Uzou Avọ Udhegbọvo

Ẹjiroro Jihova Ọ Nya te Orugba Oruaro

 1, 2. (a) Didi ẹjiroro Jihova o wo kpahe emama iwareghẹ riẹ? (b) Amono a jọ uviuwou okugbe egegagọ Ọghẹnẹ?

EMAMA nọ i wo areghẹ kpobi nọ e rẹ jọ okugbe evaọ egagọ Ọghẹnẹ uzẹme ọvo na yọ aikpobi a be reawere ufuoma oruaro wọhọ emọ Ọghẹnẹ—oye họ ẹjiroro oyoyou Jihova. O tẹ jẹ rrọ oware nọ enọ i you ẹrẹreokie kpobi a be gwọlọ avọ osegboja.

² Jihova o mu ẹjiroro ologbo ọnana họ erugba evaọ okenọ o mu iruo emama riẹ họ. Omama ọsosuọ riẹ họ Ọmọ riẹ, ọnọ anwẹnọ ọ rọ kpare oma ze no, ọ rrọ ọnọ “o tho Ọghẹnẹ eva oruaro gbe uwoho ẹkoma riẹ.” (Ahwo Hibru 1:1-3) Ọmọ nana ọ jọ oghẹrẹsa, Ọghẹnẹ ọvo ọ rehọ obọ riẹ mae. Ẹkwoma Ọmọ nana a te rọ rehọ amọfa ziọ uzuazọ: orọ ọsosuọ enjẹle evaọ obọ odhiwu, kẹsena ahwo evaọ otọakpọ. ( Job 38:7; Luk 3:38) Emọ nana kpobi i ru uviuwou ehrugbakpọ ovo via. Jihova ọ jọ Ọghẹnẹ rọ kẹ ae kpobi, Osu Ehrugbakpọ na, gbe Ọsẹ oyoyou rai.

 3. (a) Eme mai kpobi ma riọ uku riẹ no obọ ọsẹ gbe oni ọsosuọ mai ze? (b) Didi ọruẹrẹfihotọ oyoyou Jihova o ru kẹ emọ Adamu?

³ Okenọ a brukpe ọsẹ gbe oni ahwo-akpọ ọsosuọ mai wọhọ enọ e rehọ aro koko raha uzi, a te le ai no Idẹn, Ọghẹnẹ ọ tẹ se ae. A gbẹ jọ abọ uviuwou ehrugbakpọ riẹ hẹ. (Emuhọ 3:22-24; Iziewariẹ 32:4, 5) Mai kpobi emọ rai, fikiere a yẹ omai avọ iroro uzioraha. Rekọ Jihova ọ riẹ nọ ejọ evaọ udevie emọ Adamu avọ Ivi a ti you ẹrẹreokie. Fikiere Ọ tẹ rọ uyoyou ru ọruẹrẹfihotọ nọ enana e sae rọ nya te “uvẹ oruaro emọ Ọghẹnẹ.”—Ahwo Rom 8:20, 21.

Izrẹl O Ku Ọkwa Aruoriwo Riẹ Fiẹ

 4. Didi uvẹ-ọghọ Jihova o kpeze se Izrẹl anwae?

⁴ Ole ikpe 2,500 nọ a ma Adamu no, Jihova o te ru uvẹ ewo obọdẹ usu kugbe Ei kẹ ahwo jọ. Ọ salọ Izrẹl anwae re a jọ ahwo riẹ ọ tẹ jẹ kẹ ae Uzi riẹ. (Emuhọ 12:1, 2) O ru rai fihọ orẹwho jẹ rehọ ae ruiruo nya lele ẹjiroro riẹ. (Iziewariẹ 14:1, 2; Aizaya 43:1) Rekọ a gbẹ jọ igbo kẹ uzioraha gbe uwhu, fikiere a reawere oruaro ufuoma nọ Adamu avọ Ivi a wo evaọ ọsosuọ na ha.

 5. Ẹvẹ emọ Izrẹl a ro ku obọdẹ edikihẹ rai kugbe Ọghẹnẹ fiẹ?

⁵ Ghele na, emọ Izrẹl a wo edikihẹ aruoriwo kugbe Ọghẹnẹ. A te je wo owha-iruo nọ a rẹ rọ rehọ adhẹẹ kẹ Jihova wọhọ Ọsẹ rai re a je ruiruo lele ẹjiroro riẹ. Jesu o fi ẹgba họ ẹgwọlọ nọ a re ro ru owha-iruo oyena gba. (Matiu 5:43-48) Rekọ orẹwho Izrẹl o sai ru onana ha. Nọ ahwo Ju eyena a be ta nọ “ma wo Ọsẹ ọvo, Ọghẹnẹ” na, Jesu o whowho nnọ owojẹ gbe oghẹrẹ ẹzi nọ a bi dhesẹ u dhesẹ ẹme ọyena fihọ ọrue. ( Jọn 8:41, 44, 47) Evaọ 33 C.E., Ọghẹnẹ o te ru Uzi na se eri họ, usu obọdẹ Izrẹl kugbei u te kuhọ. Kọ onana u dhesẹ nọ ahwo a sae gbẹ reawere usu aruoriwo kugbe Ọghẹnẹ hẹ?

Ekokohọ “Eware Kpobi nọ E Rọ Ehru”

 6. Eme họ ẹjiroro ‘esuo’ nọ Pọl ọ fodẹ eva Ahwo Ẹfẹsọs 1:9, 10 na?

⁶ Pọl ukọ na o dhesẹ nọ ahwo jọ evaọ udevie ahwo-akpọ a sae reawere usu obọdẹ kugbe Ọghẹnẹ. Wọhọ oriruo, kpahe ọruẹrẹfihotọ Jihova nọ ahwo nọ a wo ẹrọwọ a sae rọ jọ ahwo uviuwou Riẹ, Pọl o kere nọ: “[Ọghẹnẹ] ọ jọ eva areghẹ kpobi dhesẹ iroro ididi riẹ kẹ omai, epaọ iroro riẹ nọ ọ ma fihọ vẹre eva Kristi. Wọhọ [esuo] rọ kẹ oke nọ u te no, re eware kpobi nọ e rọ ehru gbe enọ e rọ akpọ, a wo okugbe ọvo eva riẹ.” (Ahwo Ẹfẹsọs 1:9, 10) ‘Esuo’ nana ọ rehọ oma hwa Jesu Kristi. Ẹkwoma riẹ, a rehọ ahwo-akpọ ziọ uyero ọjẹrehọ kugbe Ọghẹnẹ. Umutho rai jọ a wo ẹruore ọ ekpohọ obọ odhiwu. Otu obuobu a te rria otọakpọ bẹdẹ bẹdẹ.

 7. Amono họ “eware kpobi nọ e rọ ehru” na?

⁷ Orọ ọsosuọ, muhọ no Pẹntikọst 33 C.E. ze, a rẹriẹ ovao ku “eware kpobi nọ e rọ ehru,” koyehọ, enọ e te jọ ibe ereuku kugbe Kristi evaọ Uvie obọ odhiwu. Fiki ẹrọwọ nọ a wo fihọ aghare idhe Jesu, Ọghẹnẹ o te whowho ai kiẹrẹe. (Ahwo Rom 5:1, 2) Evaọ obaro, a ku ahwo orẹwho Egedhọ kugbei, yọ “eware kpobi nọ e rọ ehru” na i ti bu te 144,000. (Ahwo Galesha 3:26-29; Eviavia 14:1) Okiọkotọ rai ọvo e gbẹ rrọ otọakpọ na.

Ekokohọ ‘Eware nọ E Rrọ Otọakpọ’

 8. Amono họ ‘eware nọ e rrọ otọakpọ’ na, kọ didi usu a wo kugbe Jihova?

⁸ ‘Esuo’ ọvona o bi je koko ‘eware nọ e rrọ otọakpọ’ họ. Obọnana a bi koko ima ahwo họ avọ ẹruore ọ ẹria bẹdẹ bẹdẹ evaọ otọakpọ. Evaọ okugbe lele okiọkotọ ereuku Uvie na, a bi ru odẹ Jihova rro jẹ kpare egagọ riẹ kpehru. (Aizaya 2:2, 3; Zefanaya 3:9) A bi je se Jihova “Ọsẹ” keme a vuhu i rie mu wọhọ ehri uzuazọ. Yọ a be reawere edikihẹ ọjẹrehọ kugbei fiki ẹrọwọ nọ a wo fihọ azẹ Jesu nọ o hwẹ. (Eviavia 7:9, 14) Rekọ nọ a gbẹ rrọ otọ sebaẹgba na, okenọ a te rọ jẹ ae rehọ vọvọ wọhọ emọ Ọghẹnẹ o gbẹ rrọ obaro.

 9. Didi eyaa Ahwo Rom 8:21 o wo kẹ ahwo-akpọ?

⁹ Enana nọ i wo ẹruore otọakpọ na a be rọ ọwhọ hẹrẹ okenọ a ti ro “si [emama ahwo-akpọ] no igbo egbogbo.” (Ahwo Rom 8:21) Obusino oyena u ti muhọ evaọ okenọ Kristi gbe egbaẹmo obọ odhiwu riẹ a te rọ uye ulogbo na t’oba eva Amagẹdọn. Onana u ti dhesẹ ọraha uyerakpọ omuomu Setan kpobi, kẹsena eghale Esuo Odu Ikpe Kristi evaọ ogaga Uvie i ve ti lele iei.—Eviavia 19:17-21; 20:6.

10. Didi ole ajiri idibo Jihova a te so?

¹⁰ Ẹvẹ o te sasa oma te nọ idibo Jihova evaọ otọakpọ a te rọ okugbe wariẹ eme idibo riẹ nọ e rrọ obọ odhiwu, enọ i bi whowho avọ oghọghọ nọ: “Oruaro gbe igbunu eye họ iruo ra, O Ọnowo Ọghẹnẹ Erumeru! Ẹrẹreokie avọ uzẹme họ idhere ra, O Ovie ebẹdẹ bẹdẹ! Ono ozọ u re ti muẹ re o jiri odẹ ra ha, O Ọnowo? Keme whẹ ọvo họ ọrẹri. Erẹwho kpobi e rẹ te gọ owhẹ, keme a dhesẹ oziẹobro ra via no.” (Eviavia 15:3, 4) Ẹhẹ, idibo Jihova kpobi a ti ku oma gbe evaọ egagọ Ọghẹnẹ uzẹme ọvo na. A te tubẹ kpare iwhuowhu na ze a vẹ te kẹ ai uvẹ nọ a re ro ku irru rai gbe jiri Jihova.—Iruẹru 24:15.

Ufuoma Ugbunu Evaọ Obaro

11. Didi ufuoma igbunu enọ e zọ no uye ulogbo na a te reawere riẹ?

¹¹ Nọ uye ulogbo na o tẹ rehọ Amagẹdọn kuhọ no, hwere emuemu no otọakpọ no, Setan Ẹdhọ na ọ gbẹ te jọ “ọghẹnẹ akpọ nana” ofa ha. Enọ e be gọ Jihova a gbe ti lele okpomahọ omuomu Setan mu abọ họ. (2 Ahwo Kọrint 4:4; Eviavia 20:1, 2) Egagọ erue e gbẹ te ta nọ a dikihẹ kẹ Jihova ha re a fi ozighi họ okegbe ahwo. Idibo Ọghẹnẹ uzẹme na e gbẹ te ruẹ okienyẹ gbe ofruriọ eva abọ ahwo nọ a rrọ ọkwa egọmeti hi. Ẹvẹ ufuoma nọ ma te reawere riẹ na u gbunu te!

12. Ẹvẹ ahwo kpobi a ti ro wo ufuoma no uzioraha gbe oware nọ o wha ze?

¹² Wọhọ “Omogodẹ Ọghẹnẹ, nọ ọ wha izieraha akpọ na vrẹ,” Jesu o ti fi aghare idhe riẹ na họ iruo ro voro izieraha ahwo no. ( Jọn 1:29) Okenọ Jesu ọ jọ otọakpọ ọ tẹ rọ izieraha ohwo vrẹ riẹ, o ve siwi ọnọ ọ rọ vrẹ na wọhọ imuẹro nnọ a rọ vrẹ riẹ no. (Matiu 9:1-7; 15:30, 31) Epọvo na re, Kristi Jesu, wọhọ Ovie obọ odhiwu ọrọ Uvie Ọghẹnẹ, ọ te rọ edhere igbunu siwi enọ i tu aro, enọ i di enu, enọ i di ezọ, enọ e ko, enọ i wo ẹbẹbẹ iroro gbe enọ i wo ẹyao ọfa jọ kpobi. (Eviavia 21:3, 4) A ti si “uzi umuomu” no kẹ otu ẹmeoyo kpobi re iroro gbe owojẹ rai e wha awere se ai gbe Ọghẹnẹ. (Ahwo Rom 7:21-23) Taure Odu-Ikpe na o te ti kuhọ, yọ a rehọ e rai te ẹgbagba ohwo-akpọ no, evaọ ‘uwoho gbe ithatho’ Ọghẹnẹ uzẹme ọvo na.—Emuhọ 1:26.

13. Eva ekuhọ Esuo Odu-Ikpe na, didi owọ Kristi ọ rẹ te jẹ, kọ avọ ẹjiroro vẹ?

¹³ Okenọ Kristi ọ tẹ rehọ ahwo-akpọ ziọ ẹgbagba no, o ve ti zihe udu-esuo nọ a rọ kẹe fiki iruo nana zihe kẹ Ọsẹ na: “Kẹsena u te te urere, oke nọ ọ rẹ te rehọ uvie na kẹ Ọghẹnẹ Ọsẹ na, nọ ọ raha isuẹsu, udu-ogaga gbe ogaga kpobi no. Keme o re suẹ hrọ bẹsenọ Ọghẹnẹ o re ti fi ewegrẹ kpobi họ otọ evawọ riẹ.” (1 Ahwo Kọrint 15:24, 25) Oke oyena yọ Esuo Odu-Ikpe ọrọ Uvie na o ru ẹjiroro riẹ gba vọvọ no; fikiere egọmeti ubroke nana ọ gbẹ te jọ udevie Jihova gbe ohwo-akpọ họ. Yọ nọ a si uzioraha gbe uwhu kpobi no je siwi ohwo-akpọ no na, ẹgwọlọ kẹ Jesu wọhọ Osiwi o kuhọ no. Ebaibol ọ ta nọ: “Kẹsena ọmọ na ọ rẹ te jọ otọ riẹ i re, ọnọ ọ rehọ eware kpobi họ otọ-awọ riẹ, re Ọghẹnẹ ọ te jọ eva eware kpobi rọ kẹ kohwo kohwo.”—1 Ahwo Kọrint 15:28.

14. Otọ eme a te rehọ ahwo-akpọ nọ e gba no ze, kọ fikieme?

¹⁴ Onana o tẹ vrẹ no, a vẹ te kẹ ahwo-akpọ egbagba uvẹ nọ a re ro dhesẹ nọ ẹsalọ rai họ re a gọ Ọghẹnẹ uzẹme ọvo na bẹdẹ bẹdẹ. Fikiere, re o te dede ai rehọ vọvọ wọhọ emọ riẹ, Jihova ọ te rehọ ahwo nọ e gba no na ziọ odawọ urere. A ti si obọ no Setan gbe idhivẹri riẹ no ọgọdọ odidi na ze. Onana o te wha enwoma ebẹdẹ ọvuọvo se enọ i ghine you Jihova ha. Rekọ enọ e rehọ oma kpotọ họ nọ e kẹ oma rai uvẹ re a su ai nyae ghẹmeeyo kẹ Jihova a te raha ae no bẹdẹ bẹdẹ kugbe ọwọsuọ anwae na avọ idhivẹri riẹ.—Eviavia 20:7-10.

15. Didi uyero o te wariẹ jọ udevie emama iwareghẹ Jihova kpobi?

¹⁵ Jihova o ve ti dede ahwo-akpọ egbagba nọ i kru esuo Ọghẹnẹ kpehru evaọ etoke odawọ urere na rehọ wọhọ emọ riẹ. No oke oyena vrẹ, a re ti wo ufuoma oruaro ovọvọ wọhọ emọ Ọghẹnẹ wọhọ abọ uviuwou ehrugbakpọ Ọghẹnẹ. Emama iwareghẹ kpobi nọ e rrọ obọ odhiwu gbe otọakpọ a vẹ te wariẹ jọ okugbe evaọ egagọ Ọghẹnẹ uzẹme ọvo na. Yọ ẹjiroro Jihova ọ nya te orugba oruaro no! Kọ whọ gwọlọ jọ abọ uviuwou ehrugbakpọ evawere oyena, nọ o te jọ bẹdẹ bẹdẹ na? Otẹrọ ere, ma ta udu họ owhẹ awọ re who roro kpahe oware nọ Ebaibol na ọ ta eva 1 Jọn 2:17: “Akpọ na avọ urusio riẹ e rẹ te vrẹ, rekọ ohwo nọ o re ru oreva Ọghẹnẹ ọ rẹ jọ bẹdẹ.”

Eme Ọkiẹkpemu

• Taure ọwọsuọ Idẹn na ọ tẹ te via, didi usu enọ e be gọ Jihova kpobi a wo kugbe ei?

• Didi owha-iruo o rrọ uzou enọ e rrọ idibo Ọghẹnẹ kpobi?

• Amono a re ti zihe ro emọ Ọghẹnẹ, kọ ẹvẹ onana u ro wo obọ kugbe ẹjiroro Jihova kpahe okugbe egagọ?

[Uwoho nọ o rrọ ẹwẹ-obe avọ 190]

Ahwo-akpọ ẹmeoyo a te reawere uzuazọ evaọ aparadase akpọ-soso