2 Bantotila

18 Na mvula ya tatu ya Oshea+ mwana ya Ela ntotila ya Izraele, Ezekiasi+ mwana ya Ahazi+ ntotila ya Yuda kumaka ntotila. 2 Yandi vandaka ti bamvula 25 ntangu yandi kumaka ntotila, mpi yandi yalaka bamvula 29 na Yeruzalemi. Zina ya mama na yandi Abi* mwana ya Zekaria.+ 3 Yandi landaka kusala mambu ya mbote na meso ya Yehowa,+ kaka mutindu nkaka na yandi Davidi salaka.+ 4 Yandi muntu katulaka bisika ya kunanguka,+ panzaka makunzi ya santu, mpi zengaka nti ya santu.*+ Yandi bukaka mpi nioka ya kwivre yina Moize salaka;+ sambu tii na ntangu yina, bantu ya Izraele vandaka kupesa yo midinga ya kimenga mpi bo vandaka kubinga yo kiteki ya nioka ya kwivre.* 5 Yandi tulaka ntima na Yehowa+ Nzambi ya Izraele; ata muntu mosi ve vandaka bonso yandi na kati ya bantotila yonso ya Yuda yina vandaka na nima na yandi, to na kati ya bayina vandaka na ntwala na yandi. 6 Yandi kangamaka ngolo na Yehowa.+ Yandi yambulaka ve kulanda yandi; yandi landaka kuzitisa bansiku yina Yehowa pesaka Moize. 7 Mpi Yehowa vandaka ti yandi. Konso kisika yina yandi vandaka kukwenda, yandi vandaka kusala mambu na mayele. Yandi kolamaka na ntotila ya Asiria mpi buyaka kusadila yandi.+ 8 Yandi bedisaka mpi bantu ya Filistia+ tii na Gaza mpi bateritware na yo, katuka na nzo-zulu tii na mbanza ya ngolo.*

9 Na mvula ya iya ya ntotila Ezekiasi, disongidila, mvula ya nsambwadi ya Oshea+ mwana ya Ela ntotila ya Izraele, Shalmanezere ntotila ya Asiria kwisaka kunwanisa Samaria mpi yandi yantikaka kuziunga yo.+ 10 Bo botulaka yo+ na nsuka ya bamvula tatu; bo botulaka Samaria na mvula ya sambanu ya Ezekiasi, yo vandaka mvula ya uvwa ya Oshea ntotila ya Izraele. 11 Ebuna ntotila ya Asiria nataka+ Izraele na Asiria mpi tulaka bo sambu bo zinga na Ala, na Abore yina kele pene-pene ya nzadi ya Gozani, mpi na bambanza ya bantu ya Media.+ 12 Mambu yai salamaka sambu bo waka ve ndinga ya Yehowa Nzambi na bo, kansi bo landaka kufwa kuwakana na yandi, mambu yonso yina Moize nsadi ya Yehowa songaka bo.+ Bo waka ve mpi bo lemfukaka ve.

13 Na mvula ya ¹⁴ ya ntotila Ezekiasi, Senakeribi ntotila ya Asiria+ kwisaka kutombuka sambu na kunwanisa bambanza yonso ya ngolo ya Yuda mpi yandi botulaka yo.+ 14 Yo yina Ezekiasi ntotila ya Yuda tindilaka ntotila ya Asiria ndinga na Lakishi nde: “Mono me sala mbi. Yambula kunwanisa mono, ebuna mono ta pesa nge konso kima yina nge ta futisa mono.” Ntotila ya Asiria futisaka Ezekiasi ntotila ya Yuda kibawu ya batalanta* 300 ya arza mpi batalanta 30 ya wolo. 15 Yo yina Ezekiasi pesaka arza yonso yina vandaka na nzo ya Yehowa mpi na bisika ya kubumba bimvwama ya nzo ya ntotila.+ 16 Na ntangu yina, Ezekiasi katulaka* bakielo ya tempelo+ ya Yehowa ti makunzi ya kielo yina Ezekiasi ntotila ya Yuda yandi mosi pakulaka wolo,+ ebuna yandi pesaka yo na ntotila ya Asiria.

17 Ebuna ntotila ya Asiria tindaka Tartani,* Rabsarisi,* mpi Rabshake* ti basoda mingi katuka na Lakishi+ sambu bo kwenda na ntotila Ezekiasi na Yeruzalemi.+ Bo tombukaka na Yeruzalemi mpi bo telamaka na nzila ya kiziba ya zulu yina ke nataka masa, yina kele pene-pene ya nzila ya nene ya kilanga ya muntu ya ke yobisaka bilele.+ 18 Ntangu bo bingaka ntotila na kubasika, Eliakimi+ mwana ya Hilkia, yina vandaka mfumu ya nzo,* sekretere Shebna,+ mpi Yoa mwana ya Asafi muntu ya ke sonikaka mambu basikaka mpi kwendaka kisika bo vandaka.

19 Yo yina Rabshake tubilaka bo nde: “Beno tubila Ezekiasi nde, ‘Ntotila ya nene, ntotila ya Asiria, me tuba nde: “Nki ke sala nde nge tula ntima?+ 20 Nge ke tuba nde, ‘Mono kele ti mayele mpi ngolo ya kunwana bitumba,’ kansi mambu ya nge ke tuba kele mpamba. Na nani nge me tula ntima, yo yina nge me baka kikesa ya kukolamina mono?+ 21 Nge ke tula ntima na lusadisu ya Ezipte,+ lukengi yai ya kubukana, yina kana muntu kuyekamina yo, yo ta kota na kipala-pala ya diboko na yandi mpi ta tobula yo. Farao ntotila ya Ezipte kele mutindu yina sambu na bantu yonso yina ke tudilaka yandi ntima. 22 Mpi kana beno tubila mono nde, ‘Beto ke tula ntima na Yehowa Nzambi na beto,’+ keti yandi ve muntu Ezekiasi me katulaka+ bisika na yandi ya kunanguka mpi bamesa-kimenga na yandi, na ntangu yandi ke tuba na Yuda mpi na Yeruzalemi nde, ‘Beno fwete fukama na ntwala ya mesa-kimenga yai na Yeruzalemi’?”’+ 23 Ntangu yai, pardo, zenga ti mfumu na mono ntotila ya Asiria: Mono ta pesa nge bampunda 2 000 kana nge ta kuka kubaka ntalu ya kufwana ya bantu yina ke tambusaka bampunda sambu na kutambusa yo.+ 24 Ebuna nki mutindu nge ta kuka kukula ata mfumu mosi ya mbanza yina kele muntu ya kukonda mfunu kibeni na kati ya bansadi ya mfumu na mono, na ntangu nge ke tula ntima na Ezipte sambu na bapusu-pusu mpi sambu na bantu yina ke tambusaka bampunda? 25 Ntangu yai keti mono me kwisa kunwanisa kisika yai sambu na kufwa yo kukonda nswa ya Yehowa? Yehowa yandi mosi tubilaka mono nde, ‘Kwenda kunwanisa insi yina mpi fwa yo.’”

26 Ebuna Eliakimi mwana ya Hilkia, Shebna,+ mpi Yoa tubilaka Rabshake+ nde: “Pardo, tubila bansadi na nge na ndinga ya Kiarami,* sambu beto lenda bakisa yo;+ kutubila beto ve na ndinga ya Bayuda na makutu ya bantu yina kele na zulu ya kibaka.”+ 27 Kansi Rabshake tubilaka bo nde: “Keti mfumu na mono me tinda mono na kutuba mambu yai kaka na mfumu na nge mpi na nge? Keti yandi me tinda mono mpi ve na bantu yina me vanda na zulu ya kibaka, bayina ta dia tufi na bo mosi mpi ta nwa masuba na bo mosi kumosi ti beno?”

28 Ebuna Rabshake telamaka mpi tubaka na ndinga ya ngolo na ndinga ya Bayuda nde: “Beno wa mambu yina ntotila ya nene, ntotila ya Asiria, ke tuba.+ 29 Ntotila me tuba nde, ‘Ezekiasi kukusa beno ve, sambu yandi lenda gulusa beno ve na maboko na mono.+ 30 Beno bika ve nde Ezekiasi kupusa beno na kutula ntima na Yehowa nde: “Ya kieleka Yehowa ta gulusa beto, mpi bo ta pesa ve mbanza yai na maboko ya ntotila ya Asiria.”+ 31 Beno wila Ezekiasi ve, sambu ntotila ya Asiria me tuba nde: “Beno sala ngemba ti mono mpi beno kudipesa,* ebuna konso muntu na kati na beno ta dia bambuma ya nti na yandi mosi ya vinu mpi bambuma ya nti na yandi mosi ya bafige, mpi yandi ta nwa masa ya dibulu na yandi mosi, 32 tii kuna mono ta kwisa mpi ta nata beno na insi yina kele bonso insi na beno,+ insi ya bankeni ti ya vinu ya mpa, insi ya mampa ti ya bilanga ya vinu, insi ya banti ya olive ti ya bwiki. Ebuna beno ta zinga mpi ta fwa ve. Beno wila ve Ezekiasi, sambu yandi ke kusa beno ntangu yandi ke tuba nde, ‘Yehowa ta gulusa beto.’ 33 Keti ata nzambi mosi ya makanda me gulusaka insi na yandi na maboko ya ntotila ya Asiria? 34 Wapi banzambi ya Amati+ mpi ya Arpadi? Wapi banzambi ya Sefarvayimi,+ ya Ena, mpi ya Iva? Keti bo me gulusaka Samaria na maboko na mono?+ 35 Inki nzambi na kati ya banzambi yonso ya bansi yina me gulusaka insi na yandi na maboko na mono, sambu Yehowa kugulusa Yeruzalemi na maboko na mono?”’”+

36 Kansi bantu bikalaka pima mpi bo vutudilaka yandi ve ata ngogo mosi, sambu ntotila tubaka nde, “Beno fwete pesa yandi ve mvutu.”+ 37 Kansi Eliakimi mwana ya Hilkia, yina vandaka mfumu ya nzo, sekretere Shebna, mpi Yoa mwana ya Asafi muntu ya ke sonikaka mambu, kwisaka na Ezekiasi ti bilele na bo ya kupasuka mpi bo songaka yandi mambu yina Rabshake tubaka.