Ẹvẹ Usu Ra Kugbe Jihova O Kpekpe Te?

 1. Fikieme o rọ gwọlọ nọ ma ru usu mai kugbe Jihova jọ gaga ẹsikpobi?

KỌ WHẸ yọ Osẹri Jihova nọ ọ roma mudhe jẹ họ-ame no? O tẹ rrọ ere, kiyọ oware oghaghae jọ who wo na, usu kugbe Ọghẹnẹ. Rekọ akpọ Setan gbe oma sebaẹgba mai o be gwọlọ raha usu oghaghae yena ku omai. Oleleikristi kpobi ọ rẹriẹ ovao dhe ẹbẹbẹ nana. Fikiere, o gwọlọ nọ ma rẹ daoma re usu mai kugbe Jihova o jọ gaga ẹsikpobi.

 2. (a) Eme họ usu? (Rri oruvẹ obotọ.) (b) Ẹvẹ ma sai ro ru usu mai kugbe Jihova ga?

² Ẹvẹ usu ra kugbe Jihova o kpekpe te? Kọ whọ gwọlọ ru usu ra kugbe Jihova ga vi epanọ o rrọ? Obe Jemis 4:8 o ta epanọ ma sai ro ru onana, inọ: “Wha si kẹle Ọghẹnẹ, o re ti si kẹle owhai.” Muẹrohọ nọ ẹme nana u kiekpahe imava.a Nọ ma be daoma si kẹle Ọghẹnẹ na, ọyomariẹ o ve ti si kẹle omai re. Yọ usu mai kugbe Jihova u re dhe ẹgẹga nọ ma tẹ be hai ru onana ẹsikpobi. U ve ti ru nọ Jihova ọ rẹ rọ jọ ogbẹnyusu ọkpekpe mai. Ma ve ti wo ọkpọ imuẹro nọ Jesu o wo nọ ọ ta nọ: “Ọnọ o vi omẹ ze ọ ginẹ rrọ, yọ . . . Mẹ riẹ riẹ.” (Jọn 7:28, 29) Rekọ ugogo eware vẹ whọ rẹ sai ru nọ i re si owhẹ kẹle Jihova?

 3. Ẹvẹ ma sai ro lele Jihova ta ẹme?

³ Edhere jọ nọ o wuzou gaga nọ ohwo ọ sai ro si kẹle Jihova họ, ẹme nọ o re lele Jihova ta ẹsikpobi. Ẹvẹ whọ sai ro lele Ọghẹnẹ ta ẹme? Roro kpahe onana, ẹvẹ who re ro lele ogbẹnyusu ra nọ ọ be rria ugbothabọ ta ẹme? Ẹsejọhọ wha re kere ileta se ohwohwo hayo rọ ifonu ta ẹme. Epọvo na re, whọ rẹ sae ta ẹme kẹ Jihova nọ whọ tẹ be hae lẹ sei noke toke. (Se Olezi 142:2.) Yọ u re je dhesẹ nọ whọ kẹ Jihova uvẹ re ọ ta ẹme kẹ owhẹ nọ whọ tẹ be hai se Ẹme riẹ je roro didi kpahe oware nọ who se. (Se Aizaya 30:20, 21.) Obọnana, joma ta kpahe epanọ ẹmeọta-kugbe otiọna ọ sae rọ bọ usu mai kugbe Jihova ga je ru ei kpekpe vi epaọ anwẹdẹ.

4, 5. Ẹvẹ Jihova ọ rẹ rọ rehọ Ebaibol na ta ẹme kẹ owhẹ? Kẹ oriruo.

⁴ Ababọ avro, whọ rọwo nọ Ebaibol na yọ ovuẹ nọ u no obọ Ọghẹnẹ ze kẹ ahwo-akpọ. Dede na, kọ Ebaibol na ọ sai fiobọhọ kẹ owhẹ si kẹle Jihova re? Ee! Evaọ oghẹrẹ vẹ? Nọ who te bi se Ebaibol na, hai roro kpahe epanọ oware nọ who se u ro kpomahọ owhẹ gbe epanọ whọ sai ro fi ei họ iruo. Who te ru ere, kiyọ whọ be kẹ Jihova uvẹ re ọ rọ Ebaibol na ta ẹme kẹ owhẹ. Onana u ve ti ru usu ra kugbe Jihova kpekpe vi epanọ o jọ.—Hib. 4:12; Jem. 1:23-25.

⁵ Wọhọ oriruo, se je roro didi kpahe ẹme Jesu nọ ọ ta nọ, “wha siọ efe ba ekokohọ kẹ omarai evaọ otọakpọ na.” Otẹrọnọ whọ rọ uzuazọ ra kpobi kẹ iruẹru Uvie na no vẹre anwẹdẹ, whọ rẹ jọ oma riẹ nọ eva ra e be were Jihova. Evaọ abọdekọ riẹ, whọ tẹ ruẹ nọ o gwọlọ nọ who re ru uzuazọ ra lọhọ re whọ sae tẹrovi iruẹru Uvie na ziezi, kiyọ oware jọ nọ who re ru re whọ sai si kẹle Jihova ziezi oye o fiobọhọ kẹ owhẹ riẹ no na.—Mat. 6:19, 20.

6, 7. (a) Ẹvẹ ewuhrẹ Ebaibol u re ro kpomahọ uyoyou mai kẹ Jihova gbe uyoyou nọ o wo kẹ omai? (b) Ẹjiroro vẹ u fo nọ ma re ro wuhrẹ Ebaibol na?

⁶ Orọnikọ abọ nọ o gwọlọ nọ ma jọ ru ẹnyaharo evaọ usu mai kugbe Ọghẹnẹ ọvo Ebaibol na ọ rẹ vuẹ omai hi. U re je ru omai wo ovuhumuo kpahe epanọ Jihova o re ru eware, onọ u ti ru uyoyou nọ ma wo kẹe ga vi epanọ o jọ. Nọ uyoyou mai kẹ Ọghẹnẹ o be ga na, uyoyou riẹ kẹ omai o vẹ te ga re, onọ u re ru usu mai kugbei jọ kpekpekpe.—Se 1 Ahwo Kọrint 8:3.

⁷ Dede na, re ma sai si kẹle Jihova, o gwọlọ nọ emamọ ẹjiroro ma re ro wuhrẹ Ẹme riẹ. Obe Jọn 17:3 o ta nọ: “Re a wo uzuazọ ebẹdẹ bẹdẹ, o gwọlọ nọ a rẹ riẹ owhẹ, Ọghẹnẹ uzẹme ọvo na, gbe ọnọ who vi ze na, Jesu Kristi.” Fikiere, ẹjiroro nọ ma re ro wuhrẹ Ebaibol na o rẹ jọ epanọ ma re ro wo eriariẹ ọvo ho, rekọ epanọ ma rẹ rọ “riẹ” Jihova ziezi.—Se Ọnyano 33:13; Ol. 25:4.

 8. (a) Ẹvẹ ohwo ọ rẹ sai rri oware nọ Jihova o ru Azaraya ovie na, onọ a gbiku riẹ fihọ obe 2 Ivie 15:1-5? (b) Ẹvẹ Jihova nọ ma rẹ riẹ ziezi u re ro ru nọ o gbẹ rọ kẹ omai uye he nọ o te ru oghẹrẹ oware jọ?

⁸ Nọ ma be riẹ Jihova ziezi na, o te kẹ omai uye he nọ ma tẹ jọ Ebaibol na se kpahe oware jọ nọ Jihova o ru, rekọ ma riẹ ẹjiroro nọ o ro ru ei hi. Wọhọ oriruo, ẹvẹ who rri oware nọ Jihova o ru Azaraya nọ ọ jọ ovie Juda? (2 Iv. 15:1-5) Muẹrohọ nọ dede nọ oke yena “yọ ahwo na a gbebi dhidhe jẹ mahe insẹnse eva eria ikpehru na,” Azaraya omariẹ ọ ruabọhọ je “ru onọ ukiẹrẹe eva aro ỌNOWO na.” Ghele na, “ỌNOWO na o te ru ovie na nọ ọ rọ mọ oti bẹdẹ nọ o ro whu.” Fikieme? Ikuigbe na e fodẹ oware nọ o soriẹ hẹ. Kọ onana o rẹ kẹ omai uye hayo ru omai roro nọ Jihova ọ kẹ Azaraya uye ekueku? Ma ti roro ere he nọ ma tẹ riẹ oghẹrẹ nọ Jihova o re ru eware ziezi. Onana u kugbe otoriẹ nọ ma wo kpahe Jihova inọ ọ rẹ ‘fa ohwo umutho’ nọ o tẹ gwọlọ ere. (Jeri. 30:11) Otoriẹ utiona nọ ma wo kpahe Jihova u re ru omai fievahọ iẹe inọ ẹdhoguo Riẹ o kiẹrẹe, dede nọ ma riẹ oware nọ o lẹliẹ e riẹ ru Azaraya ere he.

 9. Ikuigbe vẹ i ru omai riẹ oware nọ Jihova ọ rọ rehọ oti tehe Azaraya?

⁹ Rekọ u woma gaga inọ a jọ oria ofa Ebaibol na ta eware efa nọ i ru ikuigbe nana vẹ omai ẹro. Odẹ ọfa Azaraya ovie na họ Uzaya. (2 Iv. 15:7, 32) Ma jọ iku efa nọ e rrọ obe 2 Iruẹru-Ivie 26:3-5, 16-21, nọ e ta kpahe Uzaya ruẹ nọ dede nọ o je ru oreva Jihova okejọ, u wo oke ofa jọ nọ o “mu oma họ ẹvia ri te oke ẹraha.” Omorro o wọ riẹ jẹ gwọlọ ru oware nọ a kẹ riẹ udu nọ o ru hu, oware nọ u fo nọ ozerẹ ọvo o re ru. Izerẹ udhone gbọvo a tẹ jẹ gwọlọ whaha iẹe jẹ kpọe họ. Eme Uzaya o ru? O dhesẹ omorro riẹ via. ‘Ofu o mu’ rie kẹ izerẹ na. Agbẹta nọ Jihova ọ rọ rehọ oti tehe iẹe na.

10. Fikieme o gbẹ rọ gwọlọ nọ ma hae nọ kpahe ẹjiroro nọ Jihova o ro ru oware kpobi hi? Kọ ẹvẹ ma sai ro ru evaifihọ nọ ma wo kpahe ẹrẹreokie Jihova ga?

¹⁰ Wha jọ ma reghe no ugogo oware nọ ma be ta na ha. Kọ ogbẹrọnọ eware efa e rrọ Ikereakere na nọ i fiobọhọ kẹ omai wo otoriẹ ikuigbe Azaraya na ha, wọhọ epanọ o be hae jọ ẹsejọ evaọ ikuigbe ekpẹkpẹ jọ nọ e rrọ Ebaibol na? Kọ oyena o hai ti ru owhẹ wo avro kpahe ẹrẹreokie Ọghẹnẹ? Manikọ o hai ti mu owhẹ ẹro ghele nọ evuẹ nọ e rrọ Ebaibol na i te epanọ i re ro ru omai riẹ nọ Jihova o re ru oware nọ o gba ẹsikpobi, gbe inọ ọye ọ rẹ vuẹ omai oware nọ u woma gbe onọ u yoma? (Izie. 32:4) Nọ ma be daoma riẹ Jihova na, ma ti wo uyoyou kẹe jẹ riẹ oghẹrẹ nọ o re ru eware ziezi te epanọ ma gbẹ te rọ gwọlọ nọ kpahe ẹjiroro nọ o ro ru oware kpobi hi. Nọ Jihova ọ be rọ ẹkwoma Ebaibol na ta ẹme kẹ owhẹ na, jọ u mu owhẹ ẹro nọ epanọ whọ daoma wuhrẹ Ebaibol na je roro didi kpahe eware nọ who wuhrẹ te, ere whọ te riẹ Jihova te re evaọ oghẹrẹ nọ o re ru eware. (Ol. 77:12, 13) Onana o vẹ te bọ usu ra kugbe Jihova ga je ru ei kpekpe vi epaọ anwẹdẹ kpobi.

11-13. Ẹvẹ whọ rọ riẹ nọ Jihova ọ rẹ gaviezọ kẹ elẹ? (Rri uwoho nọ o rrọ emuhọ uzoẹme na.)

¹¹ Olẹ u re si omai kẹle Jihova. Ma rẹ jọ olẹ jiri iei, yere iei, jẹ yare ọkpọvio riẹ. (Ol. 32:8) Rekọ re usu ra kugbe Jihova o sae kpekpe ziezi, o gwọlọ nọ u re mu owhẹ ẹro nọ Jihova o re yo elẹ.

¹² Ahwo jọ a roro nọ olẹ yọ oware nọ o rẹ lẹliẹ udu kie ohwo vi ọvo. A rẹ ta nọ whọ tẹ roma totọ roro ziezi je vuhu ẹbẹbẹ ra mu, whọ jẹ sae gbẹ edhere nọ who ro ku ẹbẹbẹ na họ, kiyọ a yo olẹ ra no. U te no irere itieye nọ e rẹ sai no olẹ ze no, ẹvẹ whọ sae rọ riẹ sọ Jihova o bi gine yo elẹ ra?

¹³ Roro kpahe onana: Okenọ Jesu ọ gbẹ jọ obọ odhiwu, ọ rọ ẹro ruẹ epanọ Jihova o je ro yo elẹ idibo Riẹ nọ e rrọ otọakpọ. Kẹsena nọ ọ jọ iruo usiuwoma ota riẹ evaọ otọakpọ, ọ tẹ jẹ rọ olẹ ta oware nọ o jariẹ eva kẹ ọsẹ obọ odhiwu riẹ. Kọ ọ hai ti ru onana, tubẹ rọ aso jọ soso lẹ se Ọsẹ riẹ ogbẹrọnọ ọ riẹ nọ Jihova o re yo elẹ hẹ? (Luk 6:12; 22:40-46) Kọ ọ hai ti wuhrẹ ilele riẹ epanọ a rẹ lẹ o hẹ jọnọ olẹ yọ oware nọ u re ru udu te ohwo otọ ọvo nọ ọ tẹ rrọ ẹbẹbẹ? Avro ọ riẹ hẹ, Jesu ọ riẹ nọ olẹ yọ edhere nọ ma rẹ rọ ta ẹme kẹ Jihova. Ẹdẹjọ ọ ta nọ: “Ọsẹ, me bi yere owhẹ inọ who yo olẹ mẹ. Uzẹme, mẹ riẹ nọ who re yo olẹ mẹ ẹsikpobi.” Ma rẹ sai wo imuẹro itieye re, inọ Jihova họ “ọnọ o re yo elẹ!”—Jọn 11:41, 42; Ol. 65:2.

14, 15. (a) Erere vẹ ma re wo nọ ma tẹ be hae fodẹ ugogo oware nọ ma gwọlọ evaọ olẹ? (b) Ẹvẹ olẹ u ro fiobọhọ kẹ oniọvo-ọmọtẹ jọ ru usu riẹ kugbe Jihova ga?

¹⁴ Nọ whọ tẹ be hae fodẹ ugogo oware nọ o rrọ owhẹ oja evaọ olẹ, u re fiobọhọ kẹ owhẹ muẹrohọ nọ Jihova ọ tẹ be make kiyo elẹ ra evaọ edhere nọ a rẹ kaki rri mu hu. Nọ whọ tẹ ruẹ nọ Jihova ọ be kiyo elẹ ra, onana u re ru nọ usu ra kugbei o te rọ kpekpe gaga. U te no ere no, epanọ who horie eva kẹ Jihova te evaọ elẹ ra, ere o ti si kẹle owhẹ te.

¹⁵ Joma ta kpahe oriruo oniọvo-ọmọtẹ nọ a re se Kathy.b Ọ jẹ hae reawere usiuwoma ota ha dede nọ ọ jẹ hae nya ẹsikpobi. Oniọvo nana ọ ta nọ: “Usiuwoma ota o were omẹ hẹ. Uzẹme riẹ họ, o ginẹ were omẹ vievie he. Nọ mẹ kpako je serihọ no iruo egọmeti no, ọkpako ukoko na jọ ọ tẹ vuẹ omẹ nọ mẹ sai ru iruo ọkobaro oke-kpobi, ọ tubẹ kẹ omẹ efọmo na nọ me kere eme fihọ. Me ru ere je mu iruo ọkobaro họ, rekọ mẹ tẹ jẹ hae lẹ se Jihova kẹdẹ kẹdẹ nọ o fiobọhọ kẹ omẹ wo isiuru kẹ usiuwoma ota na.” Kọ Jihova ọ kiyo elẹ riẹ? Oniọvo na ọ ta nọ: “Ọnana họ ukpe avesa nọ mẹ rrọ iruo ọkobaro na. Fikinọ mẹ be hae jọ usiuwoma ota na enwenọ oke kpobi je bi wuhrẹ mi inievo-emetẹ efa, mẹ rọ ẹmẹrera wo onaa usiuwoma ota ziezi no. Ma be ta ẹme na, orọnikọ usiuwoma ota o were omẹ ọvo ho, o were omẹ thesiwa. U te no ere no, usu mẹ kugbe Jihova o kpekpe vi epanọ o jọ no.” Avro ọ riẹ hẹ, olẹ u gine fiobọhọ kẹ Kathy ru usu riẹ kugbe Jihova kpekpe ziezi.

16, 17. (a) Eme ma re ru hrọ re usu mai kugbe Jihova u dhe ẹgẹga? (b) Ẹbẹbẹ vẹ ma te ta kpahe evaọ uzoẹme nọ o rrọ aro na?

¹⁶ O gwọlọ nọ ma rẹ daoma noke toke evaọ edẹ uzuazọ mai kpobi epanọ usu mai kugbe Jihova o sai ro dhe ẹgẹga. Ma tẹ gwọlọ nọ Jihova o si kẹle omai, ma rẹ kake jowọ nọ ma re ro si kẹle iẹe hrọ. Fikiere, ajọ ma daoma kpobi re ma ruẹ nọ ma lele Jihova ta ẹme ẹsikpobi ẹkwoma uwuhrẹ Ebaibol gbe olẹ. Onọ u ti ru nọ usu mai kugbe Jihova u ti ro dhe ẹgẹga je fiobọhọ kẹ omai fi edawọ kparobọ.

¹⁷ Dede na, o rẹ sai wo oke jọ nọ ohwo ọ rẹ lẹ kpahe ẹbẹbẹ nọ o wo rekọ ẹbẹbẹ na o bi notọ họ. Evaọ oke utiona, eva nọ ma fihọ Jihova e rẹ gbẹ ga tere he nọ ma gbẹ yọroma ha. Onana o rẹ sae lẹliẹ omai roro sọ Jihova o bi gine yo elẹ mai hayo ọ ginẹ rehọ omai wọhọ egbẹnyusu riẹ. Ẹvẹ ma sai ro fi ẹbẹbẹ nana kparobọ evaọ edhere nọ u re dhesẹ nọ u gbe mu omai ẹro inọ usu mai kugbe Jihova o rrọ kpekpekpe? Ma te jọ uzoẹme nọ o rrọ aro na ta kpahe onana.