ახალგაზრდები იძლევიან შეკითხვას

როგორ უნდა მოვიქცე, თუ მშობლები ეწინააღმდეგებიან ჩემს დაქორწინებას?

ლაკეშა და მისი შეყვარებული დაქორწინებას ფიქრობენ, მაგრამ დედამისს არ მოსწონს ეს. „წელს 19 წლის გავხდები, — ამბობს ლაკეშა, — დედა კი მოითხოვს, მანამდე მოვიცადოთ, სანამ 21 შემისრულდება“.

თუ დაქორწინებას აპირებ, ბუნებრივია გსურს, რომ მშობლებს უხაროდეთ ეს. სინამდვილეში შეიძლება დამწუხრდე, როდესაც მშობლებს არ მოსწონთ შენი არჩევანი. რა უნდა გააკეთო? არაფრად ჩააგდო მათი სურვილები და განახორციელო შენი გეგმებიa?

თუ სრულწლოვანი ხარ და შენი დაქორწინება კანონით დაშვებულია, შეიძლება მიმზიდველად გეჩვენება, მშობლების თანხმობის გარეშე გააკეთო ეს. მიუხედავად ამისა, ბიბლია არ ადგენს ასაკს მშობლების პატივსაცემად (იგავნი 1:8). და, თუ არად აგდებ მათს გრძნობებს, შეიძლება მათთან ხანგრძლივად გაიფუჭო ურთიერთობა. გარდა ამისა, შესაძლებელია, რომ მშობლებს დასაბუთებული მიზეზები აქვთ შენი დაქორწინების საწინააღმდეგოდ.

რა ასაკშია პიროვნება დაქორწინებისთვის პატარა?

მაგალითად, გეუბნებიან მშობლები, რომ დაქორწინებისთვის ჯერ პატარა ხარ? მართალია, ბიბლია არ ადგენს, თუ რა ასაკიდან შეიძლება დაქორწინება. მაგრამ გვირჩევს, რომ ქორწინებამდე უნდა ‘გადასცდეს სიყმაწვილის ასაკს’, — სქესობრივი მომწიფების ასაკს, როდესაც სექსუალური მოთხოვნილებები კულმინაციას აღწევს (1 კორინთელთა 7:36). რატომ? იმიტომ რომ ასეთი ახალგაზრდები სწორედ ამ ეტაპზე მწიფდებიან ემოციურად, ავითარებენ თავშეკავებასა და სულიერ თვისებებს, რომლებიც წარმატებული ქორწინებისთვის აუცილებელია (შეადარე 1 კორინთელთა 13:11; გალატელთა 5:22, 23).

როდესაც ოცი წლის დეილმა გადაწყვიტა დაქორწინებულიყო, მშობლების წინააღმდეგობამ შეაშფოთა. „მათ მითხრეს, ამისთვის ჯერ პატარა და გამოუცდელი ხარო, — ამბობს ის, — მე ვფიქრობდი, რომ მზად ვიყავით ქორწინებისთვის, დანარჩენს კი შემდეგ ვისწავლიდით, მაგრამ მშობლებს სურდათ, დარწმუნებულიყვნენ, რომ მხოლოდ გრძნობებით არ ვმოქმედებდი. მათ აინტერესებდათ, შევძლებდი თუ არა გავმკლავებოდი ყოველდღიურ პრობლემებს, მეზრუნა ოჯახის ფინანსურ, მატერიალურ, ემოციურ და სულიერ მოთხოვნილებებზე? ვიყავი მზად, გავმხდარიყავი მშობელი? ნამდვილად ვიცოდი თუ არა, როგორი დამოკიდებულება უნდა მქონოდა? ნამდვილად მესმოდა მეუღლის მოთხოვნილებები? ისინი თვლიდნენ, რომ კარგად უნდა გამეცნო ჩემი თავი, სანამ სხვა ადამიანზე დავიწყებდი ზრუნვას.

თუმცა არ გვინდოდა დალოდება, მაინც გადავდეთ დაქორწინება, რათა მოვმზადებულიყავით. ბოლოს, როდესაც დავქორწინდით, ცხოვრებისთვის კარგი საფუძველი და თვისებები გვქონდა“.

როდესაც წუხილის მიზეზი რელიგიური დაყოფაა

როდესაც ტერის შეუყვარდა პიროვნება, რომელიც არ იზიარებდა მის მიერ არჩეულ რელიგიურ მრწამსს, სხვების უჩუმრად ხვდებოდა. როდესაც ტერიმ განაცხადა, რომ დაქორწინებას აპირებდა, დედამისის წინააღმდეგობამ გააოგნა. „არ მინდა, რომ დედაჩემი ჩემზე ასე ფიქრობდეს, — ტიროდა ის. — მინდა კვლავ ადრინდელი ურთიერთობა გვქონდეს“.

მაგრამ, სინამდვილეში, ვინ უშლიდა ამ ურთიერთობას ხელს? ცუდი უნდოდა ტერისთვის დედას თუ უგუნურად იქცეოდა? არა, ის, უბრალოდ, ემხრობოდა ბიბლიის რჩევას, რომ ქრისტიანები ‘მხოლოდ უფალში’ უნდა დაქორწინდნენ (1 კორინთელთა 7:39). ფაქტიურად, ბიბლია მოგვიწოდებს: „ნუ შეებმებით უცხო უღელში ურწმუნოებთან ერთად“ (2 კორინთელთა 6:14, 15). რატომ?

ერთ-ერთი მიზეზი ის არის, რომ რელიგიური ერთიანობა ძალიან მნიშვნელოვანია ბედნიერი და წარმატებული ქორწინებისთვის. სპეციალისტები ამბობენ, რომ სტრესსა და დაძაბულობას, რომლებიც ჩვეულებრივია რელიგიურად დაყოფილი ოჯახებისთვის, მიჰყავს გაყრამდე. თუმცა უფრო მნიშვნელოვანი მიზეზი ზეგავლენის გამო ერთ-ერთის რელიგიური შეხედულებების დათმობა ან მათი საერთოდ დატოვების შესაძლებლობაა. მაშინაც კი, როდესაც ცხოვრების ურწმუნო თანამგზავრი არ ეწინააღმდეგება შენს თაყვანისმცემლობას, მაინც გულნაკლულად ცხოვრობ, რადგან ვერ უზიარებ უმნიშვნელოვანეს აზრებს. განა ეს არის ცოლქმრული ბედნიერება?

ამიტომ ტერის ძალიან რთული საკითხი ჰქონდა გადასაწყვეტი. „მიყვარს იეჰოვა ღმერთი, მაგრამ არ მინდა დავკარგო შეყვარებული“, — თქვა ტერიმ. უბრალოდ, ვერ ივლი ორივე გზით. არ შეგიძლია კომპრომისზე წახვიდე ღვთის ნორმებთან დაკავშირებით და, მიუხედავად ამისა, ისარგებლო მისი კეთილგანწყობითა და კურთხევით.

თუმცა, შესაძლებელია, მშობლები არ არიან თანახმა, რომ რომელიმე თანაქრისტიანზე დაქორწინდე. შესაძლებელია, რომ მორწმუნეზე დაქორწინება უცხო უღელში შებმა იყოს? დიახ, თუ ეს პიროვნება არ იზიარებს შენს სულიერ მიზნებს ან ღვთისადმი ერთგულებას. თუ ასეა ან თუ ამ პიროვნებაზე კარგად არ ‘მოწმობენ’ კრებაში, ალბათ, მშობლები უმიზეზოდ არ ეწინააღმდეგებიან შენს დაქორწინებას ამ პიროვნებაზე (საქმეები 16:2).

რა შეიძლება ითქვას რასობრივ და კულტურულ სხვაობაზე

ლინის მშობლებს სხვა მიზეზი ჰქონდათ წინააღმდეგობის გასაწევად; ეს დაკავშირებული იყო იმასთან, რომ მას სურდა გათხოვილიყო სხვა რასის წარმომადგენელზე. რას გვასწავლის ბიბლია ამ მხრივ? ის გვეუბნება, რომ „ღმერთი მიკერძოებული არ არის“ და რომ „ერთიდან შექმნა ადამიანთა ყოველი მოდგმა“ (საქმეები 10:34, 35; 17:26). ადამიანებს ერთი წარმოშობა აქვთ და თანაბარნი არიან ღვთის თვალში.

თუმცა ყოველი დაქორწინებული წყვილი განიცდის ‘ხორციელ გაჭირვებას’, სხვადასხვა რასის წარმომადგენელი წყვილები შეიძლება დამატებით სიძნელეებსაც ხვდებიან (1 კორინთელთა 7:28). რატომ? იმიტომ რომ დღევანდელ სიძულვილით აღსავსე წუთისოფელში ბევრი არ ეთანხმება ღვთის თვალსაზრისს რასასთან დაკავშირებით. მაშინ როდესაც სხვადასხვა რასის წარმომადგენელთა ქორწინება ჩვეულებრივი მოვლენა გახდა, დასავლეთ ევროპის ზოგიერთ ქვეყანაში ჯერ კიდევ არის ადგილები, სადაც შერეულ წყვილებს არ უყურებენ კარგად. შეიძლება შენი მშობლები შიშობენ, რომ არ ხარ მზად ასეთი სიძნელეების ასატანად.

„ჩემი მშობლები ფიქრობდნენ, რომ ძალიან გაგვიჭირდებოდა“, — აღიარებს ლინი. ბრძნულია, რომ ლინიმ მათი გრძნობებისადმი პატივისცემა გამოავლინა და არ იჩქარა გათხოვება. რადგანაც მშობლებმა შენიშნეს ლინის მოწიფებულობა და ის, რომ უკეთესად გაიცნო შეყვარებული, თანდათანობით დარწმუნდნენ, რომ ის თავს გაართმევდა პრობლემებს. „როგორც კი დარწმუნდნენ, რომ ერთად ნამდვილად ბედნიერები ვიქნებოდით, ისინიც ბედნიერები იყვნენ ჩვენი ბედნიერებით,“ — ამბობს ლინი.

თუმცა ხანდახან საკამათო საკითხი კულტურაა და არა რასა. შენს მშობლებს აწუხებთ, რომ ძნელი იქნება ცხოვრება პიროვნებასთან, ვისი ცხოვრების წესი, მომავლის გეგმები, საკვები, მუსიკა და გართობა შენთვის ასე უცხოა. ნებისმიერ შემთხვევაში, სხვა რასის ან კულტურის წარმომადგენელზე ქორწინებამ შეიძლება დიდი პრობლემები წარმოქმნას. ნამდვილად მზად ხარ მათ გასამკლავებლად?

როდესაც მშობლების წინააღმდეგობა არაკეთილგონივრული ჩანს

მაგრამ, როგორ უნდა მოიქცე, თუ ფიქრობ, რომ შენი მშობლების წინააღმდეგობა არაკეთილგონივრულია? ახალგაზრდა ფეითი დედამისზე გვიყვება: „დედა რამდენჯერმე იყო განქორწინებული. ის ამბობს, რომ მანამდე ვერ გაიცნობ პიროვნებას ნამდვილად, სანამ ძალიან გვიანი არ იქნება. ის დარწმუნებულია, რომ ქორწინებაში ბედნიერი არ ვიქნები“. ხშირად მშობლებს, რომლებსაც წარუმატებელი ქორწინება ჰქონდათ, არ შეუძლიათ მიუკერძოებლად უყურონ შვილების ქორწინებას. ზოგჯერ მშობლებს საეჭვო მოტივები აქვთ შვილების ქორწინების საწინააღმდეგოდ, მაგალითად: სურვილი — უხელმძღვანელონ შვილების ცხოვრებას.

მაგრამ, რა შეგიძლია გააკეთო, თუ შენს მშობლებს არანაირი მიზეზის მოსმენა არ სურთ? იეჰოვას მოწმეებს ოჯახური პრობლემების გადასაწყვეტად კრების უხუცესების მიწვევა შეუძლიათ. ისინი მიუკერძოებლად დაეხმარებიან ოჯახის წევრებს საკითხის წყნარად, მშვიდობიანად და ნაყოფიერად განხილვაში (იაკობი 3:18).

მშვიდობის ძიება

რა თქმა უნდა, ბევრი სხვა ფაქტორია, რამაც შეიძლება წარმოშვას მშობლების წინააღმდეგობა შენი დაქორწინების მიმართ, მაგალითად ფინანსური მდგომარეობა ან მომავალი მეუღლის პიროვნება. შიდს-ის ან სქესობრივი გზით გადამდები სხვა დაავადებების ეპოქაში მშობლებს შეიძლება სამართლიანად აწუხებდეთ შენი ჯანმრთელობა, თუ შენი საქმრო ქრისტიანობამდე უზნეო ცხოვრებას ეწეოდაb.

სანამ მშობლებთან ცხოვრობ, ვალდებული ხარ, ცნო მათი უფლებები (კოლასელთა 3:20). მაგრამ, დამოუკიდებლადაც რომ ცხოვრობდე და საკმაოდ დიდიც იყო გადაწყვეტილებების მისაღებად, არ იჩქარო მათი ინტერესის უარყოფა. მზად იყავი მოსასმენად (იგავნი 23:22). ყურადღებით აწონ-დაწონე დაქორწინების შესაძლო შედეგები (შეადარე ლუკა 14:28).

ასე მოქცევის შემდეგ შეიძლება გადაწყვიტო, რომ კვლავ გსურს დაქორწინება. ბუნებრივია, ასეთი გადაწყვეტილებისთვის შენ დაგეკისრება მთელი პასუხისმგებლობა (გალატელთა 6:5). თუ ყველა ღონე იხმარე, რომ ანგარიში გაგეწია მშობლების შეხედულებისთვის, შესაძლოა, მათ, თუმცა უხალისოდ, მაინც მხარი დაუჭირონ შენს გადაწყვეტილებას. მაგრამ, თუ ისინი აგრძელებენ წინააღმდეგობას, ეცადე არ შეიჯავრო ან გაბრაზდე. გახსოვდეს, მშობლებს უყვარხარ და ზრუნავენ შენს მომავალ ბედნიერებაზე. შეეცადე მშვიდობა შეინარჩუნო მათთან. თუ ბედნიერი იქნები ქორწინებაში, ალბათ, მათი დამოკიდებულება შეიცვლება.

სხვა მხრივ, თუ ნამდვილად ითვალისწინებ მშობლების თვალსაზრისს, ამოწმებ საკუთარ თავსა და პიროვნებას, ვისზეც ასეთი დიდი სურვილი გაქვს დაქორწინდე, არ გაგიკვირდეს, თუ გასაოცარ დასკვნამდე მიხვალ, რომ ბოლოს და ბოლოს, მშობლები მართლები არიან.

[სქოლიოები]

[სურათი 31 გვერდზე]

მშობლები შეიძლება ფიქრობენ, რომ ქორწინებისთვის პატარა ხარ.