2 Samuele

8 Ntangu fioti na nima, Davidi bedisaka bantu ya Filistia+ mpi tulaka bo na nsi ya kiyeka na yandi,+ ebuna Davidi botulaka Metegi-ama na maboko ya bantu ya Filistia.

2 Yandi bedisaka bantu ya Moabi+ mpi ladisaka bo na ntoto mpi tesaka bo ti nsinga. Yandi tesaka bansinga zole ya bayina bo fwete fwa, mpi nsinga mosi ya mvimba ya bayina bo fwete bika na luzingu.+ Ebuna bantu ya Moabi kumaka bansadi ya Davidi mpi bo vandaka kufuta kitadi.+

3 Davidi bedisaka Adadezere mwana ya Rehobi ntotila ya Soba+ ntangu yandi vandaka kukwenda kuvutukila kiyeka na yandi na ntoto yina kele na lweka ya Nzadi ya Efrate.+ 4 Davidi botulaka yandi bantu 1 700 yina ke tambusaka bampunda mpi basoda 20 000 yina ke tambulaka na makulu. Na nima, Davidi zengaka misisa ya nima ya makulu ya bampunda yonso yina vandaka kubenda bapusu-pusu, kansi yandi zengaka ve misisa ya nima ya makulu ya bampunda 100.+

5 Ntangu bantu ya Siria ya Damasi+ kwisaka kusadisa Adadezere ntotila ya Soba, Davidi fwaka bantu ya Siria 22 000.+ 6 Na nima Davidi tulaka bimvuka ya basoda na Siria ya Damasi, ebuna bantu ya Siria kumaka bansadi ya Davidi mpi bo vandaka kufuta kitadi. Yehowa vandaka kupesa Davidi luguluku* bisika yonso yina yandi vandaka kukwenda.+ 7 Davidi bakaka mpi bitaninu ya wolo na bansadi ya Adadezere mpi yandi nataka yo na Yeruzalemi.+ 8 Ntotila Davidi bakaka kwivre mingi na Beta mpi na Berotai, bambanza ya Adadezere.

9 Ntangu yai Toyi, ntotila ya Amati,+ waka nde Davidi me bedisa basoda yonso ya Adadezere.+ 10 Yo yina Toyi tindaka mwana na yandi Yorami na ntotila Davidi sambu na kusosa kuzaba kana yandi vandaka mbote mpi kusikisa yandi sambu yandi nwanisaka mpi bedisaka Adadezere (sambu Adadezere vandaka kunwana ti Toyi mbala mingi), mpi yandi nataka bima ya arza, ya wolo, mpi ya kwivre. 11 Ntotila Davidi santisaka bima yai sambu na Yehowa, kumosi ti arza mpi wolo yina yandi santisaka na kati ya bima yina yandi bakaka na makanda yonso yina yandi bedisaka:+ 12 na Siria mpi Moabi,+ na bantu ya Amoni, na bantu ya Filistia,+ na bantu ya Amaleki,+ mpi na bima ya yandi botulaka na Adadezere+ mwana ya Rehobi, ntotila ya Soba. 13 Davidi kudisadilaka mpi zina ntangu yandi kwisaka kuvutuka na nima ya kufwa bantu ya Edomi 18 000 na Muwanda ya Mungwa.+ 14 Yandi tulaka bimvuka ya basoda na Edomi. Na Edomi ya mvimba, yandi tulaka bimvuka ya basoda, ebuna bantu yonso ya Edomi kumaka bansadi ya Davidi.+ Yehowa vandaka kunungisa* Davidi bisika yonso yina yandi vandaka kukwenda.+

15 Davidi vandaka kuyala Izraele ya mvimba,+ mpi yandi vandaka kuzenga mambu na lunungu+ mpi na mutindu ya kusungama sambu na bantu na yandi yonso.+ 16 Yoabi+ mwana ya Seruya vandaka mfumu ya basoda, mpi Yehoshafati+ mwana ya Ahiludi vandaka muntu ya ke sonikaka mambu. 17 Zadoki+ mwana ya Ahitubi ti Ahimeleki mwana ya Abiatare vandaka banganga-nzambi, mpi Seraya vandaka sekretere. 18 Benaya+ mwana ya Yehoyada vandaka mfumu ya bantu ya Kereti mpi ya bantu ya Peleti.+ Bana ya Davidi kumaka bansadi ya kuluta nene.*