Ezekiele

38 Ndinga ya Yehowa kwisilaka mono diaka nde: 2 “Mwana ya muntu, tula luse na nge na ndambu ya Gogi ya insi ya Magogi,+ mfumu ya bamfumu* ya Mesheki ti ya Tubale,+ mpi bikula mambu ya mbi sambu na yandi.+ 3 Tuba nde, ‘Yehowa Mfumu ya Kuluta Nene me tuba nde: “Mono ke nwanisa nge, O Gogi, mfumu ya bamfumu* ya Mesheki mpi ya Tubale. 4 Mono ta balula nge mpi ta tula bandobo na bambwanga na nge+ mpi mono ta basisa nge ti basoda na nge yonso,+ bampunda na nge mpi bantu yina ke tambusaka bampunda, bo yonso ti bilele ya lukumu, kimvuka mosi ya nene ti bitaninu ya nene mpi bitaninu ya fioti,* bo yonso ti bambele ya bitumba; 5 Persia, Etiopia, ti Puti+ kele ti bo, bo yonso ti bitaninu ya fioti mpi bampu; 6 Gomere ti basoda na yo yonso, nzo ya Togarma+ katuka na bisika ya kuluta ntama na nordi, kumosi ti basoda na yo yonso—bantu mingi kele ti nge.+

7 “‘“Beno yilama, beno kudibongisa, nge ti basoda na nge yonso yina me vukana ti nge, ebuna nge ta vanda komanda* na bo.

8 “‘“Mono ta tudila nge dikebi* na nima ya bilumbu mingi. Na kitini ya nsuka ya bamvula, nge ta kota na ngolo na insi yina bo me katulaka bantu na yo na bampasi yina mbele ya bitumba nataka mpi me vutulaka bo, bayina bo me katulaka na kati ya bantu mingi sambu na kuvukisa bo na bangumba ya Izraele, yina bikalaka ya kubeba ntangu ya nda. Bo katulaka bantu ya insi yai na kati ya bantu mpi vutulaka bo, ebuna bo yonso ke zinga na lutaninu.+ 9 Nge ta kwisila bo bonso mupepe ya ngolo, mpi nge ta fika insi yina matuti, nge ti basoda na nge yonso mpi bantu mingi yina kele ti nge.”’

10 “Yehowa Mfumu ya Kuluta Nene me tuba nde: ‘Na kilumbu yina, bangindu ta kwisila nge na ntima, ebuna nge ta yindula diambu mosi ya mbi. 11 Nge ta tuba nde: “Mono ta kota na ngolo na insi yina kele ti babwala ya kukonda kutanina.*+ Mono ta kwisila bantu yina ke zinga na lutaninu, kukonda muntu ya kuyangisa bo, bo yonso ke zinga na babwala yina kele ve ya kutanina na bibaka, na banti, to na bakielo.” 12 Lukanu na nge kele ya kubaka bima mingi mpi ya kubotula bima na bitumba, sambu na kunwanisa bisika ya kubeba yina bantu ke zinga ntangu yai+ mpi bantu ya bo me baka na kati ya makanda+ mpi ya bo me vukisa diaka, bayina ke fulusa kimvwama mpi bima,+ bayina ke zinga na kati-kati ya ntoto.

13 “‘Sheba+ ti Dedani,+ bantu ya mumbongo ya Tarsisi+ mpi basoda na yo yonso* ta tubila nge nde: “Keti nge ke kota na ngolo sambu na kubaka bima mingi mpi kubotula bima mingi? Keti nge me vukisa basoda na nge sambu na kubaka arza mpi wolo, sambu na kubaka kimvwama mpi bima, sambu na kubotula bima mingi kibeni?”’

14 “Yo yina, mwana ya muntu, bikula mpi tubila Gogi nde, ‘Yehowa Mfumu ya Kuluta Nene me tuba nde: “Na kilumbu yina, ntangu bantu na mono Izraele ta zinga na ngemba, keti nge ta zaba yo ve?+ 15 Nge ta katuka na kisika na nge, na bisika ya kuluta ntama ya nordi,+ mpi nge ta kwisa ti bantu mingi yina kele ti nge, bo yonso na zulu ya bampunda, kimvuka mosi ya nene, basoda mingi.+ 16 Bonso matuti ya ke fika insi, nge ta kwisa kunwanisa bantu na mono Izraele. Na kitini ya nsuka ya bilumbu, mono ta nata nge sambu na kunwanisa insi na mono+ mpidina makanda ta zaba mono ntangu mono ta kudisantisa na nzila na nge na meso na bo, O Gogi.”’+

17 “Yehowa Mfumu ya Kuluta Nene me tuba nde: ‘Keti nge kele ve muntu yina mono tubilaka na bilumbu ya ntama na nzila ya bansadi na mono bambikudi ya Izraele, bayina bikulaka bamvula mingi nde mono ta nata nge sambu na kunwanisa bo?’

18 “‘Na kilumbu yina, kilumbu yina Gogi ta kota na insi ya Izraele,’ Yehowa Mfumu ya Kuluta Nene muntu me tuba, ‘nganzi na mono ya ngolo ta pela.+ 19 Na kikesa na mono, na nganzi na mono ya ngolo, mono ta tuba; mpi na kilumbu yina ntoto ta nikana ngolo na insi ya Izraele. 20 Sambu na mono, bambisi ya nzadi-mungwa, bandeke ya zulu, bambisi ya mfinda, bambisi yonso ya ke tambulaka divumu na ntoto, mpi bantu yonso ya kele na zulu ya ntoto ta tekita, ebuna bangumba ta bwa, matadi ta bwa,+ mpi konso kibaka ta bwa na ntoto.’

21 “‘Mono ta binga mbele ya bitumba sambu na kunwanisa yandi na bangumba na mono yonso,’ Yehowa Mfumu ya Kuluta Nene muntu me tuba. ‘Mbele ya bitumba ya konso muntu ta nwanisa mpangi na yandi mosi.+ 22 Mono ta sambisa yandi* na nzila ya kipupa+ mpi ya kutiamuna menga; mono ta nokisa mvula mosi ya ngolo, mvula ya matadi,+ tiya,+ mpi sufre+ na zulu na yandi, na zulu ya basoda na yandi mpi na zulu ya bantu mingi yina kele ti yandi.+ 23 Mono ta kudikumisa kibeni, mono ta kudisantisa, mpi mono ta sala nde makanda mingi kuzaba mono; ebuna bo ta zaba nde mono kele Yehowa.’