Ezekiele

45 “‘Ntangu beno ke kabula insi bonso dikabu,+ beno fwete pesa na Yehowa kitini mosi ya santu ya beno ta baka na insi yina bonso makabu.+ Nda na yo fwete vanda maboko* 25 000, nene na yo maboko 10 000.+ Kisika na yo yonso* ta vanda kitini ya santu. 2 Na kati na yo ta vanda ti kitini mosi ya ntoto sambu na kisika ya santu yina bandambu na yo yonso ta vanda kiteso mosi, nda na yo maboko 500 mpi nene na yo maboko 500,*+ mpi yo ta vanda ti banseke ya kudisa bitwisi maboko 50 na konso ndambu.+ 3 Na bantalu yina ya kutesa, nge fwete tesa nda 25 000 mpi nene 10 000, ebuna na kati na yo ta vanda kisika ya santu, kima mosi ya kuluta santu. 4 Yo ta vanda kitini ya ntoto ya santu sambu na banganga-nzambi,+ bansadi ya kisika ya santu, bayina ke pusanaka sambu na kusadila Yehowa kisalu.+ Yo ta vanda kisika sambu na banzo na bo mpi kisika mosi ya santu sambu na tempelo.

5 “‘Sambu na Balevi, bansadi ya tempelo, kitini ya ntoto ta vanda nda maboko 25 000 mpi nene maboko 10 000,+ mpi basuku 20 ya kudila madia*+ ta vanda ya bo.

6 “‘Na kitini ya ntoto ya mbanza yina, beno fwete pesa kisika yina ta vanda nda maboko 25 000 (ya me fwanana ti makabu ya santu) mpi nene maboko 5 000.+ Yo ta vanda sambu na nzo ya mvimba ya Izraele.

7 “‘Sambu na mfumu, yo ta vanda ti kitini ya ntoto na bandambu yonso zole ya makabu ya santu mpi ya kisika yina bo pesaka sambu na mbanza. Yo ta vanda pene-pene ya makabu ya santu mpi ya kitini ya ntoto ya mbanza. Yo ta vanda na ndambu ya westi ti na ndambu ya esti. Nda na yo katuka na ndilu ya ndambu ya westi tii na ndilu ya ndambu ya esti ta vanda kiteso mosi ti kitini ya ntoto sambu na konso dikanda.+ 8 Kitini yina ya ntoto ta kuma dikabu na yandi na Izraele. Bantu na mono yina kele bamfumu ta niokula diaka ve bantu na mono,+ mpi bo ta pesa kitini ya ntoto yina na nzo ya Izraele na kutadila makanda na bo.’+

9 “Yehowa Mfumu ya Kuluta Nene me tuba nde: ‘Bamfumu ya Izraele, beno me sala mambi mingi kibeni!’

“‘Beno bika nku na beno mpi kuniokula bantu, ebuna beno sala mambu ya mbote mpi ya lunungu.+ Beno yambula kubotula bantoto ya bantu na mono,’+ Yehowa Mfumu ya Kuluta Nene muntu me tuba. 10 ‘Beno fwete sadila bakilo ya sikisiki, efa* ya sikisiki, mpi bati* ya sikisiki.+ 11 Yo fwete vanda ti ntalu ya sikisiki sambu na efa ti bati. Bati fwete vanda ti ndambu mosi na kati ya bandambu kumi ya homere* na kati, mpi efa fwete vanda ti ndambu mosi na kati ya bandambu kumi ya homere na kati. Bo ta sadilaka homere sambu na kutesa bima. 12 Shekele*+ fwete vanda bagera* 20. Mpi bashekele 20 yika bashekele 25 yika mpi bashekele 15 ta pesa kimvuka ya mane* mosi sambu na beno.’

13 “‘Yai kele makabu ya beno fwete pesa: ndambu mosi na kati ya bandambu sambanu ya efa mosi na konso homere ya ble mpi ndambu mosi na kati ya bandambu sambanu ya efa mosi na konso homere ya orze. 14 Bo fwete tesa kiteso ya mafuta na bati. Bati kele ndambu mosi na kati ya bandambu kumi ya kore* mosi, mpi ba-bati kumi kele homere mosi, sambu ba-bati kumi kele homere mosi. 15 Bo fwete baka na kimvuka ya mameme ya bitwisi ya Izraele dimeme mosi na kati ya mameme 200. Mameme yai ta vanda sambu na dikabu ya mbuma,+ dikabu ya mvimba ya kuyoka,+ mpi bimenga ya kinduku,+ sambu na kufika masumu sambu na bantu,’+ Yehowa Mfumu ya Kuluta Nene muntu me tuba.

16 “‘Bantu yonso ya insi ta pesa makabu yai+ na mfumu na Izraele. 17 Kansi mfumu muntu ta vanda ti kisalu ya kupesa makabu ya mvimba ya kuyoka,+ dikabu ya mbuma,+ dikabu ya malafu na bansungi ya bankinsi,+ bangonda ya mpa, Bisabatu,+ mpi bankinsi yonso ya bo me tulaka ya nzo ya Izraele.+ Yandi muntu ta pesa dikabu sambu na disumu, dikabu ya mbuma, dikabu ya mvimba ya kuyoka, mpi bimenga ya kinduku, sambu na kufika masumu sambu na nzo ya Izraele.’

18 “Yehowa Mfumu ya Kuluta Nene me tuba nde: ‘Na ngonda ya ntete, na kilumbu ya ntete ya ngonda, nge fwete baka mwana-ngombe ya bakala ya kukonda kifu na kimvuka ya bangombe, mpi nge fwete katula masumu na kisika ya santu sambu na kukumisa yo bunkete.+ 19 Nganga-nzambi ta baka ndambu ya menga ya dikabu sambu na disumu mpi ta tula yo na zulu ya dikunzi ya kielo ya tempelo,+ na binkonko yonso iya ya dibaya ya nziunga ya mesa-kimenga ya me basika na lweka, mpi na zulu ya dikunzi ya kielo ya nene ya kibansala ya kati. 20 Yina kele mambu ya nge ta sala na kilumbu ya nsambwadi ya ngonda sambu na konso muntu yina me sala masumu kukonda kukana to kukonda kuzaba;+ mpi beno fwete fika masumu sambu na tempelo.+

21 “‘Na ngonda ya ntete, na kilumbu ya ¹⁴ ya ngonda, beno ta sala nkinsi ya Paki.+ Beno fwete dia mampa ya kukonda levire bilumbu nsambwadi.+ 22 Na kilumbu yina mfumu ta pesa mwana-ngombe ya bakala bonso dikabu sambu na disumu, sambu na mambote na yandi mosi mpi sambu na mambote ya bantu yonso ya insi.+ 23 Na bilumbu nsambwadi yina ya nkinsi, yandi ta pesa bana-bangombe nsambwadi ya babakala mpi mameme nsambwadi ya babakala ya kukonda kifu bonso dikabu ya mvimba ya kuyoka na Yehowa, konso kilumbu ya bilumbu yina nsambwadi,+ mpi nkombo ya bakala konso kilumbu bonso dikabu sambu na disumu. 24 Yandi fwete pesa mpi bonso dikabu ya mbuma efa mosi sambu na konso mwana-ngombe ya bakala mpi efa mosi sambu na konso dimeme ya bakala, mpi hini* mosi ya mafuta sambu na konso efa.

25 “‘Na ngonda ya nsambwadi, na kilumbu ya ¹⁵ ya ngonda, na nsungi ya bilumbu nsambwadi ya nkinsi,+ yandi fwete pesa makabu ya mutindu mosi: dikabu sambu na disumu, dikabu ya mvimba ya kuyoka, dikabu ya mbuma, mpi mafuta.’”