ეკლესიასტე

11 წყალს გაატანე შენი პური+ და მრავალი დღის შემდეგ იპოვი მას.+ 2 გაუყავი შვიდს, გინდაც რვას,+ რადგან არ იცი, რა უბედურება დატრიალდება დედამიწაზე.

3 ღრუბლები წყლით რომ აივსება, დედამიწაზე წვიმა წამოვა; ხე ძირს რომ დაეცემა, სამხრეთით იქნება თუ ჩრდილოეთით, სადაც დაეცემა, იქვე დარჩება.

4 ვინც ქარს შეჰყურებს, თესლს ვერ დათესავს; ვინც ღრუბლებს შესცქერის, ვერ მოიმკის.+

5 როგორც ის არ იცი, როგორ წარმოქმნის სული* ძვლებს ორსულის მუცელში,+ ისე არ იცი ყოველივეს შემქმნელის, ღვთის, საქმენი.+

6 დილით თესე თესლი და საღამომდე ნუ დაასვენებ ხელს,+ რადგან არ იცი, რაში მოგემართება ხელი, ერთსა თუ მეორეში, ან იქნებ ორივეში მოგემართოს ხელი.

7 ტკბილია სინათლე და კარგია, თვალი მზეს რომ ხედავს. 8 თუ კაცი მრავალი წელი იცოცხლებს, დატკბეს ამ წლებით,+ მაგრამ ნუ დაავიწყდება, რომ შეიძლება შავი დღეებიც მრავლად ჰქონდეს. ყველაფერი, რაც მოხდება, ამაოება იქნება.+

9 გაიხარე, ახალგაზრდავ, სანამ ახალგაზრდა ხარ! იმხიარულოს შენმა გულმა შენს სიჭაბუკეში. იქით წადი, საითაც გული გაგიწევს და საითაც თვალი წაგიყვანს, მაგრამ არ დაგავიწყდეს, რომ ამ ყველაფრისთვის ღმერთი პასუხს მოგთხოვს.+ 10 გულიდან მოიშორე სადარდებელი და მოერიდე იმას, რაც სხეულს აზიანებს, რადგან ამაოებაა ახალგაზრდობა და სიყმაწვილე.+