ბედნიერი ქორწინებისთვის მომზადება

1, 2. ა) იესოს რომელი სიტყვებიდან ჩანს, რომ აუცილებელია წინასწარ დაგეგმვა? ბ) რისი დაგეგმვაა განსაკუთრებით მნიშვნელოვანი?

სახლის აშენება საგულდაგულო მომზადებას მოითხოვს. საძირკვლის ჩაყრამდე მიწის ნაკვეთი უნდა შეიძინო და სახლის პროექტი შეადგინო. მაგრამ უფრო მნიშვნელოვანია ის, რაც იესომ თქვა: „რომელიმე თქვენგანმა კოშკის აშენება რომ მოისურვოს, განა ჯერ არ დაჯდება და არ გამოთვლის ხარჯებს, რომ ნახოს, აქვს თუ არა საკმარისი სახსრები მის დასამთავრებლად?“ (ლუკა 14:28).

² პრინციპები, რომლებიც სახლის ასაშენებლად გამოიყენება, ბედნიერი ოჯახის შესაქმნელადაც გამოსადეგია. იშვიათად, რომ ვინმეს ოჯახის შექმნა არ უნდოდეს, მაგრამ რამდენი მათგანი ფიქრობს წინასწარ იმაზე, თუ რა დაუჯდება ეს? ბიბლია დადებითად აფასებს ოჯახის შექმნას, მაგრამ არ მალავს შესაძლო პრობლემებს, რის გარეშეც წარმოუდგენელია ოჯახი (იგავები 18:22; 1 კორინთელთა 7:28). ასე რომ, დაქორწინების მსურველებმა რეალურად უნდა შეაფასონ როგორც დადებითი მხარეები, ისე ის, თუ რა დაუჯდებათ ოჯახის შექმნა.

 3. რატომ არის ბიბლია ძვირფასი დამხმარე საშუალება მათთვის, ვინც დაქორწინებას აპირებს და რომელ სამ კითხვაზე გვიპასუხებს ის?

³ ბიბლია დახმარებას გვთავაზობს. მასში მოცემული რჩევები ოჯახის დამაარსებლის, იეჰოვა ღმერთის შთაგონებით დაიწერა (ეფესოელები 3:14, 15; 2 ტიმოთე 3:16). მოდი, ამ უძველეს, მაგრამ დღესაც ძალიან პრაქტიკულ სახელმძღვანელოში მოცემული პრინციპების დახმარებით განვსაზღვროთ: 1) როგორ გავიგოთ, ვართ თუ არა მზად ოჯახის შესაქმნელად? 2) რა უნდა ვეძებოთ მომავალ მეუღლეში? და 3) როგორ შევინარჩუნოთ სიწმინდე ტრფობის პერიოდში?

 4. რა არის მნიშვნელოვანი ბედნიერი ქორწინების შესანარჩუნებლად და რატომ?

⁴ სახლის აშენება შეიძლება საკმაოდ ძვირი დაჯდეს, მაგრამ მის მოვლას და გაფრთხილებას ნაკლები არ სჭირდება. იმავეს თქმა შეიძლება ოჯახის შექმნაზეც. ოჯახის შექმნა თავისთავად არ არის ადვილი, მაგრამ ისიც გასათვალისწინებელია, რომ წლიდან წლამდე ცოლ-ქმრულ ურთიერთობას მოვლა და გაფრთხილება სჭირდება. რა იგულისხმება ამაში? მნიშვნელოვანი ფაქტორია, მთელი გულით იკისრო ვალდებულებები. აი, რას ამბობს ბიბლია დაქორწინებულთა ურთიერთობაზე: „მიატოვებს კაცი მამას და დედას, მიეკვრება ცოლს და ერთი ხორცი იქნებიან“ (დაბადება 2:24). იესო ქრისტემ თქვა, რომ განქორწინების ერთადერთი ბიბლიური საფუძველი, რომელიც კვლავ დაქორწინების შესაძლებლობას იძლევა, არის „სიძვა“, ანუ მეუღლის ღალატი, სქესობრივი უზნეობა (მათე 19:9). თუ დაქორწინებას გადაწყვეტ, გახსოვდეს ეს ბიბლიური ნორმები. თუ მზად არა ხარ ამ სერიოზული ვალდებულების შესასრულებლად, არც ოჯახის შესაქმნელად ყოფილხარ მზად (მეორე კანონი 23:21; ეკლესიასტე 5:4, 5).

 5. თუმცა ცოლქმრული ვალდებულებები ზოგს აშინებს, რატომ უნდა მიანიჭონ მას დიდი მნიშვნელობა დაქორწინების მსურველებმა?

⁵ ამ ვალდებულებებზე ფიქრი მრავალს აშინებს. „იმის შეგნება, რომ მთელი ცხოვრება ერთად უნდა ვყოფილიყავით, ისეთ გრძნობას მიქმნიდა, თითქოს სადღაც კუთხეში მიმამწყვდიეს და შემბოჭეს“, — გამოტყდა ერთი ახალგაზრდა. მაგრამ თუ ნამდვილად გიყვარს ის, ვისზე დაქორწინებასაც ფიქრობ, ვალდებულებები ტვირთად არ მოგეჩვენება. პირიქით, მათ ისე შეხედავ, როგორც უსაფრთხოების გარანტიას. იმის შეგნება, რომ პასუხისმგებელნი არიან, ერთმანეთის წინაშე აღებული ვალდებულებები შეასრულონ, მეუღლეებს გაუღვივებს სურვილს, ერთად დარჩნენ ჭირშიც და ლხინშიც, და რაც არ უნდა მოხდეს, მუდამ მხარში ედგნენ ერთმანეთს. მოციქული პავლე წერდა, რომ ჭეშმარიტი სიყვარული „ყველაფერს იტანს“ და „ყველაფერს ითმენს“ (1 კორინთელები 13:4, 7). „ცოლქმრული ვალდებულება რომ გაკისრია, უფრო უსაფრთხოდ გრძნობ თავს, — ამბობს ერთი ქალი. — მამშვიდებს იმაზე ფიქრი, რომ სახალხოდ განვაცხადეთ ჩვენი ერთად ყოფნის გადაწყვეტილება“ (ეკლესიასტე 4:9—12).

 6. რატომ არის უკეთესი, არ იჩქარო დაქორწინება?

⁶ ასეთი ვალდებულებების თანახმად ცხოვრება მოწიფულობას მოითხოვს. ამიტომ პავლე ქრისტიანებს ურჩევს, რომ მათთვის უკეთესი იქნებოდა, არ დაქორწინებულიყვნენ, სანამ ‘ახალგაზრდული ვნებები არ დაუცხრებოდათ’. სანამ სექსუალური გრძნობები მოზღვავებულია, არასწორი გადაწყვეტილების მიღების საფრთხე ძალიან დიდია (1 კორინთელები 7:36). ზრდასთან ერთად იცვლება ფასეულობებიც. ძალიან ახალგაზრდულ ასაკში დაქორწინებულთაგან ბევრი აღნიშნავს, რომ რამდენიმე წელიწადში როგორც მათი, ასევე მათი მეუღლეების მოთხოვნილებები და სურვილები შეიცვალა. სტატისტიკა გვიჩვენებს, რომ მოზარდობის ასაკში შექმნილი ოჯახები უფრო ადვილად ინგრევა, ვიდრე მოწიფულ ასაკში შექმნილი ოჯახები. ოჯახის შექმნისას სიჩქარე არ გამოგადგება. ის რამდენიმე წელი, რომლებსაც დაუქორწინებლად გაატარებ, ძვირფას გამოცდილებას შეგძენს და მოწიფულ და ღირსეულ მეუღლედ ჩამოგაყალიბებს. ცოტა მოცდა საკუთარი თავის გაცნობაშიც გამოგადგება და ბედნიერი ოჯახისთვისაც მოგამზადებს.

 7. რატომ უნდა შეისწავლონ, პირველ ყოვლისა, საკუთარი თავი მათ, ვინც დაქორწინებას აპირებს?

⁷ რა თვისებები გინდა, რომ ჰქონდეს შენს მეუღლეს? შეიძლება დაფიქრებაც კი არ დაგჭირდეს, ისე ჩამოთვალო. მაგრამ საკუთარ თვისებებზე რას იტყვი? შენი თვისებებიდან რომელი შეუწყობს ხელს ბედნიერ ოჯახურ ცხოვრებას? როგორი ქმარი ან ცოლი იქნები? ხომ არ გიჭირს შეცდომის აღიარება ან რჩევის მიღება? როგორ რეაგირებ შენიშვნაზე? თავის მართლება ხომ არ გიყვარს? როგორი ადამიანი ხარ ცხოვრებაში — მხიარული და ოპტიმისტი თუ ყოველთვის სახე ჩამოგტირის და უკმაყოფილო ხარ? (იგავები 8:33; 15:15). გახსოვდეს: ოჯახის შექმნა ვერ შეგცვლის. თუ ამაყი, ზედმეტად მგრძნობიარე ან პესიმისტი ხარ, დაქორწინების შემდეგაც ასეთივე დარჩები. სხვისი თვალი უკეთ შეგვაფასებს. კარგი იქნება მიმართო მშობელს ან სანდო მეგობარს გულწრფელი შენიშვნებისა და რჩევებისთვის. თუ დაინახავ, რომ შესაცვლელი გაქვს რამე, ოჯახის შექმნამდე შეცვალე.

 8—10. ბიბლიის რომელი რჩევა დაეხმარება ადამიანს, რომ ქორწინებისთვის მოემზადოს?

⁸ ბიბლია მოგვიწოდებს, რომ ღვთის წმინდა სულს მივცეთ ჩვენზე მოქმედების საშუალება, რათა შევიძინოთ „სიყვარული, სიხარული, მშვიდობა, სულგრძელობა, სიკეთე, ყოველივე კარგი, რწმენა, რბილი ხასიათი, თავშეკავება“. ბიბლია აგრეთვე მოგვიწოდებს, რომ ‘განვიახლოთ გონების აღმძვრელი ძალა’ და ‘შევიმოსოთ ახალი პიროვნება, რომელიც შექმნილია ღვთის ნების თანახმად ჭეშმარიტი სიმართლითა და ერთგულებით’ (გალატელები 5:22, 23; ეფესოელები 4:23, 24). ამ რჩევის დაქორწინებამდე გამოყენება ბანკში შეტანილი ფულის მსგავსი იქნება, რომელიც ძალიან ძვირფასი აღმოჩნდება მომავალში, როდესაც დაქორწინდები.

⁹ ქალს გარეგნობაზე მეტად თავისი შინაგანი პიროვნება უნდა აღელვებდეს (1 პეტრე 3:3, 4). მოკრძალებულობა და გონიერება შეგძენს სიბრძნეს — ჭეშმარიტად ‘მშვენიერ გვირგვინს’ (იგავები 4:9; 31:10, 30; 1 ტიმოთე 2:9, 10). მამაკაცმა უნდა ისწავლოს ქალისადმი თავაზიანად და პატივისცემით მოპყრობა (1 ტიმოთე 5:1, 2). როდესაც გადაწყვეტილებების მიღებასა და პასუხისმგებლობების საკუთარ თავზე აღებას სწავლობ, მხედველობიდან არ გამოგრჩეს მოკრძალება და თავმდაბლობა. თუ ფიქრობ, რომ ოჯახს შენს ჭკუაზე ატარებ, პრობლემებს ვერ გაექცევი (იგავები 29:23; მიქა 6:8; ეფესოელები 5:28, 29).

¹⁰ ამ საკითხებში აზროვნების შეცვლა ადვილი არ არის, მაგრამ ამაზე ყველა ქრისტიანს მართებს მუშაობა, რაც შენც დაგეხმარება იმაში, რომ ღირსეული მეუღლე იყო.

11, 12. როგორ შეუძლია ორ ადამიანს იმის გარკვევა, შეეფერებიან თუ არა ერთმანეთს?

¹¹ როგორ არის მიღებული თქვენთან? შეგიძლია დამოუკიდებლად აირჩიო ცხოვრების თანამგზავრი? თუ ეს ნორმალურია, როგორ უნდა მოიქცე, როცა ვინმე მოგეწონება? პირველი, რაც უნდა გააკეთო, უნდა დაფიქრდე, მართლა აპირებ თუ არა ოჯახის შექმნას. სხვის გრძნობებზე თამაში სისასტიკეა (იგავები 13:12). შემდეგ დაფიქრდი, შენი მდგომარეობიდან გამომდინარე, გონივრულია თუ არა ამ ნაბიჯის გადადგმა? თუ ამ ორ კითხვას დადებითად უპასუხებ, შემდგომი ნაბიჯები ადგილობრივი წეს-ჩვეულებების გათვალისწინებით უნდა გადადგა. ზოგ ქვეყანაში ხანმოკლე დაკვირვების შემდეგ ნორმალურად ითვლება, რომ მიხვიდე მასთან და ახლოს გაცნობა შესთავაზო. უარის შემთხვევაში, ნუ ჩააცივდები, რათა საქმე უსიამოვნებამდე არ მივიდეს. გახსოვდეს, რომ სხვასაც აქვს გადაწყვეტილების მიღების უფლება. დადებითი პასუხის შემთხვევაში კი შეგიძლიათ შეთანხმდეთ, ერთად გაატაროთ დრო სასარგებლო საქმიანობაში მონაწილეობით. ეს დაგანახვებს, გონივრული იქნებოდა თუ არა მასზე დაქორწინებაa. რას უნდა მიაქციო ყურადღება ამ დროს?

¹² ამ კითხვაზე რომ ვუპასუხოთ, წარმოიდგინე ორი მუსიკალური ინსტრუმენტი, მაგალითად, პიანინო და გიტარა. თუ ისინი კარგად არის აწყობილი, ცალ-ცალკე ორივეზე შეიძლება შესანიშნავი სოლო პარტიის შესრულება. მაგრამ რა არის საჭირო, თუ ამ ინსტრუმენტებზე ერთდროულად უნდა დაუკრან? ისინი ერთმანეთთან უნდა იყოს კარგად შეწყობილი. იმავეს თქმა შეიძლება შენსა და შენს მომავალ მეუღლეზე. ერთმანეთისგან დამოუკიდებლად, შესაძლოა, ბევრი იშრომეთ, რათა ინდივიდუალურად „აგეწყოთ“ თქვენი პიროვნული თვისებები, მაგრამ იბადება კითხვა: ეწყობით ერთმანეთს? ანუ, სხვა სიტყვებით რომ ვთქვათ, შეეფერებით ერთმანეთს?

13. რატომ არის არაბრძნული, ეტრფოდე პიროვნებას, რომელიც არ იზიარებს შენს რწმენას?

¹³ მნიშვნელოვანია, რომ გქონდეთ ერთი და იგივე მრწამსი და პრინციპები. მოციქულმა პავლემ დაწერა: „ნუ შეებმებით უთანასწორო უღელში ურწმუნოებთან“ (2 კორინთელები 6:14; 1 კორინთელები 7:39). ისეთ ადამიანზე დაქორწინებამ, რომელიც შენს რწმენას არ იზიარებს, სავსებით შესაძლებელია, სერიოზულ უთანხმოებებამდე მიგიყვანოთ. მეორე მხრივ კი, თუ ორივენი იეჰოვა ღმერთს ემსახურებით, ეს ერთიანობის მყარი საფუძველია. იეჰოვას სურს, რომ თქვენ ბედნიერებას განიჭებდეთ ერთმანეთთან ყოფნა, და მასთან და ერთმანეთთან სიყვარულის „სამმაგი ძაფით“ იყოთ დაკავშირებული (ეკლესიასტე 4:12).

14, 15. არის თუ არა ერთი და იმავე რწმენის ქონა საკმარისი ქორწინებაში ერთიანობისთვის? ახსენი.

¹⁴ ერთიანობისთვის ყველაზე მნიშვნელოვანი ღვთისადმი ერთობლივი თაყვანისცემაა, თუმცა ეს არ არის საკმარისი. ერთმანეთს რომ შეეწყოთ, შენ და შენს მომავალ მეუღლეს ერთი და იგივე მიზნები უნდა გქონდეთ. რა მიზნები გაქვთ? რას ფიქრობთ ბავშვების ყოლაზე? რას აყენებთ ცხოვრებაში პირველ ადგილზე?b (მათე 6:33). ბედნიერ ოჯახში მეუღლეები კარგი მეგობრები არიან და ხარობენ ერთმანეთთან ურთიერთობით (იგავები 17:17). ამისათვის მათ ბევრი საერთო უნდა ჰქონდეთ. საერთო ინტერესების გარეშე მეგობრობის შენარჩუნებაა ძნელი, და ოჯახისა ხომ მით უმეტეს. მაგრამ დავუშვათ, შენს მომავალ მეუღლეს უყვარს ლაშქრობაზე სიარული ან სხვა რამ, შენ კი — არა, ნიშნავს ეს იმას, რომ არ შეეფერებით ერთმანეთს? რა თქმა უნდა, არა. შესაძლოა, თქვენ გაქვთ სხვა, უფრო მნიშვნელოვანი საერთო ინტერესები. გარდა ამისა, შეგიძლია ასიამოვნო მომავალ მეუღლეს, თუ შეუერთდები მას საყვარელ, რა თქმა უნდა, სასარგებლო საქმეში (საქმეები 20:35).

¹⁵ ურთიერთშეწყობა უფრო მეტად იმაზეა დამოკიდებული, თუ რამდენად ადვილად შემგუებლები ხართ ორივენი, და არა იმაზე, თუ რამდენად ჰგავხართ ერთმანეთს. იმის მაგივრად, რომ იკითხო: „ყველაფერში ვეთანხმებით ერთმანეთს?“, ალბათ, უმჯობესი იქნება, რომ გააანალიზო: „რა ხდება მაშინ, როდესაც არ ვეთანხმებით ერთმანეთს? შეგვიძლია საქმის მშვიდად განხილვა ურთიერთპატივისცემითა და ერთმანეთის ღირსების გათვალისწინებით? მსჯელობა ცხარე კამათში ხომ არ გადადის?“ (ეფესოელები 4:29, 31). ცხოვრების თანამგზავრად არ გამოგადგება ამაყი და თავდაჯერებული ადამიანი, რომელიც არასოდეს მიდის დათმობაზე ან მხოლოდ ითხოვს, და სანამ თავისას არ გაიტანს, ვერ ისვენებს.

16, 17. რა უნდა ეძებოს მეუღლეში მამაკაცმა ან ქალმა, როდესაც დაქორწინებას აპირებს?

¹⁶ სანამ ქრისტიანულ კრებაში ვინმეს პასუხისმგებლობა დაეკისრება, „ჯერ უნდა გამოიცადონ, გამოდგებიან თუ არა“ (1 ტიმოთე 3:10). შენც შეგიძლია ამ პრინციპის გამოყენება. მაგალითად, დაუქორწინებელ ქალს შეეძლო გაერკვია: „როგორი რეპუტაციით სარგებლობს? ვისთან მეგობრობს? არის თუ არა თავდაჭერილი? როგორ ეპყრობა ხანდაზმულებს? როგორ ოჯახშია აღზრდილი? როგორი დამოკიდებულება აქვს ოჯახის წევრებთან? რა თვალსაზრისი აქვს ფულზე? ხომ არ სვამს? ხომ არ არის ფიცხი ან სასტიკი? რა პასუხისმგებლობები აკისრია კრებაში და როგორ ასრულებს მათ? შევძლებ მისდამი ღრმა პატივისცემის გამოვლენას?“ (ლევიანები 19:32; იგავები 22:29; 31:23; ეფესოელები 5:3—5, 33; 1 ტიმოთე 5:8; 6:10; ტიტე 2:6, 7).

¹⁷ მამაკაცს შეეძლო დაფიქრებულიყო შემდეგ საკითხებზე: „ავლენს თუ არა სიყვარულსა და პატივისცემას ღვთისადმი? გაართმევს თავს საოჯახო საქმეებს? რას მოელის მისი ოჯახი ჩვენგან? არის ის გონიერი, შრომისმოყვარე და მომჭირნე? რაზე უყვარს ლაპარაკი? მზრუნველია თუ ეგოისტი? სხვის საქმეში ხომ არ უყვარს ჩარევა? არის თუ არა სანდო? დაემორჩილება მეთაურობის პრინციპს, თუ ჯიუტი და თავნებაა?“ (იგავები 31:10—31; ლუკა 6:45; ეფესოელები 5:22, 23; 1 ტიმოთე 5:13; 1 პეტრე 4:15).

18. რა უნდა მიიღო მხედველობაში, თუ მომავალ მეუღლეში უმნიშვნელო სისუსტეები აღმოაჩინე ახლოს გაცნობის პერიოდში?

¹⁸ ნუ დაგავიწყდება, რომ შენი სატრფო ადამის არასრულყოფილი შთამომავალია და არა რომანის იდეალური გმირი. უშეცდომო არავინ არის და არ ღირს ერთმანეთის ყველა შეცდომაზე გამოკიდება (რომაელები 3:23; იაკობი 3:2). უფრო მეტიც, თუ ვაცნობიერებთ საკუთარ შეცდომებს, ეს ჩვენს სულიერ ზრდას შეუწყობს ხელს. დავუშვათ, ტრფობის პერიოდში ერთმანეთს წაეჩხუბეთ. გაითვალისწინე: დროდადრო იმათაც მოსდით უთანხმოება, ვისაც უყვართ და პატივს სცემენ ერთმანეთს (შეადარე დაბადების 30:2; საქმეები 15:39). იქნებ, უბრალოდ, ორივეს ‘საკუთარი სულის დაოკებისა’ და პრობლემის მშვიდობიანად მოგვარების სწავლა გჭირდებათ? (იგავები 25:28). აქვს შენს მომავალ მეუღლეს გაუმჯობესების სურვილი? შენ? ცდილობ, რომ არ იყო ზედმეტად მგრძნობიარე და წყენია? (ეკლესიასტე 7:9). პრობლემების მოგვარების სწავლით დაამყარებთ გულწრფელ ურთიერთობას, რომელიც დაქორწინების შემთხვევაში აუცილებელია (კოლოსელები 3:13).

19. როგორი მოქმედება იქნებოდა ბრძნული, თუ ტრფობის პერიოდში სერიოზული პრობლემები იჩენს თავს?

¹⁹ რა უნდა გააკეთო, თუ მისი რომელიმე თვისება ან ქცევა ძალიან გაღიზიანებს? ეს უყურადღებოდ არ უნდა დატოვო. როგორი რომანტიკული გრძნობებიც არ უნდა გქონდეს და როგორც არ უნდა გსურდეს ოჯახის შექმნა, არ დახუჭო თვალი სერიოზულ ნაკლზე (იგავები 22:3; ეკლესიასტე 2:14). თუ თქვენს ურთიერთობაში ბევრი რამე ეჭვს ბადებს, გონივრული იქნება, არ გააგრძელო მასთან ურთიერთობა და არ დაივალდებულო თავი მის წინაშე.

20. როგორ შეუძლია წყვილს ტრფობის პერიოდში სიწმინდის შენარჩუნება?

²⁰ რას ნიშნავს სიწმინდის შენარჩუნება გაცნობის პერიოდში? პირველი: დარწმუნდით, რომ თქვენი მორალური ქცევა წუნდაუდებელია. გასათვალისწინებელია ადგილობრივი შეხედულებები. როგორ აღიქმება სხვებისგან საპირისპირო სქესის წარმომადგენელთან შეხება, ხელის ჩაჭიდება, მოხვევა ან კოცნა? სიყვარულის ასეთი გამოხატვა მიღებულიც რომ იყოს, ეს მხოლოდ მაშინ არის დასაშვები, როცა უკვე გადაწყვეტილი გაქვთ დაქორწინება. ფრთხილად იყავით, რომ სიყვარულის ასეთმა გამოხატვამ უწმინდურებამდე ან მრუშობამდე არ მიგიყვანოთ (ეფესოელები 4:18, 19; შეადარე ქებათა ქების 1:2; 2:6; 8:5, 9, 10). გული ვერაგია და გონივრული იქნებოდა, მორიდებოდით განმარტოებას სახლში, გაჩერებულ ავტომობილში ან ნებისმიერ ადგილას, სადაც არასწორი მოქმედების ჩადენის საფრთხეა (იერემია 17:9). თუ გაცნობის პერიოდში მორალურ სიწმინდეს შეინარჩუნებთ, აჩვენებთ, რომ თავშეკავებულნი ხართ და სხვის კეთილდღეობაზე ზრუნვას პირად სურვილებზე მაღლა აყენებთ. უფრო მნიშვნელოვანი კი ის არის, რომ ამას მოიწონებს იეჰოვა ღმერთი, რომელიც თავის მსახურებს მოუწოდებს, თავი შეიკავონ უწმინდურებისა და სიძვისგან (გალატელები 5:19—21).

21. როგორი გულწრფელი ურთიერთობაა საჭირო ტრფობის პერიოდში პატიოსნების შესანარჩუნებლად?

²¹ მეორე: ამ პერიოდში არანაკლებ მნიშვნელოვანია გულწრფელი საუბრები. თუ საქმე უკვე ქორწილისკენ მიდის, საჭიროა ზოგიერთი საკითხის გულახდილად განხილვა. სად იცხოვრებთ? ორივე იმუშავებთ? გსურთ თუ არა, გყავდეთ შვილები? გარდა ამისა, სამართლიანობა მოითხოვს, რომ იმსჯელოთ თქვენი წარსულიდან ისეთ საკითხებზე, რაც გავლენას მოახდენდა ოჯახზე. ეს შეიძლება იყოს: დიდი ვალები, ვალდებულებები ან ჯანმრთელობის მდგომარეობა. რადგანაც აივ-ის (შიდს-ის გამომწვევი ვირუსი) სიმპტომები ინფიცირების შემთხვევაში მაშინვე არ ვლინდება, დასაქორწინებელი ადამიანის ან მზრუნველი მშობლების მხრიდან სწორი იქნებოდა იმის მოთხოვნა, რომ მომავალ მეუღლეს შიდს-ზე სისხლის ანალიზი გაეკეთებინა, თუ წარსულში უზნეოდ იქცეოდა ან ნარკოტიკებს იღებდა. თუ ანალიზის პასუხი დადებითია, დაინფიცირებულმა არ უნდა დააძალოს მომავალ მეუღლეს ურთიერთობის გაგრძელება, თუ ის წინააღმდეგია. სიმართლე რომ ითქვას, თუ საეჭვო ცხოვრებას ეწეოდი, სანამ ვინმეს გაცნობას დააპირებ, მანამდე უნდა ჩააბარო სისხლის ანალიზი შიდს-ზე.

22, 23. ა) როგორ შეიძლება, ადამიანმა გაწონასწორებული თვალსაზრისი დაკარგოს ქორწილისთვის მზადებისას? ბ) როგორი გაწონასწორებული შეხედულება უნდა შეინარჩუნოთ, როდესაც ქორწილის დღესა და ქორწინებაზე ფიქრობთ?

²² დაქორწინებამდე ერთი-ორი თვით ადრე იწყება საქორწილო ორომტრიალი. დაძაბულობა გაცილებით ნაკლები იქნება, თუ ზომიერები იქნებით. „ზღაპრული“ ქორწილით კმაყოფილი დარჩებიან ნათესავები და სტუმრები, ახალშეუღლებულებსა და მათ ოჯახებს კი შეიძლება არც ძალა შერჩეთ და არც სახსრები. ზოგიერთი ადგილობრივი წეს-ჩვეულების მიყოლა გონივრულია, მაგრამ ყველაფრის ბრმად მიყოლამ ან მეტოქეობამ შეიძლება დაჩრდილოს ამ მოვლენის მნიშვნელოვნება და წაგართვათ სიხარული, რომელიც ამ დღეს მოაქვს. მართალია, სხვების გრძნობები გასათვალისწინებელია, მაგრამ უშუალოდ საქმროა პასუხისმგებელი, თუ როგორ ჩატარდება ქორწილი (იოანე 2:9).

²³ გახსოვდეს: შენი ქორწილი მხოლოდ ერთი დღე გაგრძელდება, ცოლ-ქმრობა კი — მთელი ცხოვრება. ეცადე მთელი ყურადღება ქორწილზე არ გადაიტანო. ამის ნაცვლად, ხელმძღვანელობისთვის იეჰოვა ღმერთს მიმართე და ოჯახის მომავალზე იფიქრე. თუ ასე მოიქცევი, კარგად იქნებით მომზადებული ბედნიერი ქორწინებისთვის.