2 Bansangu

35 Yoziasi salaka Paki+ sambu na Yehowa na Yeruzalemi, mpi bo fwaka kimenga ya Paki+ na kilumbu ya 14 ya ngonda ya ntete.+ 2 Yandi tulaka banganga-nzambi na bisalu na bo mpi yandi siamisaka bo na kulungisa kisalu na bo na nzo ya Yehowa.+ 3 Ebuna yandi tubilaka Balevi, balongi ya Izraele ya mvimba,+ bantu yina vandaka santu sambu na Yehowa nde: “Beno tula Sanduku ya santu na nzo yina Salomo mwana ya Davidi ntotila ya Izraele tungaka;+ beno ta nataka yo diaka ve na mapeka na beno.+ Ntangu yai beno sadila Yehowa Nzambi na beno mpi bantu na yandi Izraele. 4 Beno kudibongisa, na kulanda ndonga ya banzo ya batata na beno na kutadila bimvuka na beno, na kuwakana ti mambu yina Davidi+ ntotila ya Izraele mpi mwana na yandi Salomo sonikaka.+ 5 Beno telama na kisika ya santu na kimvuka na kulanda ndonga ya banzo ya batata ya bampangi na beno, bantu yina me bikala,* ti kimvuka yina me fwanana ti nzo ya batata ya Balevi. 6 Beno fwa bambisi ya kimenga ya Paki,+ beno kudisantisa, mpi beno baka bangidika sambu bampangi na beno kuzitisa mambu yina Yehowa tubaka na nzila ya Moize.”

7 Yoziasi pesaka bitwisi sambu na bantu, bana-mameme ya babakala mpi bana-bankombo ya babakala, sambu na bimenga ya Paki sambu na bantu yonso yina vandaka pana, na kimvuka bitwisi 30 000, mpi bangombe 3 000. Yo katukaka na bima ya ntotila.+ 8 Bamfumu na yandi mpi pesaka makabu ya luzolo ya mbote sambu na bantu, banganga-nzambi, mpi Balevi. Hilkia,+ Zekaria, mpi Yehiele, bantwadisi ya nzo ya Nzambi ya kieleka, pesaka banganga-nzambi bimenga ya Paki 2 600 mpi bangombe 300. 9 Konania ti bampangi na yandi Shemaya mpi Netanele, kumosi ti Ashabia, Yeyele, mpi Yozabadi, bamfumu ya Balevi, pesaka bimenga ya Paki 5 000 mpi bangombe 500 sambu na Balevi.

10 Bo yidikaka kisalu, ebuna banganga-nzambi telamaka na bisika na bo mpi Balevi telamaka na kutadila bimvuka na bo,+ mutindu ntotila songaka bo. 11 Bo fwaka bimenga ya Paki;+ banganga-nzambi vandaka kumwanga menga yina bo bakaka na bo,+ ebuna Balevi vandaka kukatula bambisi bampusu.+ 12 Na nima, bo yidikaka makabu ya kuyoka sambu na kukabula yo na bantu yina me bikala, yina bo vukisaka na kutadila banzo ya batata, mpidina bo lendaka kumonisa yo na Yehowa mutindu bo me sonikaka na mukanda ya Moize; mpi bo salaka mutindu mosi sambu na bangombe. 13 Bo lambaka* dikabu ya Paki na tiya na kulanda kinkulu;+ mpi bo lambaka makabu ya santu na banzungu, bambidika, mpi bapanu, na nima bo nataka yo nswalu na bantu yonso yina me bikala. 14 Ebuna bo yidikaka kimenga ya Paki sambu na bo mosi mpi sambu na banganga-nzambi, sambu banganga-nzambi, bana ya Aroni, vandaka kupesa bimenga ya kuyoka mpi bitini ya mafuta tii ntangu mpimpa bwaka, yo yina Balevi yidikaka kimenga ya Paki sambu na bo mosi mpi sambu na banganga-nzambi, bana ya Aroni.

15 Mpi miyimbi-bankunga, bana ya Asafi,+ vandaka na bisika na bo na kulanda nsiku ya Davidi,+ Asafi,+ Emani, mpi Yedutuni+ muntu ya ntotila ya ke monaka bambona-meso; mpi bankengidi ya bakielo vandaka na bakielo ya kuswaswana.+ Yo vandaka ve na mfunu nde bo bikisa kisalu na bo, sambu bampangi na bo Balevi yidikilaka bo kimenga ya Paki. 16 Yo yina, bo yidikaka kisalu yonso ya Yehowa na kilumbu yina sambu na kusala Paki+ mpi sambu na kupesa makabu ya kuyoka na mesa-kimenga ya Yehowa, na kulanda mambu yina ntotila Yoziasi+ tubaka.

17 Bantu ya Izraele yina vandaka pana salaka Paki na ntangu yina mpi bo salaka Nkinsi ya Mampa ya Kukonda Levire bilumbu nsambwadi.+ 18 Bo me salaka ntete ve Paki ya mutindu yina na Izraele katuka bilumbu ya mbikudi Samuele; ata ntotila ya nkaka ve ya Izraele me salaka Paki bonso yina ntotila Yoziasi,+ banganga-nzambi, Balevi, bantu yonso ya Yuda mpi bantu ya Izraele yina vandaka pana, mpi bantu ya Yeruzalemi salaka. 19 Bo salaka Paki yai na mvula ya ¹⁸ ya luyalu ya Yoziasi.

20 Na nima ya mambu yai yonso, ntangu Yoziasi yidikaka tempelo,* Neko+ ntotila ya Ezipte kwisaka kunwana na Karkemishi pene-pene ya Efrate. Ebuna Yoziasi basikaka sambu na kunwana ti yandi.+ 21 Yo yina yandi tindaka binati-nsangu sambu bo songa yandi nde: “Mambu yai me tala nge na nki, O ntotila ya Yuda? Mono ke kwisa ve bubu yai sambu na kunwanisa nge, kansi mono ke nwanisa nzo ya nkaka, mpi Nzambi ke tuba nde mono fwete sasuka. Sambu na mambote na nge mosi, bika kunwanisa Nzambi, yina kele ti mono, kana ve yandi ta fwa nge.” 22 Ata mpidina, Yoziasi yambulaka yandi ve, kansi yandi lwataka bilele ya nkaka sambu bo zaba yandi ve+ mpi yandi waka ve mambu yina Neko tubaka, yina katukaka na munoko ya Nzambi. Yo yina, yandi kwisaka kunwana na Ntoto ya Kukonda Ngumba ya Megido.+

23 Bantu ya ke sadilaka munduki ya tolo-tolo bulaka ntotila Yoziasi, ebuna yandi tubilaka bansadi na yandi nde: “Beno basisa mono awa, sambu mono me lwala ngolo.” 24 Yo yina, bansadi na yandi katulaka yandi na pusu-pusu, bo tulaka yandi na pusu-pusu na yandi ya zole ya bitumba, mpi bo nataka yandi na Yeruzalemi. Ebuna yandi fwaka mpi bo zikaka yandi na maziamu ya ba-nkaka na yandi;+ Yuda ya mvimba mpi Yeruzalemi dilaka Yoziasi. 25 Yeremia+ yimbilaka Yoziasi, mpi miyimbi-bankunga yonso ya babakala ti ya bankento+ ke landaka kuyimba sambu na Yoziasi na bankunga na bo ya mawa* tii bubu yai; mpi bo bakaka lukanu nde bo fwete yimba yo na Izraele, mpi bo me sonikaka yo na kati ya bankunga ya mawa.

26 Sambu na mambu ya nkaka ya Yoziasi salaka mpi mambu yina yandi salaka ya ke monisa zola na yandi ya kwikama, na kulanda mambu yina bo me sonikaka na Nsiku ya Yehowa, 27 mpi mambu yina yandi salaka, katuka na luyantiku tii na nsuka, bo me sonikaka yo na Mukanda ya Bantotila ya Izraele mpi ya Yuda.+