Luka

24 Kansi na kilumbu ya ntete ya mposo, bo kwisaka na maziamu* na suka-suka kibeni, bo nataka bima ya nsudi ya kitoko yina bo yidikaka.+ 2 Kansi bo kutaka bo me katula ditadi na maziamu,*+ 3 mpi ntangu bo kotaka, bo monaka ve mvumbi ya Mfumu Yezu.+ 4 Ntangu bo kumaka kisaka-saka sambu na diambu yai, babakala zole yina vandaka ti bilele ya ke ngenga kwisaka kutelama pene-pene na bo. 5 Bankento yina waka boma mpi bo tulaka luse na ntoto, yo yina babakala yina tubilaka bo nde: “Sambu na nki beno ke sosa muntu ya luzingu na kati ya bafwa?+ 6 Yandi kele awa ve, kansi yandi me futumuka. Beno yibuka mambu yina yandi songaka beno ntangu yandi vandaka ntete na Galilea, 7 nde bo fwete pesa Mwana ya muntu na maboko ya bantu ya masumu, nde bo fwete fwa yandi na zulu ya nti, mpi nde yandi fwete futumuka na kilumbu ya tatu.”+ 8 Ebuna bo yibukaka mambu yina yandi tubaka;+ 9 bo katukaka na maziamu* mpi bo kwendaka kuzabisa mambu yai yonso na bantumwa Kumi na Mosi mpi na bantu yonso ya nkaka.+ 10 Yo vandaka Maria ya Magdala, Yoana, mpi Maria mama ya Yakobo. Diaka, bankento ya nkaka yina vandaka ti bo vandaka kuzabisa bantumwa mambu yai. 11 Kansi, bo monaka mambu yai bonso mambu ya mpamba, mpi bo kwikilaka ve bankento yina.

12 Kansi Piere telamaka, yandi kwendaka ntinu na maziamu,* yandi niekaka, yandi talaka mpi monaka kaka bilele ya lino. Yo yina yandi vutukaka, mpi yandi vandaka kuyituka mambu yina bwaka.

13 Kansi kaka na kilumbu yina, bantu zole na kati na bo vandaka kukwenda na bwala mosi, zina na yo Emausi, yina vandaka na kitamina ya kiteso ya bakilometre 11* ti Yeruzalemi, 14 mpi bo vandaka kusolula mpi kutubila mambu yina yonso salamaka.

15 Ntangu bo vandaka kusolula mpi kutubila mambu yai, Yezu yandi mosi pusanaka mpi yantikaka kutambula ti bo, 16 kansi bo kukaka ve kuzaba yandi.+ 17 Yandi tubilaka bo nde: “Inki mambu yai beno ke solula na ntangu beno ke tambula?” Ebuna bo telamaka ti mawa yonso. 18 Muntu mosi na kati na bo, zina na yandi Kleopasi, yulaka yandi nde: “Keti nge kele munzenza mpi nge ke zingaka nge mosi na Yeruzalemi, yo yina nge me zaba ve* mambu yina me katuka kubwa kuna na bilumbu yai?” 19 Yandi yulaka bo nde: “Inki mambu?” Bo songaka yandi nde: “Mambu ya Yezu muntu ya Nazareti,+ yina vandaka mbikudi ya ngolo na bisalu mpi na bangogo na ntwala ya Nzambi mpi ya bantu yonso;+ 20 mpi mutindu bamfumu ya banganga-nzambi na beto mpi bamfumu na beto pesaka yandi na maboko ya bantu sambu bo zengila yandi nkanu ya lufwa,+ mpi tulaka yandi na zulu ya nti. 21 Kansi beto vandaka kutula kivuvu nde muntu yai vandaka muntu yina ta gulusa Izraele.+ Katula mambu yai yonso, yai kilumbu ya tatu yantika mambu yina bwaka. 22 Diaka, bankento ya nkaka na kati na beto mpi yitukisaka beto, sambu bo kwendaka na suka-suka na maziamu*+ 23 mpi sambu bo monaka ve mvumbi na yandi, bo kwisaka kutuba nde bo monaka mpi mbona-meso ya kuyituka ya bawanzio; bayina tubaka nde yandi kele na luzingu. 24 Ebuna bantu ya nkaka yina vandaka ti beto kwendaka na maziamu,*+ mpi bo monaka yo mutindu bankento yina tubaka, kansi bo monaka yandi ve.”

25 Ebuna yandi tubilaka bo nde: “O bantu ya kukonda mayele mpi yina ntima na bo ke kwikilaka ve nswalu mambu yonso yina bambikudi tubaka! 26 Keti yo vandaka ve mfunu nde Kristu kukutana ti mambu yai+ mpi kukota na nkembo na yandi?”+ 27 Mpi yantika na Moize ti na Bambikudi yonso,+ yandi tendudilaka bo mambu ya ke tadila yandi yina kele na Masonuku yonso.

28 Nsuka-nsuka bo kumaka pene-pene ya bwala yina bo vandaka kukwenda, ebuna yandi salaka bonso nde yandi ke luta. 29 Kansi bo siamisaka yandi na kubikala mpi bo tubaka nde: “Bikala ti beto, sambu nkokila me bwa mpi mpimpa ke zola kubwa.” Ebuna yandi kotaka sambu na kubikala ti bo. 30 Ntangu yandi vandaka kudia* ti bo, yandi bakaka mampa, yandi sakumunaka yo, yandi zengaka yo, mpi yandi yantikaka kupesa bo.+ 31 Ebuna meso na bo kangukaka kibeni, mpi bo zabaka yandi; kansi yandi vilaka na meso na bo.+ 32 Mpi bo tubaka bo na bo nde: “Keti bantima na beto vandaka kupela ve ntangu yandi vandaka kusolula ti beto na nzila, ntangu yandi vandaka kutendudila beto Masonuku mbote-mbote?” 33 Bo telamaka kaka na ntangu yina, mpi bo vutukaka na Yeruzalemi, ebuna bo kutaka bantumwa Kumi na Mosi mpi bantu yina vukanaka ti bo; 34 bantu yina bo kutaka tubilaka bo nde: “Ya kieleka Mfumu futumukaka, mpi yandi monanaka na Simoni!”+ 35 Ebuna bo songaka bo mambu yina salamaka na nzila mpi mutindu bo zabaka yandi ntangu yandi zengaka mampa.+

36 Ntangu bo vandaka kutubila mambu yai, yandi mosi telamaka na kati-kati na bo mpi yandi tubilaka bo nde: “Ngemba kuvanda na beno.”+ 37 Kansi sambu bo vandaka kutekita na boma, bo yindulaka nde bo vandaka kumona mpeve. 38 Yo yina yandi tubilaka bo nde: “Sambu na nki beno me kuma kisaka-saka, mpi sambu na nki beno kele na keti-keti na bantima na beno? 39 Beno tala maboko na mono ti makulu na mono, yo kele mono kibeni; beno simba mono mpi beno tala, sambu mpeve ke vandaka ve ti nsuni mpi mikwa mutindu beno ke mona mono kele na yo.” 40 Ntangu yandi tubaka mambu yai, yandi songaka bo maboko na yandi ti makulu na yandi. 41 Kansi sambu bo vandaka kukwikila kaka ve sambu bo vandaka na kiese mingi mpi vandaka kuyituka, yandi tubilaka bo nde: “Keti beno kele ti kima ya kudia awa?” 42 Bo pesaka yandi kitini ya mbisi ya masa ya kuyoka, 43 yandi bakaka yo, mpi yandi diaka yo na meso na bo.

44 Ebuna yandi tubilaka bo nde: “Yai mambu ya mono songaka beno ntangu mono vandaka ntete ti beno,+ nde mambu yonso yina bo me sonikaka sambu na mono na Nsiku ya Moize, na Bambikudi, mpi na Bankunga fwete lungana.”+ 45 Ebuna yandi kangulaka kibeni mabanza na bo sambu bo bakisa ntendula ya Masonuku,+ 46 mpi yandi tubilaka bo nde, “Bo me sonikaka nde: Kristu ta mona mpasi mpi ta telama na kati ya bafwa na kilumbu ya tatu,+ 47 mpi na zina na yandi, bo ta samuna+ na makanda yonso+—yantika na Yeruzalemi nde bantu fwete balula ntima sambu bo lolula masumu na bo.+ 48 Beno fwete vanda bambangi ya mambu yai.+ 49 Mono ke tindila beno dikabu yina Tata na mono silaka. Kansi beno, beno bikala na mbanza tii kuna beno ta baka ngolo yina ta katuka na zulu.”+

50 Ebuna yandi basisaka bo mpi nataka bo tii na Betania, ebuna yandi tombulaka maboko na yandi mpi sakumunaka bo. 51 Ntangu yandi vandaka kusakumuna bo, yandi kabwanaka ti bo mpi Nzambi tombulaka yandi na zulu.+ 52 Ebuna bo fukiminaka yandi mpi bo vutukaka na Yeruzalemi ti kiese mingi.+ 53 Bo vandaka ntangu yonso na tempelo, bo ke kumisa Nzambi.+