Yeremia

37 Ebuna ntotila Sidikiya+ mwana ya Yoziasi yantikaka kuyala na kisika ya Konia*+ mwana ya Yehoyakimi, sambu Nebukadenezare* ntotila ya Babilone tulaka yandi ntotila na ntoto ya Yuda.+ 2 Kansi yandi ti bansadi na yandi mpi bantu ya insi yina waka ve mambu yina Yehowa tubaka na nzila ya mbikudi Yeremia.

3 Ebuna ntotila Sidikiya tindaka Yehukale+ mwana ya Shelemia mpi Sefania+ mwana ya nganga-nzambi Maaseya na mbikudi Yeremia na kutuba nde: “Pardo samba Yehowa Nzambi na beto sambu na beto.” 4 Yeremia vandaka kutambula na kimpwanza na kati ya bantu, sambu bo kotisaka yandi ntete ve na boloko.+ 5 Ntangu yai basoda ya Farao katukaka na Ezipte,+ mpi bantu ya Kaldea yina ziungaka Yeruzalemi waka nsangu na bo. Yo yina, bo bikisaka Yeruzalemi.+ 6 Ebuna ndinga ya Yehowa kwisilaka mbikudi Yeremia nde: 7 “Yehowa Nzambi ya Izraele ke tuba nde, ‘Yai mambu yina beno fwete tubila ntotila ya Yuda, yina me tinda beno sambu na kuyula mono nde: “Tala! Basoda ya Farao yina ke kwisa sambu na kusadisa beno fwete vutuka na insi na bo, Ezipte.+ 8 Mpi bantu ya Kaldea ta kwisa kuvutuka, bo ta nwanisa mbanza yai, bo ta botula yo, mpi bo ta yoka yo tiya.”+ 9 Yehowa ke tuba nde, “Beno kudikusa ve* nde, ‘Bantu ya Kaldea ta yambula kibeni kunwanisa beto,’ sambu bo ta kwenda ve. 10 Ata kana beno fwa basoda yonso ya bantu ya Kaldea yina ke nwanisa beno mpi kaka bantu na bo ya me lwala kubikala, bantu yina ta telama kibeni na batenta na bo mpi ta yoka mbanza yai tiya.”’”+

11 Ntangu basoda ya bantu ya Kaldea bikisaka Yeruzalemi sambu na basoda ya Farao,+ 12 Yeremia katukaka na Yeruzalemi mpi kwendaka na ntoto ya Benyamini+ sambu na kubaka dikabu na yandi kuna na kati ya bantu na yandi. 13 Kansi ntangu yandi kumaka na Kielo ya Benyamini, kapita yina vandaka kukengila, zina na yandi Yiriya mwana ya Shelemia mwana ya Hanania, kangaka mbikudi Yeremia mpi tubaka nde: “Nge ke tina sambu na kukwenda na bantu ya Kaldea!” 14 Kansi Yeremia tubaka nde: “Yo kele ve kieleka! Mono ke tina ve sambu na kukwenda na bantu ya Kaldea.” Ata mpidina, yandi wilaka ve Yeremia. Yo yina Yiriya kangaka Yeremia mpi nataka yandi na bamfumu. 15 Bamfumu wilaka Yeremia+ makasi ya ngolo, mpi bo bulaka yandi, ebuna bo tulaka yandi na boloko*+ na nzo ya sekretere Yehonatani, nzo yina bo kumisaka boloko. 16 Bo tulaka Yeremia na boloko mosi ya mudidi ya nsi ya ntoto,* na basuku yina ludi na yo vandaka ya kufumbama, mpi yandi bikalaka kuna bilumbu mingi.

17 Ebuna ntotila Sidikiya tindaka bantu na kubinga Yeremia, mpi ntotila yulaka yandi bangiufula na kinsweki na nzo na yandi.*+ Yandi yulaka nde, “Keti kele ti ndinga ya me katuka na Yehowa?” Yeremia tubaka nde, “Ee!” mpi yandi yikaka nde, “Bo ta pesa nge na maboko ya ntotila ya Babilone!”+

18 Yeremia tubilaka mpi ntotila Sidikiya nde: “Inki disumu mono me sala na ntwala na nge, na ntwala ya bansadi na nge, mpi na ntwala ya bantu yai, sambu beno tula mono na boloko? 19 Ntangu yai, wapi bambikudi na beno yina vandaka kubikudila beno nde, ‘Ntotila ya Babilone ta kwisa ve kunwanisa beno mpi insi yai’?+ 20 Ntangu yai, pardo wa, O mfumu na mono ntotila. Pardo, ndima mambu ya mono ke lomba sambu nge wila mono mawa. Kuvutula mono diaka ve na nzo ya sekretere Yehonatani,+ kana ve mono ta fwa kuna.”+ 21 Yo yina, ntotila Sidikiya songaka bantu na kutula Yeremia na boloko na Kibansala ya Bankengidi,+ mpi konso kilumbu bo vandaka kupesa yandi dimpa mosi ya bala-bala ya bantu yina ke salaka mampa+ tii kuna mampa yonso manaka na mbanza.+ Mpi Yeremia bikalaka na Kibansala ya Bankengidi.