Kulonga

6 “Yai kele bantuma, bansiku mpi bankanu yina Yehowa Nzambi na beno me pesa sambu na kulonga beno, sambu beno zitisa yo ntangu beno ke sabuka sambu na kukota na ntoto yina beno ta baka, 2 sambu nge wa Yehowa Nzambi na nge boma mpi nge zitisa bansiku na yandi yonso ti bantuma na yandi yina mono ke pesa nge—nge, mwana na nge, mpi mutekolo na nge+—bilumbu yonso ya luzingu na nge, sambu nge zinga mingi.+ 3 O Izraele, nge fwete wa mpi kuzitisa yo mbote-mbote sambu nge toma mpi beno kuma mingi kibeni na insi yina miliki* ti bwiki kele mingi, kaka mutindu Yehowa, Nzambi ya ba-nkaka na nge, silaka nge.

4 O Izraele, wa: Yehowa Nzambi na beto kele Yehowa+ mosi kaka. 5 Nge fwete zola Yehowa Nzambi na nge na ntima na nge ya mvimba, na moyo*+ na nge ya mvimba, mpi na ngolo*+ na nge yonso. 6 Mambu yai ya mono ke songa nge bubu yai fwete vanda na ntima na nge, 7 mpi nge fwete kotisa yo na* bana na nge+ mpi kutubila yo ntangu nge ta vanda na nzo na nge, ntangu nge ta tambula na nzila, ntangu nge ta lala mpi ntangu nge ta telama na mpongi.+ 8 Kangisa yo na diboko na nge sambu na kuyibukaka yo, mpi yo fwete vanda na mbunzu+ na nge* bonso lele ya bo ke kangisaka na ntu. 9 Sonika yo na makunzi ya kielo ya nzo na nge mpi na bakielo ya mbanza na nge.

10 “Ntangu Yehowa Nzambi na nge ta kotisa nge na insi yina yandi zengaka kieleka na ba-nkaka na nge Abrahami, Izaki, mpi Yakobi na kupesa nge+—bambanza ya nene mpi ya kitoko yina nge tungaka ve,+ 11 banzo ya kufuluka ti bima ya mbote ya mutindu na mutindu yina nge salaka ve kisalu sambu na kubaka yo, mabulu ya masa yina nge timunaka ve, mpi bilanga ya vinu ti banti ya olive yina nge kunaka ve—ebuna nge dia mpi nge fuluka,+ 12 keba, kuvila ve Yehowa,+ yina basisaka nge na insi ya Ezipte, na nzo ya kimpika. 13 Nge fwete wa Yehowa Nzambi na nge boma,+ nge fwete sadila+ yandi mpi nge fwete zenga kieleka+ na zina na yandi. 14 Beno fwete landa ve banzambi ya nkaka, banzambi yonso ya bantu yina kele na nziunga na beno,+ 15 sambu Yehowa Nzambi na nge yina kele na kati-kati na nge kele Nzambi mosi ya ke lombaka nde bo kangama kaka na yandi.+ Kana ve, Yehowa Nzambi na nge ta wila nge makasi+ mpi yandi ta manisa nge na ntoto.+

16 “Beno fwete meka+ ve Yehowa Nzambi na beno, mutindu beno mekaka yandi na Massa.+ 17 Beno fwete zitisa mbote-mbote bantuma ya Yehowa Nzambi na beno, bangibusa na yandi mpi bansiku na yandi, yina yandi me songa nge na kuzitisa. 18 Nge fwete sala mambu ya lunungu mpi ya mbote na meso ya Yehowa, sambu nge toma, nge kota, mpi nge baka insi ya mbote yina Yehowa diaka ndefi na ba-nkaka na nge,+ 19 mpi nge kula bambeni na nge yonso na ntwala na nge, kaka mutindu Yehowa silaka.+

20 “Na bilumbu ke kwisa, kana mwana na nge kuyula nge nde, ‘Bangibusa, bansiku, mpi bankanu yina Yehowa Nzambi na beto songaka beno ke tendula inki?’ 21 nge ta tubila mwana na nge nde, ‘Beto kumaka bampika ya Farao na Ezipte, kansi Yehowa basisaka beto na Ezipte ti diboko ya ngolo. 22 Yo yina Yehowa landaka kutinda bidimbu ti bimangu, ya nene mpi ya ke fwaka, na Ezipte,+ na Farao mpi na bantu yonso ya nzo na yandi+ na meso na beto. 23 Ebuna yandi basisaka beto kuna sambu na kunata beto awa mpi kupesa beto insi yina yandi diaka ndefi na ba-nkaka na beto.+ 24 Yo yina Yehowa songaka beto na kuzitisa bansiku yai yonso mpi na kuwa Yehowa Nzambi na beto boma sambu na mambote na beto ya kukonda nsuka,+ na mpila nde beto landa kuzinga+ mutindu beto ke zinga bubu yai. 25 Ebuna yo ta tendula lunungu sambu na beto kana beto zitisa mbote-mbote bantuma yai yonso sambu na kumonisa bulemfu na* Yehowa Nzambi na beto, kaka mutindu yandi songaka beto.’+