მკითხველები გვეკითხებიან

აყენებს ღმერთი ერთ რასას მეორეზე მაღლა?

▪ რასაკვირველია, არა. ბიბლიაში არაორაზროვნად წერია: „ღმერთი მიკერძოებული არ არის, არამედ ყოველ ხალხში მისი მოშიში და სიმართლის მქმნელი მოსაწონია მისთვის“ (საქმეები 10:34, 35).

ამ საკითხს ღმერთი გაცილებით დიდ მნიშვნელობას ანიჭებს, ვიდრე არასრულყოფილი ადამიანები. ბევრს სჯერა, რომ ერთი რასა (ჩვეულებრივ, საკუთარი რასა) სხვებზე უპირატესობს. ასეთი წინასწარ შექმნილი აზრი ჩარლზ დარვინის შეხედულებას ირეკლავს. ის წერდა: „ახლო მომავალში . . . ცივილიზებული რასები, შეიძლება ითქვას, სრულიად აღგვიან ველურ და ბარბაროს ხალხებს და მათ ადგილს დაიკავებენ“. სამწუხაროდ, ბევრს ჩაგრავენ და ავიწროებენ იმ რასის წარმომადგენლები, რომლებიც საკუთარ თავს მათზე აღმატებულად მიიჩნევენ.

აქვს რაიმე გამართლება რასიზმს? მაგალითად, ამტკიცებს მეცნიერება, რომ ზოგი რასა გენეტიკურად სხვებზე მაღლა დგას? ოქსფორდის უნივერსიტეტის პროფესორი, გენეტიკოსი ბრაიენ საიკსი სრულიად საპირისპიროს ამბობს: „გენეტიკის კვლევა არ იძლევა იმის საფუძველს, რომ მკვეთრად გავმიჯნოთ ერთმანეთისგან რომელიმე ეთნიკური თუ რასობრივი ჯგუფი . . . ყოველთვის მეკითხებიან, არსებობს თუ არა ბერძნული დნმ ან იტალიური გენი, მაგრამ, რასაკვირველია, ეს სიმართლისგან შორსაა . . . ჩვენ გენეტიკურად ძალიან ვგავართ ერთმანეთს“.

ეს აღმოჩენა თანხმობაშია იმასთან, რასაც ღვთის სიტყვაში ვკითხულობთ. ბიბლია გვასწავლის, რომ ღმერთმა შექმნა მამაკაცი და ქალი, რომელთაგანაც წარმოიშვა კაცობრიობა (დაბადება 3:20; საქმეები 17:26). ასე რომ, ღვთის თვალში მხოლოდ ერთი რასა — ადამიანთა მოდგმა — არსებობს.

იეჰოვასთვის არა აქვს მნიშვნელობა ადამიანის კანის ფერსა თუ გარეგნულ ნიშან-თვისებებს. ნაცვლად ამისა, მისთვის გაცილებით მნიშვნელოვანია ჩვენი სიმბოლური გული ანუ ის, თუ როგორი ადამიანები ვართ შინაგანად. ღმერთი ამბობს: „ადამიანი იმას ხედავს, რასაც თვალი ხედავს, იეჰოვა კი გულს ხედავს“ (1 სამუელი 16:7). ამის ცოდნა ძალიან გამამხნევებელია ჩვენთვის.

იმის მიუხედავად, თუ რომელ რასას მივეკუთვნებით, ბევრ ჩვენგანს არ მოსწონს საკუთარი გარეგნობა, მაგრამ თითქმის არაფრის შეცვლა არ შეგვიძლია. თუმცა, ჩვენ შეგვიძლია შევცვალოთ ის, რაც ყველაზე მნიშვნელოვანია — ჩვენი აზროვნება და გულის ზრახვები (კოლოსელები 3:9—11). ჩვენ უნდა გამოვუტყდეთ საკუთარ თავს, რომ ზოგჯერ შეიძლება სხვა რასის წარმომადგენლებზე აღმატებულად ან მათზე დაბლა მდგომად მივიჩნევთ თავს. არც ერთი თვალსაზრისი არ არის ღვთისთვის მისაღები, ამიტომ, ყველანაირად უნდა ვეცადოთ, რომ თავიდან მოვიშოროთ ასეთი უარყოფითი ფიქრები (ფსალმუნი 139:23, 24).

თუ ვცდილობთ, რომ საკუთარ თავს და სხვებს იეჰოვას თვალით ვუყუროთ, შეგვიძლია დარწმუნებული ვიყოთ მის მხარდაჭერაში. ღვთის სიტყვა შეგვახსენებს: „იეჰოვას თვალები აკვირდება მთელ დედამიწას, რომ თავისი ძალით დაეხმაროს მათ, ვინც მთელი გულით არის მასთან“ (2 მატიანე 16:9). იეჰოვა ყოველთვის დაგვიდგება მხარში იმის მიუხედავად, თუ რომელ რასას მივეკუთვნებით.