ọghẹnẹ uzẹme na, Jihova, diwi viere. Eva oke ovona, u re ru omai gwọlọ gaviezọ kẹ Jesu ọnọ ọ rrọ ohwo ẹro Ọghẹnẹ. “[Jesu o] whu kẹ ahwo kpobi re enọ egbẹrọ uzuazọ egbẹ jọ kẹ oma obọ rai ofaha, rekọ a rẹ jọ kẹ e ọnọ o whu fiki rai.” (2 Ahwo Kọrint 5:15) Ẹvẹ o rrọ oware omawere te re ma nya lele ithihi Jesu, keme ọ rọ uvi oriruo evaọ aruorokele uyoyou gbe ohrọoriọ Jihova! Onana u dhesẹ oma via evaọ oware nọ Jesu ọ ta kẹ otu omarokpotọ: “Whai e ruẹ uye gbe enọ e wha owha ogbẹgbẹdẹ kpobi, wha bru omẹ ze, mẹ rẹ kẹ owhai udhedhẹ. Rehọ owhowha mẹ wha, wha wuhrẹ [mi] omẹ, keme me re wowolẹ jegbọ eva i ro kpotọ, wha rẹ te ruẹ udhedhẹ kẹ izi rai. Keme owhowha mẹ o rẹ lọlọhọ, owha mẹ u re vovovo.”—Matiu 11:28-30.

Uyoyou Udhesẹ kẹ Amọfa

10. Idhere jọ vẹ ma rẹ sai ro dhesẹ uyoyou kẹ ibe Ileleikristi?

¹⁰ Ẹvẹ ma re ro dhesẹ nọ ma wo oghẹrẹ uyoyou nọ Jihova gbe Jesu a wo k’omai na rọkẹ ibe Ileleikristi? Muẹrohọ idhere buobu nọ ma rẹ sai ro ru onana: “Uyoyou u re wo odiri krẹkri, avọ ọriẹruo; uyoyou u wo ihrieriọ họ hayo eha-ise he; u wo omovia ha, hayo u re ru eware etọtọ họ oma riẹ hẹ. Uyoyou o rẹ guọlọ orọ obọ riẹ hẹ; o rẹ kpare ẹme ọgaga avọ ofu hu; o rẹ ghọghọ eva oware othọthọ họ, rekọ o rẹ ghọghọ eva oware nọ u kiete. Uyoyou u re thiakọ eware kpobi, rọwo eware kpobi; u re rẹro eware kpobi, avọ odiri eva eware kpobi. Uyoyou u re re he.”—1 Ahwo Kọrint 13:4-8; 1 Jọn 3:14-18; 4:7-12.

11. Amono ọfa ma re dhesẹ uyoyou kẹ, kọ evaọ oghẹrẹ vẹ?

¹¹ Amono ọfa ma re dhesẹ uyoyou kẹ, kọ evaọ oghẹrẹ vẹ? Jesu ọ ta nọ: “Fikiere wha wuhrẹ ahwo erẹwho kpobi, wha họ ae ame evaọ odẹ Ọsẹ, gbe Ọmọ gbe Ẹzi Ẹri, wha wuhrẹ ai, re a ru eware kpobi nọ mẹ vuẹ owhai.” (Matiu 28:19, 20) Onana o kẹre te emamọ usi kpahe akpọ ọkpokpọ aparadase Ọghẹnẹ nọ ọ be tha na nọ ma rẹ ghale kugbe enọ i ti zihe ruọ ibe Ileleikristi mai hi. Jesu o dhesẹ vevẹ nnọ uyoyou mai o rẹ nya mu umuo enọ ma gbẹ rọ ẹrọwọ na ọvo ho, keme ọ ta nọ: “Wha te you otu nọ o you owhai [ọvo], didi osaohwa wha wo? Makọ imiazọhọ dede a gbẹ rọ ere eruo ho? Wha te yere imoni rai ọvo, eme wha ro ru vi ahwo ọfa? Makọ ahwo Egedhọ dede a gbẹ rọ ere eruo ho?”—Matiu 5:46, 47; 24:14; Ahwo Galesha 6:10.

“Nya Evaọ Odẹ Jihova”

12. Fikieme o jẹ rrọ nọ Ọghẹnẹ ọvo odẹ riẹ na u fo?

¹² Abọ ologbo ọfa ọrọ ẹkpare kpehru Ọghẹnẹ uzẹme na họ ẹriẹ, eroruiruo, gbe amọfa owuhrẹ kpahe odẹ riẹ nọ u wo ibe he na, Jihova. Ọso-ilezi na o dhesẹ isiuru nana nọ i no udu ze na: “Re ahwo a riẹ nọ whẹ, ọnọ odẹ riẹ o rrọ Jihova, whẹ ọvo họ Ọnọ Ọ Mai Kpehru vi otọakpọ na kpobi.” (Olezi 83:18, NW ) Otofa odẹ na Jihova họ “O re Ru Zihe Ro.” Ọye họ Ọjiroro Ologbo na, ọnọ o re ru ẹjiroro riẹ kparobọ ẹsikpobi. Yọ Ọghẹnẹ uzẹme na ọvo ọ rẹ sai wo odẹ oyena, keme o sai mu ahwo-akpọ ẹro ho inọ omodawọ rai o te kparobọ. ( Jemis 4:13, 14) Jihova ọvo ọ rẹ sae ta nọ ẹme riẹ o re ru “gba” wọhọ epanọ o vi rie. (Aizaya 55:11) U re gbe ahwo buobu unu nọ a tẹ kake ruẹ odẹ Ọghẹnẹ evaọ Ebaibol rai jẹ riẹ oware nọ u dhesẹ. (Ọnyano 6:3) Rekọ re a wo erere no eriariẹ nana ze o gwọlọ nọ a rẹ “nya evaọ odẹ Jihova . . . bẹdẹ bẹdẹ.”—Maeka 4:5, NW.

13. Eme o gwọlọ re a riẹ odẹ Jihova jẹ nya evaọ odẹ riẹ?

¹³ Rọ kpahe odẹ Ọghẹnẹ, Olezi 9:10 o ta nọ: “Enọ e riẹ odẹ ra e [rẹ] rọ ẹroso owhẹ.” Onana o gwọlọ vi ẹriẹ odẹ na Jihova ọvo, onọ o rẹ nwani dhesẹ eva nọ a fihọ iẹe he. Ẹriẹ odẹ Ọghẹnẹ u dhesẹ evuhumu oghẹrẹ Ọghẹnẹ nọ Jihova ọ rrọ, adhẹẹ ọrọkẹ udu esuo riẹ, ẹmeoyo kẹ ijaje riẹ, eva nọ a re fihọ iẹe evaọ eware kpobi. (Itẹ 3:5, 6) Epọvo na re, ẹnya evaọ odẹ Jihova u dhesẹ omaromudhe kẹe jẹ jọ ohwo ẹro riẹ wọhọ omọvo egegagọ riẹ, ghinẹ rehọ uzuazọ mai ruiruo rọwo kugbe oreva Ọghẹnẹ. (Luk 10:27) Kọ who bi ru ere?

14. Otẹrọnọ ma rẹ gọ Jihova bẹdẹ bẹdẹ, eme ma gwọlọ u te no iroro ọ owha-iruo no?

¹⁴ Otẹrọnọ ma gwọlọ gọ Jihova bẹdẹ bẹdẹ, oware nọ o rẹ w’omai o rẹ rro viọ iroro ọ owha iruo. Pọl ukọ na ọ tuduhọ Timoti nọ ọ gọ Jihova ikpe buobu no awọ nọ: “He wuhrẹ oma ra avọ omarọkẹ Ọghẹnẹ wọhọ ute ra.” (1 Timoti 4:7, NW ) Omarọkẹ u re no udu nọ o vọ avọ ovuhumuo kẹ ohwo nọ a kpọ omarọkẹ na bru na ze. “Omarọkẹ Ọghẹnẹ” yọ adhẹẹ odidi kẹ Jihova oma riẹ. U re dhesẹ usu uyoyou nọ a wo kugbe ei fiki ovuhumuo ologbo rọ kẹe gbe idhere riẹ. U re ru omai gwọlọ nọ ahwo kpobi a rri odẹ riẹ ghaghae. Ma re le omarọkẹ Ọghẹnẹ evaọ izuazọ mai otẹrọnọ ma gwọlọ nya evaọ odẹ Jihova, Ọghẹnẹ uzẹme ọvo na, bẹdẹ bẹdẹ.—Olezi 37:4; 2 Pita 3:11.

15. Ẹvẹ ma rẹ rọ kẹ Ọghẹnẹ egagọ udu kpobi?

¹⁵ Re ma gọ Ọghẹnẹ evaọ edhere nọ ọ jẹrehọ, ma rẹ rehọ udu kpobi gọe, keme ọ rrọ “Ọghẹnẹ ọre-ihri.” (Ọnyano 20:5) Ma rẹ sai you Ọghẹnẹ yọ evaọ oke ovona ma bi you akpọ omuomu na ha, ọnọ Setan ọ rrọ ọghẹnẹ kẹ na. ( Jemis 4:4; 1 Jọn 2:15-17) Jihova ọ riẹ oghẹrẹ ohwo nọ mai omomọvo ọ be gwọlọ jọ. ( Jerimaya 17:10) Ma te ghine you ẹrẹreokie, ọ rẹ ruẹ oyena yọ o ti fiobọhọ k’omai thihakọ edawọ ekẹdẹ kẹdẹ mai. Avọ ẹzi ọfuafo ọgaga riẹ nọ ọ be rọ th’omai uke, o ti fiobọhọ k’omai kparobọ vi emuemu nọ ọ dafia evaọ akpọ nana. (2 Ahwo Kọrint 4:7) O ti je fiobọhọ k’omai yọrọ ẹruore ọgaga mai ọrọ uzuazọ ebẹdẹ bẹdẹ evaọ otọakpọ aparadase. Ẹvẹ oyena o rrọ ẹruore oruaro te! Ma re wo ovuhumuo odidi kẹ ẹruore ọyena jẹ rọ unevaze gọ Ọghẹnẹ uzẹme na, Jihova, ọnọ o ru rie lọhọ.

16. Eme u fo nọ whọ rẹ gwọlọ ru kugbe ima ahwo buobu efa?

¹⁶ Ima ahwo buobu evaọ otọakpọ na soso a rehọ evawere jẹ uzizie ọso-ilezi na rehọ no, ọnọ o kere nọ: “O wha lele omẹ jiri ỌNOWO na, jo ma kuomagbe jiri ỌNOWO re ma kpare odẹ riẹ kpehru.” (Olezi 34:3) Jihova o zizie owhẹ re whọ jọ usu ogbotu nọ o bi dhe evievihọ evaọ erẹwho na kpobi nọ a bi ru ere na.

Eme Ọkiẹkpemu

• Didi oghẹrẹ ohwo Jihova ọ rrọ? Ẹvẹ ma re ro wo erere no otoriẹ uvevẹ kpahe ekwakwa riẹ ze?

• Ẹvẹ ma rẹ sai ro fiobọhọ kẹ amọfa riẹ uzẹme na kpahe Ọghẹnẹ?

• Eme o gwọlọ re a riẹ odẹ Jihova jẹ nya evaọ odẹ riẹ?

[Iwoho nọ e rrọ ẹwẹ-obe avọ 14]

Jihova, evaọ uyoyou ulogbo riẹ, ‘o ti rovie abọ riẹ jẹ rọ ẹgwọlọ eware nọ e rrọ uzuazọ kpobi kẹ ae’