დანიელი

5 მეფე ბელშაცარმა+ ნადიმი გაუმართა ათას დიდგვაროვანს; მათ თვალწინ სვამდა ღვინოს.+ 2 როცა ბელშაცარს ღვინო მოეკიდა, ბრძანა, რომ მოეტანათ მამამისის, ნაბუქოდონოსორის მიერ იერუსალიმის ტაძრიდან წამოღებული ოქროსა და ვერცხლის ჭურჭელი,+ რათა მას, დიდგვაროვნებს, მის ცოლებსა და ხარჭებს იქიდან ესვათ. 3 მაშინ მოიტანეს იერუსალიმიდან, ღვთის ტაძრიდან, წამოღებული ოქროს ჭურჭელი და სვამდნენ იქიდან მეფე და დიდგვაროვნები, მისი ცოლები და ხარჭები. 4 სვამდნენ ღვინოს და ხოტბას ასხამდნენ ოქროს, ვერცხლის, სპილენძის, რკინის, ხისა და ქვის ღმერთებს.

5 სწორედ მაშინ გამოჩნდა კაცის ხელის თითები და დაიწყო წერა მეფის სასახლის კედლის ბათქაშზე, სალამპრის წინ. ხედავდა მეფე, ხელის მტევანი რომ წერდა. 6 მეფეს ფერი წაუვიდა, საკუთარმა ფიქრებმა შეაშინა,+ ფეხები მოუდუნდა და მუხლები აუკანკალდა.

7 მეფემ იყვირა, შემლოცველები, ქალდეველები* და ასტროლოგები მომიყვანეთო.+ მან ბაბილონის ბრძენკაცებს უთხრა: „ვინც ამ წარწერას წაიკითხავს და ამიხსნის, იისფერი სამოსლით შევმოსავ და ოქროს ყელსაბამს ჩამოვკიდებ;+ ის სამეფოში მესამე კაცი გახდება“.+

8 მეფესთან ყველა ბრძენკაცი მოვიდა, მაგრამ ვერც წაიკითხეს წარწერა და ვერც ახსნეს.+ 9 მეფე ბელშაცარი შიშმა აიტანა და ფერი წაუვიდა; დიდგვაროვნებიც საგონებელში ჩაცვივდნენ.+

10 მეფისა და დიდგვაროვნების ხმა რომ გაიგო, დედოფალი სანადიმო დარბაზში შევიდა და მეფეს უთხრა: „დღეგრძელი იყავ, მეფეო! ნუ შეშინდები! რამ გაგაფითრა?! 11 შენს სამეფოში არის კაცი, რომელშიც წმინდა ღმერთების სულია; მამაშენის მეფობის დროს ის გონებაგახსნილობით, გამჭრიახობითა და ღმერთთათვის ჩვეული სიბრძნით გამოირჩეოდა;+ მამაშენმა, მეფე ნაბუქოდონოსორმა, იგი გრძნეული ქურუმების, შემლოცველების, ქალდეველებისა და ასტროლოგების მთავრად დანიშნა,+ მეფეო, თავად მამაშენმა. 12 დანიელს, რომელსაც მეფემ ბელტეშაცარი+ უწოდა, საკვირველი სული, ცოდნა და გამჭრიახობა ჰქონდა; მას სიზმრების ახსნა, თავსატეხების ამოხსნა და რთული ვითარებიდან გამოსავლის მოძებნა შეეძლო.+ მოაყვანინე დანიელი და ის აგიხსნის“.

13 მოუყვანეს მეფეს დანიელი. მეფემ მას ჰკითხა: „შენა ხარ ის დანიელი, იუდადან გადმოსახლებულთაგანი,+ მამაჩემმა, მეფემ, იუდადან რომ წამოგიყვანა?+ 14 შენზე გავიგე, ღმერთების სულიაო მასში,+ გონებაგახსნილია, გამჭრიახია და საკვირველი სიბრძნე აქვსო.+ 15 ბრძენკაცები და შემლოცველები მომიყვანეს, რომ ეს წარწერა წაეკითხათ და აეხსნათ ჩემთვის, მაგრამ ვერ ამიხსნეს.+ 16 შენზე ამბობენ, საკვირველებათა ახსნა+ და რთული ვითარებიდან გამოსავლის მოძებნა შეუძლიაო. თუ ამ წარწერას წაიკითხავ და ამიხსნი, იისფერი სამოსლით შეგმოსავ, ოქროს ყელსაბამს ჩამოგკიდებ და სამეფოში მესამე კაცი იქნები“.+

17 მაშინ დანიელმა მეფეს მიუგო: «ძღვენი არ მინდა, სხვები დაასაჩუქრე. წავუკითხავ ამ წარწერას მეფეს და ავუხსნი. 18 მეფეო, უზენაესმა ღმერთმა მამაშენს, ნაბუქოდონოსორს, სამეფო, დიდება, სიდიადე და ბრწყინვალება უბოძა.+ 19 მის მიერ ბოძებული დიდების წყალობით ყველა ხალხი, ერი და სხვადასხვა ენაზე მოსაუბრენი, შიშისაგან ცახცახებდნენ მის წინაშე.+ ვისაც უნდოდა, კლავდა და ვისაც უნდოდა, ცოცხალს ტოვებდა; ვისაც უნდოდა, აღაზევებდა და ვისაც უნდოდა, ამდაბლებდა.+ 20 მაგრამ, როცა გადიდგულდა, გაჯიუტდა და გაკადნიერდა,+ სამეფო ტახტი და დიდება წაერთვა. 21 გაძევებული იყო ადამიანთაგან, მისი გული მხეცისას დაემსგავსა და გარეულ ვირებთან დაიდო ბინა. ბალახს ჭამდა ხარივით და ცის ნამი უსველებდა სხეულს, სანამ არ გაიგო, რომ უზენაესი ღმერთი მეფობს კაცთა სამეფოზე და ვისაც უნდა, მმართველად იმას აყენებს.+

22 შენ კი, მისმა ძემ, ბელშაცარმა, არ დაიმდაბლე თავი, თუმცა ეს ყველაფერი იცოდი. 23 მეტიც, გაუმედიდურდი ზეციერ უფალს,+ მოატანინე მისი ტაძრიდან წამოღებული ჭურჭელი+ და იქიდან დალიეთ ღვინო შენ, დიდგვაროვნებმა, შენმა ცოლებმა და ხარჭებმა და ხოტბა შეასხით ვერცხლის, ოქროს, სპილენძის, რკინის, ხისა და ქვის ღმერთებს, რომლებიც ვერაფერს ხედავენ, რომელთაც არაფერი ესმით და არაფერი იციან;+ ღმერთი კი, რომლის ხელთაცაა შენი სიცოცხლე+ და გზასავალი, არ განგიდიდებია. 24 ამიტომაც მოავლინა მან ხელის მტევანი და ეს დააწერინა.+ 25 აი, რა დააწერინა: „მენე, მენე, თეკელ, უფარსინ“.

26 აი ამ სიტყვების ახსნა: „მენე“ — ღმერთმა დათვალა შენი სამეფოს დღეები და ბოლო მოუღო მას.+

27 „თეკელ“ — სასწორზე აიწონე და მსუბუქი აღმოჩნდი.

28 „ფერეს“ — გაიყო შენი სამეფო და მიდიელებსა და სპარსელებს გადაეცა».+

29 მაშინ ბელშაცარის ბრძანებით დანიელი იისფერი სამოსლით შემოსეს, ოქროს ყელსაბამი ჩამოჰკიდეს და გამოაცხადეს, რომ სამეფოში მესამე კაცი იქნებოდა.+

30 იმავე ღამეს მოკლეს ქალდეველთა მეფე ბელშაცარი.+ 31 სამეფო 62 წლის დარიოს+ მიდიელს გადაეცა.