Bazuzi

4 Kansi na nima, ntangu Ehudi fwaka, bana ya Izraele salaka diaka mambu ya mbi na meso ya Yehowa.+ 2 Yo yina Yehowa tekaka bo na maboko ya Yabini ntotila ya Kanana,+ yina vandaka kuyala na Asore. Mfumu ya basoda na yandi vandaka Sisera, yina vandaka kuzinga na Arosheti+ ya makanda.* 3 Bana ya Izraele didilaka Yehowa,+ sambu Yabini* vandaka ti bapusu-pusu ya bitumba 900 ya bibende,*+ mpi yandi niokulaka bana ya Izraele+ ngolo kibeni bamvula 20.

4 Debora mbikudi mosi ya nkento,+ nkento ya Lapidoti, vandaka kusambisa Izraele na ntangu yina. 5 Yandi vandaka ti kikalulu ya kuvanda na nsi ya diba ya Debora na kati-kati ya Rama+ ti Betele,+ na ntoto ya bangumba ya Efrayimi; bana ya Izraele vandaka kutombuka na Debora sambu na lusambisu. 6 Yandi tindaka bantu na kubinga Baraki+ mwana ya Abinoami na Kedeshi-naftali+ mpi tubilaka yandi nde: “Keti Yehowa Nzambi ya Izraele me tuba ve mambu yai? ‘Kwenda* na Ngumba ya Tabore, mpi nata babakala 10 000 ya Naftali mpi ya Zebuloni. 7 Mono ta kwisa kunatila nge Sisera, mfumu ya basoda ya Yabini ti bapusu-pusu na yandi ya bitumba mpi basoda na yandi na masa* ya Kishoni,+ ebuna mono ta pesa yandi na maboko na nge.’”+

8 Yo yina Baraki tubilaka Debora nde: “Kana nge kwenda ti mono, mono ta kwenda, kansi kana nge kwenda ve ti mono, mono ta kwenda ve.” 9 Yo yina, Debora tubaka nde: “Mono ta kwenda kibeni ti nge. Kansi bitumba yina nge ke kwenda ta natila nge ve nkembo, sambu Yehowa ta pesa Sisera na maboko ya nkento.”+ Ebuna Debora telamaka mpi kwendaka ti Baraki na Kedeshi.+ 10 Baraki bingaka Zebuloni ti Naftali+ na Kedeshi, mpi babakala 10 000 landaka yandi. Debora mpi tombukaka ti yandi.

11 Kisi ve, Hebere muntu ya Keni kabwanaka ti bantu ya Keni,+ bana ya Obabi, bokilo ya Moize ya bakala,+ mpi tenta na yandi vandaka ya kutedimisa pene-pene ya nti ya nene na Saananimi, yina kele pene-pene ya Kedeshi.

12 Bo songaka Sisera nde Baraki mwana ya Abinoami me tombuka na Ngumba ya Tabore.+ 13 Na mbala mosi, Sisera vukisaka bapusu-pusu na yandi yonso ya bitumba—bapusu-pusu 900 ya bibende*—mpi basoda yonso yina vandaka ti yandi katuka na Arosheti ya makanda sambu na kukwenda tii na masa* ya Kishoni.+ 14 Ebuna Debora tubilaka Baraki nde: “Telama, sambu yai kele kilumbu yina Yehowa ta pesa Sisera na maboko na nge. Keti Yehowa ke basika ve na ntwala na nge?” Baraki katukaka na Ngumba ya Tabore mpi kulumukaka ti bantu 10 000 yina vandaka kulanda yandi. 15 Ebuna Yehowa salaka nde Sisera ti bapusu-pusu na yandi yonso ya bitumba, mpi basoda yonso kukuma kisaka-saka+ na ntwala ya mbele ya bitumba ya Baraki. Nsuka-nsuka Sisera tulukaka na pusu-pusu na yandi mpi tinaka na makulu. 16 Baraki landaka bapusu-pusu ya bitumba mpi basoda tii na Arosheti ya makanda. Basoda yonso ya Sisera fwaka na mbele ya bitumba; ata soda mosi ve bikalaka.+

17 Kansi Sisera tinaka na makulu na tenta ya Yaele+ nkento ya Hebere+ muntu ya Keni, sambu Yabini+ ntotila ya Asore ti nzo ya Hebere muntu ya Keni vandaka na ngemba. 18 Ebuna Yaele basikaka sambu na kukutana ti Sisera mpi tubilaka yandi nde: “Kwisa kukota, mfumu na mono, kwisa kukota awa. Kuwa boma ve.” Yo yina yandi kwendaka kukota na kati ya tenta ya Yaele, mpi Yaele fikaka yandi bulanketi. 19 Ebuna Sisera tubilaka Yaele nde: “Pardo, pesa mono ndambu ya masa ya kunwa, sambu mono ke wa nzala ya masa.” Yaele kangulaka dibungu ya mpusu ya mbisi yina vandaka ti miliki* mpi pesaka yandi,+ na nima yandi fikaka yandi diaka. 20 Sisera tubilaka yandi nde: “Telama na munoko ya tenta, mpi kana muntu kukwisa mpi kuyula nge nde, ‘Keti muntu kele awa?’ tuba nde, ‘Ve!’”

21 Kansi Yaele nkento ya Hebere bakaka pike ya tenta ti marto na diboko. Ebuna ntangu Sisera lalaka mpongi ya ngolo mpi lembaka kibeni, yandi pusanaka malembe-malembe pene-pene na yandi mpi kotisaka yandi pike na ntu mpi bulaka yo, yo kotaka tii na ntoto, ebuna yandi fwaka.+

22 Baraki kwendaka kuna ntangu yandi vandaka kulanda Sisera, ebuna Yaele basikaka sambu na kukutana ti yandi mpi tubaka nde: “Kwisa mpi mono ta songa nge muntu yina nge ke sosa.” Baraki kotaka ti yandi mpi monaka Sisera me lala na ntoto ya kufwa, ti pike ya tenta ya kukotisa na ntu na yandi.

23 Na kilumbu yina, Nzambi bedisaka Yabini ntotila ya Kanana na ntwala ya bantu ya Izraele.+ 24 Diboko ya bantu ya Izraele vandaka kaka kukuma kilo mingi na zulu ya Yabini ntotila ya Kanana,+ tii kuna bo fwaka Yabini ntotila ya Kanana.+