Yeremia

28 Na mvula yina mosi, na luyantiku ya luyalu ya Sidikiya+ ntotila ya Yuda, na mvula ya iya, na ngonda ya tanu, mbikudi Hanania mwana ya Azure, muntu ya bwala Gibeoni,+ tubilaka mono na nzo ya Yehowa na meso ya banganga-nzambi mpi ya bantu yonso nde: 2 “Yehowa ya makesa, Nzambi ya Izraele, ke tuba nde, ‘Mono ta zenga vangu ya ntotila ya Babilone.+ 3 Na nsungi ya bamvula zole,* mono ke vutula na kisika yai bisadilu yonso ya nzo ya Yehowa yina Nebukadenezare ntotila ya Babilone bakaka na kisika yai mpi nataka na Babilone.’”+ 4 “‘Mpi mono ta vutula na kisika yai Yekonia+ mwana ya Yehoyakimi,+ ntotila ya Yuda, ti bantu yonso ya Yuda yina bo me nataka na Babilone,’+ Yehowa muntu me tuba, ‘sambu mono ta zenga vangu ya ntotila ya Babilone.’”

5 Ebuna mbikudi Yeremia tubilaka mbikudi Hanania na meso ya banganga-nzambi mpi ya bantu yonso yina telamaka na nzo ya Yehowa. 6 Mbikudi Yeremia tubaka nde: “Amen!* Bika Yehowa kusala mutindu yina! Bika Yehowa kulungisa bangogo na nge yina nge me bikula, yandi vutula na kisika yai katuka na Babilone bisadilu ya nzo ya Yehowa mpi bantu yonso yina bo nataka na insi ya nkaka! 7 Kansi pardo, wa nsangu yai ya mono ke tuba na makutu na nge mpi na makutu ya bantu yonso. 8 Na ntangu ya ntama, bambikudi yina vandaka na ntwala na mono mpi na ntwala na nge vandaka kubikula sambu na bansi mingi mpi bimfumu ya ngolo, mambu ya me tala bitumba, mpasi, mpi kipupa.* 9 Kana mbikudi mosi kubikula mambu ya me tala ngemba mpi ndinga na yandi kulungana, pana yo ta zabana nde Yehowa muntu tindaka kibeni mbikudi yina.”

10 Ebuna mbikudi Hanania bakaka vangu yina vandaka na nkingu ya mbikudi Yeremia, yandi zengaka yo.+ 11 Na nima, Hanania tubaka na meso ya bantu yonso nde: “Yehowa ke tuba nde, ‘Mutindu yai kaka mono ta zenga vangu ya Nebukadenezare ntotila ya Babilone na nkingu ya makanda yonso na bamvula zole.’”+ Ebuna mbikudi Yeremia kwendaka.

12 Mbikudi Hanania zengaka nti ya vangu na nkingu ya mbikudi Yeremia, ebuna na nima nsangu yai ya Yehowa kwisilaka Yeremia: 13 “Kwenda mpi tubila Hanania nde, ‘Yehowa ke tuba nde: “Nge me zenga banti ya vangu ya dibaya,+ kansi na kisika na yo nge ta sala banti ya vangu ya bibende.” 14 Sambu Yehowa ya makesa, Nzambi ya Izraele, ke tuba nde: “Mono ta tula banti ya vangu ya bibende na nkingu ya makanda yai yonso, sambu bo sadila Nebukadenezare ntotila ya Babilone, mpi bo fwete sadila yandi.+ Mono ta pesa yandi ata bambisi ya mfinda.”’”+

15 Ebuna mbikudi Yeremia tubilaka mbikudi Hanania+ nde: “Pardo, O Hanania, wa! Yehowa me tinda nge ve, kansi nge me pusa bantu yai na kutula ntima na mambu ya luvunu.+ 16 Yo yina, Yehowa ke tuba nde, ‘Tala! Mono ke katula nge na ntoto. Nge ta fwa na mvula yai, sambu nge me siamisa bantu na kukolama na Yehowa.’”+

17 Yo yina mbikudi Hanania fwaka na mvula yina, na ngonda ya nsambwadi.