დავიხვეწოთ ქადაგებაში — თავად წამოიწყე საუბარი და დაამოწმე არაფორმალურად

რატომ არის მნიშვნელოვანი. კარდაკარ მსახურების დროს ხშირად ბევრი სახლში არ გვხვდება. თუმცა ამ ადამიანების ნახვა შეგვიძლია საზოგადოებრივ ტრანსპორტში, ექიმის მისაღებში, სამსახურსა და სასწავლებელში შესვენების დროს თუ სხვაგან. იეჰოვას ნებაა, რომ ყველამ მოისმინოს სამეფოს შესახებ ცნობა (1 ტიმ. 2:3, 4). ხშირად ქადაგება რომ შევძლოთ, თავად უნდა წამოვიწყოთ საუბარი.

როგორ მოვიქცეთ:

იყავი გამჭრიახი. როგორ ატყობ, არის ადამიანი სასაუბროდ განწყობილი? რამდენად გიწყობს გარემო ხელს, რომ თქვენი საუბარი მშვიდ ატმოსფეროში წარიმართოს? ზოგი მაუწყებელი საუბრის დაწყებამდე მხედველობით კონტაქტს ამყარებს ადამიანთან და შემდეგ გულთბილად უღიმის. იმ შემთხვევაში, თუ მათ ადამიანი ღიმილზე ღიმილითვე უპასუხებს, ისინი მასთან ლაპარაკს იწყებენ.
თუ გაბედულება გაკლია, გულში მოკლედ ილოცე (ნეემ. 2:4; საქ. 4:29).
საუბარი შეგიძლია მარტივად, მაგალითად, უბრალო მისალმებით დაიწყო. იესოს სამარიელ ქალთან დიალოგი ღვთის სამეფოზე საუბრით არ დაუწყია (იოან. 4:7). საუბარი შეგიძლია გულწრფელი შექებით წამოიწყო. მაგალითად, თუ მასთან აპირებ დალაპარაკებას, ვისაც შვილები ჰყავს, შეგიძლია უთხრა: „რა ზრდილობიანი ბავშვები გყავთ“. კითხვების დასმაც კარგი საშუალებაა საუბრის წამოსაწყებად. მაგალითად, კარგი იქნება ასეთი შეკითხვის დასმა: „უყურეთ წუხელ ახალ ამბებს?“.
როცა ადამიანი დიალოგზე წამოვა, შეეცადე, ხელიდან არ გაუშვა ხელსაყრელი მომენტი, რომ სასიხარულო ცნობა გაუზიარო. თუმცა შეეცადე, ბუნებრივად გააკეთო ეს და ძალიანაც ნუ იჩქარებ სამეფოს თემაზე გადასვლას. შეგიძლია ადამიანს ისეთი რამ უთხრა, რომ მასში ცნობისმოყვარეობა აღძრა, რათა თავად დაგისვას კითხვები. თუ საუბარი ოჯახთან დაკავშირებით წარიმართება, შეგიძლია საკუთარი მოსაზრება გაუზიარო: „ამას წინათ, შვილების აღზრდის თაობაზე, საინტერესო რჩევას გადავაწყდი, რაც მგონი მართლა პრაქტიკულია“. თუ მიმდინარე ამბებიდან რომელიმეს შეეხები, შეგიძლია უთხრა: „ცოტა ხნის წინ ჩემი ყურადღება სასიხარულო ამბავმა მიიპყრო და მივხვდი, რომ ჩვენი მდგომარეობა არცთუ ისე უსაშველოა“. გულს ნუ გაიტეხ, თუ დამოწმების შესაძლებლობა არ მოგეცემა.
ყოველთვის თან გქონდეს ბუკლეტები და სხვა ბიბლიური ლიტერატურა, რომ თუ ვინმე ინტერესს გამოავლენს, შეგეძლოს მისთვის ამ პუბლიკაციების მიცემა.

კარგი იქნება, თუ ამ თვეში ასე მოიქცევი:

მიზნად დაისახე, რომ კვირაში ერთხელ მაინც პირადი ინიციატივით წამოიწყო საუბარი და დაამოწმო არაფორმალურად.