DAW 52
Anhte A Hpun Palawng Hte Mawn Sumli Ai Lam
Anhte yawng hta, gara hku bu hpun mawn sumli na hte seng nna ra sharawng ai lam amyu myu nga ai. Chyum Laika npawt tara nkau hpe hkan sa na nga yang, tinang ra sharawng ai hku bu hpun lu nna, Yehowa hpe mung myit shapyaw ya lu na re. Dai npawt tara nkau mi hpe hkaja yu ga.
1. Bu hpun mawn sumli na matu lata ai shaloi, gara Chyum Laika npawt tara ni hpe hkan sa ging ai kun?
Anhte gaw, “sari rawng ai, htap htuk ai hpun palawng ni hpe sawn maram” nna lata ging ai. “Karai Kasang hpe nawku ai” ni re ai ngu kaga ni mu lu hkra, hkrang nsam mung san seng ra ai. (1 Timohti 2:9, 10, NWT) Ndai npawt tara 4 hpe hkaja yu ga: (1) Anhte a hpun palawng gaw “htap htuk” ging ai. Nawku zuphpawng ni hta mu lu ai hte maren, Yehowa a masha ni gaw bu hpun mawn sumli ai lam n bung ai. Raitim, anhte a hpun palawng ni hte kara mawn sumli ai lam ni gaw, Karai Kasang hpe hkungga ai lam madun ai. (2) “Sari rawng” ai hku bu hpun ai ngu ai gaw, hkum shan myit hpe sharawt ya ai (sh) tinang hpe myit maju jung wa hkra, bu hpun ai hpe tsun ai n re. (3) Ladu lai prat dep ai hku, n hpun ai hku nna mung “sawn maram” ai myit nga ai hpe madun ai. (4) Anhte a mawn sumli ai lam gaw, tengman ai “Karai Kasang hpe nawku” nga ai hpe madun ging ai.—1 Korinhtu 10:31.
2. Hpun palawng lata ai shaloi, hpunau nauna ni hpe hpa majaw myit shalawm ging ai kun?
Gara hpe hpun na hpe lata mai ai. Raitim, anhte a mawn sumli ai lam gaw, kaga ni hpe gara hku hkra machyi shangun chye ai hpe mung myit ging ai. Kaga ni hpe n hkra machyi hkra dang lu ai daram anhte shakut ai. “Manang wa a ngamu ngamai na lam tau yu nna, shadaw shangang” ya ai.—Roma 15:1, 2 hpe hti u.
3. Anhte a mawn sumli ai lam gaw, tengman ai nawku dawjau lam de kaga ni hpe gara hku du wa shangun lu ai kun?
Ayan na gaw anhte htap hkuk hkra bu hpun ai. Laksan hku nna, zuphpawng lung ai aten hte hkaw tsun sa ai aten hta re. Anhte a mawn sumli ai lam a majaw, ahkyak ai shiga hpe manu yawm mat shangun ai baw n byin mayu ai. De a malai, kaga ni hpe tengman ai lam de du wa na matu hte, “hkye hkrang la ai Madu Karai Kasang a sharin shaga mung ga hpe, lam magup hta mawn sumli” ya mayu ga ai.—Titu 2:9.
Kahtap Hkaja
Hkristan ni hku nna htap htuk hkra, gara hku bu hpun mawn sumli na hte seng nna hkaja yu ga.
Anhte a mawn sumli ai lam gaw ahkang aya nga ai ni hpe hkungga ai kun? n hkungga ai kun? ngu ai hpe madun. Myit masin hpe Yehowa mu lu ai raitim, mawn sumli ai lam hku nna mung shi hpe hkungga ai lam madun ging
4. Htap htuk ai mawn sumli lam gaw Yehowa hpe hkungga ai lam madun
Gara lam a majaw mawn sumli ai lam hpe sadi na matu ahkyak ai kun? Shakawn 47:2 hpe hti nna, ndai ga san ni hpe bawngban u:
Anhte a mawn sumli ai lam gaw Yehowa a ntsa kaga ni mu mada ai lam hpe gara hku akyu shabyin ya ai kun?
Zuphpawng lung ai aten hte hkaw tsun sa ai aten hta, mawn sumli ai lam hpe sadi ai gaw hpa majaw kaja ai ngu nang shadu ai kun? Rai yang, hpa majaw dai hku htai ai?
5. Bu hpun mawn sumli ai lam hte seng nna htap htuk ai hku lata mai ai lam
Anhte a bu hpun palawng ni gaw, manu hpu tim, n hpu tim, san seng nna masa lam langai hpra hta htap htuk ai hku rai ging ai. 1 Korinhtu 10:24 hte 1 Timohti 2:9, 10 hpe hti u. Dai hpang, lawu na hpun palawng ni hpe hpa majaw koi ging ai hpe bawngban u.
N san seng ai (sh) ladu lai prat dep ai
Grai chyat ai, grai hpaw madun ai (sh) hkum shan myit hpe sharawt ya ai
Hkristan ni gaw Mawshe a Tara npu hta n nga sai raitim, dai tara ni gaw Yehowa a myit mang ai lam hpe chye shangun ai. Tara Jahprang 22:5 hpe hti nna, ndai ga san hpe bawngban u:
Lasha ni gaw numsha zawn, numsha ni gaw lasha zawn hpun ai hpe hpa majaw koi ging ai kun?
1 Korinhtu 10:32, 33 hte 1 Yawhan 2:15, 16 hpe hti nna, ndai ga san ni hpe bawngban u:
Anhte a mawn sumli ai lam gaw, makau grup-yin na ni, hpunau nauna ni hpe hkyet rung mat shangun ai baw n byin hkra hpa majaw sadi ra ai kun?
Nang nga ai shara hta gara zawn bu hpun nga ai kun?
Hkristan ni a matu dai zawn hpun palawng nkau mi gaw hpa majaw n htap htuk ai kun? Rai yang, nang hpa majaw dai hku htai ai?
Anhte gaw bu hpun palawng amyu myu bu hpun mai tim, Yehowa hpe myit shapyaw ya ging
Nkau Mi Tsun Ai: “Ngai hpun mayu ai hpe ngai hpun na.”
Nang myit hkrum ai kun? Rai yang, hpa majaw dai hku htai ai?
Kadun Dawk
Anhte htap htuk ai hku bu hpun ai nga yang, Yehowa hte kaga ni hpe hkungga ai lam madun ai re.
Bai Maram
Bu hpun mawn sumli ai lam gaw Yehowa a matu hpa majaw ahkyak ai kun?
Mawn sumli ai lam hpe lata ai shaloi, gara npawt tara nkau mi gaw lam matsun ya ging ai kun?
Mawn sumli ai lam gaw, tengman ai nawku dawjau ai lam hpe kaga ni mu mada ai lam a ntsa gara hku akyu shabyin ya lu ai kun?
Sawk Sagawn
Na a hpun palawng gaw hpa hpe madun ai lam yu yu u.
Maksam n htu shi yang myit ging ai lam ni hpe hti yu u.
“Maksam Htu Ai Hte Seng Nna Chyum Laika Hta Hpa Tsun Da Ai Kun?” (Web sumhpa)
Anhte a dawdan lam ni hpe lam matsun ya lu na npawt tara ni hpe kahtap hkaja yu u.
“Na A Mawn Sumli Ai Lam Gaw Karai Kasang Hpe Shagrau Nga Ai Kun?” (Sin Langchyi, September 2016)
Karai hpe myit shapyaw ya mayu ai num langai gaw, mawn sumli ai hte seng nna kaga ni a dawdan lam hpe hkap la na matu gara hku sharin la wa ai kun?
“Bu Hpun Mawn Sumli Ai Lam Gaw Pat Shingdang Shangun” (Dum Hprang!, December 22, 2003)